Lukas 17

Siya-siya jama ma moo pagkahi na buwat dusa

(Matiyu 18.6-7; 18.21-22; Malkus 9.42)

1Pag-anu, yuk si Isa ni siga mulit na, “Ni junyaꞌ tuu meka sina sasat kaboo-boo manusiyaꞌ buwat dusa, tud yaꞌ sina tatangkisan. Sugaꞌ tud siya-siya sina mintu soysoy bay moo sasat meꞌ looy. 2Jama meꞌ looy ilay, gam na bay ginantungan kallong na ka batu mehe, boꞌ na llabuhan ni tangngaꞌ sallang. Daa jaꞌ ya moo-moo siga sukuꞌ ku ma yaꞌ gi taggu iman da buwat dusa. 3Sangkon, jagahan bi dī bi.

“Na bong luu disu pagkahi bi mulit ku buwat dusa ningkaam, saggongun bi. Maka bong ya nawbat, ampunun bi ya. 4Minsan du ya min pituꞌ njawom dangallaw buwat dusa ningkaam, bong ya magbeleng-beleng maku ampun tuktuk na bay buwat dusa, ampunun bi sadjaꞌ.”

Yaꞌ luu tunmanūn bong luu pangando tabi pa Tuhan

5Pag-anu, yuk siga rasul si Isa, “Tuwan, bong anu, toan doꞌ kami mari pabasag na pin pangando kami pa Tuhan.”

6Yuk si Isa ninsila, “Bong siꞌ ina luu jaꞌ dangkitiꞌ pangando bi pa Tuhan, san lasa bateheꞌ-teheꞌ bigi mustard, takaya bi jaꞌ sina minsan pabuwatan tunmanūn pa manusiyaꞌ. San gi ina sohoꞌ bi poon kayu naa pungkad boꞌ nohoꞌ nanom dī na ni dilawut, mastiꞌ inasip jaꞌ du kam.”

Subay ingat tabi dī tabi ata Papuꞌ

7Pag-anu, yuk si Isa lagi, “Bong sabagay luu ata bi bohoꞌ takka moleꞌ bay madjaꞌ ni huma atawa bay makan bili-bili, yaꞌ sina ya sohoꞌ bi duhuꞌ mangan. 8Gam pin yuk bi, ‘Saynan nu na badjuꞌ nu. Busahan nu doꞌ ku, boꞌ nu motang. Noy ku lupus na mangan, boꞌ nu pasīng.’ 9Maka yaꞌ sina talpaksaꞌ ningkaam magsuku ni ata bi sukat ya bay ngasip panohoan bi. Ndang inaa sukuꞌ na. 10Subay siꞌ meꞌ naa du kam. Pus bi bay buwat mimon ma bay sinohoꞌ meꞌ Tuhan ningkaam, daa kam ngingat ga subay na pin ya magsuku ningkaam. Arapun ingatun bi ata Tuhan sadjaꞌ kam buwat sagannap ma bay sinukuꞌ ningkaam.”

Si Isa ngulian jama inipu sapū

11Na pag palanja ga si Isa pa Jerusalem, lay sila pingkaꞌ ni panggaan Samariya ka Jalil. 12Saddong da adak paasok pa disu kawum, luu na baw sapū jama inipu pasōng pa mman si Isa. Sugaꞌ sabap inipu sila, lay doꞌ sila patagong lawak-lawak gi man si Isa 13sampay ngahowap, yuk da, “Ū Tuwan Isa, panimbangan doꞌ kami!”

14Pag ndaꞌ si Isa meꞌ looy, yuk na, “Pilay na kam ba pa mman siga imam boꞌ sōn bi na pinaliksaꞌ ninsila kuwit bi.” Dari siꞌ, lay na jaꞌ sila ngasip pilay pa mman siga imam. Lān da siꞌ pilay, lay na lanyap ipu da.

15Kuwan disu ninsila, pag ndaꞌ na kaulian na ya, lay doꞌ magti pabeleng sambayan na sigi-sigi ngahowap muwan pudji pa Tuhan. 16Pag takka na pa mman si Isa, lay ya sujud ni awpan na sambayan na magsuku. Iya ilay siꞌ bangsa Samariya.

17Yuk si Isa, “Uy la, saꞌ ba, sapū siꞌ kam bay kaulian? Ninggai na lay siꞌ ilooy ma siyam? 18Ongoy itu lalla tuu sa bay pabeleng pitu muwan pudji pa Tuhan? Boꞌ saꞌ gi ga ya bangsa Yahudi!” 19Pag-anu, yuk si Isa ni lalla looy, “Nangge na ko ba boꞌ nu moleꞌ. Lay na sina ko kaulian sabapan pangando nu niyaku.”

Katakka pamarinta Tuhan

(Matiyu 24.23-28; 24.37-41)

20Pag-anu, disu llaw, lay na baw si Isa tinilaw meꞌ siga Parisi bong sumilan pamarinta Tuhan pinatangge taꞌ junyaꞌ.

Pag tampung na, “Katakka pamarinta Tuhan ina yaꞌ takita ka mata. 21Pag takka na ina, yaꞌ luu jama halling, ‘Atu na ntuu!’ atawa ‘Alay na ndooy!’ Batan pamarinta Tuhan ina, man na patannaꞌ, njawom atay jama.”

22Pag-anu, yuk si Isa ni siga mulit na, “Luu du sina mintu masa maglogtoꞌ na kam doman ngita Anak Manusiyaꞌ, yana aku, san lasa dangallaw, sugaꞌ yaꞌ gi luu dapat bi. 23Sangkon, san sabagay mintu luu māꞌ ningkaam, ‘Luu na Almasi takka ndooy,’ atawa ‘Luu na ntuu,’ daa kam hidjab maka daa kam mmeꞌ miha aku. 24Batan aku, yana Anak Manusiyaꞌ, pag beleng ku bbos-bbos, tumatandaꞌ na sina ni sikamimon meꞌ karuha mangirat sonse man dambilaꞌ langit pa dambilaꞌ. 25Sugaꞌ talpaksaꞌ doꞌ sina mintu niyaku duhuꞌ lumingkaꞌ njawom jinisan kabinsanaan sampay tinuwak meꞌ jama angkat-angkatan batnaa.

26“Pag beleng ku ina mintu, tud takurat sina manusiyaꞌ meꞌ kadari jama ni bay jaman Nabi Nū mattoꞌ. 27Jaman looy ilay, yaꞌ bay taingat da ga luu balaꞌ takka pa mman da ni sinōng. Dari bbuwatan da llaw pa dangallaw meꞌ ndang kabiyasahan da du, nginum ka mangan sampay sitampu-tampu. Sugaꞌ pag taabut llaw man ga Nabi Nū bay dutai taꞌ bahitlaꞌ, sakayi ga jama lahat looy kasayu, takka na dunuk sampay lay na sila matoy limbo sikamimon.

28“Damikiyan, meꞌ looy du silay bay kadari jama ni bay jaman si Lut maglahat ndooy ni Sodom. Yaꞌ du bay taingat da ga luu balaꞌ song takka pa mman da. Dari bbuwatan da meꞌ ndang kabiyasahan da du, nginum ka mangan sampay maglitu ka tanom-tanom ka buwat lumaꞌ, meꞌ naa, meꞌ naa. 29Sugaꞌ pag taabut llaw ga si Lut bay lakka man Sodom, sakayi ga jama ndooy kasayu, kalabuan na sila manilang noleyab pōꞌ man taꞌ langit meꞌ kadari uwan, sampay lay na sila ampud labbasakayi. 30Damikiyan, pag beleng Anak Manusiyaꞌ itu bbos-bbos, yaꞌ du taingat jama.

31“Sangkon ndang subay kam saddiya ni llaw katakka ku. Hati na, daa na kam mandang hāl junyaꞌ. Maka daa na subay na pin altaꞌ inisbat meꞌ bi. Pag takka ku ina mintu, yaꞌ na luu waktu man jama paasok pa lumaꞌ da ngaddoꞌ altaꞌ da. Atawa bong jama buwat ni huma na, yaꞌ na du luu waktu man na moleꞌ ngaddoꞌ buwatan na. 32Intomun bi na ilooy ma bay katuwaꞌ ni nda si Lut mattoꞌ.#(17.32) Man sabapan nda si Lut bay mandang hāl junyaꞌ, yaꞌ bay asip na malaikat Tuhan bay mandaan iya. Dari lay du ya tumabeꞌ matoy ni siga jama Sodom. Ndaun Panagnaan ni Awwal Jaman 19.26. 33Hantak bitsala ku ilay siꞌ, soysoy ina numbul satu niiya meꞌ na nulut dī na halloman na ntuu ni junyaꞌ, mastiꞌ tiksaꞌ jaꞌ nyawa na saumu. Sugaꞌ soysoy ina yaꞌ mean kahandak na bong pin tabean na kahandak ku, sampulnaꞌ nyawa na labba man junyaꞌ sampay pa ahirat.

34“Baan ta kam, pag taabut katakka ku ina mintu, kasohean jama salamat, kasohean niyaꞌ. Sawpama bong ku takka ni sangom sasang duwa jama ni bangkuꞌ, bong luu disu pitsayaꞌ niyaku, ilooy taboo, kuwan ilooy disu, inambanan. 35Atawa bong sawpama luu mintu danda magginduwa nappa, bong luu disu pitsayaꞌ, ilooy taboo, kuwan ilooy disu inambanan. 36Atawa pun sasang duwa lalla buwat ni huma, disu binoo, kuwan ilooy disu inambanan.”

37Pag-anu yuk ga mulit si Isa niiya, “Papuꞌ, binoo paninggai lay la?”

Pag tampung si Isa, lay makoy sambatan, yuk na, “Ndang bong ina luu sumpatoy, mastiꞌ luu du sina pumpung siga manuk-manuk ma mangan sumpatoy.”#(17.37) Ndaun futnot ni Matiyu 24.28.

Currently Selected:

Lukas 17: sjm

Highlight

Copy