Kărdimata Le Apostolengă 5
5
O Anania thai e Safira.
1Ta khă manuši, kai bušolas Anania, bitindea khă phuwoŕî, pehka romneasa la Safirasa,
2thai atărdeardea khă rig andal love, dindoi pe duma pehka romneasa; pala kodea nigărdea e rig e kolaver, thai thodea la kal pînŕă le apostolengă.#Cap. 4.37.
3O Petro phendea lehkă: „Anania, anda soste pherde o Beng teo illo te xoxaves le Sfîntone Duxos, thai te garaves khă rig anda le love la phuweorakă?#Num. 30.2. Deut. 23.21. Ecl. 5.4. Luka 22.3.
4Te na bitindinola, či ašelas oi tiri? Thai, pala so bitindean la, našti daštisas te kărăs so kames lakă lovença? Sar daštisardea pe te kărdeol kadea khă gîndo ande teo illo? Či xoxadean le manušen, ta le Devlles.”
5O Anania, kana ašundea le divanuri kadala, pelo tele, thai dea pehko dii. Khă bari dar astardea saoŕăn kai ašunenas kadala butea.#Vers. 10, 11.
6Le tărnăxara uštile, thodine pe leste, ankalade les avri, thai praxosarde les.#Ioan 19.40.
7Kam pala trin čeasuri, šutea pe i lesti romni, bi te jeanel, so kărdilea sas.
8O Petro phendea lakă: „Phen mangă, kaditença bitindean e phuwoŕî?” „E”, dea anglal oi, „kaditença.”
9Atunčeara o Petro phendea lakă: „Sar ta dean tume duma maškar tumende te zumaven le Duxos le Raiehkărăs? Dikta le pînŕă kolengă kai praxosarde te romes, sî koa udar, thai lena tu i tut.”#Vers. 3. Mat. 4.7.
10Oi peli iekhatar kal pînŕă lehkă, thai dea pehko dii. Kana šute pe le tărnăxara, arakhlela mulli; ankaladela avri, thai praxosardela paša lako rom.#Vers. 5.
11Khă bari dar astardea sa le tidimas thai saoŕăn kai ašunenas kadala butea.#Vers. 5. Cap. 2.43; 19.17.
E izbînda le apostolendi.
12Andal vast le apostolengă kărdeonas pe but minunea ando norodo. Saoŕă bešenas andekh than ando pridvoro le Solomonohko,#Cap. 2.43; 3.11; 4.32; 14.3; 19.11. Rom. 15.19. 2Kor. 12.12. Evr. 2.4.
13thai či iekh anda le kolaver či lelas te lipil pe lendar; ta o norodo lăudilas le ando mui o baro.#Cap. 2.47; 4.21. Ioan 9.22; 12.42; 19.38.
14O dindimos kolengo kai pateanas ando Rai, murši thai juwlea, bareolas sa mai but;
15ji oče kă ankalavenas le nasfalen orta pel uliçî, thai thonas le pel paturea thai andel thana, anda kă, atunčeara kana nakhăla o Petro, barem lesti ušal te nakhăl pa vo iekh anda lende.#Cap. 19.12. Mat. 9.21; 14.36.
16O butimos, sakadea našelas ando Ierusalimo, anda le četăçi dă pašal, thai anenas le nasfalen thai kolen kăznime le duxurendar le jungalendar: thai sa sasteonas.#Marko 16.17, 18. Ioan 14.12.
Le apostolea phandade thai skăpime.
17Ta o baro rašai thai sa kukola kai sas lesa andekhthan, e partida le Sadušeiendi, uštile pherde xoli,#Cap. 4.1, 2, 6.
18thodine le vast pel apostolea, thai šude le ando beči kai sas le.#Luka 21.12.
19Ta khă înjero le Raiehko pîtărdea le udara le bečehkă reate, ankaladea le avri, thai phendea lengă:
20„Jeantar, bešen ando Templo, thai vestin le norodohkă sa le divanuri la čivavakă kadalakă.”#Ioan 6.68; 17.3. 1Ioan 5.11.
21Kana ašundine on kadala divanuri, šute pe kana phaŕadeol o des ando Templo, thai line te sîkaven le norodos. O mai baro le rašango thai kola kai sas lesa, aviline biajukărimahko, tidine o Soboro thai soa phurimios le šeavengo le Israelohko, thai tradine koa beči te anen le apostolen.#Cap. 4.5, 6. Luka 22.4.
22Le aprozea, ka lengo avimos, či arakhline le ando beči. Amboldinisai le thai phendine kadea:
23„O beči arakhleam les phandado sa la grijasa, thai le pîndaren bešlindoi ande pînŕănde kal udara; ta, kana pîtărdeam, či arakhleam khanikas andră.”
24Kana ašundine kadala vorbe, o kăpitano le Templohko thai le raša le mai bară ašiline barune, thai či jeanenas so te patean pa le apostolea thai pa le avimata kadale kărdimasti.#Cap. 4.1.
25Varekon avilo thai phendea lengă: „Dikta kă le manuši, kai šutean le ando beči, bešen ando Templo, thai sîkaven le norodos.”
26Atunči o kăpitano le Templohko teleardea le aprozănça thai andea le; ta na la zorasa, kă daranas te na aven mudarde le baŕănça le norodostar.#Mat. 21.26.
27Pala so andine le, thodine le angloa Soboro. Thai o baro rašai pušlea le kadea:
28„Či mothodeam tumengă ame sa la zorasa te na sîkaven le norodos ando Anau kadoa? Thai dikta kă tume pherdean o Ierusalimo le sîkaimasa tumarăsa, thai roden te šuden pe amende o rat kodole manušehko.”#Cap. 4.18. Cap. 2.23, 36; 3.15; 4.18; 7.52. Mat. 23.35; 27.25.
29O Petro thai le apostolea le kolaver, čeačio phendimos, phendea lengă: „Trăbul te ašunas mai but le Devllestar dă sar le manušendar!#Cap. 4.19.
30O Dell amară daddengo juvindisardea le Isusos, saves tume mudardean Les, Karfidindoi Les po kašt.#Cap. 3.13, 15; 10.39; 13.29; 22.14. Gal. 3.13. 1Pet. 2.24.
31Kadale Isusos, o Dell vazdea Les Pehka zorasa, thai kărdea Les Rai thai Skăpitorii, kaste del le Israelos o kăimos thai o iertimos le bezexăngo.#Cap. 2.33, 36; 3.15; 3.26; 13.38. Mat. 1.21. Luka 24.47. Efes. 1.7. Filip. 2.9. Kol. 1.14. Evr. 2.10; 12.2.
32Ame sam martorea kadale buteangă, sar i o Sfînto Duxo, saves muklea Les o Dell kolengă kai ašunen Lestar.”#Cap. 2.4; 10.44. Ioan 15.26, 27.
Le apostolengă del pe lengă drom.
33Kana ašundine on kadala divanuri, šinenas le koa illo thai dine pe duma te mudarăn le.#Cap. 2.37; 7.54.
34Ta khă Fariseo bušlino Gamalielo, khă sîkaditorii la Krisako, jeanglino sa le norodostar, ušti'lo ande pînŕănde ando Soboro thai mothodea te ankalaven xançî avri le apostolen.#Cap. 22.3.
35Pala kodea phendea lengă: „Manušale Israieliçîna, len mišto godi so sî tume ando gîndo te kărăn kadale manušengă.
36Kă na dă but dičilo o Teuda, kai phenelas kă o sî varekon, thai ka sao astardi le kam štar šella manuši. O sas mudardo, thai sa kola kai avilesas pala leste, sas phardine thai xasardine.
37Pala leste avilo o Galaliano, po čiro le ramaimahko, thai çîrdea but norodo ande pesti rig: gălotar i o, thai sa kola kai avile pala leste sas phaŕadine.
38Thai akana, me phenau tumengă: „Na mai năkăjin le manušen kadalen, thai mekăn le pačeasa! Kana o zumaimos or e buti kadea sî katal manuši, xasaola;#Pilde 21.30. Is. 8.10. Mat. 15.13.
39ta kana sî kata o Dell, našti xasarăn les. Te na pomenin tume kă marăn tume le Devllesa.”#Cap. 7.51; 9.5; 25.9. Luka 21.15. 1Kor. 1.25.
40On ašundine lestar. Thai, pala so akhardine le apostolen, thodine te marăn le ăl ŕaiança, atărdearde le te den duma ando Anau le Isusohko, thai dine le drom.#Cap. 4.18. Mat. 10.17; 23.34. Marko 13.9.
41On telearde angloa Soboro, thai bukurisai le kă sas vreničime te aven lajaimahko, anda o Anau Lehko.#Mat. 5.12. Rom. 5.3. 2Kor. 12.10. Filip. 1.29. Evr. 10.34. Iak. 1.2. 1Pet. 4.13, 16.
42Thai ande sako des, ando Templo, thai khără, či atărdeonas te sîkaven le manušen, thai te vestin E LašiVestea le Isus Kristososti.#Cap. 2.46; 4.20, 29.
Currently Selected:
Kărdimata Le Apostolengă 5: KALD2020
Highlight
Share
Copy
Want to have your highlights saved across all your devices? Sign up or sign in
Bible translated into Kalderash Romani by Luminita Cioaba 2020, from the Cornilescu version of the Romanian Bible. Rights are held by the British and Foreign Bible Society and the Interconfessional Bible Society of Romania.
