JOŊRE 25

Pol mante minti yə ayə tó la a kumna bobloŋ Sezar

1Hiti soope adordə minti Festusi tuukuŋ giidə seŋka də minti wə koloŋ a kumnaŋa cəərəŋ, wə faŋ Sezara, wə kooroŋ Zeruzalem. 2A ko toŋa ta, kəkamna kə *kaa kə keere Pepeŋ, də kaa kə abay-abay gə Ziwifiŋ, bəŋ suru bə bi a ge kel cəərə Pola. Yə əsəŋ bə jəw kamkama 3minti wə jəə pisi la sar té bə raawe Pol warna Zeruzalem na a té kəm mo. Ana ha'aŋ, yə a ɗampaŋ kel neeteŋ wəra minti té vaw agum la a kəkəya, té əwu la wəra. 4Səma Festusi hərnəy kel minti Pol a daŋgaya Sezareŋ, tó də kusrə tó, tó paapa kir hiti wəra ablaw bay hare ada na bə gəm. 5Kəya wə wəətənəy pa minti: «Kaa nəəti gə nakə-neke jəəneŋ, are koorə la gud kumsə are keɗe. Bədoona ta, hulum toŋ a jəŋ kel kə bayməlaŋ neŋ, yə neke yaŋ bə ɗe a gaw kel cuuru na a ko toŋ na.»

6Festusi jəŋ hiti Zeruzalema azəgən mo, hor mo, kəya wə haraŋ Sezare. Ɗeŋ a deye dibiinim, wə ɗeŋ a isi wəra a ko bə jeme kəətiŋa faɗi. Wə vaŋ kaa bə ɗe a mante Pol da. 7Bə minti wə tuukuŋ anəkay, gə Ziwifi gə minti a bəŋ Zeruzalem daŋ bəŋ a ɓuku wəra cẽẽ faɗi, bə kawa də gidiirə kel kəmtəŋ-kəmtəŋ gə bayməlaŋ wəra keɗe. Səma yə paapa gə nakə-neke bə ke gud kel gə minti yə kəənu diiriŋ bə hasi. 8Kə Pol kəyaŋ, wə haraŋ kel gə cəərə kusru wəra minti: «Ten jəŋ baymele sar *ku gili kə kaanə Ziwifiŋa ba anə ceki, ten waataŋ kel kə bayməlaŋ cəərə *Kuli kə Pepeŋa bə gəm, cəərə kumna boblo Sezara bə gəm.»

9Festusi a bəlaŋ haa minti kaanə Ziwifiŋ a sə a ɗəkə la minti tó pisi siri ŋaanaanə moŋ, wə laŋ ku Pol minti: «Tam de haa yaŋ nuutu bə hare Zeruzalem kir minti ten ɗee la a jəmam kəəti də kel gə minti yə a kaanam dəm cəərəma a ko toŋ na mo?» 10Pol hərnu kel minti: «Paapa. Ten wəra gil kəna a ko bə jeme kəəti kə Sezara tə kəm, kəəti dən jeme haa a ko toŋa kəna ta'a faɗi. Tam də kusrum, tam wəra bə asə-ase anə kaŋkaŋ minti ten jəŋ karman bə baymele sar kaanə Ziwifiŋa ba. 11Ten a jəə karman bə ɓalke ku giliŋ la gəəzə-gəəzi daana ten a jəə kel la kir minti yə awan la wəra guudiŋ, ten ŋoye kasi meŋ ba. Səma, jəəne minti kel gə minti yə kaanan dən cəərəna, gəəzi paapa ada baŋ, hulum a paapa kir ayan a niini ba. Ten mante katən haa minti jəman kəəti dən la haa Sezar, kumna bobloŋ.» 12Kəya Festusi nəlaŋ nalə də kaa kə gole dər kel nuutuŋ. Wə waataŋ Pol minti: «Tam minti jəmam kəəti nəmti la haa kumna boblo me'i koo, are bə gam yaŋ a nuunu.»

Pol tiinə kumna Agripa

13Hiti jəŋ wəra maki, kumna bə Ziwifi Agripa daana nəwru Berenisi tuukuŋ Sezare bə bi a helɗe Festusi. 14Yə hətəŋ ada maki səm moŋ, Festusi fəlaŋ duru bə tope bəlam də kel gə cəərə Pol a kumna faɗi gəm. Wə wəətunu minti: «Hulum kəman yaŋ kəna, Feliksə a yəəkunu a daŋgaya. 15Bə minti ten ɗeŋ Zeruzalem, kəkamnaŋ də kaa kə keere Pepeŋ daana *kaa kəmtəŋ gə tiinə kaanə Ziwifiŋ bəŋ sarəna bə bi a gaw də kel. Yə a bəlaŋ minti ten waatə la minti kəətiŋ duunu. 16Ten hərnəy kel minti kaanə Rom ha'aŋ, yə tepe cəərə kaa gə minti a gaŋ kel cəərə huluma kəm də hulum tó bə minti kel cuuruŋ. Bədoona ta, hulum bə minti yə a gəənu də kel hare kel gə cəərə kusru wəra kəm tiini. Bay ji kel té kayiŋ wəraŋ, to'osi kə kaanə Rom bele minti əyu la a kaa gə minti gəənu kel cuuruŋ faɗi ba. 17Bədoona ta, are haraŋ diiri kanda keɗe. Kəya ten doŋ cəərən də kel teŋ ba. A dibiinima faɗi, ten ɗeŋ a isi warna a ko bə kəətiŋ na. Ten mantaŋ hulum toŋ warda tiinin da faɗi gəm. 18Bə minti kaa kə gaw də kel pətəŋ bə waateŋ, ten a ɗəkəŋ haa minti yə waate kel kə bayməlaŋ kəman yaŋ cuuru. Kel teŋ bə jəŋ paapa faɗi. 19Kel gə minti yə koloŋ awəy duuru ciiri təwa ha'aŋ, cəərə ke bə awalna neeteŋ a Pepeŋ, daana cəərə hulum kəmana yə məntu minti Yeesu. Wə wəra bə mee-meŋ, səma Pol minti wə yaŋ dədərgə caw gəm. 20Ten nəkaŋ bə fele hel daalaŋ də minti ten jəərə la bə əski gud kel teŋ pəda. Gud teŋa ta, ten waataŋ Pol minti wə de haa yaŋ nuutu bə ɗe Zeruzalem a jeme kəəti də kel nuutuŋ ada na mo? 21Səma wə bəlaŋ minti jamə kəəti də tó la haa Sezar. Bədoona ta, ten minti yə yəəku la a daŋgaya hãã bə minti ten fəlaŋ kəkəy ne bə gaw a Sezar.» 22Agripa waataŋ Festusi minti: «Ten bele jeɓre ku hulum toŋ ten də kusrən gəm.» Festusi hərnu kel minti: «Tam jiɓru ku yaŋ dibiinim faɗi.»

23Ɗeŋ a deye dibiinim, anə Agripa də Berenisi tuukuŋ a ko bə minti kaŋ lawte ciiri wəra adaŋ. Bə minti yə bə ve aləwaŋ, kaa jəŋ kar ablaw bə hay ciiri apəya. Kəkamnaŋ kəmtəŋ gə sootoŋ daana kaa kə abay-abay gə giidə vil təpaŋ guudi də gəm. Kəya Festusi waataŋ kaa minti yə ɗee la a mante Pol da, yə bəəda duuru tiinə té da. 24Bə minti Pol tuluŋ wəra tuli, Festusi məlaŋ gud kel faɗi minti: «Kumna Agripa, aŋ kaa gə minti təpaŋ də are kəna keɗeŋ, aŋ golə hulum toŋ la gil sarəŋaŋ. Haa hulum bə minti kaanə Ziwifiŋ keɗe, kaayaŋ gə Zeruzalem də kaayaŋ gə minti kənaŋ, a bəŋ sarəna haa gud kel du, bə naakte kuya minti wə paapa kir ji caw pəda. 25Ten toŋ ha'aŋ, ten fəlaŋ kel suru kir minti wə falə meŋ la guudi ba. Tó də kusru, wə minti kumna boblo Sezar jamə kəəti kə tó la tə gəm, ten ɗəkəŋ bə əyu du na. 26Səma ten jeerə la a kumna bobloŋ haa minti harmə mo, paapa də dərən ba. Gud maa mo kel anə məna minti teŋ bədoona ana, paapa də dərən ba. Ten məntunu tiiniŋ da haa sə teŋ, daŋge haa tiinima faɗi Agripa kumnaŋ, kir minti aŋ təwaŋ gole dər kel nuutuŋ ne wəraŋ, ten fele karman bə jeere yaŋ ada ɗawmay mo. 27Gud maa mo bə ge hulum bə daŋgay Rom na bay ge gud kel gə minti yə gəənu diiriŋ cekiŋ, paapa dərəna kel pəsaŋ ba.»

Currently Selected:

JOŊRE 25: KERNT05

Highlight

Copy