JOŊRE 15

Awəy də minti jəŋ Zeruzalema cəərə ceme bə tantaŋa

1Kəya sərdə kaa kəman tuluŋ wəra Antiyosi ada gəm, yə a pətəŋ giidə seŋka də Zudeŋ da. Yə əsəŋ bə hate kaa kə doo-deŋa bə wəətiya minti: «Jəəne minti aŋ ceme tantəraŋ damdi *ku gili kə *Moyisiŋ a waataŋ bədoona ana baŋ, aŋ neke bə fele seereŋ ba.» 2Kəya anə Pol daana Barnabasi paapa gə doo-de haa gud kel teŋa ba. Awəy mooto awaŋ aduubə di də kaa teŋ faɗi. Kəya cəərə kel ɗeŋ a awe haa minti, marya diŋ anə Pol, Barnabasi də sərdə kaa kə doo-de gə Antiyosiŋ ɗee la Zeruzalem a gole dər kel teŋ da kəm də *kaa kə vaa-veŋ daana də kaa kəmtəŋ gə tiinə kaa kə Tapi gə ko toŋ. 3Bədoona kəyaŋ, kaa kə Tapi gə Antiyosiŋ əynəy kar kəəsi kir nəkəy bə ɗe a gəryi neeteŋaŋ, yə vəənəy faɗi. Kəya yə haŋ tew giidə seŋka də Fenisi na, də seŋka də Samariŋ gəm. Yə haŋ ada na haa bə tope bəlam də kel na a kaŋ faɗ-faɗi gəm minti, kaa gə minti paapa gə Ziwifi baŋ bə kolte kirki wəra a baymele neeteŋ daana minti yə máŋ bə ɗe gud Barkaŋa. Kaa kə doo-deŋ gə minti əskəŋ kel teŋ keɗe jəŋ də waale ablaw guudi.

4Bə minti yə ɗeŋ a tuuki Zeruzalem na anəkay, kaa kə Tapiŋ, kaa kə vaa-veŋ də kaa kəmtəŋ gə tiinə kaŋ duuniy irku di pisi. Anə Pol tupnuy bəlam də kel gə minti Pepeŋ a jəŋ joŋreŋ də té naanaanə ji moŋ wəra keɗe. 5Səma sərdə kaa kə doo-de kəman gə minti a jəŋ gud kaanə *Farisiyeŋ daŋ pətəŋ bə waate minti: «Kaa kə doo-de gə minti teŋ paapa gə Ziwifi baŋ *camə təntəri la wəra doole, yə ɗee la haa a ku gili kə Moyisiŋa gəm.»

6Kəya kaa kə vaa-veŋ də kaa kəmtəŋ gə tiinə kaŋ təpaŋ ciiri bə gole dər kel teŋa faɗi. 7Bə minti awəy gargaŋ anə taata tə bə moŋ, Piyer faŋ apəya, wə wəətənəy minti: «Kəsaananti, aŋ wəra gə asə-ase hebkəna hãã də hi bə ajew daŋ, Pepeŋ ŋamnan aduubə dəŋa bə waate *Kel pəsaŋ kəmarwaŋ wəra a kaa gə minti teŋ paapa gə Ziwifiŋ baŋ, kir minti yə əskə kel teŋ la, yə kolə la wəra kaa kə doo-de gəm. 8Pep bə minti ase ɗiki bə ku tarmə hulum, gaŋ dər áŋ minti tó də caadə kaa gə minti teŋ paapa gə Ziwifi baŋ, haa də kel gə minti wə əynəy Tiiru Cetcetaŋ damdi wə a ayna a áŋ ana gəm. 9Wə gole áŋ paapa hal-hal diiri ba, gud maa mo wə piini baymele neeteŋ bə ku tərməyiŋ wəra haa gud bə minti yə doŋ guuduŋ gəm. 10Doloy bədoona tə kəm, aŋ gole koɗ Pepeŋ haa səm mo a kəkəy bə minti aŋ bele mele eele toŋ cəərə kaa kə doo-deŋa? Eele toŋ ha'aŋ, koo kəmoomo də áŋ gə dayday, koo nuutu áŋ də kusrə áŋ gəm, hulum nəkaŋ bə həlu ba. 11Ana ɗaw, áŋ a wəra gə doo-de gud kela minti: áŋ gə Ziwifiŋ fele seereŋ haa gud pisi bə jəə-ji bə sar kaŋ kə Barkaŋ náŋ Yeesuŋ, bə kaayaŋ ana gəm.»

12Kaa gə minti a jəŋ gə lawə-lewe ciiriŋ lakaŋ, yə zemeŋ wəra seɗem keɗe. Kəya yə əsəŋ bə jeɓre kel gə minti anə Barnabasi daana Pol bə tupuy bəlam di wəra neŋneŋ keɗe cəərə kar gə məɗ-miɗiŋa, də kar gə ŋili kaŋ, gə minti Pepeŋ a jiiniy də teŋ aduubə də kaa gə minti paapa gə Ziwifiŋ ba.

13Ku anə Barnabasi də Pol ɗeŋ a awe adawra anəkay, Zaki faŋ apəya, wə əsəŋ bə waate kaŋa minti: «Kəsaananti, aŋ jeɓren kun la! 14Simoŋ a topoŋ bəlam də kel wəra a áŋ minti, də anə hãã a mele bə gud kel daŋ, Pepeŋ a ɗəkəŋ cəərə kaa gə minti paapa gə Ziwifi baŋ. Wə ŋamtaŋ sirdi guudi ada minti yə kolə la wəra kaa kə tó. 15Kel teŋ təpaŋ wəra məna də kel gə minti *kaa kə jogte ku mini kə Pepeŋ a wəətənəy wəraŋ. Gud maa mo kel wəra gə jeerə-jeere giidə Kefter kə Pepeŋa minti:

16‹Barkaŋ waataŋ minti:

Bə ɗeŋ ne a deye hõy, ten hare yaŋ da bə bi a hare bə hərsi kuli kə *Davidi#15.16 Kuli kə Davidi waate haa sam kaasaw du. Yeesu bə minti a kaasaw də Davidiŋ bi yaŋ a isi cəərə jaaŋa də kumna kə Davidiŋa. Bədoona ana, wə bi a hare kumnaŋ a kuɗuŋa. bə minti a vaŋ wəra.

Ten hare yaŋ bə ɗampe ko du bə ɓalkə-ɓalkeŋa,

daana ten faw wəra apəyaŋ a kuɗuŋa.

17Bədoona ana taŋ, kaa kaayaŋ gə yaakə-yaakeŋ neŋneŋ keɗe

hare diri yaŋ bə golde Barkaŋa,

daana gidiirə kaa gə minti ten a məntənəy minti yə kolə la kaa katən bə guldu keɗe gəm.

18Kel teŋ haa kel gə minti Barkaŋ a wəətənəy.

Yə warda hãã də duru daana wə doy kuy wəra haa tó#15.18 Amos 9.11.›»

19Kəya Zaki raawaŋ bə waate ada pa minti: «Jəəne bədoona taŋ, ten ɗəkəŋ nin hebkəna haa minti: kaa gə minti paapa gə Ziwifi baŋ, səma yə bə de hebkəna gud Pepeŋaŋ, áŋ a gay gəəli ciiri ba. 20Áŋ jiiriy kefter la təwa, minti yə a hame kusuki bə minti yə keerte kar gə minti kaŋ kuluy pepe neeteŋ duuruŋ pəda, yə yaakə piwpiw la wəra gəm. Yə a hame kar gə minti yə murɗuy kuuri murɗiŋ ba#15.20 Kar gə minti kor di ãyaŋ wəra ba, yə a hame té ba., yə a hame kor bə gəm. 21Gud maa mo, dər kaa gə ajew da hãã dayna, kaa kə hate ku gili kə Moyisi yaŋ giidə vila wəra məna-məna keɗe, daana yə bə əŋkətu saksaki dər *hi bə faake kə Pepeŋa giidə *kuli bə toose neeteŋa.»

22Kəya kaa kə vaa-veŋ, kaa kəmtəŋ gə tiinə kaŋ daana kaa kə Tapiŋ keɗe, doŋ ku kumsi wəra ɗaaməna bə humi kaa aduubə di minti té vay la Antiyosi na gud anə Pola daana Barnabasi. Kəya yə ŋəmaŋ anə Zudasi, səmu bə tokɗeŋ minti Barsabasi, də Silasi gəm. Kaa té ɓasiŋ haa kaa gə minti yə bə humi kosoŋa ciiri adəwaldə kəsəəni gə doo-deŋa faɗi. 23Lam bə jeerə-jeere kəna haa kefter bə minti yə əynəy di kəəsi naŋ: «Aŋ kəsaanə are gə doo-de gə minti paapa gə Ziwifi baŋ gə giidə vil də Antiyosiŋ, gə giidə seŋka də Siriŋ daana gə Silisiŋ, are kəsaanaŋ gə vaa-veŋ, də kaa kəmtəŋ gə tiinə kaŋ, are bə mirkiŋ na. 24Are əskəŋ ne nuutu minti kəsaanə are gə doo-de kəman pətəŋ ger are na kanna bə ɗe a fəlaŋ. Yə ɗeŋ a hoyoŋ daana a lenteŋ ɗiki dəŋ wəra də kel gə minti yə waatənaŋ dəŋ. Ana yə ɗeŋ haa naŋ, are vəənəy na ba anə ceki. 25Gud teŋa ta, are təpaŋ ku are wəra ɗaaməna bə humi kaa gə minti are vaanaŋ dəŋ na gud anə Barnabasi na daana Pol gə minti are bələy ablaw. 26Anə Barnabasi daana Pol ha'aŋ, yə ayaŋ kusri wəra a meŋ bə ji joŋre a sam Barkaŋ náŋ Yeesu Kristuŋa. 27Bədoona ana, are vaanaŋ anə Zudasi na daana Silasi haa bə ɗe a ayaŋ kefter bə minti are a jeereneŋ dəŋ naŋ, daana bə waataŋ dəŋ də kuy ada waata pa. 28Bədoona ta, karman bə minti goloŋ dər Tiiru Cetcetaŋ ɗəwa, dər are gəm, haa minti are a məlaŋ eele bə kar ablaw cəərəŋa ba, səma té gə minti ta'a kəna paapa kir yaake wəra baŋ: 29aŋ a hame kusuki bə minti yə keerte anə pepe kəman duuru pəda. Aŋ a hame kor ba, daana kar gə minti yə murɗuy kuuri murɗiŋ bə gəm. Aŋ a ji piwpiw bə gəm. Aŋ amaŋ kusrəŋ ne ku kel teŋa gila keɗeŋ, aŋ koloŋ máŋ bə ji haa karman pisiŋ faɗi. Aŋ kəsaanə areŋ, aŋ doo mirki naareŋ la pis-pisi.»

30Kəya yə vaŋ kaa gə minti yə a ŋəmtənəy. Kaa teŋ kooroŋ nuutu Antiyosi faɗi gəm. Bə minti yə ɗeŋ a tuuki ada na anəkay, yə təpaŋ cəərə kaa kə doo-deŋ, kəya yə əynəy kefter kəəsi faɗi. 31Kaŋ aŋkaŋ kel gə giiduŋ aŋka kəyaŋ, yə jəŋ waale ablaw gud bə minti yə fəlaŋ ada haa kel kə tiŋiy diri.

32Zudasi daana Silasi də kusri haa kaa gə minti Pepeŋ əynəy neeteŋ haa jogte bə ku mini nuutuŋ tə bə moŋ, yə əsəŋ anə taata bə waate kel kə teŋe dər a kaa kə doo-deŋa, bə əyəy səɓaki a de neeteŋa gəm. 33Kəya yə hətəŋ ada maki. Adoro kaa kə doo-deŋ əynəy kəkəy minti yə harə la kəkaɓi sar kaa gə minti a vəənəy daŋ ta. [ 34Səma Silasi toŋ minti tó hiti kəm Antiyosi ada maki.] 35Kə anə Pol daana Barnabasi ha'aŋ, yə jəŋ kitir kəm Antiyosi ada laki. Yə waataŋ kel kə Pepeŋ daana yə hətnəy wəra a kaŋ. Kaa gaalaŋ təpaŋ siri ada ablaw bə ji joŋre toŋa gəm.

Anə Pol də Barnabasi ɓarse

36Yə jəŋ hiti tó laki də kumsi jəə kəyaŋ, Pol waataŋ Barnabasi minti: «Áŋ harə la a helɗe kəsaanə áŋ gə doo-de gə giidə vil də minti aŋ a waataŋ kel cəərə Barkaŋa wəra adaŋ keɗe. Bədoona, áŋ ɗe yaŋ a ase minti yə raawaŋ də de neeteŋ naanaanə raawe moŋ.» 37Barnabasi a ɗəkəŋ nuutuŋ haa minti té doo Zaŋ la kasi té, Zaŋ bə minti səmu bə tokɗeŋ minti Markəŋ. 38Səma kel teŋ doŋ dər Pol ba. Gud maa mo wə a yəəkənəy warda hõy Pamfili da daana wə a əsəŋ diiri hãã a tewe də joŋreŋa bə pa. 39Awəy də aduubə də anə Pol daana Barnabasi jəŋ wəra kələmləm. Kəya yə koloŋ bə ɓarse wəra sar kumsi. Barnabasi doŋ Markə guudu, yə luŋ a turtiŋa bə ɗe giidə ajomga də Sipərəŋ faɗi. 40Kə Pol kəyaŋ, wə ŋəmaŋ nuutuŋ Silasi minti té koorə la də toŋ. Adordə minti kaa kə doo-deŋ əynəy ayə kasi Pepeŋa minti wə əməy ciiri laŋ, yə kooroŋ faɗi. 41Kəya Pol gəryəŋ seŋka də Siriŋ daana Silisiŋ bə waate kaa kə Tapiŋa wəra minti yə əsə la ŋəŋ a de neeteŋa.

Currently Selected:

JOŊRE 15: KERNT05

Highlight

Copy