uYoohani 21
21
UYeesu akuvhaloleshela avhasundikwa vhaakwe mu shigavho isha nsi isha Galilaaya
1Lwe ahavhaliilizyo hatuuha, uYeesu ahavhaloleshela havhili avhasundikwa vhaakwe pa luvhazu pa sumbi uwa Tibeeliya.#21:1 Tibeeliya lizina ilyamwavho ilya sumbi uwa Galilaaya. Lwe ashiili kuvhaloleshela zyáli ishi, 2uSiimoni uPeeteli nu Toomasi we vhahamwitaga vhahatinji Ipasa nu Nasaniyeeli we áfumile mu nkaaya iya Kaana iya ku Galilaaya, na vhaana vhavhili avha Zebedaayi#21:2 Avhaana vhavhili avha Zebedaayi: Amazina gaavho vháali vhe vha Yaakobu nu Yoohani. na vhasundikwa avhamwavho vhavhili vháali vhonti pooka. 3USiimoni uPeeteli ahavhavhuuzya avhamwavho ahati, “Nasogola kwa sumbi kuvuvha inswi.” Vhoope vhahayanga vhahati, “Niiswe kwe tusogole pooka niiwe.” Pe vhahasogola, vhahinjila mwi ivhooti, vhahavuvha vhusiku vhwonti, ileelo vhatahalema inswi inga yooka. 4Inzanshi lwe kukuvhambunkana, uYeesu ahimiilila pa luvhazu pa sumbi, ileelo avhasundikwa vhaakwe vhatahamumanya kuuti wu Yeesu. 5Pe uYeesu ahavhavhuziilizya ahati, “Mwe vhaana vhaane, muli ni nswi inga yooka?” Avheene vhahamwamula vhahati, “Naayimo.” 6UYeesu ahavhavhuuzya ahati, “Teji ulwelo uluvhazu ulwa kundiilo ulwa ivhooti, kwe muleme inswi.” Pe vhahatega ulwelo mwa sumbi. Pisinda, vhahanda kulukwesa, ileelo vhahapootwa, mwe pe inswi zyáli nyinji nkaani. 7Umusundikwa ula we uYeesu ámukunzite, ahamuvhuuzya uPeeteli ahati, “Uno wu Mwene!” Lwe uSiimoni uPeeteli ayiivwa kuuti wu Mwene, ahazwala amenda gaakwe ge ázuuye lwe aakuvuvha inswi, ahayigwilizya mwa sumbi. 8Avhasundikwa avhamwavho vhahasogola pa luvhazu pa sumbi ni ivhooti she vhakulukwesa ulwelo lwe lwízuuye inswi, mwe pe vhatáamile apatali na pa luvhazu pa sumbi. Kufuma pe vháali na pa luvhazu pa sumbi páali uvhutali uvhwa ntambwi 100 ishi.
9Lwe vhaafiha pa luvhazu pa sumbi, vhahawulola umwoto uwa mazimwa, pa mwoto ipo páamile inswi ni ikaati. 10UYeesu ahavhavhuuzya ahati, “Leeti inswi zimo zye mwalema ishi.” 11Pe uSiimoni uPeeteli ahinjila mwi ivhooti, ahakwesela pa luvhazu ulwelo lwe lwízuuye inswi. Mu lwelo umwo mwáli inswi impiti 153. Pooka nu kuuti inswi zyámile nyinji nkaani, ulwelo lutádumusile naapamo. 12UYeesu ahavhiita avhasundikwa vhaakwe ahati, “Nzaaji mulaavhushe.” Atáliipo umusundikwa naawumo we álinzile kumuvhuziilizya kuuti, “Vhuli, iwe we naanu?” Vhatámuvhuziliziizye, mwe pe vhámanyile kuuti wu Mwene. 13UYeesu ahapalamila, ahanyatula ikaati nu kuuvhapa avhasundikwa vhaakwe. Havhili ahanyatula zyope inswi, ahavhomba inza vhwevhulo. 14Ulwo lwáli lwa vhutatu uYeesu kuvhaloleshela avhasundikwa vhaakwe, lwe uMulungu amuzyusya.
UYeesu akuyanga nu Peeteli
15Lwe vhalaavhuha, uYeesu ahamuvhuziilizya uPeeteli ahati, “We Siimoni mwana wa Yoohani, vhuli, unkunzite nkaani kuluusya ivintu ivi ivwa kuvuvhila inswi?#21:15 Vhuli, unkunzite nkaani kuluusya ivintu ivi ivwa kuvuvhila inswi? Amazwi ge gatantuliilwe ishi, lumo kwe kuuti, Vhuli, unkunzite nkaani kuluusya avhamwinyu ivha vwe vhankunzite? Havhili lumo kwe kuuti, Vhuli, unkunzite nkaani kuluusya vwe uvhakunzite avhamwinyu ivha?” UPeeteli ahamwamula ahati, “Eena Mwene, iwe umanyile kuuti nkukunzite.” UYeesu ahamuvhuuzya ahati, “Udiimaje ingʼonzi zyane.”
16UYeesu ahamuvhuziilizya uPeeteli ulwa vhuvhili ahati, “We Siimoni mwana wa Yoohani, vhuli, unkunzite?” UPeeteli ahamwamula ahati, “Eena Mwene, iwe umanyile kuuti nkukunzite.” UYeesu ahamuvhuuzya ahati, “Udiimaje ingʼonzi zyane.”
17Ahamuvhuziilizya ulwa vhutatu ahati, “We Siimoni mwana wa Yoohani, vhuli, unkunzite?” Pe uPeeteli ahaswimiililwa, mwe pe amuvhuziilizya ulwa vhutatu kuuti, “Vhuli, unkunzite?” Ahamwamula ahati, “We Mwene, iwe umanyile zyonti. Umanyile kuuti, nkukunzite.” UYeesu ahamuvhuuzya ahati, “Udiimaje ingʼonzi zyane. 18Nalyoli nkukuvhuuzya kuuti, lwe we mujaaha, uhayizwalizyaga amenda weeka nu kusogola kwonti kwe ukwanza. Ileelo lwe wagoosipa, uligolosyaga inyoovhe zyaho, nu muntu uwunji we alikuzwalizyaga, nu kukutwala kwe utakwanza.” 19UYeesu áyanzile izyo kulolesya vwe uPeeteli aliifwa kwi idala ilya kulolesya uvhushindamu uvhwa Mulungu. Lwe uYeesu ayanga amazwi igo, ahamuvhuuzya uPeeteli ahati, “Undandate.”
20Pe uPeeteli ahashevhela mwisinda, ahamulola umusundikwa we uYeesu ámukunzite akuvhalandata. Umusundikwa uyo we átendiime papiipi nu Yeesu lwe vhaakulya ishaakulya isha Pasaaka, nu kumuvhuziilizya kuuti, “We Mwene, wu naanu we kuuti akwaniile?” 21Pe lwe uPeeteli amulola umusundikwa uyo, ahamuvhuziilizya uYeesu ahati, “We Mwene, shintu vhuli she kwe shimwaje umusundikwa uno?” 22UYeesu ahamwamula uPeeteli ahati, “Inga nkwanza kuuti uno avhe mulanzi kufishila lwe nkugaluha, shooni she iwe izyo zikukutamwa? Iwe undandate ine.” 23Amazwi igo ge uYeesu áyanzile gahivwiha ku vhasundikwa avhinji, pe vhahasiivha kuuti umusundikwa uyo te ahaafwe. Ileelo uYeesu atámuvhuziizye umusundikwa uyo kuuti te ahaafwe, átili, “Inga nkwanza kuuti uno avhe mulanzi kufishila lwe nkugaluha, shooni she iwe izyo zikukutamwa?”
24Umusundikwa uyo we akuhomeshezya izi nu kuzisimba. Niiswe tumanyile kuuti zye akuhomeshezya zya nalyoli.
UYeesu ávhomvile ni zinji inyinji
25Ziliipo izinji inyinji zye uYeesu ávhomvile, ileelo zitasimviilwe. Inga zyonti zisimbwaje, nkulola kuuti insi yonti, nkandi yitali nu vhuzilo uvhwa kukwilana kusengula amakalaata gonti igo.
Currently Selected:
uYoohani 21: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
