متى 25
25
ڒْمَعْنَا ن عشْرَا ن ثعْزْرِيِين
1ڒْمُلْك وجنَّا اَمشْنَاو شَان عشْرَا ن ثعْزْرِيِين إِݣ ييْسِين ڒقْنَاذڒ، فّْغنْت اَذ ڒقَّانْت مُوْڒَاي. 2خمْسَا إِذْسنْت ذ ثِفْغَاڒ، خمْسَا إِذْسنْت ذ ثِيمِيغِيسِين. 3ثِفْغَاڒ وَامِي يْسِينْت ڒقْنَاذڒ، وَار يْسِينْت بُو زّشْت ذ زِّيَادَا. 4ثِيمِيغِيسِين نِثنْتِي يْسِينْت اَكِسنْت زِّيَادَا ن زّشْت ذِي ثْزيَّاثِين. 5ئِعْظڒ مُوْڒَاي وَار د يُوْسِي شَا، نِثنْتِي ؤُحْڒنْت طّْصنْت مَارَّا إِذْسنْت.
6غَار ڒْوسْط ن دْجِيڒث، سْڒِينْت إِ ؤُڒَاغِي يقَّار اَقَا مُوْڒَاي يُوْسَا-د، فّْغنْت اَث ثڒْقَانْت! 7كَّرنْت ثعْزْرِيِين نِّي سرْغنْت ڒقْنَاذڒ. 8ثِفْغَاڒ نَّانْت إِ ثِيمِيغِيسِين: ؤُشنْت-اَنغ شْوَايْت ن زّشْت ڒَاحقَّاش ڒقْنَاذڒ نّغ عْڒَاين اَذ خْسِين. 9أَرِّينْت خَاسنْت ثِيمِيغِيسِين نَّانْت-اَسنْت: لَّا، مِينْزِي وَار ذَانغ يتْقدِّي شَا إِ نشِّين ذ كنِّينْت. رُوْحنْت غَار ثْحَانت سْغنْت-يد مِين غَا ثحْذَاجنْت. 10وَامِي رُوْحنْت ثفْغَاڒ اَذ سْغنْت زّشْت، ئِخْضڒ-د مُوْڒَاي. ؤُذْفنْت اَكِذس ثِنِّي يسْوجْذن غَار ڒْفَارْح، ثْبلّع ثوَّارْث.
11منْبَعْد ؤُسِينْت-يد ثفْغَار نَّانْت-اَس س جّْهذ: آ سِيذِي آ سِيذِي، رْزم-اَنغ ثَوَّارْث! 12يَارَّا خَاسنْت مُوْڒَاي ينَّا-ٱسنْت: أَقَا تسْڒَانْت ڒْحَقّ: نش وَار كنِّينْت سِّينغ شَا.
13إِذن، ئِڒِيم عْلَابَال ڒَاحقَّاش وَار ثسِّينم ؤُڒَا ذ نْهَار نِّي ؤُڒَا ذ ثْسَعَّات نِّي.
ڒْمَعْنَا ن ثْڒَاثَا ن يخدَّامن
14 نْهَار نِّي اَذ يِيڒِي اَم يِجّن ن سِّيّد يرزُّو اَذ يسَفر. ئِڒَاغَا-د إِ يخدَّامن نّس يكلّف-يثن خ وَاݣْڒَا نّس. 15يُوْشَا-ٱسن عْلَاحْسَاب مِين ؤُمِي زمَّرن. يْجّن يَوْشَا-ٱس خمْسَاڒَاف ن ڒُوْزْنَاث ن نُّقَارْث. يْجّن يُوْشَا-ٱس اَڒفَاين. يْجّن يُوْشَا-ٱس اَڒَاف. سّنِّي يرُوْح نتَّا اَذ يسَفر. 16ڒخْدّنِّي يكَّر ونِّي ؤُمِي يُوْشَا خمْسَاڒَاف ن ڒُوْزْنَاث يݣَّا زَّايْسنْت تِّجَارَا، يرْبح خمْسَاڒَاف نّغْنِي. 17أَمنِّي يݣَّا ؤُڒَا ذ ونِّي ؤُمِي يُوْشَا اَڒفَاين، يرْبح اَڒفَاين نّغْنِي. 18وَلَكِن ونِّي ؤُمِي يُوْشَا اَڒَاف ن ڒُوْزْنَاث، ئِرُوْح نتَّا يغْزَا ذِي ثْمُوْرْث يسْنُوْفَّر تْمنْيَاث ن سِيذس.
19وَامِي ثعْذُو خَربِّي ن ڒْوقْث، ئِذْوڒ-د سِيذِيثْسن يتݣّ اَكِذْسن ڒحْسَاب. 20ئِقَارّب-د ونِّي ؤُمِي يُوْشَا خمْسَاڒَاف ن ڒُوْزْنَاث، يَرْنِي-يَاس اَكِذْسنْت خمْسَاڒَاف نّغْنِي. ينَّا-ٱس إِ سِيذس: آ سِيذِي، ثُوْشِيذ-اَيِي شك خمْسَاڒَاف ن ڒُوْزْنَاث، نش ؤُوِيغ-د خمْسَاڒَاف نّغْنِي. 21ينَّا-ٱس سِيذس: ثݣِّيذ مْلِيح آي اَخدَّام اَصبْحَان، شك ذَايك ڒَامَان. ذَايك ڒَامَان خ ذْرُوْس، ڒخُّو اَش كلّْفغ خ وَاطَّاس. أَذف اَذ تْفَرْحذ اَك سِيذش.
22عَاوذ يقَارّب-د وخدَّام نِّي ؤُمِي يُوْشَا اَڒفَاين ن ڒُوْزْنَاث ينَّا-ٱس إِ سِيذس: آ سِيذِي، ثُوْشِيذ-اَيِي شك اَڒفَاين ن ڒُوْزْنَاث، نش ؤُوِيغ-د اَڒفَاين نّغْنِي. 23ينَّا-ٱس سِيذس: ثݣِّيذ مْلِيح، آي اَخدَّام اَصبْحَان، شك ذَايك ڒَامَان. ذَايك ڒَامَان خ ذْرُوْس، ڒخُّو اَش كلّْفغ خ وَاطَّاس. أَذف اَذ تْفَرْحذ اَك سِيذش.
24ئِقَارّب-د ونِّي ؤُمِي يُوْشَا اَڒَاف ن ڒُوْزْنَاث ينَّا-ٱس إِ سِيذس: آ سِيذِي، نش سّْنغ شك ذ يجّن ن بْنَاذم ثقْسْحذ. ثْمجَّارذ مَانِي وَار ثْزرّْعذ شَا، ثْكسِّيذ مِين وَار تࢲُّوْذ شَا. 25ݣّْوْذغ زَّايك، رُوْحغ سْنُوْفَّرغ تْمنْيَاث نّش ذِي ثْمُوْرْث، أُو اَقَاش تْمنْيَاث نّش.
26ئِنْدق-د سِيذس ينَّا-ٱس: آي اَخدَّام اَمْشُوْم، آي اَفنْيَان! إِيوَا ثسّْنذ بلِّي نش مجَّارغ مَانِي وَار زرّْعغ، كسِّيغ مِين وَار تࢲُّوْغ. 27مَايمِّي وَار ثجِّيذ تْمنْيَاث ينُو غَار يصَرَّافن، أَتَاف نش اَذ د اَسغ اَذ يْسِيغ تْمنْيَاث ينُو ذ ڒفْضڒ اَكِسنْت؟ 28أُوشَا ينَّا-ٱسن إِ يخدَّامن نّس: كّْسم-اَس اَڒَاف ن ڒُوْزْنَاث نِّي إِ وَانِيتَا، اَرْنِيم-ثنْث إِ ونِّي غَار يدْجَا عشْرَاڒَاف. 29وَاه، ونِّي يدْجَان غَارس يتْمَارْنِي-يَاس، أَغَارس يِيڒِي اَطَّاس. ونِّي وَار غَار يدْجِي شَا، يتْوَاكْسِي-يَاس ؤُڒَا ذ مِين غَارس. 30أَخدَّام-أَ إِي ذِي وَار يدْجِي نّْفَع، نْضَرم-ث بَارَّا غَار ثَادْجسْت. ذِنِّي إِي غَا يڒِين يمطَّاون ذ وغࢲَّاࢲ ن ثغْمَاس.
يُوْم لْحِسَاب ذ لْعِقَاب
31خْمِي د غَا يَاس مِّيس ن بْنَاذم س لْعَظَمَا نّس، أَكِذس مَارَّا لْمَلَائِكَاث، أَذ يقِّيم خ لْعَرْش نّس ن لْعَظَمَا. 32أَذ نْجمْعن مَارَّا يوْذَان زَّاثس، أَذ يعْزڒ يوْذَان يجّن زݣ ونّغْنِي اَمشْنَاو مَامّش ونِّي يَروّْسن ڒبْهَايم يتعْزَاڒ يحُوْڒِيْين زِي ثْغَاطِين. 33ئِحُوْڒِيْين اَثن يݣّ خ وفُوْسِي، ثِغَاطِين اَثنْت يݣّ خ وࢲڒْمَاض.
34ڒخْدّنِّي يِنِّي يدْجَان خ وفُوْسِي اَذَاسن يِينِي وزدْجِيذ-أَ: آ يِنِّي إِي ذِي يݣَّا بَابَا لْبَرَكَا، أَرَاحم-د كنِّيو وَرْثم ڒْمُلْك إِي ذَاوم يسوْجذ زݣ وَامِي ثدْجَا دُّنشْت. 35ڒَاحقَّاش ثُوْفِيم-اَيِي دْجُوْزغ ثْسّشم-اَيِي. ثُوْفِيم-اَيِي فُّوْذغ ثْسسّْوم-اَيِي. ثُوْفِيم-اَيِي ذ اَغْرِيب ثْسزْذْغم-اَيِي. 36ثُوْفِيم-اَيِي ذ اَعَرْيَان ثݣِّيم-اَيِي اَرُّوْض. ثُوْفِيم-اَيِي هڒْشغ ثْبدّم اَكِذِي. ثُوْفِيم-اَيِي تْوَاحبّْسغ ثݣِّيم-د غَارِي زِّيَارَا.
37أَث جَاوْبن يصبْحَانن نِّي اَذَاس ينِين: آ سِيذِي، نشِّين مڒْمِي ش نُوْفَا ثدْجُوْزذ، نْسشّ-يش؟ نِغ ثفُّوْذذ، نْسسّو-يش؟ 38مڒْمِي ش نُوْفَا ذ اَغْرِيب، نْسزْذغ-يشك؟ نِغ ذ اَعَرْيَان، نݣَّا-ٱش اَرُّوْض؟ 39مڒْمِي ش نُوْفَا ثْهڒْشذ نِغ ذ اَمحْبُوْس، نُوْسَا-د غَارك؟ 40أَذ د يَاس وزدْجِيذ اَذَاسن يِينِي: أَقَا تسْڒَام ڒْحَقّ: مِين ثݣِّيم إِ يِجّن ن وُوْمَا ذ اَمزْيَان زݣ أَيثْمَا، ثݣِّيم-اَيِي-ت إِ نش.
41ڒخْدّنِّي يِنِّي يدْجَان خ وࢲڒْمَاض اَذَاسن يِينِي ؤُزدْجِيذ: آ يِنِّي ينْعڒ أَربِّـي بعّْذم خَافِي! رُوْحم غَار ثْمسِّي إِي وَار يخسِّين عمَّارْص، ئِسْوجْذن إِ شِّيطَان ذ شَّيَاطِين نّس! 42ڒَاحقَّاش ثُوْفِيم-اَيِي دْجُوْزغ، وَار ذَايِي ثْسشّم شَا. ثُوْفِيم-اَيِي فُّوْذغ، وَار ذَايِي ثْسسّْوم شَا. 43ثُوْفِيم-اَيِي ذ اَغْرِيب، وَار ذَايِي ثْسزْذْغم شَا. ثُوْفِيم-اَيِي ذ اَعَرْيَان، وَار ذَايِي ثݣِّيم بُو وَارُّوْض. ثُوْفِيم-اَيِي هڒْشغ تْوَاحبّْسغ، وَار غَارِي د ثݣِّيم بُو زِّيَارَا!
44أَث جَاوْبن ؤُڒَا ذ يِنِّي يدْجَان خ وࢲڒْمَاض اَذَاس ينِين: آ سِيذِي، نشِّين مڒْمِي ش نُوْفَا ثدْجُوْزذ نِغ ثفُّوْذذ نِغ ذ اَغْرِيب نِغ ذ اَعَرْيَان نِغ ثْهڒْشذ نِغ ثتْوَاحبْسذ أُو نشِّين وَار ش نْعِيون شَا؟ 45أَذ د يَاس وزدْجِيذ اَذَاسن يِينِي: أَقَا تسْڒَام ڒْحَقّ: مِين وَار ثݣِّيم شَا إِ يِجّن ن وُوْمَا ذ اَمزْيَان زݣ أَيثْمَا، وَار ذَايِي ت ثݣِّيم شَا إِ نش. 46أَذ رَاحن يِيْنَا غَار ثْمسِّي إِي وَار يخسِّين عمَّارْص. وَلَكِن يصبْحَانن اَذ رَاحن غَار ثُوْذَارْث ن ڒبْدَا."
Currently Selected:
متى 25: ريف
Highlight
Share
Copy
Want to have your highlights saved across all your devices? Sign up or sign in
