Panagnaan 50

1Pag ndaꞌ si Yusup lai na makkat mmaꞌ na, bbuwatan na nangis sambayan na ngūk luwa na.

2Pag-anu, lay na sohoꞌ si Yusup kinapul mayat mmaꞌ na ni siga tukang ngintu mayat. 3Halloman mayat na kinapul luu mpatpūꞌ ngallaw batan ndang ilooy arat-tabiat bangsa Ejip. Maka luu pitumpūꞌ ngallaw halloman si Yaꞌkub bay pinaglinduhan meꞌ bangsa Ejip.

4Paddus pitumpūꞌ ngallaw looy siꞌ, yuk si Yusup ni ga kunsihal sultan, “Bong siꞌ kadarihan ningkaam, puhunan bi doꞌ ku ni sultan. 5Baan bi ya bong siꞌ ku tugutan na, boo ku doꞌ mmaꞌ ku kinubu pilay pa Kanan. Batan bay sohoꞌ mmaꞌ ku sinapahan niyaku, basta subay ya kubu ku ni pangubuhan ma ndang bay panyap na ndooy ni Kanan. Sangkon bong siꞌ ku tugutan sultan, pilay na doꞌ ku, boꞌ ku sa pabeleng.”

6Lay jaꞌ siꞌ sultan kabaan, yuk na, “Sōn bi na binoo pilay mmaꞌ na kinubu pagka ndang inaa bay sapahan na ni mmaꞌ na.”

7-8Dari siꞌ, lay na si Yusup pilay pa Kanan ngubu mmaꞌ na. Maka luu du bay mmeꞌ niiya ga jama lumaꞌ na ka ga danganakan na sampay jama lumaꞌ mmaꞌ na. Ilooy du yaꞌ bay boo da, ga anak da ma dikiꞌ ka ga baanan hayop da. Lay jaꞌ sila sinohoꞌ inipat ndooy ni Gosen. Maka meka du jama Ejip bay mmeꞌ ni ga si Yusup, ga jama astanaꞌ sultan ka ga mimon kunsihal na sampay mimon ma langkaw ntan da ni parinta Ejip. 9Siga sundalu sultan pun, luu du bay mmeꞌ ni ga si Yusup, kasohean taꞌ kalesa, kasohean taꞌ kuraꞌ jaꞌ. Dari siꞌ, biddaꞌ na eka manusiyaꞌ bay mmeꞌ pilay.

10Takka jaꞌ siꞌ sila pa dambilaꞌ Sōng Juldan, lay doꞌ ga si Yusup pahantiꞌ ni Atad ni bihing panganggiokan pawoy ndooy. Ndooy siꞌ, lay na baw sila magkarukkaan ni mmaꞌ si Yusup njawom pituꞌ ngallaw. 11Pag takita jaꞌ siꞌ sila maglindu meꞌ bangsa Kanan ma maglahat ndooy ni Atad, yuk da, “Tud mehe la paglinduhan siga bangsa Ejip looy.” Dari labba mandooy, lahat looy ni bihing Sōng Juldan lay na inawnan Abel Misraim, hatiyan na, “paglinduhan jama Ejip.”

12Dari meꞌ looy na siꞌ, lay na du bean ga anak si Yaꞌkub bay tugun mmaꞌ da ninsila, 13batan lay na du boo da mayat na pa Kanan. Sampay lay na du kubu da ni lowang pampang ndooy ni Makpela tapit pa Mamre. Ilooy ilay siꞌ yana tanaꞌ ma bay balli si Ibrahim man si Epron, bangsa Hīt looy.

14Paddus jaꞌ ga si Yusup ka ga danganakan na bay ngubu mmaꞌ da, lay na sila pabeleng pa Ejip ka ga mimon jama ma bay mmeꞌ nuhi.

Si Yusup magamgaman atay ga danganakan na

15Na sabap mmaꞌ da lay na matoy, hanggaw na baw siga danganakan si Yusup, yuk da, “Pooy tu la mintu bong yaꞌ bay lungay ni si Yusup bay dusa tabi niiya? Batiꞌ ta mintu, mawos na baw ya.”

16Dari bbuwatan da, lay nohoꞌ jama masampay umanat da ni si Yusup. Tugun da meꞌ tuu: “Jaman Simmaꞌ yaꞌ gi bay matoy, ndang lay na ya nugun ningkami. 17Bay tugun na, ‘Baan bi si Yusup, junjung ku na niiya nohoꞌ na kam binuwanan kaampunan ni bay kalaatan bi bay makaat iya jaman looy.’

“Dari tugun kami pa mman si Yusup, paku kami na junjung niiya, buwanan na na kami kaampunan. Ndang-ndang sibuꞌ du Tuhan isbat kami ka Tuhan ma bay inisbat meꞌ Simmaꞌ.”

Na lay jaꞌ siꞌ si Yusup kabaan meꞌ looy, ilooy ma lay ya kapanangis. 18Yaꞌ hallom, takka na siga danganakan na sampay lay na baw sila nimbagan dī da ni awpan na sambayan da halling, “Lillaꞌ jaꞌ kami san gi man kami pabuwat nu na siga ata nu.”

19Sugaꞌ yuk si Yusup ninsila, “Ddong na kam ba tawu. Yaꞌ luu kapatut ku ngalabuꞌ hisab njataꞌ bi. Tuhan sa bahalaꞌ. 20Bana na, meꞌ bi ilay bay buwat aku biddaꞌ na bay laat na, sugaꞌ bay kalaatan bi ilay, ilooy na bay pakoy Tuhan pa kaayaran ni manusiyaꞌ. Batan pagka lay na ku lliyun pitu meꞌ Tuhan, yaꞌ na taambat manusiyaꞌ bay sinalamat supaya yaꞌ matoy kabobowan. 21Sangkon na, yaꞌ na dari man bi tawu niyaku. Gam pin, balanjaan ta lagi kam sina sampay ga anak-nda bi.” Sarī man ilooy, meka gi bitsala man na bay ngug-ngugan sila.

Kapatoy si Yusup

22Na si Yusup siꞌ tu ka ga danganakan na ka ga lūng-kampung da masi na pin maglahat ndooy ni Ejip. Maka ndooy na man si Yusup bay matoy pag taabut dahatus sapun taun umu na. 23Sugaꞌ halloman na yaꞌ gi bay matoy, lay gi baw taabut na mpu anak na si Epraim. Sampay lay gi ta-mpit na siga mpu tuut na, yana ga anak si Makil. Si Makil ilay yana anak si Manasse.

24Na tapit jaꞌ siꞌ kapatoy si Yusup, tugun na ni ga danganakan na, “Aku tu, yaꞌ na hallom matoy, sugaꞌ yaꞌ du sina kam pinabiya meꞌ Tuhan. Bbos-bbos binoo du sina ga panubuꞌ bi meꞌ Tuhan pa Kanan, lahat looy ma bay janjiꞌ Tuhan ni Boꞌ Ibrahim, Boꞌ Isahak, sampay ni Simmaꞌ.” 25Pag-anu siꞌ, lay na baw si Yusup nohoꞌ ga danganakan na napa, yuk na, “Sapahan bi, basta boonun bi ga towang ku pa Kanan pag taabut masa bangsa tabi tinammuhan meꞌ Tuhan bbos-bbos sampay binoo pilay.”

26Na si Yusup ilay siꞌ bay matoy, mag-umu na dahatus sapun taun. Pag-anu siꞌ, lay na kinapul mayat na boꞌ inannaꞌ ni jawom tuung ndooy ni Ejip.

Currently Selected:

Panagnaan 50: sjm

Highlight

Copy