LIKI 4

Nərtitiŋ ke ku Yeesu

(Mat. 4.1-11; Mar. 1.12-13)

1Yeesu bə ɗosə-ɗose də Tiiru Cetcetaŋ, taakaŋ paaŋe bə Zurdeŋ wəra. Tiiru Cetcetaŋ kooroŋ warna duuru giidə ful na. 2A ko toŋa kəya, Nərtitiŋ kəənu ku bə gulu kuɗu hiti hor-hor waaɗe. Dər ko toŋa wə hamaŋ karman ba. Bə minti hiti toŋ təwaŋ wəraŋ, kəya tay ɗəmnu. 3Nərtitiŋ wəətunu minti: «Tam jəəne Kormə Pepeŋ, waatə pərkiŋ la lama minti wə kolə la wəra so.» 4Wə harna kel minti: «Kefter kə Pepeŋ wəra bə jeerə-jeere minti: ‹Hulum ji caw dədərgə ha'aŋ paapa də so təwa ba.›»

5Kəya Nərtitiŋ ziinu guudu apəy na ada na, a gəənu duru anə cəlam cəərə kumna bə cəərə seŋkaŋa keɗe. 6A wəətunu minti: «Ten ayam abay də məyan taŋ yaŋ keɗe, gud bə minti yə aynan dən wəra, daana ten əyəy a mindi mo gud giidən gə beleŋa. 7Tam kaanan awalna neŋ, kar teŋ keɗe ji yaŋ nəmti.» 8Yeesu harna kel minti: «Kefter kə Pepeŋ wəra bə jeerə-jeere minti: ‹Kaa awalnaŋ la a Barkaŋ Pep nəmtiŋ, jəətə digiŋ la a nuunu təwa'i#4.8 Deut. 6.13.›»

9Kəya Nərtitiŋ raawaŋ də Yeesu Zeruzalem pa. A usnu apəya a lewlew də *Kuli kə Pepeŋa. A wəətunu minti: «Tam jəəne Kormə Pepeŋ gəəziŋ, gaa kusrum la warna adawra na, 10gud minti Kefter kə Pepeŋ jeereŋ wəra minti: ‹Pepeŋ waate kaa gə digi nuutuŋ yaŋ minti yə amam la.› 11Yə gə jeerə-jeere pa minti: ‹Yə ləgam yaŋ kəəsi minti kampəram a dese a pərki ba#4.11 Ps. 91.11-12.›» 12Yeesu harna kel minti: «Kefter kə Pepeŋ wəra bə jeerə-jeere minti: ‹A gole koɗ Barkaŋ Pep nəmti ba#4.12 Ex. 17.2-7.›»

13Bə minti Nərtitiŋ təwaŋ hel də ke ku Yeesuŋ wəra keɗeŋ, a kooroŋ, a yəəkunu kəm pa.

Yeesu mele gud joŋre nuutuŋ giidə seŋka də Galileŋa

(Mat. 4.12-17; Mar. 1.14-15)

14Adordə teŋa, Yeesu haraŋ giidə seŋka də Galileŋ də səɓaki kə Tiiru Cetcetaŋ. Səmu hagaŋ wəra giidə seŋka taŋa keɗe. 15Wə hatətaŋ giidə *kuli bə toose kə kaanə Ziwifiŋa keɗe, kaŋ əŋkunu keɗe gəm.

Kaanə Nazaretiŋ bele kel kə Yeesuŋ ba

(Mat. 13.54-58; Mar. 6.1-6)

16Yeesu tuukuŋ Nazareti, a ko bə minti wə suŋ adaŋ. Dər *hi bə faake kə Pepeŋa, wə kəlaŋ giidə *kuli bə toose kə kaanə Ziwifiŋa damdi wə jəətiti saksakiŋ ana. A ko toŋa, wə faŋ apəya bə aŋke keftera. 17Kəya yə əynu kefter kə Ezay, *hulum bə jogte ku mini kə Pepeŋ. Wə bəŋəŋ kefter, wə fəlaŋ kel ada gə jeerə-jeere minti:

18«Tiirə Barkaŋ dəərən gud bə minti wə zeenen wəra dəra'i bə waate

*Kel pəsaŋ kəmarwaŋ nuutuŋ a kaa kə caacaŋ.

Wə gaanan a waate kaa kə daŋgay minti yə bədəŋ ne wəra,

a waate kaa kə bəwə-bəwiŋ minti diri pəŋtəŋ ne wəra,

a bidi kaa gə minti kaŋ bə ləsəyaŋ wəra,

19a waate kaa nuutuŋ minti le bə minti

Barkaŋ ji pisiŋ sə kaa nuutuŋaŋ tuukuŋ ne#4.19 Es. 61.1.»

20Yeesu hayɗaŋ kefter, wə haraŋ bə əyu a hulum bə əmu cuuruŋ, wə əsəŋ cin. Kaa gə minti giidə kuli bə toose kə kaanə Ziwifiŋa keɗeŋ, yə gulnu deŋresi. 21Kəya wə wəətənəy minti: «Kel gə jeerə-jeere gə giidə kefter toŋ doŋ kuy ne wəra dayna a ko bə minti aŋ iskiniy bə aŋkeŋ.» 22Kəya kaŋ keɗe əŋkunu. Yə ŋələŋ ablaw gud kel pəsaŋ gə minti kəlaŋ warda ku daŋ. Yə waataŋ minti: «Haa paapa kormə Zosefiŋ bə mo?»

23Kəya Yeesu wəətənəy minti: «Aŋ bə waatan ku kumti yaŋ minti: doktor, seerə kusrum la wəra tam toki. Aŋ waatan yaŋ gəm minti: are əskəŋ kel gə minti tam jiiniy Kapernama keɗeŋ, jəy la giidə kuli nəmtiŋa bədoona gəm.» 24Wə wəətənəy pa minti: «Ten waataŋ wəra kaŋkaŋ minti: yə doŋ gud kel kə hulum bə jogte ku mini kə Pepeŋa anə məna hõy giidə seŋka nuutu ba. 25Gəəzi ten waataŋ: dər ko kə *Eliŋaŋ, kəram gə bay yaŋ ablaw *Israyela. Haa dər ko bə minti pepeŋ laataŋ soope də kitir kənki bay hageŋ, daana tay mooto awaŋ giidə seŋkaŋa keɗe. 26Anaaŋa Pepeŋ gaŋ Eli a keye həlgə də bay anə məna adəwaldə kəram té gə Israyela ba. Səma wə gəənu sar həlgə də bay də Sareptaŋ təwa də minti giidə seŋka də Sidoŋaŋ. 27Dər ko kə Eliseŋa hulum bə jogte ku mini kə Pepeŋ, kaa kə fə̃ya yaŋ ablaw Israyela. Anaaŋa wə seereŋ guudi anə məna ba. Səma wə seereŋ Naaman hulum bə Siiriŋ.»

28A ko bə minti kaa gə giidə kuli bə toose kə kaanə Ziwifiŋa keɗe əskəŋ kel nuutuŋ, yə hoptoŋ wəra də waŋ. 29A ko toŋa kəya yə pətəŋ, yə duunu, yə kooroŋ warna duuru taakaw na hãã a lewlew də pərki na a ko bə minti kuli neeteŋ ada naŋ, minti té zugu warda adawra da. 30Səma Yeesu kəlaŋ warda aduubə di da, wə kooroŋ faɗi.

Yeesu pi kəwal wəra cəərə huluma

(Mat. 7.28-29; Mar. 1.21-28)

31Yeesu sorkoŋ warna giidə vil də Kapernam giidə seŋka də Galileŋ na. Kəya wə hataŋ kaŋ dər *hi bə faake kə Pepeŋa. 32Kaa gə minti bə jiɓruŋ ŋələŋ ablaw gud hel də hate nuutuŋa, gud bə minti wə bə hətəya abay-abay. 33Hulum kəman yaŋ giidə *kuli bə toose kə kaanə Ziwifiŋa, kəwal a jəŋ cuuru, yə bə ləsu ablaw. Wə əsəŋ bə naake ku koloŋ minti: 34«Haaŋ! Yeesu bə Nazaretiŋ, kel naareŋ haŋ maa sarəma mo? Tam bəŋ haa a bese are wəra! Tam haa mindi mo, wəra də dər are anə kaŋkaŋ: tam haa Hulum Cetceti kə Pepeŋ.» 35Kəya Yeesu jəmnəy təbay da anə kəwəŋ minti: «Aŋ zenə la! Aŋ pəə la wəra cəərə hulum toŋa!» Kəwal gaŋ hulum adawra kiŋtiŋ tiinə kaŋa keɗe, yə pəŋ wəra cuuru bay jəw baymele anə weseka. 36Bə minti kaŋ asaŋ kel teŋ bədoona kəyaŋ, yə ŋələŋ ablaw. Yə əsəŋ bə waate aduubə də kumsi minti: «Teŋ kel məntəŋ bədoona mo? Hulum toŋ jeme təbay a kəwal də abay daana də səɓaki, kəya yə pəŋ wəra faɗiŋ!»

37Yə əsəŋ bə waate sam Yeesu wəra giidə seŋka taŋa keɗe.

Yeesu seere kaa kə ɗeme ablaw

(Mat. 8.14-17; Mar. 1.29-34)

38Kəya Yeesu kəlaŋ wəra giidə *kuli bə toose kə kaanə Ziwifiŋa. Wə kəlaŋ ger Simoŋ. Akaarə Simoŋ tooka, kusrə bə zalmə-zalme bə ɗəma ablaw. Kəya kaa bəŋ sar Yeesu, yə juunu kamkam minti wə golə la kəm mo. 39A ko toŋa wə cokoŋ cəərə, wə jəmaŋ təbay a kusrə bə zalmə-zalmeŋ. Kəya kusrə arsaŋ warna sara na anə sããya, a faŋ apəya, a əsəŋ bə doy irku di faɗi.

40Bə minti koŋ ziɓiŋ wəraŋ, kaa gə minti kaa neeteŋ kasi gidiirə ɗemeŋ wəra keɗeŋ, pəətəŋ diiri sar Yeesu. Wə maltaŋ kəəsu ciiri məna-məna keɗe, yə seerteŋ wəra. 41Kəwal əsəŋ bə pi wəra cəərə kaŋa ablaw, yə bə naakte kuya minti: «Tam haa Kormə Pepeŋ!» Səma Yeesu jəmnəy təbay. Wə haŋ ku kəwal wəra bay waate kel, gud bə minti wəra də diri minti wə haa Kristu, *Hulum bə minti Pepeŋ ŋəmnuŋ.

Yeesu waate kel giidə seŋka də Zudeŋa

(Mar. 1.35-39; Mat. 4.23)

42Bə minti koŋ wəra maŋ bə weleŋ, Yeesu kəlaŋ wəra giidə kuliŋa. Wə kooroŋ a isi warna a ko kəman na anə halaŋ bay cuuru. Kəya kaa ablaw əsəŋ bə guldu. Bə minti yə fəlnuŋ, yə əsəŋ bə gaw tiinu minti wə a yaake té ba. 43Səma Yeesu wəətənəy minti: «Ten kir waate *Kel pəsaŋ kəmarwaŋ cəərə *Kumna kə Pepeŋa warna a kuli baalaŋ-baalaŋ na gəm, gud bə minti Pepeŋ gaanan da ha'aŋ gud teŋ da.»

44Bədoona ana, wə waatətaŋ kel wəra giidə *kuli bə toose kə kaanə Ziwifiŋa giidə seŋka də Zudeŋa. – 4 5

Currently Selected:

LIKI 4: KERNT05

Highlight

Copy