John 5

Sa Nangaanan Jesus Atte Saḵit Ni Laḻaḵi

1Nagangput ḵad sana, inninggaw gayagayan da Judyu'd Jerusalem woḵ ummoy aḵ Jesus. 2Pun ad Jerusalem atte adani si lewangan da karnero, awad de aammosane ngannonda'tte Hinebrew, Bethzatha.#5:2 Sa nigili ḵad atta udume manuscript atte Greek, Bethesda. Sa nigili ḵad os atta udum, Bethsaida. Ḵad sa nampasiigid awad da limae iiddungane 3oobbogan da adu we nasaḵit. Awad da naḵuḻap, napilay ya da naparalaes. Uuwayonda anḵibyawan ni danum, 4te sillaḻabi ḵad, an-osog anghel Apudyus ya inḵibyawna danum. Ḵad sa umunae umoy atte miḵibyawe danum, maḵaan saḵitna.

5Pun inninggaw osae laḻaḵi ye nasaḵit si tuḻumpuḻu ya waḻu we tawon. 6Innilan ḵad Jesus we innuumbog sidi ya inigammunae nabayage innuumboge nasaḵit, ḵanana ḵan siya, “Piome maḵaan saḵitnu?”

7Ḵanan ni nasaḵit, “On Apu yaḵon naippun angiyoy ḵan saḵon atte aammosan nu miḵibyaw danum ya anna ḵade iyyaḵ, ummuna da udum.”

8Ḵanan Jesus ḵan siya, “Bumangonḵa, aḻam oboḵnu ya anaddaḻanḵa.” 9Pun daguse bummaḻu woḵ innaḻana oboḵnae innumbogana woḵ nanaddaḻan. Naḵwa sadi'tte umillongan da Judyu. 10Pun ḵanan da papangat da Judyu'tte sadi ye laḻaḵi ye bummaḻu, “Iyadin ni lintog taḵu bubuḵḵudom oboḵnu si umillongan.”

11Yaḵon ḵanan ni laḻaḵi, “Sa tagu we nangaan atte saḵitḵu nangibagae ḵanana, ‘Bumangonḵa! Aḻam oboḵnu ya anaddaḻanḵa.’ ”

12Pun ḵanandae nan-imus ḵan siya, “Ngai ḵamman sanate nangibagae aḻam oboḵnu ya anaddaḻanḵa?”

13Yaḵon sa naḵaan saḵitna, naippun igammuna nu ngai nangaan si saḵitna te amoamod da tagu ya naabus ḵesan aḵ Jesus.

14Unipun, indasan Jesus sanae laḻaḵi si paway ni templo woḵ ḵanana, “Ilam ḵad, bummaḻuḵa. Agaynu we bumasuḻ ta adi maḵwa ḵan siḵa sindumallu nu sa damu.”

15Pune sadi ḵesan laḻaḵi woḵ impaigammuna'tta papangat da Judyu we aḵ Jesus nangaan si saḵitna. 16Pun insaḻad da papangat da Judyu we sumasanga ḵan Jesus gapu ta umillongan nangwaana'tte ḵaḵna. 17Ḵanan Jesus, “Aḵ Amaḵ we Apudyus, adipun guminoḵe anḵewaaḻ ḵad isuna bos ḵan saḵon.” 18Gapu'tte sadi ye imbagan Jesus, amo pion da papangat da Judyu we gongaton. Te daḵampun ay aḵ abus nilisalisna lintog atte umillongan yaḵon imbagana bose aḵ Apudyus Amana ḵad iyisuna long-agna ḵan Apudyus.

Sa Ḵaḻabbongan Jesus

19Pun ḵanan Jesus ḵan dida, “Ibagaḵ ḵan diḵayu ḵatuttuwaan, saḵone Abengna, adiyaḵpun maḵaḵwa'tta ḵooḵ nu abusaḵ. Te da ḵooḵ, abus da ilaḵe ḵoon Amaḵ. Ḵad da ngaimane ḵoon Amaḵ, siya bos da ḵooḵ. 20Te aḵ Amaḵ, ayatona saḵone Abengna. Pun ipailana ḵan saḵon da losane ḵoona. Ḵad paḵwana da amo nakaskasdaaw nu da ilanyu ta sindumallu we mataag ḵayu. 21Te nu tinagun Amaḵ da natoy ya ittana dida si biyag, taguwoḵ ose Abengna ya ittaḵ os si biyag da pioḵ. 22Te daḵampun ḵan Amaḵ anguwis atta tagu si mipanggob atta basuḻda yaḵon innatodna ḵan saḵone Abengna ḵaḻabbongaḵe anḵuwis, 23ta dayawon da losan saḵone isun ni andadayawda ḵan Amaḵ. Da adipun andayaw ḵan saḵon, adidapun os dayawon aḵ Amaḵ we nangibuun ḵan saḵon.

24“Ibagaḵ ḵan diḵayu ḵatuttuwaan, ngaimane amati'tta ugudḵu ya amati'tte nangibuun ḵan saḵon, awad ḵan siya biyag aḵ inggana. Adipun ogon maḵuwis te illasatna dusa woḵ awad ḵan siya biyag aḵ inggana. 25Ibagaḵ ḵan diḵayu ḵatuttuwaan, dummatong timpu we dongngon da natoy gingan ni Abeng Apudyus, ḵad da andongoḻ ya amati mataguda'ḵ inggana. 26Aḵ Amaḵ, siya angitod si biyag ḵad innatodna bos ḵan saḵone Abengna ḵaḻabbongaḵe angitod si biyag. 27Innatodna bos ḵaḻabbongaḵe anḵuwis te saḵon Abeng Di Tagu. 28Adi ḵayu mataag atta ibagaḵ te dumatong timpu we da losane natoye nilibon, dongngonda gingaḵ, 29umulida ya lumoswada'tta libonda. Ḵad da nangwa'tta ambaḻu, umulida ta maittanda'tte biyag aḵ inggana. Yaḵon da nangwa'tta lawweng, umulida ta maḵoddonganda madusa'ḵ inggana. 30Naippun ḵaḻabbongaḵ ḵoon nu abusaḵ. Siya dongngoḵ da ibagan Amaḵ atte inoḵe anḵuwis ḵad ustu anḵuḵuwisḵu te siya unudoḵ pion ni nangibuun ḵan saḵone daḵampun atte pioḵ.”

Da Anaḵdoḻ Ḵan Jesus

31Pinagatupan Jesus woḵ ḵanana, “Ḵad nu abusaḵ aḵ anaḵdoḻ atte long-agḵu, daḵampun aḵ tuttuwa ibagaḵ. 32Yaḵon awad de osae anaḵdoḻ ḵan saḵon. Ḵad igammuḵe tuttuwa da ibagana si mipanggob ḵan saḵon.

33“Nangibuun ḵayu'ḵ ummoy nangimus ḵan John woḵ tinaḵdoḻana mipanggob atte ḵatuttuwaan. 34Adiḵpun ḵasapuḻane taḵdoḻan da tagu mipanggob ḵan saḵon yaḵon ipaspasmoḵḵu da imbagan John ya amati ḵayu oḵyan ta taguwon Apudyus diḵayu'tte dusan da basuḻyu. 35Aḵ John, mipani'tte silawe lumangḻang ta silawana da somsomoḵyu. Ḵad ginangganasyu we nandongoḻ ḵan siya si sin-aḵitan. 36Yaḵon awad de anaḵdoḻ ḵan saḵone nangatngatu nu aḵ John. Te da ḵooḵe impaḵwan Amaḵ, sana da anaḵdoḻe saḵon imbuunna. 37Aḵ Amaḵ we nangibuun ḵan saḵon, tinaḵdoḻanae mismu mipanggob ḵan saḵon yaḵon adiyupun dingngoḻ gingana ḵan innila bosaḻna. 38Ḵad sa ugudna, adipun lumnoḵ atta somsomoḵyu te adiḵayupun amati ḵan saḵone imbuunna. 39Adaadaḻonyu nigili ye Ugud Apudyus te ḵananyupun nu sadi angitod ḵan diḵayu si biyag aḵ inggana. Ḵad sa sanae Ugud Apudyus siya anaḵdoḻ si mipanggob ḵan saḵon. 40Yaḵon adiyupun pione umali ḵan saḵon ta ittoḵ ḵan diḵayu biyag aḵ inggana.

41“Adiḵpun pion dayawe maḻpu'tta tagu, 42yaḵon iniiggammuḵ diḵayu. Ḵad igammuḵe naippun ayatyu ḵan Apudyus. 43Ummaliyaḵ sina gapu'tte ḵaḻabbongan Amaḵ woḵ adiyupun saḵon awaton. Yaḵon nu awad umali'tte ḵaḻabbonganae mismu, siya awatonyu. 44Ngai inonyu we amati nu siya pionyu an-asidayaw ḵayu ḵad adiyupun sington dayawe maḻpu si ossaane Apudyus? 45Adiyu ḵanane saḵon amabasuḻ ḵan diḵayu si sinagung Amaḵ te aḵ Moses amabasuḻ ḵan diḵayu. Te namnamaonyu we taguwon diḵayu nu amati ḵayu'tte sadi ye inggilin Moses. Yaḵon adiḵayupun namati. 46Ḵad nu amati ḵayu ḵan Moses, amati ḵayu oḵyan os ḵan saḵon te inggilina mipanggob ḵan saḵon. 47Yaḵon nu adiyupun pinati da inggilina, ngai inonyu we amati'tta ibagaḵ?”

Currently Selected:

John 5: kml

Highlight

Copy