John 3

Sa Ummayan Nicodemus Ḵan Jesus

1Inninggaw tagu we nangngadan aḵ Nicodemus. Siya ḵad, Pharisee ya osae pangat da Judyu. 2Sillabiyan ḵad, ummoy ḵan Jesus woḵ ḵanana, “Mistulu, igammuni ye siḵa imbuun Apudyus we umoy antuttudu ḵan diḵani te naippun maḵaḵwa'tta nakaskasdaawe sinyale ḵoom nu maid aḵ Apudyus ḵan siya.”

3Ḵanan Jesus, “Ibagaḵ ḵan siḵa ḵatuttuwaan, nu adi tagu miyanaḵ ḵasin, adipun maḵwae midoga si ampangatan Apudyus.”

4Ḵanan Nicodemus ḵan siya, “Ngai inon ni tagu we miyanaḵ ḵasin nu naḻaḵay? Maḵwa ḵamman mipauli si buwang inana ta miyanaḵ ḵasin?”

5Ḵanan Jesus, “Ibagaḵ ḵan siḵa ḵatuttuwaan, adipun maḵwae midoga tagu si ampangatan Apudyus nu adi miyanaḵ atte danum ya sa Ispiritu Santu. 6Sa miyanaḵ atte tagu, siya abeng di tagu yaḵon sa miyanaḵ atte Ispiritu Santu, siya abeng Apudyus te naispirituwan. 7Adiḵa mataag atte imbagaḵe ḵasapuḻane miyanaḵ ḵayu ḵasin. 8Isun ni bibbid, adipun maila yaḵon angoy atte dinuman. Dongngonyu bungug ni bibbid yaḵon naippun igammuyu si maḻpuwana ḵan ayonana. Sadi isunae naippun maila ḵan maawatan atte inon ni miyanaḵ ḵasin atte Ispiritu Santu yaḵon tuttuwae awad de ambanagana'tte biyag ni miyanaḵ ḵasin mipagapu'tte Ispiritu Santu.”

9Ḵanan Nicodemus, “Ngai inonae maḵwa?”

10Ḵanan Jesus, “Ngai inonae siḵa osa'tta madaydayawe mistulu'd Israel yaḵon adimpun maawatan da sana? 11Ibagaḵ ḵan siḵa ḵatuttuwaan, siya panoḵnoḵanni igammuni ya da innilani yaḵon adiyupun patiyon. 12Nu imbagaḵ ḵan diḵayu da mipanggob atta maḵwa si annae lubung ya adiḵayupun amati, ngai inonyu we amati nu ibagaḵ da mipanggob atta maḵwa'd langit? 13Naippun nampangatu'd langit yaḵon abusaḵe Abeng Di Tagu we dummoḻae naḻpu'd langit. 14Sa ḵingwan Moses, intayagna gambange sinan-uḻog si inninggawanda'tte bumbummaaw.#3:14 Numbers 21:4-9. Gapu'tta basuḻ da iyIsrael, imbuun Apudyus da uḻoge amod de gitada ta ngaimane ḵotbanda matoy yaḵon nu tangadonda intayun Moses we sinan-uḻog, adidapun matoy. Sadi isun ni maḵwa ḵan saḵone Abeng Di Tagu we ḵasapuḻane mitaḻayag, 15ta ngaimane amati ḵan saḵon, awad ḵan siya biyag aḵ inggana.”

16Gapu ta amod de ayat Apudyus atta tagu si lubung, innatodna os-ossaane abengna'ḵ datun ta ngaimane amati ḵan siya, adipun madusa'ḵ inggana yaḵon awad ḵan siya biyag aḵ inggana. 17Imbuun Apudyus abengna si lubunge daḵampun aḵ dusaona da tagu gapu'tta basuḻda. Yaḵon imbuunna ta taguwona dida si sadi ye madusaanda. 18Pun da amati ḵan siya, adidapun maḵoddongan. Yaḵon da adipun amati, naḵoddonganda. Te adidapun amati'tte os-ossaane Abeng Apudyus.

19Annaya gapunae maḵuwisda. Ummali si annae lubung sadi ye ngannonda Silawe anilaw atta an-aawat taḵu mipanggob ḵan Apudyus yaḵon siya dinumaon da tagu pongot nu sa silaw te lawweng ḵoḵoḵḵonda. 20Te da losane angwa'ḵ lawweng, sasangngaanda sadi ye ngannonda silaw ya adidapun umadani te adidapun pione masilawan da ḵoḵoḵḵonda. 21Yaḵon da angunud atte ḵatuttuwaan, umadanida'tte silaw ta mamaḵ-ilae aḵ Apudyus maḻpuwan ni angwaanda'tta ambaḻu we ḵoonda.

Sa Imbagan John Mipanggob Ḵan Jesus

22Pune sadi, ummoy aḵ Jesus ya da disipuluna'tte probinsiya'd Judea woḵ inninggawda sidi ta ambonyagda'tta tagu. 23Aḵ John ḵad os, nambonyag ad Aenon we adani'd Salim te adu danum sidi. Ḵad dumanatong da tagu we umoy ḵan siya pabonyag. 24Daampun aḵ John mibaḻud si sadi ye timpu.

25Angwa ḵad da disipulun John, naḵasossongbatda'tte osae Judyu si mipanggob atte ugalida we pumoḻḵasan. 26Pun ummoyda ḵan John woḵ ḵananda, “Mistulu, sa tagu we ummali ḵan siḵa si domang ni tawwang Jordan we sa pinanoḵnoḵam, awade ambonyag ḵad losan da tagu umoy ḵan siya.”

27Summongbat aḵ John woḵ ḵanana, “Naippun tagu'ḵ awad awatona nu adi abus maatod ḵan siyae maḻpu ḵan Apudyus. 28Diḵayu we mismu anaḵdoḻ atte imbagaḵe daḵampun aḵ saḵon Kristu yaḵon saḵon imbuun Apudyus we umuna nu siya. 29Sa ḵasasaadḵu isuna buḻbuḻun ni ankasar we laḻaḵi. Ḵad taḵon ay nu daḵampun ḵan siya angikasar si bubai, amod de layadnae midoga si kasar te dongngona gingan ni buḻbuḻunna. Sadi isuna ḵan saḵone amoamod layadḵu sinsadi gapu ḵan Kristu. 30Pun ḵasapuḻane siya ngumatu ya saḵon dumoḻa te siya planun Apudyus.”

Sa Naḻpu Ad Langit

31Sa naḻpu si annae luta, ḵuwan ni luta ya abus aḵ ugudona mipanggob atte luta. Sa naḻpu'd langit, siya ḵangatuwan. 32Ibagana da innilana ḵan dingngoḻna yaḵon aḵit da amati'tta ibagana ḵan dida. 33Ḵad da amati'tta ibagana, panoḵnoḵandae tuttuwa ibagan Apudyus. 34Sa imbuun Apudyus, siya ugudona da Ugud Apudyus te innatod Apudyus Ispiritu Santu ḵan siyae ippun anungusna. 35Te aḵ Ama we Apudyus, ayatona abengna woḵ impuḻangna ḵan siya da losan. 36Ḵad ngaimane tumuttuwa gapu si amatiyana'tte Abengna, maatod ḵan siya biyag aḵ inggana. Yaḵon sa adipun tumuttuwa gapu si adinapun amatiyan atte Abengna, ippun ḵan siya biyag aḵ inggana yaḵon sa sangan Apudyus iinggaw ḵan siya.

Currently Selected:

John 3: kml

Highlight

Copy