Panagnaan 41

Si Yusup naabil upihan sultan

1Na pag bay pingkaꞌ duwan taun, sultan na baw lay ngupi. Njawom pandapat na, lay ya konoꞌ nangge ni bihing Sōng Nayil. 2Sasang na ndooy, ngita ya konoꞌ pituꞌ sapiꞌ pōꞌ man jawom sōng looy, boꞌ tud lammok maka mahap sambuhan da. Bbuwatan da siꞌ mangan kuhun ni bihing sōng. 3Yaꞌ hallom, luu na baw konoꞌ pasunuꞌ pōꞌ man sōng looy pituꞌ sapiꞌ maat dagbos da sabap nangkeg na sila ni kausuk da. Pag-anu konoꞌ, lay na baw sila nangge ni bihing ga sapiꞌ looy ma lammok. 4Mindangoy ko, lay na baw kakan da ga sapiꞌ looy siꞌ ma lammok. Pag lupus, lay na kabatiꞌ sultan.

5Pag-anu siꞌ, lay na baw sultan kapatuli pabalik sampay lay na baw ya balik ngupi. Njawom pandapat na, luu dampoon pawoy, pituꞌ tundun eka buwaꞌ na. Boꞌ mahap jaꞌ sambuhan buwaꞌ na, katting jaꞌ labbasakayi. 6Pag-anu, luu na baw konoꞌ pasunuꞌ dampoon pawoy pituꞌ tundun du eka buwaꞌ na. Sugaꞌ kappis jaꞌ buwaꞌ na labbasakayi bay lūs meꞌ mataallaw. 7Mindangoy ko, lay na baw konoꞌ tallon da siga tundunan looy siꞌ pituꞌ ma katting buwaꞌ da. Pag-anu siꞌ, lay na kabatiꞌ sultan pabalik maka tabista na na lay jaꞌ ya ngupi.

8Pag sayu, tud bay lingog pamiki na leꞌ upihan na. Dari lay tawag na mimon jama ilmuan sampay siga tukang ngandaꞌ ni sikaliput Ejip. Luu jaꞌ siꞌ sila, lay na sila tuntutan na bay upihan na, sugaꞌ yaꞌ luu san disu bay kabāꞌ bong oy kamaatunan da.

9Pag ndaꞌ tukang nunggang inuman looy yaꞌ luu bay kabāꞌ, yuk na, “Ampun Sultan, bohoꞌ la tabista ku mehe kasaan ku. Subay siꞌ ndang lay na ko baan ku. 10Na bay hallang-hallangan looy, bong siꞌ masi taintom nu, bay ko lasu ningkami ka imuwa lalla looy ma bay tukang buwat tinapay nu. Sampay lay na ga kami jīl nu ni bihing lumaꞌ kapitan siga tukang jaga. 11Na disu sangom, lay kami ngupi sikaduwa, sugaꞌ yaꞌ sibuꞌ bay upihan kami. 12Kahapan luu ndooy disu subul bangsa Hibrani, pagkahi kami njawom jīl. Iya ilay tindog pa-mmean tukang jaga ndooy. Dari pag lay jaꞌ ya tuntutan kami bay upihan kami, lay du tinaabil meꞌ na. 13Boꞌ lay bana binakbul kamaatunan ma bay bāꞌ na ningkami. Batan kuwan aku, lay na du ku bana pinabalik meꞌ nu pa bay ntan ku. Kuwan ilooy ma bay tukang buwat tinapay nu, lay du bana sohoꞌ nu pinapatoy sampay siniitan taꞌ tehang.”

14Pagka meꞌ looy, lay du sohoꞌ sultan kinaddoꞌ si Yusup pa jawom jīl. Na pus si Yusup bay ngukuhan janggut na, lay na ya sayin, boꞌ lay na ya mmeꞌ pilay pa awpan sultan. 15Luu jaꞌ siꞌ, yuk sultan niiya, “Aku tu, lay ku ngupi sugaꞌ yaꞌ san luu bay kabāꞌ bong oy kamaatunan na. Bay taaka ku kau konoꞌ pandoy naabil upihan.”

16Iya tampung si Yusup baw siꞌ tu, “Yaꞌ ba ku pandoy, Ampun Sultan, sugaꞌ luu du Tuhan kabuwan kamaatunan ni upihan nu mari sannang na pamiki nu.”

17Pag-anu siꞌ, lay na tuntutan sultan si Yusup bay upihan na, yuk na, “Njawom pandapat ku, lay ku konoꞌ nangge ni bihing Sōng Nayil. 18Maka luu konoꞌ pituꞌ sapiꞌ pōꞌ man jawom sōng looy, boꞌ tud lammok maka mahap sambuhan da. Bbuwatan da mangan kuhun ni bihing sōng. 19Yaꞌ hallom, luu na baw konoꞌ pasunuꞌ pōꞌ man jawom sōng looy du pituꞌ sapiꞌ maat dagbos da sabap nangkeg na sila ni kausuk da. Ntuu ni sikaliput Ejip, yaꞌ gi ku bay pingkaꞌ ngita meꞌ looy na dagbos da. 20Pag-anu siꞌ, sagannap ma lammok lay katis kinakan meꞌ ga ilooy ma usuk. 21Sugaꞌ pus da bay mangan, masi du yaꞌ tahilaliꞌ bong sila bay mangan atawa niyaꞌ batan masi gi du meꞌ sibuwa kappis battong da. Pus meꞌ looy, lay na ku kabatiꞌ.

22“Pag-anu siꞌ, lay na baw ku kapatuli pabalik sampay lay na baw ku ngupi balik. Njawom pandapat ku, luu konoꞌ dampoon pawoy, pituꞌ tundun eka buwaꞌ na. Boꞌ mahap sambuhan buwaꞌ na, katting jaꞌ labbasakayi. 23Pag-anu siꞌ, luu na baw konoꞌ pasunuꞌ dampoon pawoy pituꞌ tundun du eka buwaꞌ na. Sugaꞌ kappis jaꞌ buwaꞌ na labbasakayi bay lūs meꞌ mataallaw. 24Mindangoy ko, lay konoꞌ tinallon siga tundunan looy siꞌ ma katting meꞌ siga tundunan looy ma kappis. Na ga upihan looy ilay siꞌ, lay na silay tuntut ku ni siga tukang ngandaꞌ, sugaꞌ yaꞌ luu san disu bay kabāꞌ kamaatunan da niyaku.”

25Pag halling si Yusup ni sultan, “Upihan nu ilay siꞌ sikaduwa, sibuꞌ du kamaatunan da. Lay jaꞌ ko pinakitahan meꞌ Tuhan bong oy pabuwat na ni sinōng. 26Sapiꞌ looy ilay pituꞌ ma lammok yana pitun taun halloman kalap balanjaꞌ. Damikiyan, siga tundunan pawoy looy pituꞌ ma katting buwaꞌ da yana pitun taun looy du siꞌ. 27Kuwan sapiꞌ usuk looy pituꞌ ma maat dagbos da, yana pitun taun ma pasunuꞌ haboyan gotom lahat. Damikiyan, tundunan pawoy looy siꞌ pituꞌ ma kappis buwaꞌ da yana pitu taun looy du siꞌ.

28“Na meꞌ bay halling sambat ku na siꞌ Ampun Sultan, lay jaꞌ silay ko pinakitahan leꞌ Tuhan bong oy pabuwat na ni sinōng. 29Njawom pitun taun ina mintu, kinalap balanjaꞌ ni sikaliput Ejip. 30-31Sugaꞌ paddus meꞌ ilooy, luu na baw pasunuꞌ pitun taun gotom mehe. Sampay takupan na ga sina mintu bay waktu kinalap balanjaꞌ ni Ejip. Biddaꞌ na sina mintu tiksaꞌ manusiyaꞌ ni kabasag gotom looy mintu. Binasa na sina mintu lahat tabi. 32Na Ampun Sultan, kon na ilay min duwa na ko bay pinaupihan supaya tabista nu ilooy siꞌ labbasakayi ndang man gantaan Tuhan. Boꞌ yaꞌ na sina hallom, mastiꞌ binakbul na.

33“Sangkon Ampun Sultan, subay sina ko meneꞌ disu jama ma sukup pamiki maka halul-akka, boꞌ sohoun magpandoy ni mimon-mimon ntuu ni Ejip. 34Maka subay du ko nguwakilan siga jama magtakōk ni mimon pahuhuma ni Ejip. Sohoun sila ngaddoꞌ sabahagiꞌ lima tuktuk jama ngattom njawom pitun taun tuu mintu sasang kinalap balanjaꞌ. 35Pag-anu, boꞌ sohoun binoo pa jawom siga daira nu inannaꞌ njawom siga buriga, boꞌ sohoun njagahan. 36Ilooy ilay mintu halliꞌ man malanjaan manusiyaꞌ pag taabut pitun taun looy ma pasunuꞌ. Meꞌ looy ilay, yaꞌ na luu jama matoy kabobowan meꞌ gotom looy mintu.”

Si Yusup pinabuwat panghuluꞌ ni Ejip

37Pus si Yusup bay mitsala, tabista na meꞌ sultan sampay ga kunsihal na tud bay mahap palbiatan na. 38Dari yuk sultan ni ga kunsihal na, “Lalla tuu bitu inunungan meꞌ Rū Tuhan. Yaꞌ na sina kitabi nammu jama labi mahap man iya wakilan ku nohoꞌ magpandoy ni mimon-mimon ni lahat tuu.”

39Sangkon yuk sultan ni si Yusup, “Pagka kau bay pakitahan Tuhan meꞌ looy siꞌ labbasakayi, tumatandaꞌ na niyaku, yaꞌ luu sukup pamiki maka halul-akka labi man kau. 40Batnaa, kau na pabuwat ku panghuluꞌ magpandoy ni astanaꞌ ku. Mimon raayat ku sohoꞌ ku jaꞌ maglillaꞌ ni oy-oy sohoꞌ nu ninsila. Sarī man aku, yaꞌ luu ngantanan kapatut langkaw man ningkau. 41Batnaa, wakilan ta na ko nohoꞌ maggubnul ni sikaliput Ejip.”

42Pag-anu siꞌ, lay na urusan sultan simsim na ma bay inindanan ka awon na boꞌ pinapatuk ni si Yusup. Maka lay gi papatukan na juba ayad banahan sampay lantay mmas baga. 43Boꞌ lay gi ya sohoꞌ sultan dutai taꞌ kalesa ddas ka ga kuraꞌ na ma pinagpakoy meꞌ jama ma numbul disu ndiyoan sultan. Maka paninggai-paninggai ya, luu na pin jama sinohoꞌ paruhuꞌ man iya tukang ngahowap nohoꞌ jama pakokoꞌ ngahulmat sasang gubnul pingkaꞌ. Dari ilooy na silay siꞌ poonan si Yusup bay inuwakilan maggubnul ni sikaliput Ejip.

44Lay gi halling sultan ni si Yusup, “Batnaa aku gi baw situ sultan, sugaꞌ bong saꞌ bitsala pōꞌ man behe nu, yaꞌ padari ku jama buwat oy maka oy na ntuu ni Ejip.”

45-46Pus meꞌ looy, lay na hinalin meꞌ sultan awon si Yusup pa si Japenat-Paniya, boꞌ lay gi pahandān na ni si Asenat. Mmaꞌ si Asenat ilay yana si Potipera, disu imam ndooy ni daira inawnan On.

Na jaman si Yusup siꞌ bay inuwakilan meꞌ sultan maggubnul, mag-umu na ya tallumpūꞌ taun. Dari siꞌ, lay na ya maliksaꞌ mimon kakawum-kawman ni sikaliput Ejip.

47Na meꞌ ndang bay tinaabil meꞌ si Yusup, lay jaꞌ du bay kinalap balanjaꞌ njawom pitun taun. 48Dari njawom pitun taun looy du siꞌ, lay na si Yusup magpanohoꞌ ni siga jama na ngaddoꞌ sabahagiꞌ lima ni kattoman jama. Pag-anu, boꞌ lay sohoꞌ na inannaꞌ pa jawom siga daira ma tapit pa siga huma jama. Dari siꞌ mimon daira ndooy ni Ejip lay na inannaan balanjaꞌ halliꞌ ni gotom ma song takka. 49Na eka balanjaꞌ bay ta-nnaꞌ meꞌ si Yusup, yaꞌ na taambat, meꞌ eka ungus ni tapiyan na. Song hallom, lay na tagongan na meꞌ na ngalista sukatan na sabap kalanduꞌ na eka itungan na.

50Na yaꞌ lagi siꞌ bay takka gotom looy, ndang anakan na si Yusup ka si Asenat duwa lalla. 51Ilooy ma siyaka lay awnan si Yusup si Manasse, hatiyan na, “lupa,” batan yuk si Yusup, “Man tabang Tuhan meꞌ bay na ku pinalupahan ni bay jinisan katiksaan ku sampay logtoꞌ ku sitammu ka ga rahasiyaꞌ ku.” 52Kuwan anak na ma ni kaduwa, lay awnan na si Epraim, hatiyan na “binuwanan ga anak,” batan yuk na, “Lay na ku kaladjikian meꞌ Tuhan binuwanan siga anak ni lahat man ku bay pingkaꞌ tiksaꞌ.”

53Na paddus jaꞌ siꞌ pitun taun looy sasang kalap balanjaꞌ ni Ejip, 54ilooy ma nagnaꞌ na gotom ni pitun taun looy siꞌ ma bay bināꞌ meꞌ si Yusup. Mimon kalahat-lahatan gotom na, sugaꞌ bong ni sikaliput Ejip masi meka bay inannaꞌ. 55Song hallom siꞌ, ngalelet na du gotom looy ngabut sampay ni sikaliput Ejip. Dari ilooy ma lay na pasahid siga raayat sultan pa mman na. Yuk sultan ninsila, “Patiluꞌ na jaꞌ kam pilay pa mman si Yusup, boꞌ lillaꞌ na jaꞌ kam pooy-pooy meꞌ na buwat kaam.”

56Na pagka magmasak na pin gotom looy ni sikaliput Ejip, ilooy ma lay na binukaꞌ meꞌ si Yusup ga buriga ni siga daira man na bay ngannaꞌ balanjaꞌ. Maka lay na ya dagang ni siga raayat ndooy ni Ejip. 57Maka sabap tud kalanduꞌ na basag gotom looy ni sikaliput junyaꞌ, meka na manusiyaꞌ man mimon kalahat-lahatan lay bahuklud pilay pa Ejip malli balanjaꞌ man si Yusup.

Currently Selected:

Panagnaan 41: sjm

Highlight

Copy