iMbombo izya Vhatumwa Uvhwandilo
Uvhwandilo
Umusimvi uwa ikalaata ili áali wu Luuka, we ásimvile ni ikalaata ilya Izwi iLyinza ilya Luuka. Mwi ikalaata ili akupanga kuuti uYeesu lwe anyatulwa kusogola ku mwanya, avhasundikwa vhaakwe vhahanda kulumbiilila Izwi iLyinza ku Vhayuuda avha mu nsi yaavho. ULuuka akupanga vwe avhasundikwa vhonti ku vhwandilo vháposheleeye uMupepo uMufinjile, na vwe uMupepo uyo ájendeleeye kuvhalongozya nu kuvhagomwa avheene pooka na vhalongozi vhaavho mu mbombo yaavho iya kulumbiilila izwi ilya Yeesu.
Mu lutuulo ulwa 1-12 uLuuka akupanga zye umutumwa uPeeteli ávhomvile, na zye zyáfumiiye ku vhiitisi avha ku Yelusaleemu. Havhili akupanga vwe uMupepo uMufinjile ávhavwizye nkaani kumanyinsanya kuuti uMulungu akwanza Izwi iLyinza ilya Yeesu likumushe ku vhantu avha mu nsi zyonti. Izwi ilyo te lya Vhayuuda vheeka. Havhili ulutuulo ulwa 13-28, uLuuka akupanga vwe uMupepo uMufinjile ámulongoziizye umutumwa uPaavhuli kusogola kulumbiilila Izwi iLyinza mu ntala inyinji izya Aasiya ni zya mu Vhulaaya nu kumaliilizya mu nkaaya iya Luumi. Mwi ikalaata ili asimvile inongwa zimo zye umutumwa uPaavhuli álumbiliiye. Izyo zikutwavwa iswe kumanyinsanya vwe avhatumwa vhálumbiliiye Izwi iLyinza ilya Yeesu ku vhantu avha mavhiila mu mavhiila, na zye vháhomiine nazyo lwe vhakulumbiilila.
Zye zili mwi ikalaata ili
Uvhwandilo uvhwa shivhanza isha Mulungu 1:1--5:42
Amayimba aga vhiitisi lwe vhakulumbiilila Izwi iLyinza 6:1--9:31
Imbombo iya Peeteli 9:32--12:25
Uvhulendo uvhwa kwanda uvhwa Paavhuli kusogola kulumbiilila 13:1--14:28
Uluhomaano ulwa ku Yelusaleemu 15:1-41
Uvhulendo uvhwa vhuvhili uvhwa Paavhuli kusogola kulumbiilila 16:1--18:22
Uvhulendo uvhwa vhutatu uvhwa Paavhuli kusogola kulumbiilila 18:23--21:14
Kulemwa ukwa Paavhuli nu vhulendo vhwakwe kusogola ku Luumi 21:15--28:31
Currently Selected:
iMbombo izya Vhatumwa Uvhwandilo: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.