uLuuka 2
2
Kupaapwa ukwa Yeesu Chilisiti
1Ahavhaliilizyo haala he uYoohani ápafwilwe, uKayisaali#2:1 UKayisaali: Vhaazya mu Ntantiho izya Mazwi aMajeni. uAguusito umwene umupiti uwa vhumwene uvhwa Shiluumi álajiziizye kuuti, avhantu vhonti avha mu nsi zye ahakonzyaga, vhasimbisye amazina gaavho. 2Kusimbisya ukwo kwámile kwa kwanda mu vhumwene uvhwa Shiluumi. Kwávhomviilwe, lwe uKileeniyo ahakonzyaga mu shigavho isha nsi isha Siiliya. 3Pe avhantu vhonti vhahasogola kusimbisya mu nkaaya zye uluho lwavho lwáfumiliiye.
4UYoosefu woope aheepa mu nkaaya iya Naazaleeti ye yáamile mu shigavho isha nsi isha Galilaaya. Ahasogola kusimbisya mu nkaaya iya Betelehemu ye yáamile mu shigavho isha nsi isha Yudeeya. Mu Betelehemu mwe umwene uDaavhudi ápafwilwe, uYoosefu ásogooye ukwo, mwe pe áamile wa mu luho ulwa Daavhudi. 5Ásogooye kusimbisya pooka nu Maliiya we ámuzinjiiye. Ahavhaliilizyo iho uMaliiya áamile pa vhumwamu. 6Lwe vhali ukwo, ahavhaliilizyo aha Maliiya kupaapa hahafiha. 7Ahapaapa umwana umwanaavuli uhatoote, ahamuzwalizya amenda aga mwana umucheeche. Ahamukaasya mwi isuuvha ilya kuliila ingʼombe, mwe pe patáliipo apa kukaata avheene, inyumba izya vhajeni zyízuuye avhantu.
Avhadiimi vhakuposheela inongwa izya kupaapwa ukwa Yeesu
8Uvhusiku vhuula kwáli avhadiimi vhamo vhe vhahatendamaga kwi ihombe, papiipi ni Betelehemu, vhahagulilaga ingʼonzi zyavho. 9Naluvhiilo uhavhizya uwa MWENE uMulungu ahavhaloleshela. Uvhuzelu uvhuhali kufuma kwa MWENE vhuhavhahozya imbazu zyonti, pe vhahoogopa nkaani. 10Ileelo uhavhizya ahavhavhuuzya ahati, “Mutogopaje! Mbaleteeye inongwa inyinza zye kuuti ziivhape avhantu vhonti uluseshelo ulupiti. 11Ileelo mu nkaaya iya Betelehemu mwe uDaavhudi ápafwilwe, apafwilwe uMuposhi ku zyinyu. Uyo we wu Chilisiti, uMwene. 12Ishilolesyo isha imwe kumumanya she shino: Kwe mumwaje umwana umucheeche vhamuzwaliziizye amenda aga mwana umucheeche, akaasite mwi isuuvha ilya kuzuvhiilila ingʼombe.”
13Naluvhiilo yihaloleha impuga impiti iya vhahavhizya kufuma ku mwanya pooka nu havhizya ula. Vhahamutiimaga uMulungu vhahatinji,
14“Ashindikwaje uMulungu uMupiti uwa ku Mwanya,
vhwope uvhutehamu vhuvhanje mu nsi
ku vhantu vhe avhitisile.”
15Pe avhahavhizya ivho vhaheepa kusogola ku mwanya. Lwe vheepa, avhadiimi vhaala vhahanda kuvhuuzanya kuuti, “Ishi tusogole ku Betelehemu, tuvhale twenye lye livhombesile lye uMWENE uMulungu atuvhuuzya.” 16Pe vhahasogola naluvhiilo ku Betelehemu. Lwe vhaafiha, vhahavhaaga avha Maliiya nu Yoosefu nu mwana umucheeche akaasite mwi isuuvha ilya kuzuvhiilila ingʼombe. 17Lwe vhamulola umwana uyo, vhahavhavhuuzya avhantu inongwa zye uhavhizya ávhavhuziizye kuzya mwana uyo. 18Vhonti vhe vhívuuye inongwa zye avhadiimi ivho vhávhavhuziizye, vhahasukumila. 19Ileelo uMaliiya ahavhanga akuzisivhiilila zyonti izyo nu kuzivhiiha mu mwoyo. 20Pisinda, avhadiimi ivho, vhahagaluha kwi ihombe she vhakumushindiha nu kumutiima uMulungu ku zyonti zye vházyivuuye nu kuzilola, mwe pe vháazile zili sheshiila inza vwe uhavhizya ávhavhuziizye.
Vhakumwita uYeesu izina
21Lwe lyafiha isiku ilya 8 kufuma umwana apaapwe, vhahamutahiili nu kumwita izina ilya Yeesu. Izina ilyo uhavhizya ámupiiye umaayi uwa mwana, lwe ashiili kuvha pa vhumwamu.
Vhakumufinjila uYeesu kwa Mulungu
22Ahavhaliilizyo hahasila aha Yoosefu nu Maliiya kuyizelufwa,#2:22 UMoose ávhalajiziizye aVhaisilayeeli kuuti, inga umwantanda apaapa umwana, atendamaje insiku 40 ishisita kulema ivintu ivifinjile, poosye kwinjila mu Nyumba iMfinjile. Inga insiku izyo zyatuuha, ayizelufwaje. Vhaazya aVhalaawi 12:2-4. inza vwe uMWENE uMulungu álajiziizye mu ndajizyo izya Moose.#2:22 Indajizyo izya Moose: Vhaazya uMoose mu Ntantiho izya Mazwi aMajeni. Pe vhahasogola nu mwana ku Yelusaleemu pa Nyumba iMfinjile, inga vhamufinjile kwa MWENE. 23Mu ndajizyo izya MWENE izyo, yisimviilwe kuuti, “Umwana wonti umwanaavuli uhatoote, vhamuvhiihaje kuvha musaavhulwa kwa MWENE.”#2:23 Kufuma 13:2, 12, 15 24Havhili vhásogooye inga vhafumwe impuutile, inkunda zivhili, poosye inyaana zivhili izya nkunda inza vwe yihanzilwaga mu ndajizyo izya MWENE.#2:24 aVhalaawi 12:8
25Ahavhaliilizyo iho ku Yelusaleemu, kwáli umuntu wumo we vhahatinji uSimiyooni. Umuntu uyo áamile mugolosu, havhili ahamushindihaga uMulungu. Ahasuvhilaga kwinza ukwa we alivhapoha aVhaisilayeeli. USimiyooni ahalongolwaga nu Mupepo uMufinjile. 26UMupepo uMufinjile ámuvhuziizye kuuti, “Te uhaafwe she ushiili kumulola uChilisiti uwa MWENE uMulungu.” 27UMupepo uMufinjile ahamulongola uSimiyooni kusogola pa Nyumba iMfinjile. Woope uYoosefu nu Maliiya vhahamutwala umwana uYeesu pa Nyumba iyo, kufumwa impuutile nu kumufinjila kwa MWENE, inza vwe yihanzilwaga mu ndajizyo izya Moose. 28USimiyooni ahamunyatula umwana uyo ahamupahatila, ahamutiima uMulungu. Ahati,
29“We MWENE, wavhomba zye wámbuziizye,
kuuti ndimulola uChilisiti.
Ishi, unitishile ine ne muvhomvi waaho
kuuti mfwe ku vhutehamu.
30Aminso gaane gamulola uMuposhi,
31we umusavhuuye kuvha Muposhi
uwa vhantu avha nsi zyonti.
32Uno kuuti avhe vhuzelu uvhwa kukulolesya iwe
ku vhe te Vhaisilayeeli,
havhili kuuti aleetaje uvhushindamu
ku vhantu vhaaho aVhaisilayeeli.”
33Uyise nu maayi uwa Yeesu vhahavhanga vhakusukumila zye uSimiyooni ahayangaga kuzya mwana. 34Pisinda, uSimiyooni ahavhaloota. Havhili ahamuvhuuzya uMaliiya ahati, “Umwana uno avhisiilwe nu Mulungu kuzya vhantu avhinji mu nsi iya Isilayeeli. Avhantu vhe vhalimuhaana vhalilongwa, ileelo vhe vhalimwitiha vhaliipokwa. Uweene aliivha shilolesyo isha Mulungu kulunjisya ulukasamo lwakwe ku Vhaisilayeeli, ileelo avhantu vhalimuhaana. 35Pe izya muhati mu mooyo aga vhantu avhinji ziliivha apazelu. Niiwe, umwoyo waaho wulivwalala nkaani, ngati vhuvwalale uvhwa ipanga.”
36Havhili áliipo umukuvhwi wumo umwantanda, we vhahatinji uAana, uweene áamile mugoosi. Áamile mwana wa Fanuweeli kufuma mu luho ulwa Aasheli. UAana átendiime nu mulume waakwe amaaha 7 kufuma pe vhímaliine. 37Kufuma ipo umulume waakwe áfuuye, ahasyala muziishe, ahafisya amaaha 84 kufuma kupaapwa kwakwe. Ahavhaliilizyo honti ahavhanga pa Nyumba iMfinjile, ahamupuutaga uMulungu uvhusiku nu musanya kwi idala ilya kulaavha nu kuyiima kulya.#2:37 Kuyiima kulya: Vhaazya mu Ntantiho izya Mazwi aMajeni. 38Lwe uSimiyooni akuyanga nu Yoosefu nu Maliiya, uAana áyimiliiye papiipi navho. Pe ahanda kumutiima uMulungu kuzya mwana uYeesu nu kuyanga inongwa zyakwe ku vhantu vhonti vhe vhahasuvhilaga kuuti uMulungu alivhapoha aVhaisilayeeli.#2:38 AVhaisilayeeli: IShiyunaani shikuti iYelusaleemu.
39Avha Yoosefu nu Maliiya vhahamala kuvhomba zyonti inza vwe zyámile mu ndajizyo izya MWENE uMulungu. Pe vhahagaluha mu nkaaya yaavho iya Naazaleeti mu shigavho isha nsi isha Galilaaya. 40Woope umwana ahajendeelela kukula, ahonjelaga kuvha na maha nu vhushindamu uvhwa njeele, woope uMulungu ahamufwilaga uvhwila.
UYeesu akuyanga na vhasambiilizi pa Nyumba iMfinjile
41Amaaha gonti avhapaafi avha Yeesu vhahasogolaga mu nkaaya iya Yelusaleemu ahavhaliilizyo aha shikulukuulu isha Pasaaka.#2:41 IPasaaka: Vhaazya mu Ntantiho izya Mazwi aMajeni. 42Lwe uYeesu avha na maaha 12, ahasogola na vhapaafi vhaakwe ku Yelusaleemu ku Pasaaka, inza vwe gáamile amaata gaavho. 43Lwe insiku izya Pasaaka zyasila, avhapaafi vhaakwe vhahanda kuvhwela kuhaaya. Vhatámanyile kuuti, umwana uYeesu asyaye ku Yelusaleemu. 44Lwe vhakuvhwela kuhaaya, vhahasiivhaga kuuti, vhali pooka nu Yeesu mu mpuga, vhahajenda isiku ipuuma. Pe vhahanda kumulondola mu vhajenzi na mu vhamanyani vhaavho. 45Lwe vhatamwaga, vhahagaluha ku Yelusaleemu uku vhakumulondola.
46Lwe zyatuuha insiku zitatu kufuma pe vhéefile ku Yelusaleemu, vhahamwaga pa Nyumba iMfinjile. Átendiime pahati pa vhasambiilizi avha ndajizyo izya Moose,#2:46 Avhasambiilizi avha ndajizyo izya Moose: Vhaazya mu Ntantiho izya Mazwi aMajeni. ahavhatejelezyaga nu kuvhavhuziilizya. 47Vhonti vhe vhahamutejelezyaga, vhahasukumilaga nkaani uvhumanyi vhwakwe na zye ahavhamulaga. 48Avhapaafi vhaakwe lwe vhamulola, vhahasukumila nkaani. Pe umaayi waakwe ahamuvhuziilizya ahati, “Mwana waane, shooni she watuvhomba vhwevhulo? Yeenya, ine nu taata waaho tweleela nkaani kukulondola.” 49UYeesu ahavhaamula ahati, “Shooni she mwandondolaga? Mutaamanyile kuuti ine nkwanzilwa kuvha mu nyumba iya Taata waane?” 50Ileelo avhapaafi vhaakwe vhatahazimanyinsanya zye ávhavhuziizye.
51Pe ahagaluha na vhapaafi vhaakwe ku Naazaleeti, ahavhashindihaga. Unyina ahavhanga akuzisivhiilila zyonti izyo nu kuzivhiiha mu mwoyo. 52UYeesu ahajendeelela kukula umuvhili nu vhushindamu uvhwa njeele, ahamuhondezyaga uMulungu na vhantu.
Currently Selected:
uLuuka 2: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
