uLuuka 5

UYeesu akuvhasaavhula avhasundikwa avha kwanda

(uMataayi 4:18-22; uMaaliko 1:16-20)

1Isiku limo, uYeesu áyimiliiye pa luvhazu pa sumbi uwa Jenesaleeti,#5:1 Usumbi uwa Jenesaleeti: Ili lizina ilyamwavho ilya sumbi uwa Galilaaya. ahasambilizyaga izwi ilya Mulungu. Ivhungaana ilya vhantu lihasejelelaga kumutejeelezya, pe lihavha likumuvijiilizya. 2UYeesu ahagalola amavhooti gavhili pa luvhazu pa sumbi. Avhavuvhi avha nswi vhe vhahaata mavhooti igo vhatáliipo, mwe pe vháamile kwozya inyeelo zyavho. 3UYeesu ahinjila mwi ivhooti limo, lye lyámile lya Siimoni. Ahamulaavha uSiimoni kuuti alisejeelezye hansi muhati mwa sumbi. Pe ahatendama mwi ivhooti, ahajendeelela kusambiilizya ivhungaana ilya vhantu.

4Lwe aamala kusambiilizya, ahamuvhuuzya uSiimoni ahati, “Twala ivhooti pe pivhiiye, muteje inyeelo zyinyu, muvuvhe inswi.” 5USiimoni ahamwamula uYeesu ahati, “We Mwene, tuvhomvile imbombo iyo iya kuvuvha vhusiku vhwonti,#5:5 Tuvhomvile imbombo iyo iya kuvuvha vhusiku vhwonti: Imbombo iya kuvuvha inswi yikuvhombeha ahinza ahavhaliilizyo aha vhusiku. ileelo tutalemile naayimo. Ishi, mwe pe weewe wayanga, kuuti nteje ulwelo.”

6USiimoni na vhamwavho vhahatega inyeelo zyavho. Lwe vhaatega, inswi inyinji nkaani zihalemwa, ni nyeelo zihanzaga kudumunkana. 7Pe vhahavhapalizya avhamwavho vhe vháamile mwi ivhooti ilyamwavho, kuuti vhinze kuvhaavwa. Lwe vhinza, pe vhonti pooka vhahiizuzya inswi amavhooti gonti gavhili, inswi zyámile nyinji nkaani, na mavhooti gahanzaga kudwivha. 8USiimoni we izina ilyamwavho vhahatinji uPeeteli, lwe aalola izyo, ahamusugamilila uYeesu ahati, “We Mwene, nkulaavha uyeepe pa kwane, mwe pe ine ne mutalamalandu.” 9USiimoni áyanzile izyo, mwe pe uweene na vhanji vhonti vhe vháamile pooka, vhásukumiiye nkaani uvhwinji uvhwa nswi zye vhávuvile. 10Vhoope avhaana avha Zebedaayi, uYaakobu nu Yoohani, vhe vhahavuvhaga pooka nu Siimoni, vhahasukumila nkaani. Pe uYeesu ahamuvhuuzya uSiimoni ahati, “Siimoni utogopaje! Kufuma ileelo ili kuuti uvuvhaje avhantu.#5:10 Kuuti uvuvhaje avhantu kwe kuuti kwe avhavhunganihaje avhantu avhanji kufuma mu vhutalamalandu vhwavho nu kuvhatwala kwa Mulungu.” 11Pe vhahagatwala amavhooti gaavho pa luvhazu pa sumbi, vhahagaleha panaapo gonti, vhahamulandata.

UYeesu akumuzelufwa uwa mambombo

(uMataayi 8:1-4; uMaaliko 1:40-45)

12Isiku limo, uYeesu ahinjila mu nkaaya yimo. Umwo mwáli umuntu uwa mambombo umuvhili wonti. Umuntu uyo lwe amulola uYeesu, ahagwa ishikupama pansi, pe ahamulambiilizya ahati, “We Mwene, imanyile kuuti uli na maha aga kunzelufwa. Inga ukwanza, nkulaavha unzelufwe.” 13UYeesu ahagolosya inyoovhe yaakwe nu kumupalamansya,#5:13 Kumupalamansya: Ku Vhayuuda yáali mwiho kumupalamansya we ali na mambombo. Inga umuntu amupalamansya, yáali mwiho kumupuuta uMulungu. ahati, “Nkwanza uzelupe!” Ahavhaliilizyo hanaaho amambombo gahamwepa mu muvhili waakwe. 14Ahamuhaana umuntu uyo ahati, “Utahamuvhuuzye umuntu wonti inongwa izi! Ileelo usogole uyilolesye kwa mupuuti nu kufumwa impuutile izya kuzelupa kwaho inza vwe uMoose álajiziizye, inga avhantu vhonti vhazilole zye uMulungu akuvhombela.”#5:14 aVhalaawi 14:1-32 15Ileelo inongwa izya Yeesu zihonjela kukumuha imbazu zyonti. Avhantu amavhungaana amapiti, vhahavhungaanaga kumutejeelezya nu kuvhaponia impungo zyavho. 16Ileelo uYeesu ahasogolaga ukutali kwe kutáali avhantu kumulaavha uMulungu.

UYeesu ali na maha aga kuvhaswila avhantu uvhutalamalandu

(uMataayi 9:1-8; uMaaliko 2:1-12)

17Isiku limo, uYeesu ahavhasambilizyaga avhantu mu nyumba yimo. Muli ivho vháliipo aVhafalisaayi#5:17 AVhafalisaayi: Vhaazya mu Ntantiho izya Mazwi aMajeni. na vhasambiilizi avha ndajizyo izya Moose,#5:17 Avhasambiilizi avha ndajizyo izya Moose: Vhaazya mu Ntantiho izya Mazwi aMajeni. kufuma mu ntala zyonti izya mu Galilaaya ni zya mu Yudeeya, na mu nkaaya iya Yelusaleemu. Amaha aga MWENE uMulungu gáamile pooka nawo kuvhaponia avhavhinu.

18Pe vhahinza avhantu vhamo, vhamusenziinye pi izagala umuntu we áhataliiye. Vhahalinga kumwinjizya mu nyumba, inga vhamuvhiishe pa Yeesu kuuti amuponie. 19Ileelo vhahapootwa kumwinjizya umuvhinu uyo pa mulyango, mwe pe páali ivhungaana ilya vhantu. Pe vhahazuvha pa nyumba pamwanya, vhahadovhola. Vhahamwisya we áhataliiye she ali pi izagala lyakwe, vhahamuvhiiha pilongolela ilya Yeesu.

20Lwe uYeesu aalola ulwitiho lwavho, ahamuvhuuzya umuvhinu uyo ahati, “Mumanyani, nakuswila uvhutalamalandu vhwaho.” 21Pe avhasambiilizi avha ndajizyo na Vhafalisaayi vhaala vhahanda kuvhuzilizanya kuuti, “Ishi wu naanu uno we akumusaamula uMulungu? Ataliipo umuntu we angavhaswila avhantu uvhutalamalandu, nkandi we Mulungu weeka!” 22Ileelo uYeesu ahamanya insiivho zyavho, pe ahavhapilila ahati, “Shooni she mukusiivha izyo mu mooyo giinyu? 23Ishi lili kwoshi lye lipupuusu: kumuvhuuzya umuntu uno we ahataliiye kuuti, ‘Nakuswila uvhutalamalandu vhwaho,’ pamo kuuti, ‘Yimiliila ujendaje’? 24Ileelo ishi nkwanza mumanye kuuti, ne Mwana wa Aadamu#5:24 UMwana wa Aadamu: Vhaazya mu Ntantiho izya Mazwi aMajeni. indi na maha aga kuvhaswila avhantu uvhutalamalandu mu nsi.” Pe ahamuvhuuzya ula we áhataliiye ahati, “Nkukuvhuuzya kuuti, yimiliila! Nyatuula izagala lyaho, vhwelaaga kuhaaya.” 25Pepaala, umuntu uyo ahimiilila pilongolela lyavho, ahanyatula izagala lyakwe, ahavhwela kuhaaya uku akumutiima uMulungu. 26Pe vhonti vhahasukumila nu kumutiima uMulungu, vhahavha ni lyoga nkaani, vhahati, “Ileelo ili twazilola izya kusukumizya!”

UYeesu akumwita uLaawi kuuti avhe musundikwa waakwe

(uMataayi 9:9-13; uMaaliko 2:13-17)

27Pisinda, uYeesu aheepa pa nyumba yiila, ahamulola umusonchezya musonko wumo, we izina lyakwe vhahatinji uLaawi,#5:27 ULaawi: Izina ilyamwavho vhahatinji uMataayi. atendiime apa kusonchezezya umusonko. UYeesu ahamuvhuuzya ahati, “Undandate! Uvhe we musundikwa waane.” 28Pe uLaawi ahavileha vwonti, ahamulandata uYeesu.

29Ahamusenganizanya uYeesu umulyo mu nyumba yaakwe. Vhoope avhasonchezya musonko ni ivhungaana ipiti na vhantu avhanji, vhátendiime kulya ishaakulya pooka nawo. 30Avhasambiilizi avha ndajizyo izya Moose na Vhafalisaayi, vhahanda kuvhakwinkwina avhasundikwa avha Yeesu, vhahatinji, “Shooni she mukulya nu kumwela pooka na vhasonchezya musonko na vhatalamalandu?” 31UYeesu ahavhaamula ahati, “Avhapuuma vhatakumwanza umuganga, nkandi vhe vhavhinile vhe vhakumwanza. 32Ine ntinzile kuvhiita avhantu avhagolosu, nkandi kuvhiita avhatalamalandu, inga vhapindushe.”

Vhakumuvhuziilizya uYeesu izya kuyiima kulya

(uMataayi 9:14-17; uMaaliko 2:18-22)

33Avhantu vhamo vhahamuvhuziilizya uYeesu vhahati, “Avhasundikwa avha Yoohani na vha Vhafalisaayi vhali na maata aga kuyiima kulya nu kulaavha insiku zimo, shooni she avhasundikwa vhaaho avheene vhaakulya nu kumwela insiku zyonti?” 34UYeesu ahavhaamula ahati, “Vhe vhalanjiliilwe pa winga, vhatakwanzilwa kuyiima, lwe we akwimala ali pooka navho, 35nkandi insiku zye vhalivheefwezya we akwimala pe vhaliyiima kulya.”#5:34-35 UYeesu akuyiholanya na we akwimala na vhasundikwa vhaakwe akuvhaholanya na vhe vhakuvhalanjila. Havhili lwe akutaha ahavhaliilizyo he vhalivheefwezya we akwimala, akupanga ahavhaliilizyo he vhalimugoga.

36Havhili ahavhavhuuzya ku miivhi ahati, “Ataliipo umuntu we akuzeepula ishigamba pa mwenda umupwa nu kugambiha pa mwenda umukaali. Inga avhomba vhwevhulo, akuwulazya umwenda umupwa, shoope ishigamba isha mwenda umupwa shitakuvhalilana nu mwenda umukaali. 37Havhili ataliipo umuntu we akuvhiiha idivaayi impwa mu mafuuku amakaali aga makwembe. Inga avhomba vhwevhulo, idivaayi iyo yikupunsya amafuuku nu kwitiha, goope amafuuku gakunanjiha.#5:37 AVhaisilayeeli vhahasengulaga idivaayi mu mafuuku aga makwembe aga mbuzi. Amafuuku amakaali gahapotwaga kududuha nkaani, lwe idivaayi ye yili muumwo yikulula, pe gahapuntaga. Ileelo amafuuku amapwa gahaduduhaga nkaani, ageene gatahapuntaga. Mu miivhi iga, idivaayi impwa, kwe kuuti insambiilizyo impwa izya Yeesu, goope amafuuku amakaali aga makwembe, kwe kuuti amaata aga hali aga Vhaisilayeeli. 38Idivaayi impwa yikwanzilwa kuyivhiiha mu mafuuku amapwa. 39Ataliipo umuntu we akusungwa kumwela idivaayi impwa, lwe amweleeye inkaali, mwe pe akusiivha kuuti idivaayi inkaali ye nyinza.”

Currently Selected:

uLuuka 5: nih

Highlight

Copy