Matthew 19

Sa Mipanggob Atte Idang

(Mrk. 10:1-12; Luk. 16:18)

1Ginangput ḵad Jesus imbaga da sana, tinenana probinsiya'd Galilee woḵ iḵaponna'tte saḵubna'd Judea we domang ni tawwang Jordan. 2Amod da tagu we nitun-ud ḵan siya woḵ ḵinaanna da saḵit da nasaḵit.

3Pun ummoy da udume Pharisee ḵan Jesus ta padasonda siḵapan woḵ ḵananda ḵan siya, “Iyunud ḵamman ni lintoge idangan ni laḻaḵi asawana taḵon ay nu ngai ye gapu?”

4Ḵanan Jesus we summongbat, “Adiyupun ḵamman binasa nigili'tte Ugud Apudyus we ḵanana, ‘Sa laplapunae nangwaan Apudyus atta tagu, ḵingwana dida'ḵ laḻaḵi ḵan bubai.’#19:4 Genesis 1:27; 5:2. 5Pun ḵanan Apudyus, ‘Sadi gapunae tenan ni laḻaḵi da amana ḵan inana ḵad nitipun atte asawana ḵad didae duwa nambalinda'ḵ ossaane long-ag.’ ”#19:5 Genesis 2:24. 6Pinagatupan Jesus we nan-ugud woḵ ḵanana, “Pun daḵandapun ogon aḵ duwae long-ag te nambalinda'ḵ ossaane long-ag. Ḵad da nantipunon Apudyus, adipun maḵwae ansinaon ni tagu dida.”

7Pun ḵanan da Pharisee ḵan siya, “Ngaipan Moses imbiline maḵwa an-idang da an-asawa nu angwa laḻaḵi'ḵ ḵasuḻatane an-idangda ya asinaot paḻyawon?”#19:7 Deuteronomy 24:1.

8Ḵanan Jesus we summongbat, “Gapu si tummungitong da somsomoḵyu iyyunud ay Moses yaḵon daḵampun aḵ ḵaḵnat planun Apudyus si damu. 9Sa ibagaḵ ḵan diḵayu, sa laḻaḵi ye idangana asawana malaksid nu naḵadagdagas, maḵabasuḻ si dagdagas nu angasawa si sabali ye bubai.”

10Ḵanan da disipuluna, “Nu ḵaḵnat maḵwa'tta an-asawa, un-unnoyna umadita angasawa.”

11Ḵanan os Jesus, “Yaḵon daḵampun aḵ losane tagu maḵaḵwa si ḵaḵnat te abus aḵ maḵaḵwa da innattan Apudyus aḵ ḵaḻabbongan. 12Te sa lasune adin da tagu angasaw-an nansabasabali. Awad da udume laḻaḵi ye adipun angasawa gapu ta naḵawoyda. Awad da udume inggagaḻada impaḵaan maḻpuwan ni maganaḵanda. Ḵad awad da udume adipun angasawa gapu si anserbiyanda ḵan Apudyus si ampangatana. Sa tagu we ḵallabbong anuttuwa si sanae tuttudu, ambaḻu oḵyan nu ḵoona.”

Sa Namindisyunan Jesus Atta Abeng

(Mrk. 10:13-16; Luk. 18:15-17)

13Pun nan-iyoy da udume tagu'tta abengda ḵan Jesus ta ipatayna imana ḵan iluwaḻuwana dida yaḵon sinuppaḵan da disipulu dida. 14Yaḵon ḵanan Jesus ḵan dida, “Iyunudyu we umali da abeng ḵan saḵon. Adiyu paadiyon dida te da tagu we isuda dida midogada'tte ampangatan Apudyus.” 15Pun impatay Jesus imanae namindisyun ḵan dida woḵ asiyot umoyon.

Sa Baḵnang

(Mrk. 10:17-31; Luk. 18:18-30)

16Sin-aḻgawan ḵad, baag-en inninggaw osae babaḻu we ummoy ḵan Jesus woḵ ḵanana, “Mistulu, ngai ambaḻu we ḵooḵ ta itton Apudyus ḵan saḵon biyag aḵ inggana?”

17Ḵanan Jesus, “Ngaipam imuson ḵan saḵon mipanggob si ambaḻu? Abus aḵ Apudyus aḵ ambaḻu. Nu piome awad ḵan siḵa biyag aḵ inggana, ḵasapuḻane tuttuwaom da losane bilinna.”

18Ḵanana, “Ngai'tta bilin ḵasapuḻane tuttuwaoḵ?”

Ḵanan Jesus, “Adiḵa pumatoy, adiḵa maḵadagdagas, adiḵa an-aḵaw ya adiḵa antultulli. 19Dayawom da amam ḵan inam#19:18-19 Exodus 20:12-16; Deuteronomy 5:16-20. ya ḵasapuḻane ayatom da asintatagume isun ni an-aayatnu si long-agnu.”#19:19 Leviticus 19:18.

20Ḵanan ni laḻaḵi, “Tinuttuwaḵ losan da sadi ye lintog. Pun ngai naippun ḵan saḵon?”

21Ḵanan Jesus ḵan siya, “Nu piom wadawadda ḵan siḵa, inḵa ingina da ḵuḵuwam ya ittom bayadna'tta ḵaḵapus woḵ awad de binaḵnangnu we inggappot Apudyus ad langit. Ḵad umaliḵa ta tun-udonaḵ.” 22Dingngoḻ ḵad ni sanae laḻaḵi imbagan Jesus, ummoyone andadauy te baḵnabaḵnang.

23Pune sadi ḵanan Jesus atta disipuluna, “Ibagaḵ ḵan diḵayu ḵatuttuwaan, anḵamnuḵamnut midog-an da babaḵnang si ampangatan Apudyus. 24Ḵasinḵu ibaga ḵan diḵayu we naḻaslasu lumnoḵan ni camel si abut ni tanud nu sa midog-an ni baḵnang si ampangatan Apudyus.”

25Dingngoḻ ḵad da disipuluna sana, amod pagay nantataagda woḵ ḵananda, “Ngai ḵad ain da maḵwae matagu?”

26Yaḵon sa nangitotollongan Jesus ḵan dida ḵanana, “Da tagu ḵad, naippun paat ḵallamog. Yaḵon ḵan Apudyus, lamogna ḵoon da ngaiman.”

27Pun ḵanan Peter, “Ilam Apu, tinenanni da losan ta ambalin ḵani'ḵ disipulum. Pun ngai maganabni?”

28Ḵanan Jesus ḵan dida, “Ibagaḵ ḵan diḵayu ḵatuttuwaan, saḵone Abeng Di Tagu, nu dumatong tumuḵduwaḵ si tronoḵe an-ari nu ḵoon Apudyus baru we lubung, diḵayu we nasawaḻan aḵ duwae nibuḻubuḻun ḵan saḵon, tumuḵdu ḵayu bos atta nasawaḻan aḵ duwae trono we angipangat ḵan anguwis atta ganaḵ da nasawaḻan aḵ duwae abeng Israel. 29Ḵad ngaimane tenana boḻoyna, susunudna, amana baḵon nu inana, da abengna ya da lutana gapu ḵan saḵon, anginsinggasute ḵaadu awatona nu da tinenana ḵad maittan si biyag aḵ inggana. 30Yaḵon sinsadi, adu da tagu we nangatu we mipababa ya da nababae tagu sinsadi, mipangatuda si umali ye aḻgaw.”

Currently Selected:

Matthew 19: kml

Highlight

Copy