Panagnaan 48

Si Yaꞌkub makuhan siga anak si Yusup supaat

1Pag-anu siꞌ, luu disu llaw lay na baw kabaan si Yusup saki mmaꞌ na. Dari lay du ya pilay pa mman mmaꞌ na. Maka luu du bay boo na anak na sikaduwa, yana si Epraim ka si Manasse. 2Na lay jaꞌ siꞌ kabaan si Yaꞌkub luu na si Yusup, ilooy ma lay du ya magtuyuꞌ bangun, boꞌ na ningkōꞌ taꞌ patulihan na. 3Pag-anu siꞌ, yuk si Yaꞌkub ni si Yusup, “Toꞌ, jaman ku ni Luz ndooy ni Kanan, lay ku tinammuhan meꞌ Tuhan Sangat Kawasa, boꞌ lay gi ku supaatan na. 4Yuk na niyaku, ‘Buwanan ta ko panubuꞌ paeka, maka bbuwat ta kam disu bangsa balkanan sampay tabeꞌ na jinisan bangsa ningkaam.’ Maka yuk Tuhan niyaku, ‘Dean ku na sina mintu tanaꞌ Kanan ni siga panubuꞌ nu, boꞌ sila na dapu pangkat-mamangkat saumu.’ ”

5Pag-anu, yuk si Yaꞌkub lagi ni si Yusup, “Ga anak nu ina si Epraim ka si Manasse, aku ku na anak ku. San sila bay pinamaddihan ntuu ni Ejip jaman ku masi ni Kanan, itung ku na du sila anak ku rahasiyaꞌ sibuꞌ ka si Ruben, si Simiyun sampay na kaam sikamimon ga anak ku. 6Bong hati ko mintu bay gi hanak balik, bohoꞌ na tud ningkau na. Dari bbos-bbos, pag taabut binahagiꞌ tanaꞌ ni Kanan, pusaka ninsila subay lakka man bahagiꞌ si Epraim ka si Manasse. 7Ngkon itu ku buwat meꞌ tuu ni si Epraim ka si Manasse sabapan aseꞌ ku ni imuwa nneꞌ nu. Iya ilay bay matoy lān tabi bay moleꞌ pa Kanan lakka man Paddan-Aram. Yaꞌ gi kitabi bay ngabut Eprat ma ginalla du Betlehem, lay na ya kubu ku ni bihing lān pagka tā gi lahat tiluꞌ tabi.”

8-10Na ni katoa si Yaꞌkub na, yaꞌ na tampak mata na. Dari pag takita na ga anak si Yusup, tilaw na, “Soy na ga jama naa?”

Tampung si Yusup, “Ga anak ku bina Maꞌ, ladjikiꞌ ma bay dean Tuhan niyaku ntuu ni Ejip.”

Yuk si Yaꞌkub, yana si Israil, “Bōn na pitu. Pakuhan ku na sila supaat pa Tuhan.” Dari siꞌ lay na sila sinongan meꞌ si Yusup pa mman mmaꞌ na sampay lay na sila kakkopan si Israil sambayan da inūk. 11Yuk si Israil ni si Yusup, “Yaꞌ na ku la bay ngaholat ga ngita luwa nu lagi pabalik, boꞌ ko, sampay ga anak nu lay gi du ku pakitahan Tuhan.”

12Pag-anu siꞌ, lay doꞌ siyahan si Yusup ga anak na man bihing tuut bboꞌ da, boꞌ na sujud ni awpan mmaꞌ na. 13Pag-anu siꞌ, lay na pinabalik meꞌ si Yusup siga anak na pa awpan mmaꞌ na supaya tahan da sinupaatan na. Kuwan si Epraim, lay nnaꞌ si Yusup huwin pa kayli mmaꞌ na sabap iya siyali. Kuwan si Manasse ma siyaka, lay nnaꞌ na huwin pa kawnan. 14Sugaꞌ pag tappak si Israil bumbunan da, lay bay sinamban meꞌ na langngon na. Dari kuwan tangan na huwin pa kawnan, lay nappak pa taꞌ bumbunan si Epraim san iya siyali. Kuwan kayli na, lay nappak pa taꞌ bumbunan si Manasse.

15Pag-anu siꞌ, lay na si Israil makuhan ga anak si Yusup supaat, yuk na, “Ū Tuhan ku, kau ma bay inisbat meꞌ Boꞌ ku Ibrahim ka mmaꞌ ku si Isahak, kamura-murahan sinupaatan du ga anak-anak tuu meꞌ nu. Yana meꞌ nu bay nabang aku sampay bay ngunungan aku man kadikiꞌ ku sampay batnaa, kamura-murahan meꞌ looy du mintu meꞌ nu buwat sila. 16Maka kamura-murahan sinupaatan du ga anak-anak tuu meꞌ malaikat ma bay maddusan aku man mimon bahaya njataꞌ ku. Kamura-murahan man sabapan ga anak-anak tuu, pinaehe du awon ku ka awon mmaꞌ ku si Isahak sampay na awon Boꞌ ku Ibrahim. Kamura-murahan paeka boꞌ paeka na pin panubuꞌ da taꞌ babaw junyaꞌ ngabut sampay yaꞌ na sila taambat.”

17Kuwan si Yusup siꞌ tu, pag ndaꞌ na buwatan mmaꞌ na bay matappak kawnan na taꞌ bumbunan si Epraim ma siyali, yaꞌ ya kasaddongan. Dari lay sakkop na kawnan mmaꞌ na man bumbunan si Epraim lān hinalin pa bumbunan si Manasse 18sambayan na halling, “Magsāꞌ bina ko Maꞌ. Daa busung, ntē ba man nu matappak kawnan nu taꞌ bumbunan ma siyaka.”

19Sugaꞌ tud yaꞌ baw kuhi mmaꞌ na ngahalin tangan na, sampay yuk na, “Katoonan ku du sina Toꞌ. Balkanan du sina mintu siga panubuꞌ si Manasse, sugaꞌ labi gi ni ariꞌ na. Batan siga panubuꞌ si Epraim ina mintu poonan jinisan kabangsa-bangsahan.” 20Maka yuk si Israil ni siga mpu na, “Awon bi ina mintu pinakoy na meꞌ bangsa Hibrani man makuhan ga anak-mpu da supaat, batan yuk da ina mintu, ‘Kamura-murahan sibuꞌ du kadari bi ka bay jaman si Epraim ka si Manasse.’ ” Na ngkon na ilay bay pinaduhuꞌ sinabbut meꞌ si Israil awon si Epraim batan bbos-bbos patingkat ya labi man si Manasse.

21Pag-anu yuk si Israil ni si Yusup, “Yaꞌ na hallom matoy na situ ku, sugaꞌ yaꞌ du sina kam pinabiya meꞌ Tuhan. Masi gi kam inunungan meꞌ na. Bbos-bbos tuhiyanan na du sina kam pabalik pa tanaꞌ looy ma bay njanjiꞌ ni siga kabboꞌ-bboan tabi.” 22Maka yuk si Israil lagi ni si Yusup, “Luu silay pusaka dean ku kau ma yaꞌ luu kabigiꞌ-bigian ga danganakan nu. Dean ku na kau tanaꞌ looy ma bay takoleꞌ ku man siga bangsa Amol ka kataliꞌ ku sampay panaꞌ ku.”

Currently Selected:

Panagnaan 48: sjm

Highlight

Copy