JOŊRE 17

Anə Pol daana Silasi giidə vil də Tesalonikiŋa

1Bə minti anə Pol daana Silasi cakɗaŋ vil də Amfipolisi wəra də nayta də Apoloniŋ wəra cakɗaŋ, yə tuukuŋ Tesaloniki. A ko toŋa ta, *kuli bə toose kə kaanə Ziwifi yaŋ ada. 2Pol a hataŋ wəra bə ɗeete giidə kuli bə tooseŋa səm moŋ, wə ɗeŋ giidə kuli kə kaanə Tesalonikiŋa gəm. *Hi bə faake kə Pepeŋ koltoŋ kampa soope, wə bə ce awəya diiri cəərə Kefter kə Pepeŋa. 3Wə piiniy gud kel wəra də kefter toŋ toki minti *Hulum bə minti Pepeŋ ŋəmnu bə se lasi wəra anə pal-pal hãã wə ɗe a me wəra, daana wə ɗe a hare wəra dədərgə adordə meŋa gəm. Wə wəətənəy minti: «Hulum tó bə minti Pepeŋ ŋəmnu wəraŋ, haa Yeesu bə minti ten bə waataŋ səmu wəra ha'aŋ.» 4Bədoona ta, sərdə gə Ziwifi gə minti bə əski kel teŋaŋ doŋ guudi faɗi, yə təpaŋ wəra gud anə Pola də Silasi. Kaanə Gereki gə minti a bə ke awalna a Pepeŋ, təpaŋ warna guudi na ablaw, də kəram gə abay-abay ablaw gəm.

5Səma sərdə gə Ziwifi kəman gə minti giidi gə hətəyaŋ taaraŋ cəərə sərdə kaa kə hãy-hãy gə minti lam a kəkəyaŋ. Yə əsəŋ bə ke cəərə kumsi anə həz-həzi, bə jaŋye kaŋa. Giidə vila kəyaŋ, kaŋ paapa bə isi ɗeketi pəda. Kəya yə bəŋ a ve anə faɗi giidə kuli kə Zasoŋa bə golde anə Pola də Silasi minti té ɗee la diiri tiinə kaa gə giidə vil, gə minti a təpaŋ ciiriŋ. 6Səma yə fəlnəy ada ba. Bədoona ta, yə humuŋ anə Zasoŋ də sərdə kaa kə doo-de ada, yə təɗtənəy warna tiinə kəkamna gə giidə vil na. Yə bə naakte kuya minti: «Ha! Kaa teŋ laki sarəŋa ta, yə jaŋyaŋ kaŋ wəra a koŋa keɗe! Yə dayna kəna ger áŋa 7daana Zasoŋ duuni irku di girdu! Ana kaa teŋ keɗe bə ji haa kel kə bayməlaŋa cəərə ku gili bə minti kumna boblo Sezar yəəkunu a áŋ. Gud maa mo yə bə waate minti kumna boblo kəman yaŋ pa, səmu minti Yeesu ŋaanaanə mo.» 8Bə minti kaa kə ablaw də kəkamnaŋ əskəŋ kel teŋ kəyaŋ, yə əsəŋ bə ɗiki ablaw. 9Gud teŋa ta, kəkamnaŋ waataŋ anə Zasoŋ də kaa kə doo-deŋ minti yə ayə soloy la bə miɗi cəərə kusri#17.9 Soloy tó bə minti yə əynu ha'aŋ, bə ase təwa minti yə doge bə ji kel kə baymeleŋa sar ku giliŋa pəda. Yə haraŋ ne bə ɗe a ku giliŋa, kəkamnaŋ bə hərəy soloy neeteŋ.. Yə ayaŋ soloy, kəya yə vəənəy wəra faɗi.

Anə Pol də Silasi giidə vil də Bereŋa

10Də bə minti koŋ koloŋ duugŋ anəkay, kaa kə doo-deŋ məlaŋ anə Pol daana Silasi warna bə ɗe giidə vil də Bereŋ. Bə minti yə ɗeŋ a tuli warna ada na anəkay, yə raawaŋ bə ɗe a ve giidə *kuli bə toose kə kaanə Ziwifiŋa pa. 11Kaa gə minti adaŋ ha'aŋ, teŋ paapa kaa kə tete ablaw akas gə Ziwifi gə Tesalonikiŋa ba səm moŋ, yə doŋ kel kə Pepeŋ də giidi pəsaŋ. Dər hitiŋa saksaki, yə bə gole dər Kefter kə Pepeŋa minti kel gə minti Pol wəətətəy a teŋ, yə haa nuutu a kuɗiŋa mo, paapa moŋ? 12Bədoona ta, kaa ablaw guudi doŋ wəra. Kəram gə abay-abay ablaw, də kaa kaŋkar wəra gəroti gəm aduubə də gə Gerekiŋa, koloŋ wəra kaa kə doo-de.

13Səma, bə minti gə Ziwifi gə Tesalonikiŋ əskəŋ anəkay minti anə Pol bə waate kel kə Pepeŋ na warna a kaŋ Bere na gəm, yə kooroŋ da bə bi a ge kaŋ a tete daana yə ləŋnəy ɗiki di wəra. 14Bədoona ta, kəsaanə anə Pol gə doo-deŋ məŋ pəda, yə vəənəy kaa tiini bə ɗe a mələy ku kan kəmtəŋ na bə ɗe a he turtiŋ. Anə Silasi də Timote teŋ yaakaŋ Bere ada. 15Kaa vaŋ tiinə anə Pola, yə ɗeŋ a mələy Atena. Kəya Pol wəətənəy minti yə waatə anə Silasi la də Timote minti yə bəəda warda gud tó da cəlamma. Kəya yə haraŋ bə koore Bere faɗi.

Pol waate kel wəra a kaŋ giidə vil də Atena

16Bə minti Pol bə mi anə Silasi də Timote Atenaŋ, ɗiki du wəra bə hoyə-hoye bə anə kəla'i gud bə minti wə bə gole giidə vila ha'aŋ, a wəra də ɗosə-ɗose lewlew də kar gə minti kaŋ guluy pepe neeteŋ. 17Bədoona ta, wə caate awəy də gə Ziwifiŋ giidə *kuli bə toose neeteŋa, daana də kaayaŋ gə minti paapa gə Ziwifi baŋ, səma yə bə ke awalna a Pepeŋ. Dər hitiŋa saksaki, wə caate awəy də kaa gə minti wə ŋafte diiri a ko bə alumaŋa gəm#17.17 Ko bə aluma toŋ ha'aŋ, wə haa ko bə minti kaa gə minti ɗiki di wəətəy minti té asaŋ wəra (haa anə filosofiŋ), pəəti a ŋafte ada bə ce awəy də kela..

18Sərdə kaa kə hate kəman ada gə minti doŋ gud hate bə minti yə məntu minti *Epikur, də naayaw toŋ bə minti yə məntu minti *Estoyikiŋ, haŋ neleŋ nuutu də Pol faɗi. Sirdiŋ minti: «Jerweŋ toŋ geye kusru bə hage haa səm mo?» Sirdiŋ bə waate ada gəm minti: «Wə gole dər are damdi wə waate haa sam pepe kə kaa kəman ana.» Yə waataŋ bədoona gud bə minti Pol bə waate kela wəra cəərə Yeesu, daana cəərə hare bə kaŋa wəra dədərgə adordə meŋa.

19Kəya yə mantaŋ Pol, yə kooroŋ duuru tiinə kaa kəmtəŋ gə Aropaziŋ#17.19 Aropazi haa sam pərki kəman sar vil də Atena ada. Kaa kəmtəŋ ɗeete a tapte ciiri a ko toŋa bə ke dər kela.. Yə ləənu ku minti: «Tam neke yaŋ kir topə bəlam də hate nəmti kimirwi toŋ a are minti are usku guudu la gəm mo? 20Gud maa mo, kel gə minti tam wəətəy ha'aŋ, are iskiniy hõy ba. Bədoona ta, are də caadə minti are iskiy guudi la gəm.» 21(Gəəzi, kaanə Aten keɗe, də kaa gə minti girdi kə irku də kuliŋ giidə vil taŋa adaŋ ha'aŋ, yə jaate daŋgeŋ haa bə waate daana bə jeɓre kel gə minti kəlaŋ də ne girdi da kəmarwaŋ.)

22Kəya Pol faŋ apəya tiinə kaa kəmtəŋ gə Aropaziŋa, wə wəətənəy minti: «Aŋ gə Aten, ten asaŋ minti, a jəəti bə kar nəətiŋa keɗe, aŋ haa kaa gə minti bele ke awalna a gidiirə pepe ablaw. 23Gud maa mo, a kəkəy bə gəryi giidə vil nəətiŋa, ten astaŋ ko bə hərsə-hərsi bə minti aŋ ɗeete a kaate awalna a pepe kəman ada anə pələl. Adəwaldi ha'aŋ, aŋ hərsəŋ ko bə keere ada bə jeerə-jeere suru minti: ‹Toŋ haa a pepe bə minti áŋ əsnu hõy baŋ.› Karman toŋ bə minti aŋ əsnu hõy ba, səma aŋ bə kaw awalnaŋa ha'aŋ, ten bəŋ haa a waataŋ kel du faɗi. 24Pep bə minti jəŋ seŋkaŋ də kar gə giidə neŋneŋ keɗeŋ, wə haa Bərdə ko bə apəyaŋ də ko bə adawraŋ keɗe. Wə neke bə hi giidə kuli bə minti hulum hursunu ba. 25Hulum a ɗiki minti tó golde karman bə aye a nuunu haa damdi karman toŋ paapa kəəsu da ba anaŋ, paapa. Anaaŋa, ayə dədərgəŋ, maaheŋ, də kar neŋneŋ keɗe a kaŋ haa tó ɗaw. 26Pepeŋ a jəŋ kəm haa hulum məna. Bədoona ta, gidiirə kaa gə minti wə jiiniy neŋneŋ keɗe bə jewe wəra giidə seŋkaŋa haa kaasaw də hulum toŋ məna'i. Wəra hãã ajew də we də huluma, ko bə minti wə ɗe a ji caw duruŋ, daana ko bə minti wə ɗe a isi adaŋ, warda bə ŋamə-ŋeme kəəsu da. 27Wə jəŋ kel teŋ a kaŋ bədoona haa minti yə goldə tó la. A kəkəy bə laame koŋa ɗəwa'-ɗəwa'i, yə neke yaŋ bə fele tó ɗawmay mo, gud bə minti wə haa paapa tooto sar áŋa bə ɗaw. 28Gud maa mo, áŋ zugi dədərgə, áŋ ɗoote, áŋ lam damdi kaŋ ana, haa guudu. Sərdə kaa nəəti gə minti bə ɗəkti ablaw cəərə karaŋ, waataŋ bədoona gəm minti: ‹Áŋ haa kərmuyu›. 29Bədoona ana ta, áŋ kərmuyu tə kəm, áŋ a doŋ paapa kir ɗiki anə weseki minti Pepeŋ haa akas kəwal gə minti hulum jiiniy də maaway mo, də dornoŋ mo, ɗalba də pərki pisi moŋ, gud ɗiki du daana də hel nuutu faɗi, paapa. 30Pepeŋ paapa bə bele aŋke də kel gə minti kaŋ a jiiniy dər ko bə minti wə a kəm paapa də diri baŋ pəda. Səma, bə daynaŋ ha'aŋ, wə wəra bə wəətiya keɗe a ko mundu mundu mo minti yə kir kole kirki a baymele neeteŋ. 31Gud maa mo, Pepeŋ ŋəmaŋ hi bə jeme kəəti də kaa gə cəərə seŋkaŋ də ne warda neŋneŋ keɗe ɗaw. Wə ɗe a jəməy kəəti di haa də kəəti ɗekeri faɗi, də hulum bə minti wə a ŋəmnu warda bə ji joŋre toŋ. Wə gaŋ dər kaŋ wəra kəkər minti tó ɗe a ji teŋ yaŋ bədoona, haa a kəkəy bə minti wə haraŋ hulum toŋ wəra dədərgə adordə meŋaŋ.»

32Bə minti kaa kə jeɓre kel kə Pol əskəŋ sam hare bə dədərgəŋ wəra adordə meŋa anəkay, sirdi kəman ada əsəŋ bə dafɗe Pola faɗi. Kaaya teŋ bə wəətu minti: «Tam hare da yaŋ a topə bəlam də kel teŋ a are kəm hõy pa.» 33Pol jəmaŋ wəra a tepe neeteŋa haa bədoona anəkay faɗi. 34Də teŋ keɗe, sərdə kaa təpaŋ guudu, yə koloŋ wəra kaa kə doo-de. Adəwaldə kaa teŋa anə faɗi ha'aŋ, Deni, hulum kəman gud kaa kəmtəŋ gə Aropaziŋa. Həlgə ada pa, sam taŋ minti Damarisi gəm, də kaa gaalaŋ ada gəm.

Currently Selected:

JOŊRE 17: KERNT05

Highlight

Copy