Panagnaan 45

Si Yusup magpakila ni ga danganakan na

1-2Na si Yusup siꞌ tu, yaꞌ na tasaggaꞌ na parasahan na. Dari lay na sohoꞌ na ga tindog na pōꞌ labbasakayi. Pag sila-sila sa ndooy magdanganakan, ilooy ma lay na ya killahap pahaddo ni pag-awpan da. Ni kahaddo na killahap, takale na ga meꞌ jama Ejip ni poan sampay lay na ga nakka habal na pa astanaꞌ sultan. Pag lay jaꞌ ya kahuwasan killahap, ilooy ma lay na ya magpakila ni siga danganakan na.

3Yuk na ninsila, “Aku na situ si Yusup.” Maka tilaw na, “Tud bana kilay masi gi llum Simmaꞌ?” Na ga danganakan na baw siꞌ tu, tud bay kahimattaan sampay yaꞌ na san ga bay katampung.

4Pag-anu siꞌ, lay na sila sohoꞌ si Yusup pasōng pa mman na, maka yuk na, “Tud aku na situ si Yusup, yana danganakan bi ma bay paballihan bi ni jama ma bay moo aku pitu pa Ejip. 5Na batnaa, daa na kam gundalaꞌ. Ma bay na pingkaꞌ, papingkaꞌ tabi na. Maka daa na kam magsusun. Ilooy ilay man gantaan Tuhan na du. Tuhan na du silay bay mapitu aku duhuꞌ man kaam mari yaꞌ matoy manusiyaꞌ. 6Gotom tuu itu bohoꞌ duwan taun. Pus ituu, luu gi pasunuꞌ liman taun yaꞌ na luu meꞌ jama kadarihan huma sampay yaꞌ na luu kinattom. 7Lipara, lay na ku pinapitu meꞌ Tuhan duhuꞌ man kaam nalamat kaam mari yaꞌ katis bangsa tabi ni junyaꞌ. 8Sangkon, saꞌ du silay kaam bay mapitu aku, arapun iya bay mapitu aku yana Tuhan. Lay na ga ku pinabuwat meꞌ Tuhan subay ga mmaꞌ sultan ka pa-mmean ni astanaꞌ na sampay panghuluꞌ ni sikaliput tanaꞌ Ejip.

9“Batnaa, bbeleng na kam deꞌ-dēꞌ pa mman Simmaꞌ. Baan bi ya anak na si Yusup lay na pinabuwat meꞌ Tuhan panghuluꞌ ngantanan sikaliput Ejip. Maka baan bi ya, tugun ku niiya, bong anu, daa na ya konoꞌ maglawun-lawun. Doman kami sikita ka iya deꞌ-dēꞌ. 10Baan bi ya, dari ya maglahat ni Gosen, tapit pa mman ku. Boonun na konoꞌ ga anak-mpu nu ka ga hayop nu labbasakayi, sampay na mimon altaꞌ nu. 11Pag takka nu pa Gosen, balanjaan na sa ko konoꞌ. Gotom tuu tu konoꞌ, luu gi liman taun pasunuꞌ, boꞌ yaꞌ baw ya konoꞌ doman kau kabobowan ka ga anak-mpu nu sampay na ga kahayop-hayopan nu.”

12Maka yuk si Yusup lagi ni siga danganakan na, “Itu na du kam ka ga si Benjamin mismu ngita tud aku na situ si Yusup mitsala ni pag-awpan bi. 13Tuntutan bi na Simmaꞌ bong pooy ehe kawasa-kapatut ku ntuu ni Ejip. Maka baan bi na ya mimon ma bay tasakup bi, boꞌ boonun bi na patuhut pitu pa mman ku deꞌ-dēꞌ.”

14Na pus si Yusup siꞌ bay mitsala, lay na ya patapit pa mman si Benjamin, boꞌ da sikakkop sambayan da sikatangis. 15Pag-anu, boꞌ na lay na ngūk ga siyaka na sikamimon sambayan na masi na pin nangis. Dari siꞌ, bohoꞌ na sila nawakka moo si Yusup magbitsala.

16Na takka jaꞌ siꞌ habal pilay pa astanaꞌ sultan luu bay takka ga danganakan si Yusup, ilooy ma tud gāk ya sampay na siga kunsihal na mimon. 17Dari yuk sultan ni si Yusup, “Sohoun na inuwanan kuraꞌ ga danganakan nu balanjaꞌ mari sila kapoleꞌ na pa Kanan. 18Takka ga danganakan nu luꞌ pilay, sohoun na binoo luꞌ pitu mmaꞌ bi sampay na ga anak-nda da. Takka ntuu, buwanan ku sa sila tanaꞌ pinakaayad ni sikaliput Ejip mari sila sannang. 19Maka sohoun gi ga danganakan nu moo kalesa mantuu man da moo anak-nda da ka mmaꞌ bi pitu. 20Daa na sila sohoun gampang bong luu gi pabuwatan da ma yaꞌ na taboo da. Takka da ina mintu pitu, altaꞌ ma numbul satu sadjaꞌ ni sikaliput Ejip dean ku sila.”

21Dari siꞌ, bay tugun sultan lay na inasip meꞌ siga anak si Yaꞌkub. Maka lay na sila buwanan si Yusup siga kalesa man panohoan sultan. Boꞌ lay gi sila pinalutuan 22sampay binuwanan badjuꞌ bahau. Kuwan si Benjamin, lay gi buwanan si Yusup tallu hatus dublun pilak porol ka lima pangampuan pamakoy bahau. 23Maka lay gi pokonan na mmaꞌ na sapū kuraꞌ lalla llop meꞌ barang numbul satu ni Ejip, ka sapū kuraꞌ danda llop meꞌ jinisan balanjaꞌ ka lutuꞌ da. 24Pag-anu siꞌ, lay na palakka si Yusup siga danganakan na sambayan na nugun sila yaꞌ nohoꞌ sasaꞌ-manasaꞌ ni tangngaꞌ lān.

25Dari lay na lanjahan da palanan da palakka man Ejip. Pag takka da pa mman mmaꞌ da ni Kanan, 26yuk da, “Maꞌ, masi gi la llum si Yusup! Boꞌ iya lagi marintahan sikaliput Ejip.” Kuwan si Yaꞌkub siꞌ tu, dallag-dallag, sampay yaꞌ na ga nammu halling. Boꞌ na, tud kaawran ya pitsayaꞌ. 27Sugaꞌ lay jaꞌ siꞌ ya kabaan mimon ma bay tugun si Yusup ninsila, sampay takita na na kalesa ma bay pinokonan meꞌ si Yusup man moo iya pa Ejip, bohoꞌ na bay nammu halling. 28Yuk na siꞌ tu, “Ohoꞌ, pitsayaꞌ na ku. Llum gi bitu hati si Yusup! Subay situ ku pilay na deꞌ-dēꞌ nammuhan iya padpad ku yaꞌ gi bay matoy.”

Currently Selected:

Panagnaan 45: sjm

Highlight

Copy