John 4

Aḵ Jesus Ya Sa Bubai Ye ISamaria

1Da Pharisee ḵad, dingngoḻdae naadu da inawis ḵan binonyagan Jesus we disipulu nu aḵ John. Inigammun Jesus we dingngoḻ da Pharisee anna. 2Yaḵon sa ḵatuttuwaan, daḵampun ḵan Jesus nambonyag yaḵon abus da disipuluna.

3Inigammun ḵad da Jesus sana, tinenanda probinsiya'd Judea ta mipaulida'tte probinsiya'd Galilee. 4Ḵad ḵasapuḻane ayonda'd Samaria. 5Pun dummatongda'd Sychar we osae ili'd Samaria ya adani si lutae innatod Jacob si awe ḵan Joseph we abengna. 6Inninggaw bubun Jacob sidi si awe. Gapu'tte ayong Jesus we nanadtaddaḻan, tummuḵdu si daḻnig ni bubun. Annae mumamatuḵ atte sadi.

7-8Da disipuluna ḵad, ummoyda si siyudad ngumina'ḵ ḵanonda. Sibotda ḵad, dummatong bubai ye iSamaria we umoy anaḵdu woḵ ḵanan Jesus ḵan siya, “Ittanaḵ ud aḵ inumoḵ.”

9Ḵanan ni bubai, “Ngaipaḵa gay anḵodaw aḵ danum ḵan saḵone siḵa ḵad Judyuḵa ya saḵon ḵad iSamaria?” Te sa ugalin da Judyu, adidapun maḵabuḻbuḻun atta iSamaria.

10Ḵanan Jesus, “Nu inigammum atod Apudyus ya inigammum nu ngaiyaḵe anḵodaw atte danum, siḵa oḵyan anḵodaw ta ittaḵ siḵa si danume angitod si biyag.”

11Ḵanan ni bubai, “Apu, adaddaḻoman annae bubun ḵad ippun gagaudnu. Dinu ḵad ain angaḻ-am atte danume angitod si biyag? 12Aḵ Jacob we daḵdaḵoḻ taḵu, impaḻaḵsunna annae bubun. Ḵad sanat maḻpuwan ni inumona ya sa inumon da abengna ya da ayamna. Nangatngatuḵa ḵamman nu aḵ Jacob?”

13Ḵanan Jesus, “Ngaimane uminum si danume maḻpu si annae bubun, mauwaw ḵasin. 14Yaḵon sa uminum atte danume ittoḵ, adipun ogon mauwaw. Te ambalin aḵ isunan bubune bumubus si long-agnae angitod si biyag aḵ inggana.”

15Ḵanan ni bubai, “Apu, ittanaḵ ud atte sanate danum ta adiyaḵ ogon mauwaw ḵad agayḵu we umoy anaḵdu.”

16Ḵanan Jesus ḵan siya, “Inḵa ayagan aḵ asawam ta umali ḵayu.”

17Ḵanan ni bubai, “Naippun asawaḵ.” Ḵanan Jesus, “Tuttuwa sanate imbagam, 18te nangallimaḵa nangasawa. Ḵad sa inḵamboḻoynu we sana, daḵampun aḵ gattoḵe asawam. Tuttuwa sanate imbagam.”

19Ḵanan ni bubai, “Apu, igammuḵe profetaḵa. 20Da danaḵḵoḻni, sa annae beleg andayawanda ḵan Apudyus yaḵon diḵayu ḵade Judyu, ḵananyu we ad Jerusalem ḵasapuḻane andayawan da tagu ḵan Apudyus.”

21Ḵanan Jesus, “Bubai, amatiḵa ḵan saḵon, dumatong timpu we daḵampun ogon atte annae beleg baḵon nu ad Jerusalem andayawan da tagu ḵan Apudyus we Ama. 22Diḵayu we iSamaria, naippun igammuyu ḵan Apudyus we dayawonyu. Diḵani ḵade Judyu, igammuni te diḵani maḻpuwan ni anagu'tta losane tagu. 23Yaḵon dummatong timpu we da tuttuwae andayaw ḵan Apudyus we Ama, ḵasapuḻane andayawda ḵan siya si Ispiritu ya mibatay si ḵatuttuwaan. Te sanat da singsington Apudyus we andayaw ḵan siya. 24Aḵ Apudyus Ispiritu. Ḵad da andayaw ḵan siya, ḵasapuḻane andayawda si Ispiritu ḵan ḵatuttuwaan.”

25Pun ḵanan ni bubai, “Igammuḵe dumatong Messiah we awaganda'ḵ Kristu ḵad nu umali ipaigammuna ḵan ditaḵu da ngaiman.”

26Ḵanan Jesus, “Saḵone maḵaug-uggud ḵan siḵa sinsadi, saḵon sadi ye imbagame umali.”

27Sissiya ḵade maḵaug-uggud aḵ Jesus, dummatong da disipuluna woḵ nataagda te naḵaug-uggud si bubai. Yaḵon naippun osa'ḵ nangimus nu ngai pion ni bubai baḵon nu ngaipa maḵaug-uggud aḵ Jesus ḵan siya.

28Ḵingwan ḵad ni bubai, tinenana sasaḵduwanae banga woḵ nipauli'tte siyudad. Pun ummoyna imbaga'tta tagu ḵanane, 29“Awwayyu ḵad ta inḵayu ilan tagu we imbagana da losane ḵingwaḵ! Siya ḵamman nin Kristu?” 30Pun ummoyda'tte igaw Jesus.

31Sa ḵesanan ḵad ni bubai, isassaud da disipulun Jesus ḵanane angimus, “Mistulu, anganḵa!”

32Yaḵon ḵanana ḵan dida, “Awad de maḵane ḵanoḵe naippun igammuyu.”

33Da disipuluna ḵad, ḵanandae nan-asiimus, “Awad nin nangiyoy ḵan siya'ḵ ḵanona?”

34Pun ḵanan os Jesus ḵan dida, “Sa ḵanoḵ sa anuttuwaaḵ ḵan angangputaḵ atta ḵewaaḻe paḵwan ni nangibuun ḵan saḵon. 35Awad de uuggudonyu we ḵanana, ‘Opat buḻan daan ya asiyot iyyaani.’ Yaḵon sa ḵanaḵ iyyaani sinsana. Allangḻanga ḵayu! Annat da umali ye tagu we maḻyad andongoḻ ya angawat atta ugudoḵ. Dida isun da pagoy we naḻ-um ya madam-an maani. 36Da an-ani ḵad matangdananda, da anagup atta tagu awatonda biyag aḵ inggana. Ḵad da angimuḻae isun da angibaga'tte ugudḵu ya da an-ani ye bumadang ta awatonda ugudḵu, anggangganasda losan. 37Te tuttuwa uuggudone ḵanana, ‘Awad de angimuḻa ya awad os an-ani.’ 38Te ibuunḵu diḵayu'ḵ umoy an-ani'tte adiyupun inayong. Maḵḵon da nanḵewaaḻ ya diḵayu angaaw atta inayongda.”

39Da iSamaria ḵade ummili'tte siyudad, adu da namati ḵan Jesus gapu'tte imbagan ni bubai ye ḵanana, “Imbagana da losane ḵingwaḵ.” 40Pun dummatong ḵad da iSamaria'tte inninggawan Jesus, tinawidanda ta inggaw yan ḵan dida woḵ inninggaw sidi'ḵ duwan aḻgaw. 41Gapu'tta imbagana, amo ummadu da namati ḵan siya.

42Ḵananda si bubai, “Daḵampun ogon atta imbagam namatiyanni te dingngoḻni ye mismu ḵad igammuni ye siya tuttuwae Anagu'tta tagu'tte lubung.”

Sa Nangaanan Jesus Atte Saḵit

43Naḻaḵpus ḵad duwan aḻgaw, ummoy da Jesus atte probinsiya'd Galilee, 44te pinanoḵnoḵan Jesus we mismu ḵanane, “Sa profeta adipun mapatgan si mismu we ilina.” 45Pun dummatongda ḵad atte probinsiya'd Galilee, nisagaw da tagu we nammangili ḵan siya te innilada da nakaskasdaawe ḵingwana'tte Gayagayae Nallausan ad Jerusalem.

46Pune sadi, ummoyda bos ad Cana we osae ili'tte probinsiya'd Galilee ye sa nambalinon Jesus danum aḵ bayas. Inninggaw osae pangat atte gubilnu'd Capernaum we nasaḵit abengnae laḻaḵi. 47Dingngoḻna ḵade dummatong aḵ Jesus atte probinsiya'd Galilee ye naḻpu'tte probinsiya'd Judea, ummoy ḵan siya nandagdagu ta an-osog ad Capernaum ya ḵaanona saḵit ni abengnae mamattoy.

48Ḵanan Jesus ḵan siya, “Nu ippun ilanyu'ḵ nakaskasdaawe sinyal, adiḵayupun amati.”

49Yaḵon ḵanan ni pangat, “Apu, awwaynu ḵappos ta daan matoy abengḵu.”

50Pun ḵanan Jesus, “Inḵan, matagu abengnu.” Pun namati pangat atte imbagana woḵ ummoyon.

51Mabigat ḵad si sissiya'tte daḻan,#4:51 Sa boot ni maḻpu'd Capernaum inggana'd Cana umoye tuḻumpuḻu ya duwae kilomitro. inabotna da sammilunae ḵanandae nangibaga ḵan siya, “Natagu abengnu!” 52Inimusna ḵad nu ngai ye oras bummaḻuwana ḵananda, “Naḵaan atungna'tte nandangawel akkaḻbiyan.”

53Pun inḵagasmoḵ ni ama we sadi ustuustu we nangibag-an Jesus ḵan siya ḵanane, “Matagu abengnu.” Pune sadi, siyae mismu ya da ḵabaḻyanna namatida losan ḵan Jesus. 54Sana miḵagwae sinyale ḵingwan Jesus atte probinsiya'd Galilee si naḻpuwana'tte probinsiya'd Judea.

Currently Selected:

John 4: kml

Highlight

Copy