uMataayi 24

UYeesu akukuvhwa izya kumongolwa iNyumba iMfinjile

(uMaaliko 13:1-2; uLuuka 21:5-6)

1UYeesu ahafuma nu kwepa pa Nyumba iMfinjile. Lwe akufuma avhasundikwa vhaakwe vhahasogola, inga vhamulolesye iNyumba iMfinjile ni zyamwavho zye ziyizyunguluuye vwe zizengwilwe. 2Ileelo uYeesu ahavhavhuuzya ahati, “Mukuzilola zyonti izi? Nalyoli nkuvhavhuuzya kuuti, te lihasyale ivhwe naalimo pamwanya pa lyamwavho. Amavhwe gonti igo galimongolwa!#24:2 Amavhwe gonti igo galimongolwa! INyumba iMfinjile yámongoliilwe na Vhaluumi umwaha uwa 70 kufuma pe uYeesu ápafwilwe.”

UYeesu akusambiilizya izya mayimba aga ku vhusililishilo

(uMaaliko 13:3-13; uLuuka 21:7-19)

3Pe uYeesu ahazuvha pi igamba ilya Mazayituuni nu kutendama penepo. Lwe atendama, avhasundikwa vhaakwe vhahasogola kwa Yeesu kukwilu vhahati, “Tuvhuuzye, zyonti izyo zilifumila lii? Havhili shilolesyo vhuli she shilitulolesya kwinza kwaho nu vhusililishilo uvhwa nsi?” 4UYeesu ahavhaamula ahati, “Muvhanje minso, inga vhatahinze vhavhahopenkanye! 5Nkuvhavhuuzya vhwevhulo, mwe pe avhantu avhinji vhaliyinza kwi izina lyane, vhaliiti, ‘Ine ne ne Chilisiti!’ Vhalivhahopenkanya avhantu avhinji. 6Ahavhaliilizyo iho muliyivwaga inkoolo izya vhulugu ni nongwa izya vhulugu, mutahinze musaaje. Poosye zivhe vhuli, izyo zikwanzilwa kufumila, ileelo ahavhaliilizyo aheene aha kumpeleela haliivha hashiili. 7Insi yililwanga ni nsi iyamwavho, vhwope uvhumwene vhulilwanga nu vhumwene uvhwamwavho. Havhili kuliivha inzala ni visumbi uku nuukwo. 8Vwonti ivwo viliivha vhwandilo vhweleele uvhwa havhaliilizyo aha kumpeleela, inza vwe uvhuvhaavi vhwe vhwandilo uvhwa mwantanda kupaapa.

9“Ahavhaliilizyo iho, avhantu avha mu nsi zyonti vhalivhavitilwaga, vhalivhalemaga nu kuvhayimvwa nu kuvhagoga, mwe pe mukundandata ine. 10Pe avhantu avhinji vhaliileha kundandata. Vhaliyanilanaga nu kuviitana vhuuvho vheeka. 11Havhili avhakuvhwi avhinji avha ilenga vhalifumila, vhoope vhalivhahopenkanya avhantu avhinji. 12Havhili, mwe pe uvhuvhiivhi vhuliivula nkaani, avhantu avhinji vhaliileha kuvhakunda avhamwavho. 13Ileelo we alijimbiilila kufishila ku vhusililishilo, we aliipokwa. 14Havhili Izwi iLyinza ilya vhumwene uvhwa Mulungu lilikumuha mu nsi zyonti, inga livhe vhuhomeshezi ku vhantu vhonti. Ipo pe uvhusililishilo uvhwa nsi vhuliyinza.”

Ahavhaliilizyo aha mayimba amapiti

(uMaaliko 13:14-23; uLuuka 21:20-24)

15“Ahavhaliilizyo iho mulishilola ishintu isha kuviisya nu kuhandamania shimiliiye aPafinjile.#24:15 uDaaniyeeli 9:27; 11:31; 12:11 Ishintu isho she áshiyanzile umukuvhwi uDaaniyeeli. Umuntu wonti we akuvhaazya amazwi iga, agamanyinsanyaaje. 16Pe vhe vhali mu shigavho isha nsi isha Yudeeya, vhahashimbililaje mu magamba. 17Umuntu we ali pamwanya pa nyumba atahiishe nu kwinjila mu nyumba, inga anyatule ivintu vwakwe muumwo, nkandi ayiishe nu kushimbila. 18Woope we ali ku magunda, atahagalushe mwisinda kunyatula umwenda waakwe pe avhiisile. 19Vhasheela avhantanda vhe vhaliivha pa vhumwamu na vhe vhaliyonsyaga insiku izyo! 20Ishi mupuutaje, inga kushimbila kwinyu kutahinze kuvhe ahavhaliilizyo ahavhiivhi aha lupepu, poosye lisiku ilya Sabaato.#24:20 Ahavhaliilizyo ahavhiivhi aha lupepu, poosye lisiku ilya Sabaato kwe kuuti yiliivha shigomu nkaani kushuula nu kulondola ishaakulya nu vhukaato ahavhaliilizyo aha lupepu. Kulandatana ni ndajizyo izya Moose, isiku ilya Sabaato aVhayuuda vhatahitishilwaga kushuula kushila uvhutali uvhwa kilomiita yooka. 21Nkuyanga vhwevhulo, mwe pe insiku izyo kuliivha amayimba amapiti nkaani ge gatafumiiye naalumo kufuma pe uMulungu ápezile insi kufishila ileelo. Havhili amayimba igo te gahafumile naalumo. 22Inga uMulungu atazivhiihaje insiku izyo izya mayimba kuvha nyinsi, umuntu nuumo we aamile apokwaje. Ileelo kuzya vhasaavhulwa vhaakwe, uMulungu alizivhiiha insiku izyo kuvha nyinsi.

23“Ahavhaliilizyo iho, inga umuntu akuvhavhuuzya kuuti, ‘Yeenya, uChilisiti ali ipa,’ poosye kuuti, ‘Ali kuula!’ Mutahinze mwitishe. 24Yeenya, vhalifumila avhantu vhe vhakuluma ilenga kuuti, ine ne Chilisiti nu kuuti ne mukuvhwi. Vhalivhomba ivilolesyo ivipiti havhili ivwa kusukumizya, inga vhavhahopenkanye avhantu, inga zingavha poosye na vhasaavhulwa avha Mulungu. 25Muvhanje minso, ine navhasoha nziila she zishiili kufumila. 26Pe ishi, inga vhakuvhavhuuzya vhakuti, ‘Yeenya, uChilisiti ali kwi ilaala kuula!’ Mutahinze musogole kwenya. Poosye inga vhakuti, ‘Yeenya, ali kwi iziiho!’ Mutahinze mwitishe. 27Navhavhuuzya izyo, mwe pe kwinza kwane ine ne Mwana wa Aadamu, kuliivha kwa kwitushizya inza ulumesyo ulwa mvula intalala lwe lukufuma kuvhutukulo na havhaliilizyo hanaaho lukufiha kuvhuswelo. 28Pe pali ishihanu she shifuuye pe amavhimba gakuvhungaana.”#24:28 Ahayanjile iha kwe kuuti, lwe uYeesu akwinza mu vhushindamu vhwakwe, avhantu vhonti vhalimulola inza vwe inga vhagalola amavhimba gavhungiine pooka, vhakumanya vhweleele kuuti paala pali ishihanu she shifuuye.

Kwinza ukwa Mwana wa Aadamu

(uMaaliko 13:24-27; uLuuka 21:25-28)

29“Naluvhiilo lwe insiku izyo izya mayimba zyatuuha,

‘Izuvha lilivhiishilwa ishiisi,

nu mwezi te wuhaahozye uvhuzelu vhwakwe,

zyope inzota zililagala kufuma kumwanya.

Havhili ivintu ivwa kumwanya viliyingaana.’#24:29 uYisaayi 13:10; 34:4; uYooweli 2:10

30“Ahavhaliilizyo iho ishilolesyo isha ine ne Mwana wa Aadamu shililoleha kumwanya. Pe avhantu vhonti avha mu nkolo izya mu nsi zyonti vhalitaliha kuloosya kwi lyoga. Lwe nkwinza, avhantu vhonti vhalindola mu mavhingo na maha nu vhushindamu uvhupiti. 31Pe ndivhasonteelezya avhahavhizya vhaane ni isaji lye lilikuutaga kwi izwi ipiti. Vhalivhavhungaaniha avhasaavhulwa vhonti avha Mulungu kufuma imbazu zyonti zine izya nsi, kwandila uluvhazu ulwa kwanda kwe insi yanzite, kufishila kwe yisiliiye.”

Ishiholanyo isha ituvhu

(uMaaliko 13:28-31; uLuuka 21:29-33)

32UYeesu ahajendeelela kuyanga, ahati, “Musambiilile ishiholanyo isha ituvhu, ahavhaliilizyo he mwalola insamba zyanda kuvha nyoolo nu kulemba amatundu, naluvhiilo mukumanya kuuti ishisiku shipalamiiye. 33Vhwevhulo, niimwe lwe mukuzilola izyo zikuvhombeha, pe muhamanyaje kuuti ne Mwana wa Aadamu mpalamiiye nkaani kwinza. 34Nalyoli nkuvhavhuuzya kuuti, avhantu avha havhaliilizyo iha te vhatuushe she izi zyonti zishiili kulunjiha. 35Imwanya ni nsi viliyeepa, ileelo poosye zivhe vhuli amazwi gaane galilunjiha.”

Ataliipo we amanyile isiku na havhaliilizyo

(uMaaliko 13:32-37; uLuuka 12:35-40; 17:26-36)

36“Ileelo izya isiku liila na havhaliilizyo haala, ataliipo umuntu we amanyile, poosye avhahavhizya vhe vhali ku mwanya, poosye uMwana, nkandi we Taata weeka vhweleele. 37Inza vwe zyámile insiku izya Noowa, vwe ziliivha ahavhaliilizyo aha kugaluha ine ne Mwana wa Aadamu. 38Insiku izyo lwe intalala yishiili kwinza, avhantu vhahalyanga nu kumwela, vhahimalaga nu kwimalwa, kufishila isiku liila lye uNoowa áyinjiiye mu mbogooso. 39Avhantu ivho vhatámanyile naashimo she shingafumila mwilongolela, kufishila pe amahavha gavhalovwa vhonti. Vhwevhulo, vwe kuliivha kwinza kwane ne Mwana wa Aadamu. 40Ahavhaliilizyo iho, avhantu vhavhili vhaliivha ku mugunda, ileelo wumo alinyatulwa, uwamwavho alisyala. 41Havhili avhantanda vhavhili vhaliivha vhakusya pa lwala, ileelo wumo alinyatulwa, uwamwavho alisyala. 42Pe ishi, muvhanje minso, mwe pe mutamanyile isiku lye ne Mwene wiinyu ndiyinza. 43Ileelo mumanye ahinza kuuti uwa nyumba inga amanyile ahavhaliilizyo he umwivha akwinza, nkandi akuguulila, inga amudinde atahapankule inyumba yaakwe. 44Pe ishi, niimwe muyisenganyaaje ahavhaliilizyo honti, mwe pe ne Mwana wa Aadamu ndiyinza ahavhaliilizyo he mutasuvhiiye.”

Ishiholanyo isha mwimiilizi umutungamu

(uLuuka 12:41-48)

45UYeesu ahavhavhuziilizya ahati, “Pe ishi, wu naanu umuvhomvi umutungamu, havhili uwa njeele? Uyo we umwene waakwe alimuvhiiha kuvha mwimiilizi uwa vhamwavho, alivhapanga ishaakulya ahavhaliilizyo he hakwanzilwa. 46Alosiitwe umuvhomvi uyo we lwe umwene waakwe akuvhwela kufuma kwe aashuuye, akumwaga akuvhomba zye ámulajiziizye. 47Nalyoli nkuvhavhuuzya kuuti, umwene uyo alimuvhiiha umuvhomvi uyo kuvha mwimiilizi uwa vintu vwakwe vwonti. 48Ileelo inga umuvhomvi uyo umuvhiivhi, asiivha mu mwoyo waakwe kuuti, ‘Umwene waane ahaavha kuvhwela,’ 49nu kutaliha kuvhahoma avhavhomvi avhamwavho nu kulya nu kumwela pooka na vhashimwela, 50umwene waakwe alivhwela isiku na havhaliilizyo he umuvhomvi waakwe atasuvhiiye. 51Pe aliimupa isunde ipiti nu kumuvhiiha pooka na vhashifumbo. Ukwo kwe vhalikuutaga nu kuyimba nkaani.”

Currently Selected:

uMataayi 24: nih

Highlight

Copy