LIKI 5

Yeesu mante kaa gə guudu gə ajew

(Mat. 4.18-22; Mar. 1.16-20; Zaŋ 21.1-11)

1Ɗeŋ a deye hõy, Yeesu ku vor bə Genezaretiŋa, kaŋ bə hebte kumsi cuuru bə iski kel kə Pepeŋa. 2Yeesu asaŋ kətartaw ɓasi ku vora. Kaa gə giidiŋ luŋ wəra, yə kooroŋ a baade amaaya neeteŋ. 3Kəya Yeesu luŋ giidə turti kə Simoŋa. Wə waataŋ Simoŋ minti wə zee la warna də tó weseka dər kan na. Kəya Yeesu əsəŋ cin giida bə hate kaŋa.

4Bə minti wə təwaŋ hateŋ wəraŋ, wə waataŋ Simoŋ minti: «Zee la də turtiŋ dər kan kələmiŋa. Tam də kaa nəmtiŋ, aŋ vaa amaaya nəətiŋ la.» 5Simoŋ hərnu kel minti: «Hulum bə hateŋ, are həŋ bə geye a joŋreŋa, are doŋ aska anə məna ba. Səma, gud kel nəmtiŋa, ten ve amaayaŋ yaŋ dər kana.»

6Kəya yə vaana. Yə topoŋ aska ablaw hãã bə minti amaayaŋ goldoŋ ko bə caarte wəra. 7A ko toŋa kəya, yə veɗgeŋ gədəəri gə minti giidə turti naytaŋa minti yə bəəda a keye té. Yə bəŋ, yə ɗostoŋ kətartawaŋ wəra ɓasi keɗe də askaŋ hãã bə minti kətartawaŋ goldoŋ ko bə tere. 8Bə minti Simoŋ Piyer asaŋ kel teŋ kəyaŋ, wə vaŋ də guguuru kampar Yeesu. Wə wəətunu minti: «Barkaŋ, zee la wəra sarəna gud bə minti ten hulum bə baymele.» 9Wə waataŋ ha'aŋ gud bə minti walka juunu də kaa gə minti suru adaŋ keɗe gud aska də minti yə topna ablaw. 10Anə Zaki də Zaŋ, karmə Zebedeŋ, yə haa kaa kə ji joŋre də Simoŋ, walka jiini bədoona gəm. Yeesu waataŋ Simoŋ minti: «A ji walka ba, gud bə minti dər hebkənaŋa ten kolom yaŋ máŋ hulum bə golde kaa da.»

11Bə minti yə maltaŋ kətartaw neeteŋ wəra ku doŋ-doŋaŋ, yə yaakaŋ kar neeteŋ wəra keɗe, yə təpaŋ guudu faɗi.

Yeesu seere hulum bə fə̃ya

(Mat. 8.1-14; Mar. 1.40-45)

12Hõy məna, bə minti Yeesu giidə kuli kəmtəŋ kəmana, hulum yaŋ ada, wə də fə̃ya. Bə minti wə asaŋ Yeesuŋ, wə vaŋ də guguuru, wə kuɓuŋ də ku tərmuyu adawra, wə juunu kamkam minti: «Barkaŋ, giidim a doo haa laŋ, tam a sə a neke bə seeren minti ten harə la wəra *cetcetiŋ haa pə mo!» 13Kəya Yeesu məɗaŋ kəəsu, wə məlnu du suru, wə wəətunu minti: «Gəəzi, giidən gə doo-de haŋ, hebkəna tam wəra bə seerə-seere.» A ko toŋa faɗi, fə̃yaŋ təəkunu. 14Yeesu nəənu minti: «A waate kel gə minti jəŋ kəya wəra a hulum bə anə ceki! Səma ɗee la a veɗe kusrum haa a *hulum bə keere Pepeŋ. Jəə kar gə minti *Moyisi a wəətənəy səməy bə ji poore bə kaŋ la, kir minti yə asə la minti tam wəra bə seerə-seere.»

15Də teŋ keɗe, kel kə Yeesu duusuŋ wəra pisi duusa. Kaa ablaw pəətəŋ suru saksaki a iski kel nuutuŋ, daana bə seere kusri wəra ku ɗeme neeteŋa. 16Səma Yeesu koorte warna saksaki a ko bə minti hulum paapa ada na baŋ, a tooste Pepeŋ.

Yeesu seere hulum bə hurufi

(Mat. 9.1-8; Mar. 2.1-12)

17Hõy məna, Yeesu bə hate kaŋa. Kaanə *Farisiyeŋ də *kaa kə hate ku gili kə Pepeŋ, gə əsə-isi suru maŋ. Sirdiŋ bəŋ giidə vil də minti giidə seŋka də Galileŋ da, daana Zude da keɗe. Kaayaŋ bəŋ Zeruzalem da gəm. Səɓaki kə Barkaŋ bə ji joŋre də Yeesu bə seerte ɗemeŋa wəra. 18Kaa bəŋ də hulum bə hurufi a gisi lam. Yə goldoŋ kəkəy bə kele duuru aləwa bə gaw tiinə Yeesu. 19Səma yə ɗempa a fele kəkəy bə kele duuru kas kaa kə ablaw ba. Kəya yə luŋ duuru apəya cəərə kuliŋa. Yə palwaŋ cəərə kuliŋ wəra. Bədoona ta, yə ziirunu da ada lam a gisi nuutuŋ da, aduubə də kaŋ da a ko bə minti Yeesu adaŋ. 20Bə minti Yeesu ɗeŋ a ase anəkay minti kaa teŋ gə doo-de gud tó ŋaanaanə moŋ, wə waataŋ hulum bə hurufiŋ minti: «Daarən, baymele nəmtiŋ fəlaŋ vəəgi bə giidu ne.»

21A ko toŋa kaanə Farisiyeŋ də kaa kə hate ku gili kə Pepeŋ əsəŋ bə le ku kusri minti: «Hulum toŋ ha'aŋ, wə mindi mo minti wə sarte sam Pepeŋ! Pepeŋ məna aye vəəgi bə giiduŋ cəərə baymeleŋa haa tó. Mindi baalaŋ neke pə mo?» 22Yeesu asaŋ minti yə bə le ku kusri, kəya wə wəətənəy minti: «Ana aŋ le ku kusrəŋ bədoona səm mo? 23Gə ji gəəli dəŋaŋ kumsiŋ gud kel té ɓasiŋa haa məntəŋ mo? Ten waataŋ hulum bə hurufiŋ ne minti ‹Baymele nəmtiŋ fəlaŋ vəəgi bə giidu neŋ›, ɗalba ‹faa la apəya, ɗee laŋ› mo? 24Səma ten gaŋ dərəŋ yaŋ wəra hebkəna minti ten Kormə Hulúm də abay cəərə seŋkaŋa kəna bə aye vəəgi bə giiduŋ cəərə baymeleŋa.» Kəya wə waataŋ hulum bə hurufiŋ minti: «Ten waatam, faa la apəya, haa gisi nəmtiŋ la, ɗee la akera!» 25A ko toŋa faɗi, hulum faŋ apəya wəra də dər kaŋ keɗe. Wə haŋ gisi bə minti wə a jəŋ ada lam, wə kooroŋ akera bə tokɗe Pepeŋa wəra anə caw. 26Kaŋ ŋələŋ keɗe. Yə əsəŋ bə tokɗe Pepeŋa, walka jiini ablaw, yə əsəŋ bə waate minti: «Áŋ asaŋ kar kə məɗ-miɗi ne dayna!»

Yeesu mante Levi

(Mat. 9.9-13; Mar. 2.13-17)

27Adordə teŋa, Yeesu kəlaŋ wəra. Wə asaŋ hulum kəman bə tope lamba, səmu minti Levi. Wə bə əsə-isi giidə kuli bə taareŋa cin. Kəya wə wəətunu minti: «Bəəda guudən da!» 28Levi yaakaŋ kar nuutuŋ wəra keɗe, wə faŋ apəya, wə kooroŋ guudu faɗi.

29Kəya Levi jəŋ kar kə hame ablaw a Yeesu girdu. Kaa kə tope lambaŋ də kaa gaalaŋ ada ablaw bə hame duuru. 30Kaanə *Farisiyeŋ də *kaa kə hate ku gili neeteŋ, kel teŋ duuni diri ba. Yə ŋormoŋ kuy sar *kaa gə gud Yeesuŋa minti: «Aŋ təpaŋ bə hame, bə se, də kaa kə tope lambaŋ daana kaa kə jəəti baymeleŋ haa naanaanə mo?» 31Yeesu hərnəy kel minti: «Kaa gə minti wəra holoŋ ɗe a golde maa kasi doktora mo? Ɗe suru haa kaa kə ɗemeŋ. 32Ten bəŋ paapa gud kaa ɗekeriŋa ba, ten bəŋ haa gud kaa kə ji baymeleŋa minti yə kolə kirki la a baymele neeteŋ.»

Yeesu waate sam je də ku bay hameŋ

(Mat. 9.14-17; Mar. 2.18-22)

33Sərdə kaa kəman waataŋ Yeesu minti: «*Kaa gə gud Zaŋ *jaate hõy də kuy bay hame, yə tooste gəm. Kaa gə gud kaanə *Farisiyeŋ jəəti bədoona gəm. Səma kaa nəmtiŋ, teŋ hame daana se saksaki naanaanə mo?» 34Yeesu wəətənəy minti: «Hulum bə de həlgəŋ, gədəəru gə minti suruŋ, aŋ neke bə jəy minti yə yaakə kusri la bə je də kuy də ko bə minti wə kəm siri mo? Paapa! 35Səma koŋ bə neke yaŋ minti kaŋ bə daw yaŋ warna, gədəəruŋ neke yaŋ bə yaake kusri bə je də kuy kəm də ko toŋ.»

36Yeesu wəətənəy *ku kumti minti: «Hulum caarte kepteŋ də dəməəmə təmarwaŋ bə mala dər ko bə co'ə-co'e də dəməəmə də gayə-geyeŋa bə õya də kumsə ba. Wə õyna ne bədoonaŋ, wə ɓalkaŋ təmarwaŋ wəra boobo, kepteŋ də dəməəməŋ de haa bə tepe də təərəŋkaŋ bə pa. 37Ana paŋ, hulum neke bə ge kumuy bə atələələm bə minti kəm bə de siipəŋa kimirwiŋ giidə mandəhaŋ golgo pəərəŋki bə gəm. Wə gəənu ne adaŋ, wə naake wəra də kumuy#5.37 Kaanə Ziwifiŋ ke kumuy giidə mandəhaŋ golgo bə kaaraŋ bə zoorə-zoore, yə ke kan ada gəm.. 38Marya diŋ gaa kumuy kimirwiŋ bə minti kəm bə de siipəŋa kimirwiŋ la giidə mandəhaŋ golgo kimirwiŋa gəm. 39Hulum bə minti saŋ kumuy kəlaŋ neŋ, wə bele kumuy kimirwiŋ pəda. Wə minti: ‹Kumuy kəlaŋ pisi dəŋaŋ kumsuŋ.›» – 5 6

Currently Selected:

LIKI 5: KERNT05

Highlight

Copy