Matthew 20

Da Anḵewaaḻ Si Mumuḻḻaan Atta De Grape

1Ḵanan Jesus, “Sa ampangatan Apudyus mipani'tte sinḵuwa'tte mumuḻḻaana'tta de grape we nawwiḵise ummoy nansingit aḵ tangdanana'ḵ umoy anḵewaaḻ si mumuḻḻaana'tta de grape. 2Nangdas ḵad, nantutuḻagandae ossaane palata tangdan ni osa'tte sin-aḻgaw. Pun imbuunna dida'ḵ umoy nanḵewaaḻ si mumuḻḻaana'tta de grape.

3“Suminaḻ ḵad, ummoy sinḵuwa'tte mumuḻḻaana'tta de grape nanggaḵay ḵasin woḵ indasana da bulakbol atte market. 4Ḵanana ḵan dida, ‘Nu pionyu bose umoy maḵaḵewaaḻ si mumuḻḻaaḵ atta de grape, ittoḵ ustu we tangdanyu.’ 5Pun ummoyda naḵaḵewaaḻ.

“Anna ḵade mumamatuḵ, ummoy os nangngit aḵ matangdanan. Siya bos ḵingwana'tte ummag-agaw. 6Madam-an ḵad mumasdom, ummoy os ḵasin nansingit woḵ indasana da sisiḵade ippun ḵoonda. Ḵanana ḵan dida, ‘Ngaipayu tangtanggaon sin-aḻgawe naippun ḵoonyu?’

7“Ḵananda, ‘On te naippun anangdan ḵan diḵani.’

“Ḵanan ni sinḵuwa si mumuḻḻaan atta de grape, ‘Inḵayu bos maḵaḵewaaḻ si mumuḻḻaaḵ atta de grape.’

8“Mummasdom ḵad, ḵanan ni sinḵuwa'tte mumuḻḻaan atta de grape si ap-apuwonda, ‘Ayagam da nanḵewaaḻ ta ittom da tangdanda. Isaḻadnu'tta ḵapayatan inggana'tta ḵasapaan.’#20:8 Leviticus 19:13.

9“Pune sadi, dummatong ḵad da asi naḵaḵewaaḻ atte mummasdom, sin-ossae palata tangdanda. 10Dummatong ḵad da ḵasapaane nanḵewaaḻ, ninamnamadae ad-adu tangdanda yaḵon an-iisu tangdandae sin-ossae palata. 11Pun innaḻada ḵad da tangdanda, insaḻaddae singngongonot atte sinḵuwa'tte mumuḻḻaan atta de grape 12woḵ ḵananda, ‘Da ḵapayatan, abuse sin-orasan nanḵewaaḻanda ya anna ḵani gaye inanusanni ye ummaḻ-aḻgaw nanḵewaaḻ atte lengelenge init. Pun ngaipam os ay iyisu tangdanni ḵan dida?’

13“Yaḵon ḵanan ni sinḵuwa si mumuḻḻaana'tta de grape, ‘Buḻbuḻun, naippun kinulukḵu ḵan diḵayu. Daḵampun ḵamman aḵ siya tuḻagan taḵu ossaane palata sin-aḻgawyu? 14Aḻanyu da tangdanyu ta inḵayun. Nu pioḵe iyisu tangdan da ḵapayatan ḵan diḵayu, awad ḵamman biyangyu? 15Adipun ḵamman miyunude gastuwoḵ pilaḵḵu si pioḵ angastuwan? Maapos ḵayu ḵad ain gapu ta allaayaḵ?’ ”

16Pun ḵanan Jesus we nangiyanungus, “Sinsadi, adu da tagu we nangatu we mipababa ya da nababae tagu sinsadi, mipangatuda si umali ye aḻgaw.”#20:16 Sa osae pion ni anna ugudon, da naudi sinsadi, dida da umuna ḵad da ummuna sinsadi, dida da naudi.

Sa Piḵlun Jesus We Nangibaga Si Matoyana Ḵan Umuliyana

(Mrk. 10:32-34; Luk. 18:31-34)

17Anagada ḵad da Jesus we umoy ad Jerusalem, imbattawana da nasawaḻan aḵ duwae disipuluna woḵ ḵanana ḵan dida, 18“Dongngonyu, annan intaḵu'd Jerusalem. Nu dumatong taḵu sidi, saḵone Abeng Di Tagu mipuḻangaḵ atta papangat da papadi ya da mimistulun ni lintog. Ḵad ḵoddonganda saḵon aḵ matoy 19ya asidaot saḵon ipuḻang atta Gentil. Ḵad ang-angyagonda saḵon ḵan ap-aplitonaḵ, ḵade sadi ipattoḻda saḵon atte kros. Yaḵon sa miḵaḵlu we aḻgaw, taguwonaḵ ḵan Apudyus.”

Sa Ḵindaw Ni Inan Da James Ḵan John

(Mrk. 10:35-45)

20Pune sadi, ummoy ummadani asawan Zebedee ya da duwae abengnae laḻaḵi ḵan Jesus. Pun nanalluḵu si sinagung Jesus woḵ ḵanana, “Apu, awad de pioḵ ḵodawon.”

21Pun ḵanan Jesus ḵan siya, “Ngai ḵad ain ḵodawom?”

Ḵananae summongbat, “Nu dumatong timpu we ampangatam, nu maḵwa, tumuḵdu osae abengḵu si madawinannu ya sa osa si madawigim.”

22Ḵanan Jesus atta duwae ansunud, “Ippun igammuyu'tte ḵodawonyu. Maanusanyu ḵad aine ampaḵaḻame isun ni ampaḵaḻamaḵ?”

Ḵananda, “On, lamogni.”

23Ḵanan Jesus ḵan dida, “Tuttuwae lamogyu maanusane ampaḵaḻame isuḵ. Yaḵon naippun ḵaḻabbongaḵe ampili nu ngai da tumuḵdu si madawinanḵu ḵan madawigiḵ te da annae saad insaganan Amaḵ atta nagangpute pinilina.”

24Dingngoḻ ḵad da simpuḻu we disipulun Jesus, summangada'tta duwae ansunud. 25Pun inayagan Jesus da disipuluna woḵ ḵanana, “Igammuyu we da ampangat atta Gentil, ipatutda da pionda'tta ipangatanda. Taḵon ay da nangangatu we tagu, daḵoḻ ḵaḻabbongandae angipangat atta taguda. 26Yaḵon daḵampun oḵyan aḵ ḵaḵnat inonyu we angwa te ngaiman ḵan diḵayu we pionae nangatu, ḵasapuḻane anserbi'tta buḻunnae isun di sammilu. 27Ḵad nu ngai ḵan diḵayu pionae ambalin aḵ ḵangatuwan, ḵasapuḻane anserbi'tta buḻunnae isun di musassu. 28Siya unudonyu saḵone Abeng Di Tagu te daḵampun aḵ ummaliyaḵ ta anserbi da tagu ḵan saḵon. Yaḵon ummaliyaḵ ta anserbiyaḵ ḵan dida ya ittoḵ biyagḵu ta masubut da adu we tagu'tte madusaanda'tta basuḻda.”

Da Duwae Naḵuḻap

(Mrk. 10:46-52; Luk. 18:35-43)

29Tinenan ḵad Jesus ya da disipuluna'd Jericho, aduadu da tagu we nitun-ud ḵan dida. 30Baag-en inninggaw da duwae naḵuḻape tutuḵdu si igid ni ḵaḻsa. Dingngoḻda ḵade annate lumaus aḵ Jesus, insaḻaddae nampoḵaw woḵ ḵananda, “Apu we ganaḵ Ari David,#20:30 Ganaḵ David - awag ni uuwayondae Messiah, dam-on da naḵuḻap usarone angayag ḵan Jesus. Bigbigondae siya Messiah baḵon nu Kristu we pinilin Apudyus aḵ Anagu ya An-ari. ḵadaguwam ḵappos diḵani!”

31Sinang-an da adu we tagu dida yaḵon amo ḵanandae nampoḵaw, “Apu we ganaḵ Ari David, ḵadaguwam ḵappos diḵani.”

32Pun ummillong aḵ Jesus woḵ ḵananae nangayag ḵan dida, “Ngai ḵad ain pionyu we ḵooḵ ḵan diḵayu?”

33Ḵananda ḵan siya, “Apu, pionni ye maḵaila.”

34Pun ḵinadaguwan Jesus dida woḵ inappadana da atada. Pun daguse naḵailada woḵ nitun-udda ḵan siya.

Currently Selected:

Matthew 20: kml

Highlight

Copy