Matthew 21

Sa Nanaydayawanda Ḵan Jesus Ad Jerusalem

(Mrk. 11:1-11; Luk. 19:28-40; Jhn. 12:12-19)

1Madam-an ḵad da Jesus ya da disipuluna'd Jerusalem, dummatongda'tte domangna'd Bethphage atte Beleg Olives. Namangpanguwon Jesus da duwa'tta disipuluna 2woḵ ḵanana ḵan dida, “Inḵayu si umasi ye ili. Ḵad nu dumatong ḵayu sidi, odasanyu nipungode donkey ya sa ubbuna. Uḵasanyu ya indatongyu dida ḵan saḵon. 3Ḵad nu awad angimus ḵan diḵayu, ḵananyu, ‘Ḵasapuḻan ni Apu dida,’ woḵ daguse iyunudna.”

4Naḵwa sana ta mituttuwa inggilin da profeta si awe ye ḵanana,

5“Ibagayu'tta tagu'd Jerusalem,#21:5 Atte Greek Zion osae ngadanna'd Jerusalem.

‘Annat Ariyu we umali ḵan diḵayu

we impakumbabana long-agnae

nangabayu si ubbun ni donkey.’ ”#21:5 Isaiah 62:11; Zechariah 9:9. Sa ugalin da ari'tte awe, nu angabayu da papangatda si ḵabayu we umoy umadani si ili, aaddi ye umoyda maḵagubat. Yaḵon nu angabayuda'tta donkey ye umoy umadani si ili, uḻnus panggobda.

6Pun ummoy da duwae disipuluna woḵ ḵingwada imbilin Jesus ḵan dida. 7Indatongda ḵad donkey ya sa ubbu ḵan Jesus, iyyap-apda da taḵḵop da silupda'tta odog da duwae ayam woḵ angabayu'ḵ Jesus. 8Ḵaaduwan atta tagu we inninggaw sidi iyyap-apda da taḵḵop da silupda'tte ḵaḻsae ayon Jesus. Da udum ḵad os lummapidda'tta pangan da ḵayu woḵ iyyap-apda si ḵaḻsae ayona ta idayawda ḵan pasaaḻonda. 9Da losane tagu we ummun-una ḵan niyun-unud ḵan Jesus, ḵanandae nanugtug-uy, “Madaydayaw ganaḵ Ari David! Madaydayaw oḵyan umali ye imbuun Apudyus! Madaydayaw aḵ Apudyus we ḵangatuwan!”#21:9 Psalm 118:25-26.

10Dummatongda ḵad ad Jerusalem, nagulu da losane tagu sidi woḵ ḵananda, “Ngai anna?”

11Ḵanan da tagu we nibuḻun ḵan Jesus, “Siya'ḵ Jesus we profeta we iNazareth si probinsiya'd Galilee.”

Sa Namaḻyawan Jesus Atta Allaḵlaḵu Atte Templo

(Mrk. 11:15-19; Luk. 19:45-48; Jhn. 2:13-22)

12Pune sadi, nillumnoḵ aḵ Jesus atte paway ni templo#21:12 Sa inggawan Jesus, daḵampun ad daḻom si templo yaḵon sa lasin ni templo we inggawan da tagu we andaydayaw. woḵ pinaḻyawna da losane allaḵlaḵu ḵan ngumina'tta banage mausar atte andatunan ḵan Apudyus ad daḻom atte paway ni templo. Binalittuwaḵna da lamisaan da ansusuḵat aḵ pilaḵ ya da tutuḵduwan da allaḵu'tta kalapati, 13woḵ ḵanana ḵan dida, “Nigili'tte Ugud Apudyus we ḵanana, ‘Sa boḻoyḵu ngannonda boḻoye luluwaḻuwan da tagu.’#21:13 Isaiah 56:7. Yaḵon nambalinonyu'ḵ inggawan da tulisan.”#21:13 Jeremiah 7:11.

14Pun ummoy da udume naḵuḻap ya da udume napilaye tagu ḵan Jesus si paway ni templo woḵ ḵinaanna da saḵitda. 15Yaḵon innilan ḵad da papangat da papadi ya da mimistulun ni lintog da nakaskasdaawe ḵingwana ya dingngoḻda bos da abenge ḵanandae angiyip-ipḵaw atte paway ni templo, “Madayaw ganaḵ Ari David!” Summangada.

16Ḵananda ḵan Jesus, “Dingngoḻnu ḵamman iyip-ipḵaw da annae abeng?”

Ḵanan Jesus, “On, dingngoḻḵu. Iḵagasmoḵyu oḵyan binasayu si nigili ye Ugud Apudyus we ḵanana, ‘Tuttuduwan Apudyus da abeng ya da uttinge gattoḵe andayaw ḵan siya.’ ”#21:16 Psalm 8:2. 17Pun tinenan Jesus dida woḵ ummoy ummiyan ad Bethany.

Sa Ḵayu We Adipun Amunga

(Mrk. 11:12-14, 20-24)

18Bigbigat ḵad si nipauliyan da Jesus ad Jerusalem, nauḻat. 19Innilana ḵad ḵayu we fig si igid ni ḵaḻsa, ummoyna inadani nu awad bungana yaḵon naippun indasana, abus tubuna. Pun ḵanan Jesus si ḵayu, “Inggana sinsadi, adiḵa ogon amunga!” Pun daguse naḻ-uy sadi ye ḵayu.

20Innilan ḵad da disipuluna ḵingwana, sintataagda woḵ ḵananda, “Ngaipa daguse naḻ-uy sanate ḵayu?”

21Ḵanan Jesus ḵan dida, “Ibagaḵ ḵan diḵayu ḵatuttuwaan, nu amati ḵayu ḵan Apudyus ya adi ḵayu anduwaduwa, lamogyu ḵoon isun ni ḵingwaḵ si annae ḵayu we fig. Daḵampun aḵ abus sana, lamogyu bos ḵanan si annae beleg, ‘Ḵumassadḵa ya an-atunḵa si baybay,’ ḵad tuttuwae maḵwa. 22Nu awad pammatiyu ḵan Apudyus, ittona da losane ḵodawonyu nu alluwaḻu ḵayu ḵan siya.”

Sa Ḵaḻabbongan Jesus

(Mrk. 11:27-33; Luk. 20:1-8)

23Pun nipauli'ḵ Jesus si paway ni templo. Nantuttudu ḵad, nandatdatong da papangat da papadi ya da pallakayon da Judyu woḵ ḵanandae nan-imus ḵan siya, “Ngai ḵaḻabbongame angwa'tta sana? Ḵad ngai nangitod ḵan siḵa si annae ḵaḻabbongam?”

24Ḵanan Jesus we summongbat, “Awad ud imusoḵ ḵan diḵayu. Nu songbatanaḵ, asiḵ os ibaga nu ngai ḵaḻabbongaḵe angwa'tta sana.” 25Pun ḵanana, “Dinu naḻpuwan ni ḵaḻabbongan John we ambonyag? Aḵ Apudyus baḵon nu da tagu?”

Pun ḵanandae nan-uugud, “Ngai isongbat taḵu? Nu ḵanan taḵu we, ‘Naḻpu ḵan Apudyus,’ ḵanana ḵan ditaḵu, ‘Ngaipayu adi pinati nu?’ 26Yaḵon nu ḵanan taḵu we sumongbat, ‘Naḻpu'tta tagu,’ siya iyogyat taḵu nu ngai ḵoon da tagu ḵan ditaḵu te losanda pinati ye profeta'ḵ John.” 27Pun sa insongbatda ḵan Jesus, “Naippun igammuni.”

Pun ḵanan Jesus ḵan dida, “Nu ḵaḵnat, umadiḵ os ibaga nu ngai nangitod si ḵaḻabbongaḵe angwa'tta sana.”

Sa Pani Atta Duwae Abeng

28Pun inug-uggud Jesus annae pani woḵ ḵanana ḵan dida, “Ngai ḵasomsomḵanyu'tte mipanggob si anna? Inninggaw tagu we duwa da abengnae laḻaḵi. Sin-aḻgaw ḵad ḵanana si panguḻu, ‘Abeng, inḵa anḵewaaḻ atte mumuḻḻaan atta de grape.’

29“Summongbat woḵ ḵanana, ‘Umadiḵ,’ yaḵon umun-uni pun, nandadauli woḵ ummoy nanḵewaaḻ.

30“Pune sadi, ummoy os ama si udidi woḵ isuna bos imbagana ḵan siya. Ḵanana, ‘On Ama, annae iyyaḵ,’ yaḵon adipun ummoy.” 31Pun ḵanan Jesus, “Dinu'tta annae duwa nanuttuwa si pion amada?”

Ḵananda, “Sa panguḻu.”

Pun ḵanan Jesus ḵan dida, “Ibagaḵ ḵan diḵayu ḵatuttuwaan, sa ḵabasbassuḻane tagu we isun da andadagup atta bugis ya da puta, umun-unada nu diḵayu umoy si ampangatan Apudyus. 32Te ummali'ḵ John we Ambobonyag woḵ intuttuduna ḵan diḵayu inonyu we mabiyag si maun-unane biyag yaḵon adiyupun pinati. Ḵad sa andadagup atta bugis ya sa puta, namatida ḵan siya. Taḵon ay nu intollongyu inondae nambabawi'tta basuḻda, adiḵayupun nambabawi'tta basuḻyu ya adiyupun os pinati.”

Sa Pani Atta Gumagammole

(Mrk. 12:1-12; Luk. 20:9-19)

33Pun ḵanan Jesus, “Dongngonyu osae pani. Inninggaw tagu we nammuḻa'ḵ aduadu we grape atte lutana. Pun ḵinabitina nampaliḵwos woḵ ummabut atte batu ta mauppunan ni baḻat da de grape nu asotonda. Nantaḵad os aḵ antaḵnange boḻoy ta inggawan da guwaḻda. Pun impatangḵonna'tta udume gumagammole woḵ ummoy atte adayu we ili.#21:33 Isaiah 5:1-2.

34“Dummatong ḵad timpu we ambuḻasanda'tta de grape, imbuun ni sinḵuwa da sammiluna'ḵ umoy angaḻa si billayna. 35Yaḵon dummatong ḵad da sammiluna, dinoḵmaan da gumagammole da sammiluna woḵ inap-aplitda osa ḵan dida, gingngatda osa woḵ binatubatuda osa. 36Pun imbuunna bos ḵasin da ad-adu'tta sammiluna nu da ummuna yaḵon da gumagammole, ḵingwada bos isun ni ḵingwada'tta ummuna. 37Anungusna ḵad, imbuunna abengna ḵan dida te ḵanana'tte somsomoḵna, ‘Patpatgonda abengḵu.’

38“Yaḵon innilan ḵad da gumagammole ye sa abeng ni sinḵuwa'tte mumuḻḻaan atta de grape, ḵanandae nantutuḻag, ‘Annaya angilaḵsun si annae mumuḻḻaan atta de grape. Awwayyu, gongaton taḵu ta anḵuwa taḵu da laḵsunna.’ 39Pun dinoḵmaanda woḵ pinaḻyawda'tte lasin ni sadi ye mumuḻḻaan atta de grape woḵ gingngatda.

40“Pun nu dumatong sinḵuwa si mumuḻḻaan atta de grape, ngai nin ay ḵoona'tta gumagammole?”

41Ḵanandae summongbat, “Aaddi ye ḵaog-ogyat inonae angongat atta sanae ḵabasbassuḻane tagu. Ḵad iyatunna ipatangḵon mumuḻḻaana'tta de grape atta sabali ye tagu we angitod si billayna nu imbubuḻas.”

42Pun ḵanan Jesus ḵan dida, “Iḵagasmoḵyu oḵyan binasayu si nigili ye Ugud Apudyus we ḵanana,

“ ‘Sa batu we indiyan da nantaḵad aḵ boḻoy,

siya nambalinon Apudyus aḵ ḵapatogane batu

we amapagdot atte boḻoy.

Sa annae ḵingwan Apudyus, ambaḻubaḻu.

Ḵad nakaskasdaaw atte ḵasomsomḵan taḵu.’#21:42 Psalm 118:22-23.

43“Pun sana ibagaḵ ḵan diḵayu we aḵ Apudyus iginoḵnae angipangat ḵan diḵayu ya siya ipangatana da tagu we angwa'tta ambaḻu we mibagay atta ipangatana. 44Ngaimane maottag si annae batu magomogomoḵ ya sa tagu we maottagan ni sanae batu, magabugabuḵe isun di gabu.”

45Dingngoḻ ḵad da papangat da papadi ya da Pharisee sanae pani, inigammudae dida piona ugudon. 46Pun pionda oḵyane doḵmaan aḵ Jesus yaḵon siya iyogyatda da tagu te imbelangda'ḵ Jesus we profeta.

Currently Selected:

Matthew 21: kml

Highlight

Copy