Panagnaan 47

1-2Pus meꞌ looy, lay na baw si Yusup moo danganakan na lima pilay pa mman sultan. Takka ndooy, yuk na, “Ampun Sultan, luu na la ga danganakan ku ka mmaꞌ ku takka man Kanan. Maka luu na du bay boo da kahayop-hayopan da sampay mimon altaꞌ da. Batnaa luu na sila ndooy ni Gosen.”

Pag-anu siꞌ, lay na pakila na ga danganakan na ni sultan.

3Tilaw sultan ni siga danganakan si Yusup, ilooy siꞌ sikalima, “Oy tu usaha kabiyasahan bi?”

Pag tampung da siꞌ tu, “Kami itu Ampun Sultan, meꞌ bay jaman kabboꞌ-bboan kami du tukang ngipat ga baanan hayop. 4Kon kami doman maglahat ntuu samantalaꞌ sabap ndooy ni Kanan magmasak na gotom sampay yaꞌ na ga luu man kami makan ga bili-bili kami. Bong siꞌ kadarihan ningkau, ndooy na doꞌ kami maglahat ni Gosen.”

5Yuk sultan ni si Yusup, “Batnaa, pagka luu na takka mmaꞌ nu ka ga danganakan nu, 6subay sila ngingat, tanaꞌ Ejip lahat da na du. Biyahun na sila maglahat ndooy ni Gosen. Ilooy na silay tanaꞌ ma ayad banahan ni lahat tuu. Na soysoy sila ndooy alistu ngipat, sila na sohoun ngipat ga baanan hayop ku.”

7Pag-anu siꞌ, lay na baw kaddoꞌ si Yusup mmaꞌ na pinakila ni sultan. Pus meꞌ looy, bbuwatan si Yaꞌkub lay makuhan sultan supaat pa Tuhan.

8Tilaw sultan niiya, “Dangon taun na tu Paꞌ umu nu?”

9Tampung si Yaꞌkub, “Ampun Sultan, umu ku tu luu na dahatus tallumpūꞌ taun. Aku tu, halloman ku bay magsampihan ni junyaꞌ tuu, meka na kasusahan bay talingkaꞌ ku. Bong ni hāl umu ku, bong binista ka umu bay jaman kabboꞌ-bboan ku, yaꞌ du meꞌ noy tahaꞌ na.” 10Pag-anu siꞌ, lay na baw balik si Yaꞌkub makuhan sultan supaat, boꞌ na lay na muhun palakka man astanaꞌ.

11Dari siꞌ, man panohoan sultan, lay na du sohoꞌ si Yusup ga mmaꞌ na ka ga danganakan na maglahat ndooy ni Gosen ma pinag-awnan du Rameses. Boꞌ ndooy na silay tanaꞌ pinakaayad ni sikaliput Ejip. 12Maka lay gi sila binuwanan balanjaꞌ meꞌ si Yusup pinagsipataꞌ-pataꞌ ka eka anak da.

Meka manusiyaꞌ bahuklud pilay pa mman si Yusup malli balanjaꞌ

13Na gotom looy siꞌ tu, song magmasak na pin ndooy ni Ejip ka Kanan. Ninggai-ninggai jaꞌ, yaꞌ na luu huma kinattom sampay lamma na ga manusiyaꞌ ni kalingantu da. 14-15Dari manusiyaꞌ siꞌ tu labba man Kanan sampay ni sikaliput Ejip luu na bahuklud pilay pa mman si Yusup malli balanjaꞌ. Kuwan ballihan na, lay kinumpo meꞌ si Yusup boꞌ binoo pa astanaꞌ sultan.

Na manusiyaꞌ siꞌ tu, san lay na katis sīn da, amu-amu luꞌ pilay pa mman si Yusup, yuk da, “Tuwan, junjung kami na ningkau, buwanan doꞌ kami balanjaꞌ. Yaꞌ na la luu sīn kami. Bong itu kami niyaꞌ buwanan nu, basta matoy kabobowan na situ kami.”

16Tampung si Yusup, “Pagka katis na sīn bi, boonun bi na pitu siga hayop bi man bi nambiꞌ balanjaꞌ.” 17Dari lay na siꞌ boo da ga kuraꞌ da, bili-bili da, kambing da ka sapiꞌ da pa mman si Yusup man da nambiꞌ balanjaꞌ. Dari taun looy siꞌ, ilooy na man da bay magbalanjaꞌ, yana sambian kahayop-hayopan da.

18Pag taun balik, lay na baw sila pilay pa mman si Yusup, yuk da, “Kami tu la Tuwan, pōꞌ kami na kabanahan kami. Sīn kami yaꞌ na luu. Kahayop-hayopan kami pun, luu na du mman nu. Yaꞌ na situ luu tadean kami kau, isu-isu baran kami sa ka tanaꞌ kami. 19Junjung kami na ningkau, daa jaꞌ kami pabiyahun matoy. Ballihun na kami sampay na tanaꞌ kami bong pin luu jaꞌ balanjaꞌ kami. San kami pinahata na meꞌ sultan, buwanan nu sa kami bani man kami huma bong pin kami llum jaꞌ maka supaya luu kapansahaliyan tanaꞌ.”

20Pag-anu siꞌ, mimon bangsa Ejip lay na paballihan da tanaꞌ da ni si Yusup sabap biddaꞌ na bay basag gotom looy. Dari siꞌ lay na takoleꞌ sultan mimon tanaꞌ ndooy ni Ejip. 21Kuwan siga raayat sultan siꞌ, sikamimon sila ni sikaliput Ejip lay na ngandagangan dī da ni si Yusup nohoꞌ binuwat ata. 22Tanaꞌ ndooy ni Ejip, ilooy du yaꞌ bay taballi si Yusup, yana tanaꞌ siga imam. Sila ilay san yaꞌ na ngandagangan tanaꞌ da batan luu na pin hasil da ndean meꞌ sultan man da magbalanjaꞌ.

23Pag-anu siꞌ, yuk si Yusup ni ga jama ma bay maku bani niiya, “Batnaa, pagka tanaꞌ bi sampay na baran bi lay na balli ku para ni sultan, buwanan ta na kam bani. Atu, tanomun bi na.” 24Maka yuk na, “Pag taabut bi mintu ngattom, buwanan bi sa sultan sabahagiꞌ lima ni kattoman bi. Pus mandooy, ningkaam na man bi malanjaan ga anak-nda bi maka man bi ngahalliꞌ bani bi.”

25Pag tampung da siꞌ, “Tuwan Gubnul, danan kami itu bay salamat man sabapan nu. Sangkon lillaꞌ na kami san sohoꞌ nu pinahata ni sultan. Kamura-murahan kinahopan du kami meꞌ nu.”

26Dari ilooy na silay siꞌ saraꞌ bay binotang meꞌ si Yusup pasal tanaꞌ ni Ejip. Hati na, dangoy-dangoy bay takattom jama, subay sila muwanan sultan sabahagiꞌ lima. Boꞌ masi gi silay saraꞌ looy pinalān ngabut sampay batnaa. Ilooy du yaꞌ bay talapay ni saraꞌ looy yana siga imam, batan masi luu tanaꞌ da dī da.

27Na kuwan ga si Yaꞌkub baw siꞌ tu ka ga anak-mpu na, sannang na maglahat ni Gosen ndooy ni Ejip. Maka meka na du altaꞌ bay tausaha da ndooy. Kuwan siga panubuꞌ si Yaꞌkub, paeka boꞌ paeka na pin.

28Na luu jaꞌ siꞌ sapu-pitun taun halloman si Yaꞌkub maglahat ndooy ni Ejip, mag-umu na ya dahatus mpatpuꞌ-pitun taun. 29Tapit jaꞌ siꞌ kapatoy na, lay na sohoꞌ na kinaddoꞌ anak na si Yusup. Luu jaꞌ siꞌ, yuk si Yaꞌkub niiya, “Ningkōꞌ ko Toꞌ ni bihing ku. Nnaun tangan nu dambilaꞌ ndiyoꞌ paa ku sambayan nu napa. Bong ko bana-bana maaseꞌ niyaku, sapahan nu na, basta daa ku kubuhun ntuu ni Ejip. 30Pag patoy ku, boonun mayat ku palakka man Ejip, boꞌ ku kubuhun bi ndooy ni Kanan ni tanaꞌ man kabboꞌ-bboan tabi bay kinubu.”

Pag tampung si Yusup, “Ohoꞌ Maꞌ, bean ku sa bay halling nu.”

31Yuk si Yaꞌkub siꞌ tu, “Bong meꞌ naa, sapahan nu na.” Dari lay na napa si Yusup. Kuwan si Yaꞌkub siꞌ tu, lay sujud pa Tuhan taꞌ patulihan na.

Currently Selected:

Panagnaan 47: sjm

Highlight

Copy