JOŊRE 22

1Wə minti: «Aŋ kəsaanan də kamnan keɗe, ten bele waataŋ kel cəərə kusrəna, aŋ jeɓrə la wəra kaŋkaŋ.» 2Bə minti yə əskəŋ minti wə bə wəətəy kela də ku Hebere, yə zeŋ gud zeneŋ máŋ pisi sekeki ta. 3Kəya wə wəətənəy minti: «Ten haa hulum bə Ziwifi bə waa-we bə giidə vil də Tarsə, giidə seŋka də Silisiŋa, səma ten suŋ haa kəna Zeruzalema. Hulum bə minti hatnan, haa Gamaleyel. Wə hatnan hel də minti ten ɗe gud *ku gili bə minti Pepeŋ əynu a kəmoomo də áŋ anə ɓet-ɓeti a kuɗuŋa faɗi. Ten a jəŋ haa hulum bə minti də cəwa anə pəwəŋ gud sam Pepeŋa, damdi aŋ dayna bə ji haa na gəm. 4Bədoona ta, ten ləsaŋ kaa gə minti haŋ Kəkəy kə Barkaŋ, hãã ten awtaŋ sirdi wəra. Ten fəkaŋ kaa bə ɗe a tope kaa kaŋkar, kəram, bə ɗe a intiy daana bə ɗe a kay anə faɗ-faɗi a daŋgay na. 5*Kumna boblo bə keere Pepeŋ daana kaa kəmtəŋ kə tiinə kaanə Ziwifiŋ waate yaŋ gəm minti ten waate haa gəəzi. Gud maa mo aynan kefter bə minti ten sə a ɗe a əyu a kəsaanə áŋ gə Damasiŋ haa té. Bədoona ana, ten kooroŋ Damasi bə ɗe a humti kaa gə minti doŋ gud Kəkəy kə Barkaŋa bə hare diiri Zeruzalem da gə əntə-ənti bə bi a ləsəy.

6Bə minti ten a kəkəy na bə tuli maŋ sar Damasiŋ də cəwa də daaway ɗekeraŋ, pəɗaki mooto kəman faŋ nuutu da anə jiɗiɗ apəy da, a wəlaŋ koŋ wəra cəərəna ɓəki. 7Ten awaŋ adawra anə muf. Ten əskəŋ dordə karman kəman bə mantana minti: ‹Sol! Sol! Tam ləsan haa səm mo?› Ten hərnu kel minti: 8‹Kumnaŋ, tam haa mindi mo?› Dordə karman toŋ harnan kel da minti: ‹Haa kəna ten Yeesu bə Nazaretiŋ bə minti tam bə ləsuŋ.› 9Kaa gə minti a jəŋ dəərən asaŋ pəɗakiŋ, səma yə əskəŋ kel gə minti dordə karman toŋ waatənan dən ba. 10Kəya ten haraŋ bə law ku minti: ‹Kumnaŋ, ten jəə la hebkəna haa naanaanə tə mo?› Wə harnan kel minti: ‹Bə hebkənaŋ, faa la apəya, ɗee la nəmti Damasi ta, kəya hulum bə waatam kel gə minti tam bə jəy yaŋ wəra məna-məna keɗe.› 11Pəɗaki də minti a welɗeŋ bəwnən dərən wəra səm moŋ, ten paapa bə ase koŋa pəda. Kaa gə minti a jəŋ dəərən doonon kaasən máŋ bə ɗe a məlan Damasiŋ.

12Hulum kəman Damasi ada, səmu minti Ananiyasi. Wə hulum bə minti bə ɗe haa də ku Pepeŋ, bə humi kosoŋa cəərə *ku gili náŋa anə kaŋkaŋ faɗi gəm. Kaanə Ziwifi gə ko toŋ bə wəətu səmu pisi ablaw gəm. 13Kəya wə bəŋ sarəna, wə əsəŋ sarəna anə maŋ, wə waatənan minti: ‹Sol, seenənti, dərəm harə la bə ase wəra a koɗoŋa!› Ku bay awe adawra ceki, dərən haraŋ bə ase daana ten əsnu gil faɗi. 14Kəya wə haraŋ bə waatəna pa minti: ‹Pep kə kəmoomo də áŋ ŋamnam warda hãã minti tam asə kel gə minti giidə tó bələy la, tam asə Hulum Ɗekeriŋ la, daana tam əskə dordə tó la bə waatam kela faɗi. 15Gud maa mo tam ji yaŋ bərdə kəkəy kə tó bə waate sam kar gə minti tam a əsnəy daana kel gə minti tam a iskiniy, a kaŋ wəra keɗe. 16Bə hebkənaŋ, tam bə mi kəm haa səm pə mo? Faa la apəya, jəə batem la wəra daana də səɓaki kə sam Barkaŋ, baymele nəmtiŋ baadə la wəra.›

17Bə jəŋ hõy, bə minti ten haraŋ warna Zeruzalem naŋ, ten ɗeŋ a toose giidə *Kuli kə Pepeŋa. Bə minti ten bə tooseŋ, karman vəɗaŋ dərəna. 18Ten asaŋ Barkaŋ gil bə waatəna minti: ‹A mi ba, zee la wəra giidə vil də Zeruzalema, yaakə la wəra cəlamma. Gud maa mo kaa gə giidəŋ bə bele de haa də kel gə minti tam bə wəətəy cəərənaŋ ba.› 19Ten hərnu kel minti: ‹Barkaŋ, té də kusri, yə wəra gə asə-ase minti ten a jəŋ bə kalte giidə *kuli bə toose kə kaanə Ziwifiŋa wəra məna-məna keɗe bə ɗe a humti kaa gə minti doŋ guudumaŋ, bə ɗe a fəkəy a daŋgaya, daana bə lətəya wəra anə pasyak-pasyaki. 20Bə minti yə awaŋ Etiyen, hulum bə minti jəŋ bərdə kəkəy cəərəma ha'aŋ, ten a jəŋ ada də kusrən, ten laŋ kaasən gud kaa kə əwuŋa, daana goloŋ cəərə dəməəmə neeteŋ haa ten faɗi#22.20 Kel kə Pol gə minti wə hərnəy waate giidi ada haa minti: a kel kə tó gə waateŋa cəərə Yeesuŋ, kaanə Ziwifi sə a ase yaŋ máŋ minti tó bə kolə-kole, gud maa mo tó a ha'aŋ, hulum bə awe kaa kə doo-de..› 21Kəya Barkaŋ waatənan minti: ‹Ɗee la, gud maa mo ten bə gam haa warna tooto sar kaa gə minti teŋ paapa gə Ziwifiŋ baŋ.›»

Yə de Pol a daŋgaya

22Kaa gə ablaw jeɓreŋ kel gə minti Pol wəətənəy hãã warna də kel gə adoro gə minti Barkaŋ a wəətunu duŋ. A ko toŋa kəya yə humuŋ bə naakte kuya keɗe faɗi minti: «Aŋ a yaake hulum toŋ kəna cəərə seŋkaŋa caw pəda! Aŋ əwu la wəra! Hulum toŋ a paapa kir ji caw ba!» 23Yə əsəŋ bə naakte kuya máŋ pisi naakta də səɓaki. Yə əsəŋ bə gaste dəməəmə də siriŋa wəra, bə humti seŋkaŋa bə fəka apəya#22.23 Bə minti kaanə Ziwifiŋ əsəŋ bə gaste dəməəmə neeteŋa daana bə humti seŋkaŋa bə fəka apəya, haa bə waate minti té doŋ haa də kel kə Pol ba anə ceki.. 24Bə minti hulum boblo bə cəərə sootoŋ asaŋ kel teŋ kəyaŋ, wə waataŋ faɗi minti yə kalə Pol la giidə kuli boblo kə sootoŋ na. Yə ɗee la a wəw də keleki kir minti wə gaa gud gəəzi də kel gə minti gə Ziwifi naakte kuy cuuruŋ la wəra. 25Bə minti yə bə bəŋu də kuuti bə certə-certeŋ, wə waataŋ sooto bə saamaŋ minti: «*Ku gili nəətiŋ aynaŋ kəkəy ne máŋ hebkəna bə witi hulum bə Rom anə faɗi bay jəmu kəəti du ceki mo?» 26Sooto bə saamaŋ əskəŋ kel teŋ kəyaŋ, wə faŋ cəlam bə ɗe a waate hulum boblo bə cəərə sootoŋ minti: «Tam asaŋ kel gə minti tam sə a jəy ne? Hulum toŋ doloy kəna hulum bə Rom!» 27Kəya hulum bobloŋ kooroŋ sar Pol da cəlam faɗi bə bi a law ku minti: «Gosə waatan la kəm, tam nuutu haa hulum bə Rom gəəzi mo?» Pol hərnu kel minti: «Gəəzi.» 28Hulum bobloŋ haraŋ bə həru kela minti: «Ten dayna gil hulum bə Rom, ten koloŋ paapa ku gaɗi ba, ten ayaŋ soloy haa hayaŋ gadi faɗi.» Pol hərnu du minti: «Ten toŋ hulum bə Rom hãã a we dəna ɗaw.» 29Kaa gə minti sə a wəw zeŋ wəra suru tooto anə cəlamma faɗi. Hulum boblo bə cəərə sootoŋ ɗeŋ a ase anəkay minti tó a bəŋaŋ kəna hulum bə Rom bə moŋ, walka jəmnu.

Pol tiinə kaa kəmtəŋ kə kaanə Ziwifiŋa

30Kel gə minti kaanə Ziwifiŋ gaŋ Pol diiriŋ, hulum bobloŋ bele minti tó əsəy guudiŋ la wəra me'-me'i. Gud teŋa ta, ɗeŋ a deye dibiinim, wə waataŋ kəkamna kə *kaa kə keere Pepeŋ, də *kaa kəmtəŋ gə jeme kəəti kə kaanə Ziwifiŋ keɗe, minti té tapə cəərə té la. Wə waataŋ sootoŋ minti yə bədə Pol la wəra, yə bəəda duuru warda tiinə kaŋ da.

Currently Selected:

JOŊRE 22: KERNT05

Highlight

Copy