uLuuka 4

UYeesu akulingwa nu Mukwalanzi

(uMataayi 4:1-11; uMaaliko 1:12-13)

1Lwe uYeesu ayoozelwa, aheepa pi ijenje uYoolodaani she ayizuuye uMupepo uMufinjile. UMupepo uMufinjile ahamulongola kusogola mu luugwa. 2Ukwo ahalingwa nu Mukwalanzi insiku 40. Insiku zyonti izyo, atáliiye naashimo. Lwe zyasila, inzala yihamuluma. 3Pe uMukwalanzi ahamuvhuuzya ahati, “Inga iwe we Mwana wa Mulungu, livhuuzye ivhwe ili ligalunkane livhe likaati.” 4UYeesu ahamwamula ahati, “Yisimviilwe mu Vhusimbe uVhufinjile kuuti, ‘Umuntu atangalandila kwe ku shaakulya sheeka vhweleele.’#4:4 iNkumbushizyo izya Ndajizyo 8:3”

5Pe uMukwalanzi ahamutwala uYeesu pamo pe páali pamwanya nkaani, ahamulanga uvhumwene uvhwa mu nsi zyonti ku havhaliilizyo hansi. 6Ahamuvhuuzya ahati, “Kwe nkupe amaha aga kukonzya uvhumwene uvhu vhwonti nu vhushindamu vhwakwe, mwe pe vwonti vwane. Ine nkuumupa umuntu wonti ku lukasamo lwane. 7Inga wampuuta, vwonti kwe vivhe vwaho.” 8UYeesu ahamwamula ahati, “Yisimviilwe mu Vhusimbe uVhufinjile kuuti, ‘Umupuutaje uMWENE waaho uMulungu weeka, havhili umuvhombelaje wuuyo weeka vhweleele.’#4:8 iNkumbushizyo izya Ndajizyo 6:13”

9Pe uMukwalanzi ahamutwala uYeesu ku Yelusaleemu, ahamuvhiiha pamwanya nkaani#4:9 Pamwanya nkaani: Páliipo pamo pa Nyumba iMfinjile pe pázengwilwe kuzuvha kumwanya nkaani. Inga umuntu angaagwa, kufuma penepo angaafwa. pa Nyumba iMfinjile. Ahamuvhuuzya ahati, “Inga iwe we Mwana wa Mulungu, yisumbe pansi, 10mwe pe yisimviilwe mu Vhusimbe uVhufinjile kuuti, ‘UMulungu kwe avhalajizye avhahavhizya vhaakwe kuuti vhakuguulile.’#4:10 iZabuuli 91:11 11Havhili kuuti, ‘Vhakutone mu nyoovhe zyavho inga utahabumile ishinama pi ivhwe nu kuvwalala.’#4:11 iZabuuli 91:12 ” 12UYeesu ahamwamula ahati, “Yisimviilwe havhili mu Vhusimbe uVhufinjile kuuti, ‘Utamulingaje uMWENE waaho uMulungu.’#4:12 iNkumbushizyo izya Ndajizyo 6:16” 13Lwe uMukwalanzi aamala kumulinga uYeesu ku madala gonti, ahamuleha ku havhaliilizyo hamo.

UYeesu akutaliha imbombo iya kulumbiilila ku Galilaaya

(uMataayi 4:12-17; uMaaliko 1:14-15)

14Pe uYeesu ahagaluha mu shigavho isha nsi isha Galilaaya, she ayizuuye amaha aga Mupepo uMufinjile. Inongwa zyakwe zihakumuha mu nkaaya zyonti impalamani. 15Ahasambilizyaga mu masinagoogi#4:15 Amasinagoogi: Vhaazya isinagoogi mu Ntantiho izya Mazwi aMajeni. gaavho, avhantu vhonti vhe vhahamutejelezyaga vhahamutiimaga.

Vhakumuhaana uYeesu ku mwavho

(uMataayi 13:53-58; uMaaliko 6:1-6)

16Isiku limo, uYeesu ahafiha mu Naazaleeti, inkaaya ye ákuliiye. Isiku ilya Sabaato#4:16 ISabaato: Vhaazya mu Ntantiho izya Mazwi aMajeni. ahinjila mwi isinagoogi, inza vwe gáamile amaata gaakwe. Ahimiilila inga avhaazye uVhusimbe uVhufinjile. 17Wumo ahaamupa ikalaata ilya mukuvhwi uYisaayi, pe ahagubula pe pasimviilwe kuuti,

18“UMupepo uwa MWENE uMulungu ali pooka niine,

mwe pe uMulungu ansavhuuye#4:18 Ansavhuuye: IShiyunaani shikuti, Ampasile amafuta.

kuvhalumbiilila avhapiina Izwi iLyinza.

Ansonteleziizye kuvhakumusizya vhe vhakunziilwe,

inongwa izya kusatulwa kwavho,

na vhantonko kuuti vhatalishe kulola havhili.

Ansonteleziizye kuvhapoha vhe vhakuyimvilwa,

19nu kukumusya ahavhaliilizyo

he uMWENE kwe ayinze kuvhaloota avhantu.”

20Lwe avhaazya, ahagubishila ikalaata liila, ahamugalusizya umuvhomvi uwa isinagoogi, ahatendama inga atalishe kusambiilizya. Avhantu vhonti vhe vháamile mu nyumba yiila, vhahamutontomela. 21Pe ahataliha kuvhasambiilizya kuuti, “UVhusimbe uVhufinjile uvhu vhwe mwivwa nkuvhaazya, ileelo vhwalunjiha.” 22Vhonti vhahamutiima nkaani, vhahasukumila ku mazwi aga vhuloote ge áyanzile, vhahati, “Uno te mwana wa Yoosefu?”

23UYeesu ahavhavhuuzya ahati, “Nalyoli kwe mumbuuzye ku miivhi kuuti, ‘Iwe muganga, yiponie weneewe!’ Kwe muti, ‘Imbombo zye twivuuye uvhomvile mu nkaaya iya Kapelanawuumu, ishi uzivhombe na pa nkaaya ipa pa mwinyu weneewe.’” 24Ahajendeelela kuyanga, ahati, “Nalyoli nkuvhavhuuzya kuuti, ataliipo umukuvhwi we vhakumwitiha ku mwavho. 25Ahavhaliilizyo aha mukuvhwi uEeliya, imvula yitátoonyile amaaha gatatu na meezi 6, inzala impiti yihagwa mu nsi yonti iya Isilayeeli. Nalyoli nkuvhavhuuzya kuuti, ahavhaliilizyo iho vháliipo avhaziishe avhinji mu nsi iyo. 26Ileelo uMulungu atámusonteleziizye uEeliya kwa muziishe inga wooka muli ivho avha mu Isilayeeli, ámusonteleziizye kwa muziishe uwa mu nkaaya iya Seleeputa, mu nsi iya Siidoni.#4:26 1 aVhamwene 17:8-24 27Havhili ahavhaliilizyo aha mukuvhwi uEelisha, vháliipo avhantu avhinji avha mpungo iya mambombo mu nsi iya Isilayeeli. Ileelo atáliipo inga wooka we ázelufile, nkandi we Nahamaani weeka umuhaaya uwa mu shigavho isha nsi isha Siiliya.”#4:27 2 aVhamwene 5:1-14 28Avhantu vhonti vhe vháamile mwi isinagoogi, lwe vhiivwa amazwi igo, vhahaviitwa nkaani. 29Pe vhahimiilila, vhahamufumwa uYeesu mu nkaaya yaavho ye yáamile pi igamba pamwanya. Vhahanzaga kumubunshiilila kwi ipalaazya, inga agwe pansi, afwe. 30Ileelo uweene ahatuuha pahati yaavho, aheepa.

UYeesu akushimbizya impepo inkandamanu

(uMaaliko 1:21-28)

31Pisinda, uYeesu ahasogola mu nkaaya iya Kapelanawuumu ye yáamile mu shigavho isha nsi isha Galilaaya. Isiku ilya Sabaato, ahinjila mwi isinagoogi, ahanda kuvhasambiilizya avhantu. 32Avhantu vhahasukumila nkaani insambiilizyo zyakwe, mwe pe zyámile na maha. 33Mwi isinagoogi ilyo, mwáli umuntu wumo we álemwilwe ni mpepo inkandamanu, ahahoola kwi izwi ipiti, ahati, 34“Shooni she ukutwinjiilila, iwe Yeesu wa ku Naazaleeti? Uyinzile kutulovwa? Imanyile kuuti iwe we Mufinjile uwa Mulungu!” 35UYeesu ahayipilila impepo yiila ahati, “Ahalanga! Fuma mwa muntu uno!” Impepo iyo yihamugwisya umuntu uyo pilongolela lyavho, yihafuma ishisita kumuvwalazya. 36Avhantu vhonti vhahasukumila nkaani, vhahapanzanyaaga vheeka vhahatinji, “Izi zya kusukumizya nkaani! Umuntu uno akuzipilila impepo inkandamanu ku maha, zyope zikufuma!” 37Inongwa izya mbombo izya Yeesu zihakumuha mu nsi iyo yonti.

UYeesu akuvhaponia avhavhinu avhinji

(uMataayi 8:14-17; uMaaliko 1:29-39)

38UYeesu ahafuma mwi isinagoogi, ahasogola mu nyumba iya muntu wumo we vhahatinji uSiimoni.#4:38 USiimoni: Uyo izina ilyamwavho áali wu Peeteli. Lwe aafiha, ahaaga unyinavwala uwa Siimoni avhinile nkaani inzegema, pe vhahamulaavha uYeesu kuuti amuponie. 39Pe ahimiilila papiipi nu muvhinu, ahayipilila inzegema iyo. Panaapo inzegema yihapona, woope ahavhuuha, ahataliha kuvhavhombela.

40Lwe izuvha lyaswa, avhantu vhonti vhe vháamile na vhavhinu avha mpungo izya mavhiila mu mavhiila, vhahavhatwala avhavhinu ivho kwa Yeesu. Uweene ahavhalemaga vhonti, kuvhaponia. 41Havhili, ahazyefwaga impepo inkandamanu inyinji, zyope zihazumaga ahalanga zihatinji, “Iwe we Mwana wa Mulungu!” Ileelo ahazihaanaga kuuti zitamutahaje, mwe pe zyámumanyile kuuti wu Chilisiti.

42Indaavhi yaakwe lwe kwasha, uYeesu aheepa mu nkaaya yiila, ahasogola pamo pe patáali avhantu. Ivhungaana ilya vhantu lihanda kumulondola, lihafiha pe áamile. Lwe lyamulola, lihalinga kumudinda kuuti ataheepe mu nkaaya yaavho. 43Ileelo uweene ahalivhuuzya ahati, “Nkwanzilwa kulumbiilila Izwi iLyinza ilya vhumwene uvhwa Mulungu#4:43 Uvhumwene uvhwa Mulungu: Vhaazya mu Ntantiho izya Mazwi aMajeni. na mu nkaaya izinji mwope, mwe pe vhansonteleziizye kuvhomba vhwevhulo.” 44Pe aheepa ipo, ahajendeelela kukumusya Izwi ilyo mu masinagoogi aga mu nsi yiila.

Currently Selected:

uLuuka 4: nih

Highlight

Copy