Panagnaan 46

Si Yaꞌkub ka paglūng na maglayin pa Ejip

1Pag-anu siꞌ, lay na du ga si Yaꞌkub ka ga paglūng na ddas ka mimon altaꞌ da lakka man Hebron song pilay pa Ejip. Lān da pilay, lay gi sila pahantiꞌ ni Beel-Siba. Ndooy siꞌ, lay gi si Yaꞌkub numbaliꞌ siga hayop, boꞌ lay songan na pa Tuhan ma ndang bay inisbat meꞌ mmaꞌ na si Isahak.

2Pag sangom, lay na baw si Yaꞌkub tinammuhan meꞌ Tuhan. Njawom pandapat na, lay ya linganan Tuhan, yuk na, “Yaꞌkub! Ū Yaꞌkub!”

Pag tampung na, “Atu ku. Oy lay siꞌ?”

3Yuk Tuhan, “Aku na situ Tuhan, ilooy ma bay sinumba meꞌ mmaꞌ nu. Daa na ko hanggaw pilay pa Ejip. Buwanan ta sa kam panubuꞌ paeka ngabut sampay man bi dari bangsa mehe ndooy. 4Unungan ta sa kam pilay pa Ejip. Maka bbos-bbos boo ku sa siga panubuꞌ nu pabeleng pa Kanan. Pag taabut nu ina mintu matoy, luu du si Yusup nondokan kau.”

5Na lakka man Beel-Siba, lai na si Yaꞌkub binoo pawus meꞌ siga anak na song pilay pa Ejip. Maka luu na du ga iwan na ka ga mpu na lay du boo da taꞌ ga kalesa looy ma bay pokonan sultan ninsila. 6Luu na du bay boo da ga kahayop-hayopan da sampay na mimon altaꞌ da ma bay tausaha da halloman da ni Kanan. Dari siꞌ luu na takka ndooy ni Ejip ga si Yaꞌkub 7ka ga paglūng na labbasakayi.

Ga anak-mpu si Yaꞌkub

8Na ituu tu batnaa yana listahan siga awon anak-mpu si Yaꞌkub ma bay pilay pa Ejip. Sila ilay yana poonan bangsa Israil.

Si Ruben yana anak si Yaꞌkub ma siyaka banahan. 9Siga anak si Ruben mpat lalla, yana ga si Hanok, si Pallu, si Hezron ka si Kalmi.

10Pasunuꞌ man si Ruben, yana si Simiyun. Iya ilay anakan nnom lalla, yana ga si Jemuwel, si Jamin, si Ohad, si Jakin, si Zohal ka si Sol. Kuwan nneꞌ si Sol siꞌ tu bangsa Kanan.

11Pasunuꞌ man si Simiyun, yana si Libay. Anak na tallu lalla, yana ga si Gelson, si Kohat ka si Merari.

12Pasunuꞌ man si Libay, yana si Juda. Anak na lima lalla, yana ga si Er, si Onan, si Sela, si Peres ka si Zera. Sugaꞌ kuwan si Er ka si Onan, lay na matoy ndooy ni Kanan. Kuwan si Peres, anakan duwa lalla, yana si Hezron ka si Hamul.

13Pasunuꞌ man si Juda, yana si Isakal. Iya ilay anakan mpat lalla, yana ga si Tola, si Pua, si Jasub ka si Simron.

14Pasunuꞌ man si Isakal, yana si Zebulun. Iya ilay anakan tallu lalla, yana ga si Sered, si Elon ka si Jalil.

15Na ilooy ilay siꞌ yana siga anak-mpu si Yaꞌkub ka nda na si Liya. Maka luu gi disu anak da danda yana si Dayna. Mimon ga anak da ilay siꞌ bay pinamaddihan ni Paddan-Aram. Dari eka anak-mpu si Yaꞌkub ka si Liya ma bay mmeꞌ pa Ejip tallumpuꞌ-tallu.

16Sarī man ilooy siꞌ, luu du bay tabeꞌ pilay pa Ejip siga anak-mpu si Yaꞌkub ka si Silpa. Anak da ma siyaka yana si Ged. Iya ilay anakan pituꞌ lalla, yana ga si Jephon, si Haggi, si Suni, si Esbon, si Eri, si Arodi ka si Areli.

17Pasunuꞌ man si Ged, yana si Asel. Anak na mpat lalla, yana ga si Imna, si Isba, si Isbi ka si Beriya. Maka luu gi disu danda yana si Sera. Na si Beriya siꞌ tu, anakan na baw duwa lalla, yana ga si Hebel ka si Malkiel.

18Mimon ilooy siꞌ sikasapu-nnom, yana ga anak-mpu si Yaꞌkub ka si Silpa yana ata looy ma bay dean si Laban ni anak na si Liya.

19Kuwan siga anak si Yaꞌkub ka nda na si Rakel, yana ga si Yusup ka si Benjamin.

20Si Yusup siꞌ tu, anakan duwa lalla ka nda na si Asenat, yana si Manasse ka si Epraim. Si Asenat ilay anak si Potipera, yana imam ni daira inawnan On ndooy ni Ejip.

21Kuwan si Benjamin siꞌ tu anakan sapū lalla, yana ga si Bela, si Bekel, si Asbel, si Gera, si Naaman, si Ehi, si Ros, si Mupim, si Hupim ka si Ald.

22Dari siga anak-mpu si Yaꞌkub ka si Rakel, sapu-mpat.

23Sarī man sila, luu gi du bay tabeꞌ pilay pa Ejip ga anak-mpu si Yaꞌkub ka si Bilha. Ilooy ma siyaka yana si Dan. Iya ilay anakan disu lalla, yana si Husim.

24Pasunuꞌ man si Dan, yana si Naptali. Anak na mpat lalla, yana ga si Jasiel, si Guni, si Jesel ka si Sillem.

25Ga kalallahan ilooy siꞌ sikapituꞌ yana ga anak-mpu si Yaꞌkub ka si Bilha, yana ata looy ma bay dean si Laban ni anak na si Rakel.

26Dari eka panubuꞌ si Yaꞌkub ma bay mmeꞌ niiya pa Ejip, nnompuꞌ-nnom, sarī gi siga iwan na. 27Pag pinatabeꞌ si Yusup ka ga anak na sikaduwa ma bay pinamaddihan ni Ejip sampay si Yaꞌkub, luu pitumpūꞌ eka da dambuwaꞌ lahaꞌ ni paglūng si Yaꞌkub ndooy ni Ejip.

Katakka si Yaꞌkub ka ga paglūng na ni Ejip

28Na ni bay palanan ga si Yaꞌkub, tapit jaꞌ siꞌ sila pa Ejip, lay doꞌ paruhuꞌ na si Juda pilay pa mman si Yusup nohoꞌ nilaw bong ninggai lān song pilay pa Gosen. Pag beleng si Juda, lay na sila patiluꞌ pilay. 29Kuwan si Yusup siꞌ tu, magti du ya nangonan kuraꞌ na kalesa sampay lay na ya pilay pa Gosen nampang ga mmaꞌ na. Sitammu jaꞌ siꞌ sila, magti du si Yusup ngakkopan mmaꞌ na boꞌ tud bay hallom ya nangis.

30Yuk mmaꞌ na niiya, “Uy la, tud bana du hati ko Toꞌ llum! Batnaa san ku matoy na, pagka lay na ko bay takita ku ka mata ku ma duwa.”

31Pag-anu siꞌ, yuk si Yusup ni siga danganakan na sampay na mimon paglūng na ilooy kasohean, “Subay situ ku pilay pa mman sultan maan iya luu na takka mmaꞌ ku ka ga mimon danganakan ku lakka man Kanan. 32Maka baan ku gi ya, kaam tukang ngipat hayop maka luu na kam ka siga baanan hayop bi ka ga altaꞌ bi labbasakayi. 33Bong kam mintu tinawag meꞌ sultan boꞌ tinilaw bong oy usaha bi, 34baan bi ya, tukang ngipat hayop kam labba man kadikiꞌ bi, meꞌ ndang bay usaha kabboꞌ-bboan tabi. Pag ilay mintu katoonan na meꞌ looy, mastiꞌ ntuu na man bi sohoꞌ na maglahat ni Gosen. Batan siga bangsa Ejip ina, yaꞌ du doman maglamud ka sagannap ma tukang ngipat hayop batan nipin sila.”

Currently Selected:

Panagnaan 46: sjm

Highlight

Copy