Panagnaan 42

Siga danganakan si Yusup pilay pa Ejip malli balanjaꞌ

1Na balik ta pa si Yaꞌkub ndooy ni Kanan, pag taaka na luu balanjaꞌ ndooy ni Ejip pinaballihan, yuk na ni siga anak na, “Balanjaꞌ tabi itu yaꞌ na kuhi pasampun saumu bong kam sat si-ndaꞌ-ndaꞌ jaꞌ lunnaa. 2Habal jama, luu konoꞌ balanjaꞌ pinaballihan ndooy ni Ejip. Bong anu, pilay teꞌ kam malli bong pin yaꞌ jaꞌ kitabi matoy kabobowan.”

3Dari siꞌ lay na sohoꞌ si Yaꞌkub siga siyaka si Yusup sikasapū pilay pa Ejip malli balanjaꞌ. 4Sugaꞌ bong si Benjamin, yana siyali si Yusup, yaꞌ na bay patabeꞌ si Yaꞌkub ninsila. Tawu na baw ya taggahaꞌ luu na baw mintu maat katuwaꞌ niiya.

5Dari lān siga anak si Yaꞌkub siꞌ pilay pa Ejip malli balanjaꞌ, meka du jama pahaboy ninsila batan gotom looy siꞌ lataꞌ na du ni sikaliput Kanan.

6Na si Yusup siꞌ tu, pagka iya panghuluꞌ gubnul ni sikaliput Ejip ngantanan kapatut maballi balanjaꞌ ni jama, talpaksaꞌ iya du man ga danganakan na patiluꞌ. Dari siꞌ, pag takka da pilay, lay na sila pasōng pa mman na boꞌ da sujud labbasakayi ni awpan na. 7Si Yusup siꞌ tu, takila na na ga siyaka na, sugaꞌ sila yaꞌ kakila. Dari lay doꞌ ya magbawuꞌ-bawuꞌ yaꞌ sila takila na, boꞌ kasla lagi bitsala na ninsila, yuk na, “Jama maninggai kam tu?”

8Pag tampung da siꞌ, “Kami tu la jama man Kanan luꞌ pitu malli balanjaꞌ.”

9Pag-anu siꞌ, tapanambung na meꞌ si Yusup bay upihan na pasal sila maruhuꞌ. Pag-anu yuk na, “Tukang mayu-mayu bitu kam! Banti mintu, lay na baw tatammu bi kalammaan paglahat tuu.”

10Pag tampung da, “Uy, niyaꞌ baw bilay Tuwan Gubnul. Kami tu pitu malli balanjaꞌ jaꞌ. 11Kami itu danganakan sikamimon, dambuwaꞌ mmaꞌ. Saꞌ ga kami tukang mayu-mayu. Jama bonto kami.”

12Yuk si Yusup ninsila, “Ā, yaꞌ ba ku pitsayaꞌ. Kaam itu bay pitu, basta miha kam kalammaan paglahat kami.”

13Yuk da baw siꞌ tu, “Kami itu Tuwan sapu-duwa magdanganakan dambuwaꞌ mmaꞌ ndooy ni Kanan. Sugaꞌ kuwan ilooy ma duwa, yaꞌ luu bay mmeꞌ batan ma kabungsuhan lay tamban ndooy mman mmaꞌ kami. Kuwan ilooy disu, lay na duhuꞌ-duhuꞌ.”

14Yuk si Yusup baw siꞌ tu, “Ndaun bi na ba meꞌ halling sambat ku na siꞌ, basta tud mattan du bina kam tukang mayu-mayu. 15Sugaꞌ meꞌ tee na, ndaꞌ ku teꞌ bong mawjud bitsala bi. Subali ku baw ningkaam ngkod-ngkoran masi gi llum sultan, basta yaꞌ kam papoleꞌ ku bong yaꞌ doꞌ bay duhuꞌ nakka pitu ariꞌ bi ma kabungsuhan. 16Sangkon, pilay na doꞌ kam disu ngaddoꞌ ariꞌ bi. Kuwan kaam kasohean, jīl ku na doꞌ halloman yaꞌ gi tumatandaꞌ bana bitsala bi. Bong mintu yaꞌ bay bana, ndang-ndang llum gi du sultan, basta subali ku baw ningkaam, yaꞌ kam papoleꞌ ku sabap tud mattan du kam tukang mayu-mayu.” 17Pag-anu siꞌ, lay na doꞌ sila sikamimon njīl njawom tallu ngallaw.

18Paddus jaꞌ siꞌ tallu ngallaw, yuk si Yusup ninsila, “Aku itu tawu pa Tuhan. Sangkon, buwanan ta lagi kam dapat llum basta asip bi jaꞌ panohoan ku. 19Ndaꞌ ta sa bong sabana-bana kaam jama bonto. Disu kam subay tamban na doꞌ njawom jīl tuu. Kuwan kaam kasohean, tuhiyanan bi na doꞌ pa lumaꞌ bi balanjaꞌ ma bay balli bi pa mman anak-nda bi taggahaꞌ malasahi sila kalingantuhan. 20Sugaꞌ pag beleng bi pitu, yaꞌ dari bong yaꞌ bay luu taboo bi siyali bi mari katoonan ku mawjud bitsala bi, boꞌ bi yaꞌ sohoꞌ ku pinapatoy.”

Dari sila siꞌ tu lillaꞌ na jaꞌ 21sampay yuk dangan pa dangan, “Saꞌ ga bina oy, hinisab na kitabi meꞌ Tuhan sabap kalaatan bay pabuwat tabi ni siyali tabi maruhuꞌ. Bay na ya maku luuy ningkitabi, sugaꞌ yaꞌ san bay paruli tabi. Sangkon pag batnaa, kinisas na kitabi.”

22Yuk si Ruben baw siꞌ tu, “Ndang bay na kam ba baan ku bay llaw looy, ‘Daa ya pakaatun bi,’ sugaꞌ yaꞌ san kam bay paruli. Pag batnaa, tuwaꞌ hisab na situ kitabi ni bay kapatoy na.”

23Si Yusup baw siꞌ tu, tahati na mimon bitsala da, sugaꞌ kanna da niyaꞌ, batan tuktuk si Yusup mitsala ninsila bay gi makoy julbahasa.

24Lay jaꞌ siꞌ takale si Yusup bitsala da, ilooy ma lay doꞌ ya palakka sampay nangis. Pag lupus, lay na ya pabeleng mitsala ninsila sampay lay gi peneꞌ na si Simiyun nohoꞌ iningkotan ni awpan da.

Ga siyaka si Yusup pabeleng pa Kanan

25Pus meꞌ looy, lay na si Yusup magpanohoꞌ ngisihan siga karut da ka balanjaꞌ bay balli da. Maka lay du sohoꞌ na inannaꞌ sīn bay bayad da saliꞌ-saliꞌ huwin pa behe karut da, boꞌ lay gi sila sohoꞌ na binuwatan lutuꞌ. 26Lay jaꞌ siꞌ ga siyaka na nguwanan ga kuraꞌ da, ilooy ma lay na sila palakka.

27Taabut man da pahantiꞌ sangom, kuwan disu lay pilay pa karut na ngaddoꞌ isi na dangkitiꞌ man na makan kuraꞌ na. Pag ungkad na, luu na ndooy pilak man na bay mayaran balanjaꞌ na. 28Dari lay linganan na ga danganakan na, yuk na, “Tu doꞌ kam ba. Atu sīn ku lay pinapoleꞌ balik njawom karut ku!” Dari siꞌ, magkabba-kabba na atay da. Maka mipig na ga sila ni katawu da sambayan da sitilaw-tilaw, yuk da, “Ongoy tu la meꞌ tuu bay tinakdil meꞌ Tuhan ningkitabi?”

29Na pag takka da pa Kanan, lay na sila nuntutan mmaꞌ da bong oy bay katuwaꞌ sila ni bay palanan da. 30Yuk da, “Lalla looy la ma maggubnul ndooy ni Ejip, kasla jaꞌ bitsala na ningkami. Sampay lay gi kami tanggap na mayu-mayuhan kalammaan paglahat da. 31Sugaꞌ lay ya baan kami jama bonto kami, saꞌ ga kami tukang mayu-mayu. 32Bay gi ya baan kami, bay sapu-duwa kami danganakan dambuwaꞌ mmaꞌ. Disu lay na duhuꞌ-duhuꞌ. Kuwan ma kabungsuhan, batnaa lay tamban man mmaꞌ kami ndooy ni Kanan. 33Salla na, yaꞌ san bay pitsayaꞌ gubnul looy ningkami. Sambat na, subay luu buktiꞌ bong bana-bana du kami bonto. Dari lay na doꞌ kami sohoꞌ na tamban disu. Kuwan kami kasohean, lay na sohoꞌ na moleꞌ nuhiyanan balanjaꞌ anak-nda kami taggahaꞌ malasahi konoꞌ sila kalingantuhan. 34Sugaꞌ bay tugun na, subay konoꞌ boo kami luꞌ pilay siyali kami, boꞌ na kuhi pitsayaꞌ kami jama bonto maka saꞌ tukang mayu-mayu. Na bong mintu lay na ya taduwan kami, papoleꞌ na du konoꞌ balik danganakan kami maka sumunsayaꞌ na kami konoꞌ magpōꞌ-paasok ni lahat looy maglitu.”

35Na pag taabut da ngahudhuran karut da, saliꞌ-saliꞌ na sila bay nammu putusan pilak man da bay malli balanjaꞌ da. Pag ndaꞌ da luu gi sīn da, tud bay tawu sila sampay mmaꞌ da.

36Dari yuk mmaꞌ da ninsila, “Uy, sadda du bitu kam noy katis na lungay mimon anak ku man diyoꞌ dakan ku. Duhuꞌ-duhuꞌ si Yusup, boꞌ pasunuꞌ si Simiyun. Pag batnaa, kahandak bi si Benjamin na baw pasunuꞌ lakkahan bi man diyoꞌ dakan ku. Uy la, yaꞌ na bitu taambat kasusahan njataꞌ ku!”

37Pag halling si Ruben ni mmaꞌ da, “Biyahun na ba Maꞌ, aku sa bahalaꞌ ni si Benjamin. Bong mintu ya yaꞌ bay taboo ku balik pa mman nu, dari san gi papatoy nu anak ku ma lalla sikaduwa. Basta pabeleng ku sa ya pitu pa mman nu.”

38Iya tampung si Yaꞌkub, “Basta yaꞌ baw situ tapatugutan ku anak ku ma kabungsuhan mmeꞌ ningkaam. Anak ku ka si Rakel duwa lisu du. Boꞌ disu lay na matoy. Pag batnaa disu sa takapin. Bong mintu, sipais, lay na baw ya kongoy-kongoy ni palanan bi, meꞌ tuu na katoahan ku, matoy njawom susa na situ ku meꞌ bi!”

Currently Selected:

Panagnaan 42: sjm

Highlight

Copy