uLuuka 1
1
Amazwi aga kwanda
1Kuli iwe uwa mushinzi nkaani Teyofiilo:
Avhantu avhinji vhasimvile inongwa izya Yeesu Chilisiti#1:1 UChilisiti: Vhaazya mu Ntantiho izya Mazwi aMajeni. inza vwe zyávhombesile muli iswe. 2Vhasimvile inongwa izi inza vwe vhátuvhuziizye avhavhomvi vhaala vhe vházivhwenyi na minso gaavho kufuma pe zyátalisile nu kuzilumbiilila. 3Ishi niine naalola kuuti hinza kukusimbila izi zyonti inza vwe zyálandatiine, mwe pe nkomesheziizye ahinza uvhwanalyoli uvhwa nongwa izya Yeesu kufuma ku vhwandilo. 4Navhomba vhwevhulo, inga umanye uvhwanalyoli uvhwa nongwa zye vhakusambiliziizye.
Uvhukuvhwi uvhwa kupaapwa ukwa Yoohani uMwozyi
5Ahavhaliilizyo he umwene uHeelodi#1:5 UHeelodi: Vhaazya mu Ntantiho izya Mazwi aMajeni. uMupiti ahakonzyaga mu nsi iya Vhayuuda, kwáli umupuuti#1:5 Umupuuti: Vhaazya avhapuuti mu Ntantiho izya Mazwi aMajeni. wumo we izina lyakwe vhahatinji uZakaliya. Umupuuti uyo ahafumaga mu mpuga iya vhapuuti iya Aabiya. Umushi waakwe vhahatinji uEelizabeeti. Woope áfumile mu luho ulwa shipuuti ulwa Aaloni.#1:5 UAaloni áamile mupuuti umupiti uwa kwanda. Vhaazya Kufuma 28:1-3. 6UZakaliya nu mushi vháamile vhagolosu pilongolela ilya Mulungu, vhahazilemaga ahinza indajizyo zyonti izya Mulungu ishisita ulukwinkwino. 7Ileelo vhatáamile nu mwana, mwe pe uEelizabeeti áamile mugumba, havhili vhonti vhavhili vháamile vhagoosi.
8Isiku limo, uZakaliya ahavhombaga imbombo iya vhupuuti mu Nyumba iMfinjile#1:8 INyumba iMfinjile: Vhaazya mu Ntantiho izya Mazwi aMajeni. ahavhaliilizyo aha luvhambo ulwa mpuga yaakwe iya Aabiya. 9Ásavhuliilwe kulandatana na maata gaavho#1:9 Ásavhuliilwe kulandatana na maata gaavho: Kumusaavhula umuntu, aVhayuuda vhahasimbaga amazina aga vhantu mu mavhwe amansi, nu kuvhiiha gonti mu lupindi. Vhahayinzanyaaga kufishila ivhwe lyoka lifume nu kugwa pansi. Umuntu we ivhwe lili ni izina lyakwe lyataliha kufuma, we vhahatinji atuuha. kwinjila aPafinjile apa MWENE uMulungu, inga asuushizye pa shifinjilo ivintu vwe vikununshila umununsi umwinza. 10Lwe ali muhati kusuushizya, avhantu impuga impiti vháamile panzi pa Nyumba iMfinjile vhahapuutaga.
11Pe uhavhizya uwa MWENE uMulungu ahamufumila uZakaliya. Uhavhizya uyo, áyimiliiye uluvhazu ulwa kundiilo ulwa shifinjilo isho. 12Lwe uZakaliya amulola uhavhizya, ilyoga lihamulema, ahasaaga nkaani. 13Ileelo uhavhizya ula ahamuvhuuzya ahati, “Utogopaje Zakaliya! UMulungu ayivuuye impuuto zyaho, umushi waaho uEelizabeeti kwe akupaapile umwana umwanaavuli, umwana uyo ulimwita kuuti wu Yoohani. 14Pe uliseshela nkaani, havhili avhantu avhinji vhaliseshela kupaapwa kwakwe, 15mwe pe uMWENE uMulungu alimuvhiiha kuvha mupiti. Umwana uyo atahamwele idivaayi,#1:15 Idivaayi: Vhaazya mu Ntantiho izya Mazwi aMajeni. poosye ishintu shonti she shikuhola.#1:15 Atahamwele idivaayi, poosye ishintu shonti she shikuhola Ishi sháali shilolesyo isha kuuti umwana uyo asavhuliilwe nu Mulungu. Amaha aga Mupepo uMufinjile#1:15 UMupepo uMufinjile: Vhaazya mu Ntantiho izya Mazwi aMajeni. galiivha nawo kufuma ahavhaliilizyo he ali mu lwanda mwa maayi waakwe. 16Alivhagalusya aVhaisilayeeli avhinji kwa MWENE waavho uMulungu. 17Havhili alimulongolela uMwene, aliivha na maha nu mwoyo uwa kumulandata uMulungu inza umukuvhwi uEeliya#1:17 UEeliya: AVhayuuda vhahasuvhilaga kuuti aliyinza havhili umukuvhwi uEeliya, kusengaanya kwinza ukwa Chilisiti. Vhaazya uMalaaki 3:1; 4:5-6. vwe áamile. Alivhakundanya avhapaafi na vhaana vhaavho, havhili alivhagalulanya vhe vhatakumushindiha uMulungu, kuvha ni nsiivho ingolosu. Alivhomba zyonti izyo, inga avhasengaanye avhantu kumuposheela uMwene uYeesu.”
18Pe uZakaliya ahamuvhuziilizya uhavhizya ahati, “Ine nu mushi waane twe vhagoosi. Shintu vhuli she shingamanyisya kuuti amazwi igo ga nalyoli?” 19Pe uhavhizya ahamwamula ahati, “Ine ne Gabiliyeeli, nkwimiilila pilongolela ilya Mulungu. Uweene we ansonteleziizye kuuti nkuvhuuzye iwe inongwa inyinza izi. 20Ishi, mwe pe utiitiha zye nakuvhuuzya kuuti, uvhe we shinuunu. Te uyangaje kufishila isiku lye zilivhombeha izyo. Zyonti zilivhombeha, lwe ahavhaliilizyo haakwe haafiha!”
21Ahavhaliilizyo iho, avhantu vhaala vhe vháamile panzi, vhahamugulililaga uZakaliya. Vhahasukumila, mwe pe áhaavile nkaani kufuma aPafinjile mu Nyumba iMfinjile. 22Lwe aafuma, ahapootwa kuyanga navho, pe avheene vhahamanya kuuti, avhwenyi injozi iya pa minso amazelu mu Nyumba iMfinjile. Uweene ahalolesyaga ni nyoovhe zye akwanza kuyanga, ahajendeelela kuvha wu shinuunu. 23Lwe insiku zyakwe zyasila izya kuvhomba imbombo iya vhupuuti, ahavhwela kuhaaya.
24Pisinda, umushi waakwe uEelizabeeti ahavha pa vhumwamu, ahayizyiha mu nyumba ku havhaliilizyo aha meezi gasaano. Ahayiyanjilaga wuuyo ahatinji, 25“Izi zye uMWENE uMulungu ambombeeye ine, amfwiliiye uvhwila nu kuneefwezya insoni ku vhantu.”
Uvhukuvhwi uvhwa kupaapwa ukwa Chilisiti
26Lwe waafiha umwezi uwa 6 uwa vhumwamu uvhwa Eelizabeeti, uMulungu ahamusonteelezya uhavhizya uGabiliyeeli mu nkaaya iya Naazaleeti. Inkaaya iyo yáamile mu shigavho isha nsi isha Galilaaya. 27Ahasogola kwa mulindu wumo we izina lyakwe vhahatinji uMaliiya. Umulindu uyo atámumanyile umwanaavuli. UMaliiya ázinjiliilwe nu Yoosefu uwa mu luho ulwa mwene uDaavhudi.#1:27 UDaavhudi: Vhaazya mu Ntantiho izya Mazwi aMajeni. 28Uhavhizya lwe aafiha kwa Maliiya ahati, “Mwakaata iwe we ulosiitwe nkaani, uMWENE uMulungu ali niiwe.”
29UMaliiya, lwe ayiivwa amazwi igo, ahagandushila nu kwogopa nkaani, ahavhanga akuyivhuziilizya mu mwoyo kuuti, “Shooni she akundamuha inza vhwevhulo?” 30Pe uhavhizya ahati, “Maliiya, utogopaje! UMulungu akufwiliiye uvhwila. 31Yeenya, kuuti uvhe pa vhumwamu, kuuti upaape umwana umwanaavuli. Umwana uyo ulimwita kuuti wu Yeesu. 32Umwana uyo aliivha mupiti, havhili izina lyakwe vhalitinji Mwana wa Mulungu#1:32 UMwana wa Mulungu: Vhaazya mu Ntantiho izya Mazwi aMajeni. uMupiti uwa ku Mwanya. UMWENE uMulungu aliimupa amaha aga vhumwene, inza vwe áamile utaata waakwe umwene uDaavhudi. 33Havhili, alivhakonzyaga aVhaisilayeeli#1:33 AVhaisilayeeli: IShiyunaani shikuti inyumba iya Yaakobu. insiku zyonti, uvhumwene vhwakwe te vhuhaavhe nu vhusililishilo.”
34UMaliiya ahamuvhuziilizya uhavhizya ahati, “Ine ntamumanyile umwanaavuli nuumo, ishi izyo kwe zivhombeshe vhuli?” 35Uhavhizya ahamwamula ahati, “UMupepo uMufinjile kuuti akwishile, na maha aga Mulungu uMupiti uwa ku Mwanya kuuti gakugwinshile inza ahanzundila. Pe umwana we ulipaapa aliivha mufinjile, havhili avhantu vhalitinji Mwana wa Mulungu. 36Yeenya, woope umujenzi waaho uEelizabeeti ali pa vhumwamu, poosye she mugoosi! Havhili uvhumwamu vhwakwe vhwa meezi 6, uweene we vhatinji mugumba! 37Naalimo lye lingamupoota uMulungu.” 38Pe uMaliiya ahati, “Ine ne muvhomvi uwa MWENE uMulungu. Zivhe vhwevhulo ku kwane inza vwe wayanga.” Pe uhavhizya aheepa.
UMaliiya akumushuulila uEelizabeeti
39Lwe zyatuuha insiku nyinsi, uMaliiya ahahalambana kusogola mu nkaaya yimo ye yáamile mu nsi iya magamba aga mu Yudeeya. 40Lwe aafiha, ahinjila mu nyumba iya Zakaliya, ahamulamuha uEelizabeeti. 41UEelizabeeti lwe ayiivwa vwe uMaliiya akumulamuha, umwana ahanyangʼanya muhati yaakwe. Pe uMupepo uMufinjile ahamwishila uEelizabeeti. 42Pe ahanda kuyanga kwi izwi ipiti kuuti, “Ulosiitwe iwe kuluusya avhantanda vhonti, havhili alosiitwe nu mwana we kuuti upaape. 43Ine ne naanu ne umaayi uwa Mwene waane ayinzile kunshuulila? 44Lwe niivwa izwi lyaho ilya kundamuha, umwana muhati yaane anyangʼanya ku luseshelo. 45Ulosiitwe iwe, mwe pe uyitisile zye uMWENE uMulungu akuvhuziizye, izyo kuuti zivhombeshe.”
Ulwimbo ulwa Maliiya
46Pe uMaliiya ahati,
“Umwoyo waane wukumutiima uMWENE uMulungu.
47Havhili wukumudovhela uMulungu uMuposhi waane,
48mwe pe ankumbuha ine ne muvhomvi waakwe,
poosye she ne muyeyevhazu.
Yeenya, kufuma ishi avhantu avha manda gonti,
vhalitinji ine ne mulootwa.
49UMWENE uMulungu uwa Maha Gonti
ambombeeye izya kusukumizya,
uweene mufinjile.
50Akuvhafwila uvhwila avhantu avha manda gonti,
vhonti vhe vhakumunyila.
51Alolesiizye uvhupiti vhwakwe ku maha gaakwe.
Avhasasiizye avha mabaado mu mooyo gaavho.
52Avhamwene avhefwizye mu mbombo yaavho iya kukonzya,
nu kuvhavhiiha avhayeyevhazu.
53Vhe vhali ni nzala, avhapiiye ivintu ivwinza ku vhwinji,
ileelo avha vwuma ivwinji avhashimbiziizye inyoovhe zyeka.
54Avhavwizye avhavhomvi vhaakwe aVhaisilayeeli.
Akumbusile ulufingwi lwake ulwa kuvhafwila uvhwila,
55inza vwe ávhavhuziizye avhataata vhiitu,
avha Aabulahamu#1:55 UAabulahamu: Vhaazya mu Ntantiho izya Mazwi aMajeni. nu luho lwakwe lwonti shiima shiima.”
56UMaliiya ahatendama nu Eelizabeeti ameezi gatatu ishi, pe ahavhwela ku mwavho.
Kupaapwa ukwa Yoohani uMwozyi
57Lwe haafiha ahavhaliilizyo aha Eelizabeeti kupaapa, ahapaapa umwana umwanaavuli. 58Avhapalamani na vhajenzi vhaakwe vhahiivwa kuuti uMWENE uMulungu amufwiliiye uEelizabeeti uvhwila nkaani, pe vhahaseshela pooka nawo.
59Lwe isiku ilya 8 lyafiha kufuma umwana apaapwe, vhahinza kumutahiili.#1:59 Kumutahiili: Vhaazya kutahiili mu Ntantiho izya Mazwi aMajeni. Vhahanzaga kuumupa umwana izina ilya yise, uZakaliya. 60Ileelo umaayi waakwe ahavhavhuuzya ahati, “Ndaali! Izina lyakwe kuuti avhe wu Yoohani.” 61Avheene vhahamwamula vhahati, “Mu luho lwinyu ataliipo umuntu we ali ni izina inza ilyo.”#1:61 Amaata aga Vhayuuda gatahitishilaga kuumupa umwana izina lye litali mu luho ulwa vhapaafi vhaakwe. 62Pe vhahamuvhuziilizya uyise ku shilolesyo, inga vhamanye kuuti uweene akwanza kuumupa umwana lizina vhuli. 63UZakaliya ahalaavha apa kusimbila, ahasimba ahati, “Izina lyakwe avhe wu Yoohani.” Pe avhantu vhonti vhahasukumila. 64Ahavhaliilizyo hanaaho uZakaliya ahiiguha, ahanda kuyanga kumutiima uMulungu. 65Pe avhapalamani vhonti avha Zakaliya, vhahoogopa nkaani. Inongwa izi zihajendeelela kukumuha mu nsi yonti iya mu magamba aga mu Yudeeya. 66Avhantu vhonti vhe vhívuuye inongwa izyo, vhahasukumila mu mooyo gaavho, vhahati, “Amwe umwana uno aliivha inza vhuli?” Vhahasukumila vhwevhulo, mwe pe uMWENE uMulungu áali pooka nawo.
Ulwimbo ulwa Zakaliya
67Pe amaha aga Mupepo uMufinjile gahamwishila uZakaliya, utaata uwa mwana, pe ahanda kukuvhwa kuuti,
68“Ashindikwaje uMWENE uMulungu uwa Vhaisilayeeli,
mwe pe ayinzile kuvhapoha avhantu vhaakwe.
69Atupiiye uMuposhi uwa Maha,#1:69 UMuposhi uwa maha: IShiyunaani shikuti ulupembe ulwa vhuposhi. Mu Vhusimbe uVhufinjile ulupembe ulwa shihanu shiholanyo isha muntu uwa maha nkaani.
kufuma mu luho ulwa muvhomvi waakwe uDaavhudi.
70Avhomvile inza vwe áyanzile kufuma hali
kutuushila ku vhakuvhwi vhaakwe avhafinjile.#1:70 Avhafinjile: Vhaazya mu Ntantiho izya Mazwi aMajeni.
71Áyanzile kuuti alitupoha kufuma mu vhalugu vhiitu,
mu vhantu vhonti vhe vhatupasite.
72Átili, alivhafwila uvhwila avhataata vhiitu,
nu kulunjisya ulufingwi#1:72 Ulufingwi: Vhaazya mu Ntantiho izya Mazwi aMajeni. lwake ulufinjile.#1:72 uVhwandilo 17:7; aVhalaawi 26:42; iZabuuli 105:8; 106:45
73Áfinzile nu taata wiitu uAabulahamu,
74kuuti alitupoha mu vhalugu vhiitu,
inga tumuvhombelaje uweene ishisita ilyoga.
75Tuvhe swe vhafinjile,
havhili swe vha nalyoli insiku zyonti zye tukulandila.
76Ishi iwe mwana waane,
kwe vhakwitaje kuuti umukuvhwi uwa Mulungu uMupiti
uwa ku Mwanya.
Kwe vhakwitaje vhwevhulo,
mwe pe kuuti umulongolele uMwene uYeesu,
inga umupelele uweene idala.
77Kwe uvhamanyisyaje avhantu vhaakwe kuuti,
vhakupokwa kwi idala ilya kuswilwa
uvhutalamalandu vhwavho,
78mwe pe uMulungu wiitu ali nu vhwila nkaani ku kwitu.
Ku vhwila uvhwo,
uvhuzelu kufuma ku mwanya#1:78 Uvhuzelu kufuma ku mwanya: Amazwi iga gakumutaha uYeesu Chilisiti. vhulituhozezya,
79swenti swe tuli mu shiisi nu kupalamila kufwa,#1:79 uYisaayi 9:1-2
nu kutulongola mwi idala ilya vhutehamu.”
80Pe uYoohani ahajendeelela kukula, nu kwonjela kuvha na maha mwa Mupepo uMufinjile. Lwe aakula, ahatendama mu luugwa kufishila ahavhaliilizyo he ahaloleha ku Vhaisilayeeli.
Currently Selected:
uLuuka 1: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
