JOŊRE 23

1Pol məlaŋ duru anə ɗeŋres cəərə *kaa kəmtəŋ gə jeme kəəti kə kaanə Ziwifiŋa, wə wəətənəy minti: «Kəsaananti, aŋ jeɓrə la kəm mo. Ɗiki dən paapa bə hoyona anə weseka cəərə ɗe dəna tiinə Pepeŋa ba, hãã dayna.» 2Bə minti Ananiyasi, *kumna boblo bə keere Pepeŋ əskəŋ kel teŋ anəkay, wə waataŋ kaa gə minti gə əsə-isi sar Pola maŋ minti yə law la ku. 3Kəya Pol hərnu kel minti: «Bə lam yaŋ haa Pepeŋ gadi ɗaw! Tam je'a damdi goŋ bə minti yə sətnu karman gibirwi wəra suru ana, doloy wə giidu na karman baalaŋ! Tam əsəŋ kəna je'a minti tam he *ku giliŋ bə jəman kəəti dən, ana tam bə waate minti yə lan la. Tam cakɗaŋ wəra haa paapa ku giliŋ toŋ derra bə mo?» 4Kəya kaayaŋ gə minti suru ada maŋ wəətunu minti: «Tam gədaŋ máŋ bə sarte haa kumna boblo bə keereŋ bə pə mo?» 5Pol hərnəy kel minti: «Kəsaananti, ten asaŋ minti kəna kumna boblo bə keereŋ ba. Gəəzi kel wəra gə jeerə-jeere giidə Kefter kə Pepeŋa minti: ‹A sarte kumna bə ame cəərə kaa gə giidə seŋka nəmtiŋ ba.›»

6Pol wəra bə asə-ase minti aduubə də kaa kəmtəŋ gə jeme kəəti kə kaanə Ziwifiŋa lakaŋ, kaanə *Saduseyeŋ ada, kaanə *Farisiyeŋ ada gəm. Gud teŋa ta, wə naakaŋ ku koloŋ a niini minti: «Kəsaananti, ten bə Farisiyeŋ, ten haa kormə gə Farisiyeŋ gəm. Yə mantənan ku kəətiŋa haa gud bə minti ɗiki dən bə malə-mele cəərə hare bə dədərgə də kaŋa wəra adordə meŋa.» 7Bə minti wə waataŋ kel teŋ bədoona kəyaŋ, awəy awaŋ aduubə də kaanə Farisiyeŋa daana kaanə Saduseyeŋ faɗi. Kəya kaa gə minti a təpaŋ ciiriŋ cəmaŋ giidi ɓasi. 8Gud maa mo kaanə Saduseyeŋ ha'aŋ, teŋ waate haa minti hare bə dədərgə wəra adordə meŋa, paapa. Koo kəwal, koo *hulum bə digi kə Pepeŋ, yə paapa anə ceki. Kə kaanə Farisiyeŋ, neeteŋ haa minti kar teŋ yaŋ gəm. 9Awəy əntəŋ gərləŋ aduubə diya. Sərdə *kaa kə hate ku gili kə Pepeŋ gə gud kaanə Farisiyeŋ pətəŋ apəya, yə əsəŋ wəra də səɓaki bə de haa ba, yə minti: «Hulum toŋ gila, kel kə bayməlaŋ paapa suru anə weseki kir minti áŋ jəw gəbaŋ la ciiri ba. Áŋ asaŋ də maa mo? Ɗalba wəətunu kel teŋ haa kəwal mo, hulum bə digi kə Pepeŋ mo, hulum asaŋ ba.» 10Bə minti awəy əsəŋ bə kole mooto pisi kolə, walka jəmaŋ hulum boblo bə cəərə sootoŋ wəra kas ɗiki bə minti kaŋ jegde Pol wəra kasi tó ɗawmay moŋ. Wə waataŋ sooto gə guuduŋ minti yə vaa la adəwaldə kaŋ na, yə doo Pol da warda, yə hare da duuru giidə kuli boblo kə sootoŋ da.

11Ɗeŋ a deye dər duugŋa, Barkaŋ vəɗaŋ kusru wəra dər Pola, wə wəətunu minti: «Dərəm teŋe! Gud maa mo tam jəŋ bərdə kəkəy wəra cəərəna Zeruzalema. Bədoona ana ta, tam kir ɗe a ji bərdə kəkəy wəra cəərəna Roma gəm.»

Kaŋ jeme gud Pol bə awe wəra

12Ɗeŋ a deye dibiinim bəbəgiŋ, sərdə gə Ziwifiŋ təpaŋ bə jeme gud Pola minti té əwu la wəra. Yə kəlaŋ kuy wəra minti té a hame karman ba, koo té a se karman bə gəm, té awə Pol la wəra kəm pəraki. 13Kaa gə minti a doŋ ku kumsi wəra ɗaaməna bə ji kel teŋ dəŋaŋ hor-hor waaɗe mo, bədoona. 14Yə kooroŋ bə ɗe a fele kəkamna kə *kaa kə keere Pepeŋ daana kaa kəmtəŋ gə tiinə kaŋ bə ɗe a wəətəy minti: «Are kəlaŋ ku are wəra minti are a hame karman ba, koo are a se karman bə gəm, hãã bə minti are awə Pol la wəra kəm. 15Bə hebkəna aŋ jəə karman la máŋ gəm ta. Aŋ tapə kuŋ la də *kaa kəmtəŋ gə jeme kəəti kə kaanə Ziwifiŋ bə ɗe a waate hulum boblo bə cəərə sootoŋ minti wə bəəda də Pol warda tiiniŋ da. Aŋ məltu kel la minti aŋ bele jeɓre gud kel kə Pol wəra kaŋkaŋ. Naareŋ ha'aŋ, are ɗampaŋ wəra bə əwu warda a kəkəy da, wə tuli warna saa ba.»

16Səma nəənə də Pol əskəŋ sam agum taŋ wəra. Kəya wə kooroŋ a kuli boblo kə sootoŋ na, wə kəlaŋ aləw na ada na, wə fəlaŋ Pol. Kəya wə əsəŋ bə tupu bəlam də kel gə minti yə bə jəmu guudu diiriŋ. 17Pol əskəŋ bədoona kəyaŋ, wə mantaŋ sooto bə saamaŋ da, wə wəətunu minti: «Ɗee la a mele pur gila sar hulum boblo bə cəərə sootoŋ, kel yaŋ ku kir wəətu.» 18Sooto toŋ kooroŋ bə ɗe a məlu sar hulum bobloŋ. Wə wəətunu minti: «Pol, hulum bə daŋgay, mantənan na, wə ɗeŋ a waatan minti ten bəə la a məlam pur toŋ gila, kel yaŋ ku kir waatam di. Ten bəŋ da duuru haa sə teŋ.» 19Hulum bobloŋ doŋ kasi pur, yə zeŋ warna bay ciiri anə halaŋ. Wə əsəŋ bə law ku minti: «Waatan kel gə minti tam sə a waatan dən la tə gəm ba.» 20Kəya nəənə də Pol əsəŋ bə tupu bəlam də kela ɓet-ɓeti minti: «Gə Ziwifiŋ doŋ ku kumsi wəra məna minti té bəə la a waatam minti tam ɗe na dibiinim də Pol a tepe bə cə kə kaa kəmtəŋ gə jeme kəəti kə kaanə Ziwifiŋ na. Yə bə ji yaŋ damdi té bele jeɓre gud kel nuutu wəra kaŋkaŋ ana. 21Səma, a mere guudi ba anə ceki faɗi. Kaa dəŋaŋ hor-hor waaɗe mo, bədoona, wəra gə ɗampə-ɗampe bə vaw agum. Yə kəlaŋ kuy wəra minti té hame karman ba, té se karman bə gəm, hãã té awə Pol la wəra kəm. Yə wəra gə ɗampə-ɗampe, yə mi máŋ haa minti tam doŋ haa da ne də kel kə teŋ təwa.» 22Kəya hulum bobloŋ yaakaŋ pur bə hare faɗi. Səma wə wəətunu wəra kəm anə kaŋkaŋ minti: «A waate hulum minti tam gaanan kosnon wəra cəərə kel teŋa ba anə faɗi.»

Yə ɗe də Pol a kumna Feliksə

23Adordə kel teŋa kəyaŋ, hulum boblo bə cəərə sootoŋ mantaŋ sooto gə saama da ɓasi faɗi, wə wəətənəy minti: «Aŋ humə sooto la kəs-kəsi ɓasi. Aŋ ganə la wəra bə koore dər ko bə duugŋ kənaŋa Sezare, də cəwa də minti kaŋ ve aləwaŋ. Aŋ ɗee la də sooto gə cəərə gədaamo guudəŋa ada hor-hor seeɗa, sooto gə duuri də kəŋkəw jəə la ada kəsi ɓasi gəm. 24Aŋ goldə gədaamo la a Pol, wə luu la cəərə kumundu məna'i, gədaamo kaayaŋ jəə la guudu ada zugi. Aŋ ɗee la duuru anə ŋaŋ-ŋaŋ a kəəsuŋ na a Feliksə, kumna bə minti Sezar usnuŋ.» 25Kəya wə jiirunu kefter ada na minti: 26«Tam Feliksə, kumna bobloŋ, jeerem kefter toŋ kay kəna haa ten Kolodi Lisiyasi. Ten bə mirkima. 27Hulum bə minti ten malnam dəm caw naŋ, kaanə Ziwifiŋ a duunu, yə a ɗəlaŋ əwu wəra. Bə minti ten əskəŋ minti wə hulum bə Rom, ten kooroŋ də sootoŋ bə ɗe a ɓutu warda kəəsi da faɗi. 28Ten a bəlaŋ ase gud kel gə minti yə gəənu du cuuruŋ səm moŋ, ten ɗeŋ duuru warna tiinə *kaa kəmtəŋ gə jeme kəəti kə kaanə Ziwifiŋ na. 29Ten ɗeŋ a ase ha'aŋ, yə gəənu kel cuuru haa gud *ku gili neeteŋa. Ten asaŋ karman bə baymele suru kir əwu wəra guudu ba, koo paapa kir gaw a daŋgaya guudu bə gəm. 30Səma ten əskəŋ hebkəna minti yə bə ji hela bə daw bə awe wəra. Ten gaanam dəm na cəlamma haa sə teŋ. Ten bə waate kaa té gə minti gəənu kel cuuru yaŋ minti yə ɗee la a waate kel gə minti yə gəənu du cuuru máŋ tiinim na.»

31Kəya sootoŋ jəŋ haa kel gə minti hulum neete bobloŋ a wəətənəy diŋ. Yə kooroŋ də Pol dər duugŋa faɗi, yə ɗeŋ a məlu warna hãã Antipatri na#23.31 Antipatri haa ko kə sooto bə əsə-isi gəga'-gəga'i aduubə də seŋka də Zeruzalema də seŋka də Sezareŋ.. 32Ɗeŋ a deye dibiinim, sooto gə minti a ɗeŋ na də kampaŋ haraŋ giidə kuli neete bobloŋ da. Yə yaakaŋ sooto kaayaŋ gə gədaamoŋ máŋ bə raawe də Pol. 33Bə minti yə tuukuŋ Sezareŋ anəkay, yə ayaŋ kefter a kumnaŋ, yə gəənu duru cəərə Pola faɗi gəm. 34Kumnaŋ aŋkaŋ kefter aŋka, wə ləənu ku minti wə bəŋ giidə seŋka məntə da mo? Bə minti wə əskəŋ minti wə waŋ haa Silisiŋ, 35wə wəətunu minti: «Ten bə jeɓrem kel nəmtiŋ yaŋ bə minti kaa gə minti a gaanam kel cəərəmaŋ bə bəŋ neŋ kəm.» Kəya wə waataŋ kaŋ minti yə ɗee la a məlu giidə kuli boblo bə minti kumna *Erodi a hursunuŋ, kaa jəə la bə əmu cuuru ada lam.

Currently Selected:

JOŊRE 23: KERNT05

Highlight

Copy