JOŊRE 16

Timote tepe də anə Pol də Silasi bə gəryi koŋa

1Kəya Pol ɗeŋ a tuuki giidə vil də Derbeŋ, wə raawaŋ giidə vil də Listərəŋ gəm. Wə ŋəfaŋ də hulum bə doo-de ada, səmu minti Timote. Nuru həlgə də doo-de, kamnaŋ gə Ziwifi, səma buruŋ hulum bə Gereki. 2Kaa gə doo-de gə giidə vil də Listərə, də Ikoniyom gəm, bə wəətu səmu wəra pisi keɗe. 3Kəya Pol ɗəkəŋ wəra minti tó daw kasi tó, té koorə la máŋ də kumsə té keɗe bə ɗe a gəryi koŋ. Kəya wə *jəmnu tənturu wəra faɗi, gud bə minti kaanə Ziwifi gə minti a koŋa adaŋ, yə wəra gə asə-ase keɗe minti bar Timote haa hulum bə Gereki. 4Giidə vil də minti yə kaltaŋ wəra ada keɗeŋ, yə ayaŋ mini wəra a kaa kə doo-deŋ cəərə kel gə minti *kaa kə vaa-veŋ, də kaa kəmtəŋ gə tiinə kaa kə Tapi gə Zeruzalem a ŋəraŋ kuy wəra ciiriŋ. Kəya yə wəətənəy ada pa minti yə ɗee la gud kel teŋa. 5Kaa kə Tapiŋ əsəŋ bə kole də səɓaki a de neeteŋa pisi kolə, daana dər hitiŋa saksaki gəm ha'aŋ, ablaw diŋ əsəŋ máŋ bə zuli pisi zulə.

Pepeŋ veɗe karman dər Pola giidə vil də Torwasiŋa

6Anə Pol a bəlaŋ minti té koorə la bə ɗe a waate kel kə Pepeŋ wəra giidə seŋka də Aziŋa, səma Tiiru Cetcetaŋ həənəy kuy wəra. Gud teŋa ta, yə haŋ tew giidə seŋka də Firijiŋa daana də Galatiŋa bə koore a ko baalaŋ. 7Bə minti yə ɗeŋ a tuli warna maŋ sar Misi na anəkay, yə a bəlaŋ koore giidə seŋka də Bitini, səma Tiirə Yeesu#16.7 Tiiru Cetcetaŋ daana Tiirə Yeesu, yə haa kel kə məna. əynəy kəkəy bə pa. 8Yə cakɗaŋ seŋka də Misi wəra, yə ɗeŋ a tuli warna giidə vil də Torwasi də minti ku kan kəmtəŋaŋ. 9A ko toŋa ta, Pepeŋ vəɗaŋ karman dər Pola dər ko bə duugŋa. Wə vəɗnu haa hulum bə seŋka də Masedəwan bə əsə-isi tiinu gil sə kampa, bə jəw kamkama minti: «Gosə bəəda kəm Masedəwan da bə bi a jeme tulul də are mo.» 10Bə jəŋ anə sawəwa adordə karman bə minti a vəɗaŋ wəra dər Polaŋ, are goldoŋ kəkəy bə raawe giidə seŋka də Masedəwana faɗi. Gud maa mo are asaŋ wəra máŋ kaŋkaŋ cəərə are minti Pepeŋ mantaŋ are bə ɗe a waate *Kel pəsaŋ kəmarwaŋ wəra a kaa gə ko toŋ, haa tó də kusru.

Litiya, həlgə də giidə vil də Filipiŋ, de gud Barkaŋa

11Are haŋ turtiŋ ku kan gə Torwasiŋa, are kooroŋ ɗeker cəərə ajomga də Samotərasiŋ na faɗi. Ɗeŋ a deye dibiinim kəya, are raawaŋ də turtiŋ bə koore Neyapolisi faɗi pa. 12Are tuluŋ tulə Neyapolisi kəyaŋ, are raawaŋ giidə vil də Filipiŋ. Filipi haa vil pasa də minti aŋ fəla giidə ko bə acekjew bə giidə seŋka də Masedəwana faɗiŋ#16.12 Seŋka də Masedəwan də camə-ceme giidə waaɗe. Ko bə acekjew bə minti aŋ fəlu a kəkəy bə minti aŋ bə ve na Masedəwan na, vil pasa də giidə ko toŋ haa Filipi.. Kaa gə minti giidə vil taŋa ha'aŋ, daŋge diŋ gə Rom. Are hətəŋ ada ablaw. 13Dər *hi bə faake kə Pepeŋa, are vaŋ wəra taakawa, are yaakaŋ giidə vil warda. Kəya are doŋ ku vor na kar gud bə minti are a ɗəkəŋ haa minti kaanə Ziwifiŋ tapte ciiri bə jəəti toose diidəday haa a ko toŋa. Kəya are ɗeŋ a fele kəram kəman gə tayə-teye ciiri ada laki. Are əstəŋ siri je'-je'i, are əsəŋ bə wəətəy kela. 14Adəwaldə kəram teŋa ha'aŋ, həlgə kəman yaŋ ada, sam minti Litiya. A haa həlgə də Tiyatir daana a bə kaate awalna a Pepeŋ pa. Joŋre naataŋ haa celeere də dəməəmə pas-pasa də minti kaa kə begeŋ gustəŋ. Bə minti Pol bə waate kelaŋ, Barkaŋ malna ɗiki də ɗeketi cəərə kel teŋa, wə bəŋnə ku tarmaya wəra bə doy. 15Yə jəənə batem wəra də gə gerdaŋ keɗe. Adoro a mantaŋ are, a minti: «Aŋ asaŋ wəra hebkəna aŋ də kusrəŋ gəm minti ten wəra də doo-de gud Barkaŋa tə kəm, aŋ bəəda a isi gerdəna máŋ ta.» Kəya a nuutu ku are helew-helew minti are doo haa la.

Pol daana Silasi a daŋgaya giidə vil də Filipiŋa

16Dəyaŋ hõy məna, bə minti are bə koore a ko bə tooseŋ, tər terewka kəman, a haa tamka də joŋre kə hulum, ŋəfaŋ də are a kəkəy na, a də kəwal cəərə. Kəwal teŋ waatəta wəra cəərə kel gə minti ɗe a jəəti ajew naŋ. Gud teŋa ta, kəmnə də gə minti a girdiŋ, fele begeŋ dəərə ablaw. 17Bə minti a ŋəfaŋ də are anəkay daana Pol, a təpaŋ gud are. Kəya a malte kampara máŋ haa də naareŋ keɗe-keɗe. A máŋ caw gud are bə naakte ku koloŋ-koloŋ minti: «Kaa teŋ lama, haa kaa kə joŋre kə Pep bə Daŋə-Deŋe! Yə bəŋ bə bi a waataŋ wəra cəərə kəkəy bə minti aŋ seere duuruŋ.» 18A hətəŋ bə ji teŋa kəya anə pər. Kel naataŋ raawaŋ cəərə Pol wəra, kəya wə haraŋ duru cəərə, wə waataŋ kəwal minti: «Ten wəətəy, də sam Yeesu Kristu, pəə la wəra cəərə tər taŋa!» A ko toŋa ada anə gil faɗi, kəwal pəŋ wəra cəərə.

19Bə minti kəmnə də tər tá kafkam asaŋ anəkay minti bege kə teŋ jeme cuuru wəra haa jemeŋ, yə topoŋ anə Pol daana Silasi anə faɗ-faɗi, yə əsəŋ bə təɗtəya bə ɗe diiri a ko bə alum na bə minti yə ceme kəətiŋ ada na gəm. Yə bəŋ diiri tiinə kaa kəmtəŋ gə vila. 20Kəya yə bəŋ a əyəy kasi kəkamna gə Roma, yə əsəŋ bə wəətiya minti: «Kaa teŋ lakaŋ, yə gə Ziwifi, yə bə leŋe kaŋa giidə vila də kel kə waate neeteŋ. 21Gud maa mo yə bə hate to'osi daalaŋ, də minti təpaŋ də ku gili kə áŋ gə Rom baŋ. Gud teŋa ta, áŋ paapa kir de haa də kel teŋ ba, bə jəy bə gəm.» 22Kaa kə ablaw koloŋ kuy cəərə anə Pola faɗi gəm. Kəya kəkamnaŋ gə Romeŋ vaŋ kaa bə pəy dəməəmə də siriŋa wəra, daana yə wəətənəy minti yə humə gədəwa la ciiri, yə lətəy la. 23Kəya yə bərnəy wəra bere də leteŋ, yə vəənəy a daŋgaya faɗi. Yə waataŋ hulum bə ame ku kuli bə daŋgay minti wə guluy ciiri la pisi. 24Bə de ku kel gə minti yə a wəətunu duŋ wəra a kuɗiŋaŋ, hulum bə gole cəərə daŋgay humuŋ anə Pol, wə ɗeŋ a gisi diri warna giidə kuli bə daŋgay bə minti toŋ paapa máŋ sar ku kuli bə keleŋa baŋ. Kəya wə kəənəy paklam kəmpəri.

25Ɗeŋ a deye wəra aduubə də ko bə duugŋa leŋ, anə Pol də Silasi nuutu bə toose daana bə tokɗe Pepeŋa də gudul. Kaa kə daŋgay kaayaŋ bə jeɓre haa jeɓre. 26Ɗeŋ a goleŋa, seŋkaŋ miiriŋ ŋiɗ-ŋiɗ-ŋiɗ, gud kuli bə daŋgay əsəŋ bə ɗoote faɗi. Kəya ku kuliŋ pəŋtəŋ warna anə giɓlim-giɓlim faɗi, gaalay bə minti yə a əntəŋ kaa kə daŋgay duuruŋ foktoŋ warna bay cuuru gəm. 27Hulum bə ame cəərə daŋgay gunuŋ anə gafraw kəya, wə ɗeŋ a ase ha'aŋ ku kuli bə daŋgay warna lamnaŋ keɗe bə pəŋtə-pəŋti. Wə máŋ bə ɗiki haa minti kaa kə daŋgay kəna gadtaŋ ne wəra keɗe ta. Kəya wə pəŋ macəlam nuutu minti tó awe kusrə tó wəra#16.27 Ger kaanə Romeŋ ha'aŋ, daŋgay gədaŋ ne wəra sar hulum bə guluy ciiriŋa, gəəli bə minti daŋgay toŋ sə a fəluŋ, fəlu máŋ ha'aŋ hulum tó bə guluy ciiriŋ.. 28Səma Pol nəəkunu təbay anə koloŋ minti: «Amba! A ji kusrum baymele ba! Are yaŋ kəm kəna neŋneŋ keɗe!» 29Kəya hulum bə ame cəərə daŋgay mantaŋ minti yə do'ə cəwa da a tó. Wə doŋ cəwa duru kəya, wə kəlaŋ na anə cəlam giidə kuli bə minti anə Pol ada naŋ, wə bəŋ a awe kəmpəri anə kəpapi adawra bə miiri kas walkaŋ. 30Wə vəənəy warda vaa kay daŋ, wə əsəŋ bə lay kuya minti: «Kaa kətanti, ten jəə la haa naanaanə tə mo bə fele seereŋ?» 31Yə hərnu kel minti: «Doo la gud Barkaŋ Yeesu, tam seere yaŋ wəra də gə gerdem keɗe.» 32Yə wəətunu kel kə Barkaŋ wəra a nuunu, də kaa gə minti akera girduŋ keɗe. 33Dər ko tó bə duugŋ leŋiŋa tokiŋ, hulum bə ame cəərə daŋgay humnuy bə ɗe a bəədəy dər toso neeteŋ wəra. Adoro yə juunu batem wəra, də gə girduŋ keɗe. 34Kəya, wə kooroŋ máŋ diiri girdu, wə ɗeŋ a əyəy kar kə hame. Yə waalaŋ ablaw də gə girduŋ gud bə minti yə doŋ wəra gud Pepeŋaŋ.

35Koŋ ɗeŋ a wele wəra kəyaŋ, kəkamnaŋ gə Rom vaŋ sooto na bə ɗe a waate hulum bə ame daŋgay minti wə vaa kaa teŋ la. 36Kəya hulum bə ame daŋgay kooroŋ nuutu bə ɗe a joge kel teŋ wəra a anə Pol faɗi gəm. Wə wəətənəy minti: «Kəkamnaŋ vaanan kaa kanda minti ten vaŋ la wəra. Bədoona ta, aŋ vaa la wəra, aŋ ɗee la kəkaɓi, kel pa pəda.» 37Səma Pol haraŋ kel a sootoŋ minti: «Haa maa mo! Yə wətəŋ are wəra anə kəkər laki bay jeme kəəti də are, anaaŋa are nuutu kaanə Rom gəm#16.37 Ku giliŋ bə Rom waataŋ minti yə a lete hulum bə Rom də gədəwa mo, də ajewɗeki mo, ba.. Yə haraŋ, yə vaŋ are a daŋgaya anə faɗi pa. Bə jəŋ naanaanə minti hebkəna yə ve are wəra dəgaaya-dəgaayaŋ mo? Are teŋ de haa ba! Yə bəəda a ve are wəra té də kusri!» 38Bə minti sootoŋ əskəŋ kel teŋ, yə haraŋ bə ɗe a tupuy bəlam di a kəkamnaŋ. Yə ɗeŋ a iski kay minti anə Pol doloy kaanə Romeŋ gəm, walka jəmnəy. 39Kəya yə kooroŋ də kusri sar anə Pol bə ɗe a jəy kamkam. Adoro yə vəənəy wəra, yə wəətənəy minti: «Are bele minti aŋ yaakə vil naareŋ la ɗawəwa.» 40Anə Pol daana Silasi vaŋ warda mini daŋgay kəyaŋ, yə kooroŋ ger Litiya. A ko toŋa yə fəlaŋ kəsəəni gə doo-deŋ ada, yə tiŋniy diri teŋe, kəya yə haraŋ bə he kəkəy neeteŋa faɗi.

Currently Selected:

JOŊRE 16: KERNT05

Highlight

Copy