Panagnaan 40

Si Yusup naabil upihan duwa pilisu

1Na sasang siꞌ si Yusup njawom jīl, luu duwa lalla buwat ni sultan bay kapagdusa niiya. Disu yana tukang nunggangan sultan inuman, kuwan ilooy disu tukang buwat tinapay na. 2Dari tud bay lasu sultan ninsila sikaduwa, 3sampay lay na sila sohoꞌ na njīl. Jīl mman da, ndooy na du man bay nganjīl si Yusup ndooy ni bihing lumaꞌ kapitan siga tukang jaga. 4Ndooy siꞌ, lay na sila sohoꞌ kapitan looy inintu ni si Yusup.

Hallom jaꞌ siꞌ sila njawom jīl looy, 5luu disu sangom, kuwan tukang nunggang inuman looy ka tukang buwat tinapay looy lay ngupi sikaduwa. Boꞌ siga upihan da ilay siꞌ kaniya-kaniya ka kamaatunan da.

6Pag pilay si Yusup pa mman da sayu, ndaꞌ na bantuk susa sila. 7Dari tilaw si Yusup ninsila, “Ongoy tu meꞌ bay na latak sahayaꞌ luwa bi?”

8Pag halling da, “Lay ba la kami ngupi dabuhiꞌ sikaduwa, boꞌ yaꞌ san luu ntuu pandoy naabil.”

Yuk si Yusup, “Ē, luu du ba Tuhan muwanan manusiyaꞌ kapandoyan man naabil upihan. Oy siꞌ lay bay upihan bi?”

9Dari lay na duhuꞌ tukang nunggang inuman looy nuntut, yuk na, “Njawom pandapat ku, luu konoꞌ poon anggul ni awpan ku 10tallu engas na. Pag ndaꞌ ku, pag sapput dawun na, ilooy ma pasapput du bungku, sampay tahak du magti buwaꞌ na. 11Aku konoꞌ ngantanan sawan sultan. Dari lay paggaꞌ ku buwaꞌ ga anggul looy jawom sawan na boꞌ dean ku iya.”

12Pag halling si Yusup, “Na njawom upihan nu ilay siꞌ, engas looy tallu, tuwaꞌ pa tallu ngallaw. Kamaatunan upihan nu ilay siꞌ meꞌ tuu: 13Njawom tallu ngallaw, pinōꞌ na sina ko meꞌ sultan. Pinabalik na ko meꞌ na pa bay ntan nu tukang nunggangan iya inuman na meꞌ bay sibuwa du. 14Sugaꞌ paku ku baw ningkau, intomun sa ku la bong ko mintu jawom haluhaya na. Panimbangan nu sa ku maka sabbutun na pin awon ku ni sultan, balangkali ku tapōꞌ man jawom jīl tuu. 15Batan aku itu bay binoo man lahat kami, yana lahat bangsa Hibrani, bay jaꞌ ku pinaggos. Pag ntuu ni Ejip, san ku bay tajīl, yaꞌ du bay luu dusa ku.”

16Na pag ndaꞌ tukang buwat tinapay looy siꞌ mahap kamaatunan upihan soheꞌ na, ilooy ma yuk na ni si Yusup, “Aku pun, bay du ku la ngupi. Njawom pandapat ku, lay ku konoꞌ ngandurung tallu pangkat bakaꞌ tinapay. 17Kuwan bakaꞌ man jataꞌ banahan, isihan jinisan tinapay para ni sultan, sugaꞌ luu na pin siga manuk-manuk mangan isi bakaꞌ looy.”

18Pag halling si Yusup, “Na njawom upihan nu ilay, tallu bakaꞌ looy tuwaꞌ pa tallu ngallaw. Kamaatunan upihan nu ilay siꞌ meꞌ tuu: 19Njawom tallu ngallaw, pinōꞌ na du ko meꞌ sultan man jawom jīl, sugaꞌ nohoꞌ na baw pinonggolan kallong nu. Pag-anu, boꞌ siniitan baran nu taꞌ tehang sampay kinakan na isi baran nu leꞌ ga manuk-manuk.”

20Na taabut jaꞌ tallu ngallaw looy siꞌ, ndooy na du llaw man sultan bay pinamaddihan. Dari lay ya ballang mehe man na maglami-lami ka ga kunsihal na. Maka lay sohoꞌ na binoo pa awpan da bay tukang nunggang inuman na ka bay tukang buwat tinapay na. 21Kuwan tukang nunggang inuman looy siꞌ, lay na pinabalik pa bay ntan na maruhuꞌ sampay lay na ya balik nunggangan sultan. 22Sugaꞌ kuwan tukang buwat tinapay looy siꞌ, lay na sinohoꞌ pinapatoy boꞌ nohoꞌ siniitan taꞌ tehang. Dari ilooy siꞌ ma bay katuwaꞌ ni ga lalla looy sikaduwa, sikatuwaꞌ bana ka bay halling si Yusup. 23Salla na, kuwan tukang nunggang inuman looy baw siꞌ tu, lay jaꞌ takupan na bay tugun si Yusup.

Currently Selected:

Panagnaan 40: sjm

Highlight

Copy