Panagnaan 44

Sawan ma lungay

1Na sakap jaꞌ siꞌ ga danganakan si Yusup moleꞌ, lay na baw sohoꞌ si Yusup tindog looy ma magpandoy ni lumaꞌ na, yuk na, “Pannoan nu banahan karut ga lalla naa. Pag-anu, boꞌ nnaun balik pilak da saliꞌ-saliꞌ huwin pa behe karut da. 2Kuwan ni ilooy ma siyali, kaddoun sawan ku, yana sawan pilak porol looy, boꞌ nnaun huwin pa behe karut na ddas ka pilak man na bay malli balanjaꞌ na.” Dari siꞌ, lay na pabuwat na ma bay sinohoꞌ niiya.

3Pag taabut sayu, awwal lagi, lay na pinapoleꞌ ga danganakan si Yusup ka ga kuraꞌ da llop meꞌ balanjaꞌ. 4Yaꞌ gi san siꞌ sila lawak man daira looy, yuk si Yusup ni tindog na siꞌ, “Siglaꞌ ko, onsehun ga lalla looy. Pag taabut nu, pasparan nu sila, yuk nu, ‘Uy, tud bay mahap bilay meꞌ kami bay buwat kaam. Ongoy taggahaꞌ pag tungbas bi, maat? 5Ongoy bay kaddoꞌ bi sawan man tuwan ku nginum sampay man na nunaꞌ? Tud maat baw arat bi.’ ”

6Lay jaꞌ siꞌ taabut tindog looy siga danganakan si Yusup, lay du sila baan na bay tugun si Yusup.

7Sugaꞌ yuk da baw siꞌ tu, “Doꞌ ko la Tuwan, oy doꞌ ina maksud bitsala nu meꞌ naa? Meꞌ kami itu siga tindog bi, tud yaꞌ bina takaya kami buwat meꞌ naa. 8San pilak looy maruhuꞌ ma bay tatammu kami njawom karut kami, lay na du bay boo kami balik man Kanan pa lahat bi. Ongoy taggahaꞌ nawakka na baw kami nangkaw pilak porol atawa mmas tuwan nu? 9Sugaꞌ meꞌ tuu na Tuwan: Soysoy kami bay katammuhan meꞌ nu, san papatoyun na. Kuwan kasohean kami, dari san pahata bi na.”

10Yuk tindog looy siꞌ, “Sigi ba, pagka kaam na du bay halling. Sugaꞌ ilooy jaꞌ mintu pahata ku ma bay karapatan nangkaw sawan tuwan ku. Kuwan kaam kasohean, pabiya ku na.”

11Pag-anu, ilooy ma lay du paduwai da karut da maka saliꞌ-saliꞌ na sila ngungkad. 12Tindog si Yusup siꞌ tu, lay na miha paayad njawom karut da nagnaꞌ man ilooy ma siyaka banahan lūd pa ilooy ma kabungsuhan. Dari siꞌ, sakayi na nammu sawan looy, noy ndooy na njawom karut si Benjamin. 13Dari pag takita ga siyaka na meꞌ looy, bbuwatan da nganggeret pamakoy da ni kasusa da. Sampay lay na uwanan da kuraꞌ da boꞌ da pabeleng balik pa daira.

14Takka ga si Juda ka ga danganakan na pa lumaꞌ si Yusup, masi gi ya ndooy. Dari bbuwatan da, lay nimbagan dī da saliꞌ-saliꞌ taꞌ tanaꞌ ni awpan na.

15Yuk si Yusup ninsila, “Ongoy kam bay buwat meꞌ looy? Yaꞌ kina tasayu bi jama meꞌ aku pandoy nunaꞌ bong oy pabuwat jama?”

16Yuk si Juda siꞌ tu, “Tuwan Gubnul, yaꞌ na kami la pandoy ngandaawa sabap yaꞌ na luu tapahalling kami. San kami mattan yaꞌ bay buwat dusa, yaꞌ baw luu tapōꞌ meꞌ kami buktiꞌ ga saꞌ kami bay ngaddoꞌ. Sugaꞌ bistahan ku ituu na hisab Tuhan ni jataꞌ kami ni bay dusa kami maruhuꞌ. Biyahun na, pahatawun na kami labbasakayi. Daa na sat ilooy jaꞌ ma bay katammuhan sawan looy.”

17Yuk si Yusup baw siꞌ tu, “Yaꞌ baw bina sikatuwaꞌ. Yaꞌ ku nawakka buwat meꞌ naa. Arapun ilooy na jaꞌ pahata ku ma bay ngaddoꞌ sawan ku. Kuwan kaam kasohean, pasannangun bi na atay bi boꞌ bi pabeleng pa mman mmaꞌ bi.”

Si Juda makuhan si Benjamin timbang

18Pag-anu, lay na baw si Juda pasōng pa mman si Yusup sambayan na maku junjung, yuk na, “Tuwan, meꞌ aku disu tindog nu, bong siꞌ kadarihan ningkau, luu situ siꞌ bitsala ku ningkau. Bong anu, daa doꞌ ku kalasuhan nu meꞌ kau sibuꞌ du ka sultan. 19Tuwan, jaman kami bay tilaw nu bong luu gi mmaꞌ kami atawa bong luu gi danganakan kami sarī, 20lay jaꞌ du kami paintong māꞌ masi llum mmaꞌ kami, sugaꞌ toa na. Damikiyan, lay du kami māꞌ ariꞌ kami luu gi du bay tamban ndooy mman mmaꞌ kami. Iya ilay kabungsuhan bay pinamaddihan ni katoa mmaꞌ kami na. Maka bay du kami paintong māꞌ danganakan na langgung lay na matoy. Pag batnaa, iya sa takapin anak imuwa nneꞌ na. Boꞌ pabiddaꞌ situ banahan aseꞌ mmaꞌ kami njataꞌ na.

21“Na kami tu Tuwan, sabana-bana lay jaꞌ du asip kami bay sohoꞌ nu ningkami moo ariꞌ kami pa mman nu supaya takita nu na ka mata nu ma duwa. 22Kamasaꞌ ndang bay ko baan kami bay llaw looy, anak-anak tuu yaꞌ taambanan na mmaꞌ kami taggahaꞌ ilooy na baw mintu poonan man mmaꞌ kami matoy maglindu. 23Sugaꞌ yuk nu na baw ningkami, yaꞌ kami dari magpakita bong yaꞌ bay taboo kami siyali kami ma kabungsuhan. 24Dari pag kami lay na pabeleng pa mman mmaꞌ kami, lay na ya tuntutan kami bong oy bay tugun nu.

25“Na kabus jaꞌ siꞌ kami, lay na baw kami sohoꞌ na pabeleng balik malli balanjaꞌ. 26Sugaꞌ yuk kami niiya, ‘Yaꞌ kami la kapilay bong yaꞌ luu ariꞌ kami bay taboo kami. Tugun gubnul yaꞌ kami dari magpakita niiya bong yaꞌ bay mmeꞌ ariꞌ kami.’

27“Pag tampung mmaꞌ kami, ‘Tud paya bitu ku bong boo bi na baw Sittoꞌ. Katoonan bi na du, anak ku ka si Rakel duwa lisu du. 28Boꞌ ilooy disu, lay na lungay man diyoꞌ dakan ku. Marean ta, lay na ya sinalik-salik meꞌ halimaw. Yaꞌ na san ya bay talaman ngabut sampay batnaa.’ 29Maka yuk Simmaꞌ, ‘Na bong mintu lay na baw kongoy-kongoy siyali bi sampay man na lungay man diyoꞌ dakan ku, meꞌ tuu na katoahan ku, basta matoy njawom karukkaan na situ ku meꞌ bi.’

30“Sangkon Tuwan Gubnul, kaallum mmaꞌ kami ilay, inaa ko ngawon, tikmod na njataꞌ ariꞌ kami lasa. Bong ina mintu yaꞌ na ya luu bay tabeleng pag poleꞌ kami, 31pagka ndang toa na Simmaꞌ, mastiꞌ matoy njawom kasusahan na silay ya sabapan kami. 32Sarī gi, Tuwan, lay gi ku nubali niiya bong yaꞌ bay taboo ku pabeleng anak-anak tuu pa mman na, atas ku mimon susun labuꞌ pa aku halloman ku llum.

33“Batnaa Tuwan, meꞌ aku disu tindog nu, gam na aku pahatawun gantiꞌ anak-anak tuu. Kuwan iya, bong siꞌ kadarihan, pabelengun na ka ga danganakan ku kasohean. 34Ndang-ndang yaꞌ na du situ ku kapabeleng pa mman Simmaꞌ bong yaꞌ luu bay taboo ku anak-anak tuu. Boꞌ na, yaꞌ na du ku kasogsog ngandaꞌ Simmaꞌ njawom kasusahan mehe.”

Currently Selected:

Panagnaan 44: sjm

Highlight

Copy