Panagnaan 49

Si Yaꞌkub ngambanan bitsala ni siga anak na

1Pus meꞌ looy, lay na tawag si Yaꞌkub ga anak na. Luu jaꞌ siꞌ sikamimon, yuk na, “Kumpo kam ni bihing ku, boꞌ bi baan ku bong oy kaadaan bi ni sinōng. 2Tu na kam siga anak ku. Pakalehun bi na bitsala mmaꞌ bi.

3“Kau ina Ruben, pagka kau anak siyaka, kau na anak ku duhuꞌ tandaꞌ ni pagkalalla ku. Bay na silay sinukuꞌ ningkau patingkat ni kabantugan ka kawasa, labi man mimon danganakan nu, 4sugaꞌ lay na timanan nu ladjikiꞌ nu. Sibuꞌ du ko ka dunuk yaꞌ takoleꞌ sinapad, batan yaꞌ bay luu og-og nu magkamuklahan ka nda ku bay llaw looy.

5“Kaam ina, Simiyun ka si Libay, dambuwaꞌ mukalnaꞌ kam. Bong kam lasu na, yaꞌ luu og-og bi ngaddoꞌ pakakas monoꞌ ni kapasuꞌ atay bi. 6Bong kinawnan pag-isunan bi, tud yaꞌ ku doman palamud. Bila kam kumpo-kumpo na magmiting, yaꞌ ku doman tabeꞌ batan kadiyoꞌ ni awon ku. Bong kam lasu na, yaꞌ luu og-og bi numpahan lahaꞌ jama. Ni kadahulakaꞌ bi, tigiꞌ kam mintohan sapiꞌ jama. 7Sabap biddaꞌ na pasuꞌ atay bi, sumpaan ta na sina kam sampay na ga panubuꞌ bi. Bbos-bbos ina magpilulān na jaꞌ siga panubuꞌ bi ni sikaliput lahat tabi Israil.

8“Kau ina Juda, pinudji ko ni sinōng meꞌ siga danganakan nu sampay pakokoꞌ gi sila magpadiyoꞌ ni awpan nu. Maka soysoy ina mintu manta kau, mastiꞌ ā jaꞌ sila meꞌ nu. 9Kau ina Juda tadalil pa halimaw bohoꞌ lupus bay mangan sabbatan na boꞌ na pabeleng pa pahaliyan na pahangkop-hangkop. Boꞌ yaꞌ san luu katawakka ngusik-ngusik iya. 10Maka Juda, luu sina mintu siga panubuꞌ nu magsunuꞌ-sunuꞌ magsultan ni lahat tabi. Boꞌ luu gi sina mintu lahil panubuꞌ nu ilooy ma yaꞌ na kuhi labbos pagkasultan na saumu. Iya ina mintu yana sultan ma inasip meꞌ mimon kabangsa-bangsahan.#(49.10) Panubuꞌ si Juda ilay siꞌ ma yaꞌ kuhi labbos pagkasultan na saumu, yana si Isa Almasi. 11Maka sultan looy ilay mintu, man na ngingkotan kuraꞌ na, ni poon anggul ma numbul satu. Pamakoy na meꞌ bantuk lay popoan na njawom tubaꞌ anggul akket.#(49.11) Meꞌ kasohean mista, poon anggul ma numbul satu tuwaꞌ pa bangsa Israil. Ndaun Kitab Nabi Jeremaya 2.21, Kitab Nabi Isaya 5.7 ka Kitab Jabul 80.8. Ni hāl meꞌ sultan looy ngingkotan kuraꞌ na ni poon anggul ma numbul satu, meꞌ kasohean mista, hatiyan na, sultan looy turunan bangsa Israil. Meꞌ kasohean mista, pamakoy sultan looy meꞌ bantuk lay popoan na njawom tubaꞌ anggul akket tuwaꞌ pa lahaꞌ na bay tumpa pa taꞌ juba na taabut na llagpiꞌ. Ndaun Yahiya 19.1 ka Siga Pakaradjaan Pinalahil 19.13. 12Mata na ina mintu akket meꞌ karuha mata jama ma bahau jaꞌ bay nginum tubaꞌ anggul paeka. Maka impon na poteꞌ gi man gatas.#(49.12) Meꞌ kasohean mista, kon mata sultan looy akket sabap luu jinisan kabinsanaan lay talingkaꞌ na. Maka meꞌ kasohean mista, “impon na poteꞌ gi man gatas” tuwaꞌ pa kabanahan ma pōꞌ man behe na.

13“Kau ina Zebulun, siga panubuꞌ nu ina mintu maglahat ni bihing tapiyan. Ni kaayad tapiyan da, meka adjung labu. Ni kaluha tanaꞌ ga panubuꞌ nu, panggaan da ngabut sampay pa Saydon.

14“Kau ina Isakal, tadalil pa disu kuraꞌ timbasok lay pabāk sasang masi luu uwanan na duwa bakaꞌ bay sinalay. 15Pag takita jaꞌ meꞌ na lahat ma tiluꞌ na ayad man pahali, ngamasag na ya sampay kuhi na jaꞌ ya moo san du pooy bohat barang inuwan njataꞌ na.

16“Kau ina Dan yana disu pa-mmean mawsan bangsa nu. Sabapan nu, magtaayun na sikasapu-duwa lūng-kampung bangsa Israil. 17Meꞌ nu ina mawos, sibuꞌ du sina mintu karuha nu ka sō ni bihing lān ninduk battis kuraꞌ sampay man jama na na humayaꞌ.”

18Pag-anu siꞌ, lay doꞌ si Yaꞌkub patagong mitsala ni anak na sakāng. Pag-anu, boꞌ na halling na baw pa Tuhan, “Papuꞌ, itu na pin ku ngagad katakka kasalamatan ma papitu nu bbos-bbos.”

19Pag-anu yuk na, “Kau ina Ged, llān sina ko mintu meꞌ baanan mundu, sugaꞌ gam pin ina mintu, sila gi inonse meꞌ nu sampay binonoꞌ.

20“Kau ina Asel, makanan nu ina mintu mahap-mahap jaꞌ, boꞌ ilooy na silay mintu man motangan siga sultan.

21“Kau ina Naptali, bbuwatan nu ina mintu masampay umanat mahap. Sibuꞌ du karuha nu ka usa pinalappa, sumunsayaꞌ na ngalataan lahat.”

22Pag-anu yuk si Yaꞌkub ni si Yusup, “Kau ina Yusup, tadalil pa poon anggul labung buwaꞌ na ni bihing poon boheꞌ. Minsan luu na kutaꞌ ni bihing na, amu-amu palele ga engas na pa dambilaꞌ. 23Kau ina Yusup, bay ko pingkaꞌ meꞌ sapantun pinanaꞌ meꞌ sagannap ma ginigit ningkau. 24Sugaꞌ san pooy meꞌ da bay buwat kau, yaꞌ du bay kuhi tungkas iman nu. Batan luu na pin Tuhan Sangat Kawasa ma sinumba meꞌ ku bay ngunungan kau sampay nganggaosan kau. Iya na sina ndang tukang ngayaran aku. Maka iya na du sina tadalil pa batu mehe man si Israil, yana aku, palimbu man bahaya. 25Kamura-murahan luu na pin Tuhan ku Sangat Kawasa nabangan kau sampay muwanan kau uwan man jataꞌ ka boheꞌ man jawom tanaꞌ. Maka kamura-murahan llipat du meꞌ Tuhan eka panubuꞌ bi ka hayop bi.” 26Maka yuk si Yaꞌkub lagi, “Yusup, siga supaat ma bay nnaꞌ Tuhan ni jataꞌ ku, mas hagaan gi man mimon ladjikiꞌ tatammu ni kapunu-punuhan ma ndang luu na man awwal jaman lagi. Kamura-murahan mimon supaat njataꞌ ku labuꞌ pa jataꞌ nu du. Kau ina panghuluꞌ ni siga danganakan nu.

27“Kau ina Benjamin, tadalil pa disu halimaw pōꞌ sayu-sayu miha sabbatan na. Luu-luu takoleꞌ na, magti ya mangan ni kabongtas na. Pag deꞌ kohap, pahampitan na na siga soheꞌ na ma takapin.”

28Dari ilooy na silay siꞌ bitsala bay mbanan si Yaꞌkub ni siga anak na kaniya-kaniya ka bitsala ma pataꞌ ninsila. Siga anak na ilay siꞌ sikasapu-duwa yana poonan ga lūng-kampung sikasapu-duwa ma bay dari bangsa Israil.

Kapatoy si Yaꞌkub

29Pag-anu siꞌ, yuk si Yaꞌkub ni ga anak na, “Yaꞌ na hallom, patuhut na situ ku ni kabboꞌ-bboan ku pilay pa ahirat. Pag kam mintu ngubu aku, subay ni bihing induꞌ-mmaꞌ ku du ndooy ni lowang pampang ni bay tanaꞌ si Epron, bangsa Hīt looy. 30-32Lowang pampang looy ilay luu ndooy ni Makpela tapit pa Mamre ndooy ni Kanan. Tanaꞌ looy ilay ddas ka lowang pampang na bay binalli meꞌ Boꞌ Ibrahim man si Epron halliꞌ man ngubu. Boꞌ ndooy na du silay man Boꞌ Ibrahim ka Boꞌ Sara bay kinubu. Sinneꞌ pun ka Simmaꞌ, ndooy na du man da bay kubu ku sampay na si Liya.”

33Paddus jaꞌ si Yaꞌkub bay ngamban-ngamban ni ga anak na, ilooy ma lay na ya pabāk taꞌ patulihan na sampay lay na makkat.

Currently Selected:

Panagnaan 49: sjm

Highlight

Copy