متى 26
26
ئِجّن ن ثمْغَارْث ثݣَّا اَمَان ن لْوَرْذ إِ سِيذِيثْنغ عِيْسَى
1وَامِي يكمّڒ عِيْسَى اَوَاڒ نِّي ينَّا-ٱسن إِ يمحْضَارن نّس: 2"ثسّْنم بلِّي ڒْعِيذ اَمقّْرَان ن أَيث-إِسْرَائِيل يقِّيم-اَس يُوْمَاين. ذَايس إِي غَا يتْوَاسلّم مِّيس ن بْنَاذم اَذ يتْوَاصلّب."
3سّنِّي مُوْنن اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل ذِي ثدَّارْث ن اَرَّايس ن ڒْفُقَهَا ونِّي ؤُمِي قَّارن قِيَافَا. 4مْشَاوَارن جَارَاسن حمَا اَذ طّْفن عِيْسَى س ثحْرَايْمِيث اَث نْغن. 5نَّان جَارَاسن: ئِتْخصَّا وَار ث نْتطّف شَا ذِي ڒْعِيذ حمَا شَّعْب وَار يتݣّ شَا لْفَوْضَا.
6عِيْسَى اَقَاث ذݣ وبِيلَاج ن بَيْت عَنْيَا ذِي ثدَّارْث ن يِجّن قَّارن-اَس سِمْعَان بُو-جْذَام. 7ثقَارّب-د غَارس يجّن ن ثمْغَارْث غَارس يجّن ن ثْزيَّات يتْوَاصنْعن س لْمَرْمَر،#26.7 لْمَرْمَر نتَّا ذ يجّن ن نُّوْع وزْرُو يتْشَابَّاه ذِي مَرْمُو. ذَايس اَمَان ن لْوَرْذ يغْڒَان س وَاطَّاس. ثْفرّغ-اَس-ثن خ وزدْجِيف نّس وَامِي يقِّيم غَار مِيسَّا. 8وَامِي ت ࢲْرِين يمحْضَارن مِين ثخْذم، ئِقّس-اَسن ڒْحَاڒ نَّان جَارَاسن: "مَايمِّي قَاع اَضيّع-أَ؟ 9أَتَاف اَمَان نِّي إِڒِي منْزن س وَاطَّاس ن تْمنْيَاث اَذ مُّوْشنْت إِ يمسْعَان!"
10ئِسّن عِيْسَى مِينْخف سِّيوْڒن جَارَاسن ينَّا-ٱسن: "مَايمِّي ثسْخيَّاقم ثَمْغَارْث-أَ؟ أَقَا مِين ذَايِي ثݣَّا ذ اَصبْحَان اَطَّاس. 11ئِمسْعَان اَقَاثن اَكِذْوم إِ ڒبْدَا، نش وَار كِذْوم تْغِيمِيغ شَا إِ ڒبْدَا. 12ثْفرّغ-اَيِي اَمَان-أَ ن لْوَرْذ خ دَّات ينُو حمَا اَذَايِي ثْسوْجذ إِ ثنْضڒْث ينُو. 13أَقَا تسْڒَام ڒْحَقّ: مَانِي مَا يُوْوض لْإِنْجِيل ذِي دُّنشْت-أَ اَمن-ثكْمَاڒ، أَتَاف اَذ عَاوْذن خ ثَمْغَارْث-أَ ذ مِين ذَايِي ثݣَّا اَم يِجّن ن ذِكْرَا خَاس."
14أُوْشَا يكَّر يَهُوْذَا إِسْخَريُوطِي ونِّي زِي ثنْعَاش ن اَرُّسُل يرُوْح نتَّا غَار اَرُّوْيَاس ن ڒْفُقَهَا 15ينَّا-ٱسن: "مِين ذَايِي غَا ثُوْشم مڒَا ؤُوِيغ-اَوم-د عِيْسَى؟" حسْبن-اَس ثْڒَاثِين ن ثْپـيَّاسِين ن نُّقَارْث ؤُشِين-اَس-ثنْت. 16سّنِّي يرزُّو يَهُوْذَا لْفُوْرْصَا مَامّش إِي غَا يݣّ اَذ يزّنْز عِيْسَى.
أَمنْسِي ن ڒْعِيذ اَمقّْرَان ن أَيث-إِسْرَائِيل
17نْهَار اَمزْوَارُو ن ڒْعِيذ ن ثفْضِيرْث قَارّْبن-د يمحْضَارن غَار عِيْسَى نَّان-اَس: "مَانِي ثخْسذ اَذَاش نْسوْجذ اَمنْسِي ن ڒْعِيذ اَمقّْرَان؟"
18ينَّا-ٱسن عِيْسَى: "رُوْحم غَار ثنْدِينْت إِنِيم-اَس إِ فْڒَان قَا ينَّا-يَاش سِيذِيثْنغ ثْسَعَّات ينُو ثِيْوض-د اَكِش إِي غَا عيّْذغ نش ذ يمحْضَارن ينُو." 19يمحْضَارن ݣِّين مِينْخف ثن يوصَّا عِيْسَى سّنِّي سْوجْذن اَمنْسِي ن ڒْعِيذ.
20ثُوْوض-د ثْمدِّيث، ئِقِّيم عِيْسَى اَك ثنْعَاش ن اَرُّسُل نّس غَار مِيسَّا. 21قِّيمن تتّن ينَّا-ٱسن عِيْسَى: "أَقَا تسْڒَام ڒْحَقّ: يجّن زَّايوم اَذَايِي يزّنْز."
22أُوْشَا خيّْقن اَطَّاس بْذَان تْسقْسَان-ث ئِج-يج نَّان-اَس: "وَار يدْجِي بُو ذ نّش، يَاش آ سِيذِي؟"
23ئِنْدق-د عِيْسَى ينَّا-ٱسن: ونِّي إِي كِذِي يسِّيسْنن ذِي طّبْسِي ذ ونِّي إِي ذَايِي غَا يزّنْزن. 24مِّيس ن بْنَاذم اَذَاس يوْقع عْلَاحْسَاب مَامش خَاس يقَّار لْكِتَاب، وَلَكِن يَا ڒفْضِيحث ن بْنَاذم نِّي إِي ث غَا يزّنْزن! حْسن إِ نتَّا مْڒِي وَار د يخْڒِيق شَا."
25أُوْشَا ينَّا-ٱس يَهُوْذَا يعْنِي ونِّي إِي ث غَا يزّنْزن: "وَار يدْجِي بُو ذ نش، يَاش آ سِيذِي؟"
ينَّا-ٱس عِيْسَى: "ذ شك إِي ث ينَّان."
26وَامِي عَاذ تتّن، ئِيْسِي-د اَغْرُوْم يشكَّر أَربِّـي يرْزَا اَغْرُوْم نِّي يُوْشَا-ٱسن-ث إِ يمحْضَارن نّس ينَّا-ٱسن: "يْسِيم-ث شّم-ث، وَا إِݣ يدْجَان ذ دَّات ينُو." 27ييْسِي-د ڒْكَاس يشكَّر أَربِّـي يُوْشَا-ٱسن-ث. ينَّا-ٱسن: "سْوم زَّايس مَارَّا إِذْوم. 28ڒْكَاس-أَ ذَايس يذَامّن#26.28 ئِذَامّن نتَّا ذ دّم. ن ڒْعَهذ، يعْنِي ذ يذَامّن ينُو إِي غَا يَازّْڒن عْلَاحْسَاب اَطَّاس ن يِوْذَان حمَا اَذَاسن يغْفَر أَربِّـي ڒْمُعْصِيَاث نْسن. 29أَقَا قَّارغ-اَوم: زِي سَّا اَڒ ثْسَاونْت وَار سسّغ شَا زݣ وَامَان-أَ ن وضِيڒ حتَّا اَڒ نْهَار نِّي إِي ثن غَا سْوغ اَكِذْوم زِي جْذِيذ ذِي ڒْمُلْك ن بَابَا."
30غنّْجن يجّن ن يِزْڒِي ن ڒْعِيذ، سّنِّي فّْغن رُوْحن غَار وذْرَار ن زِّيتُوْن.
سِيذِيثْنغ عِيْسَى يسَّاوَاڒ خ ونْكَار ن بُطْرُس
31ينَّا-ٱسن عِيْسَى إِ يمحْضَارن نّس: "دْجِيڒث-أَ ثَانِيتَا اَذَايِي ثْسمْحم مَارَّا إِذْوم مِينْزِي يقَّار لْكِتَاب: أَذ ؤُوْثغ ونِّي يرَاسّن يحُوْڒِيْين، كُڒ يجّن زِي ثْحِيمرْث مَانِي غَا يَرْوڒ.#26.31 خْزَر زَكَرِيَا 13:7. 32وَلَكِن خْمِي د غَا كَّرغ زِي ڒْموْث، أَذَاوم يزْوَارغ غَار ثْمُوْرْث ن لْجَلِيل."
33ئِنْدق-د بُطْرُس ينَّا-ٱس: "وَاخَّا اَذَايش غَا سمْحن مَارَّا، نش وَار ذَايش سمْحغ شَا عمَّارْص."
34ينَّا-ٱس عِيْسَى: "أَقَا تسْڒِيذ ڒْحَقّ: ثَا، دْجِيڒث-أَ قْبڒ مَا ٱذ يدّن ؤُيَازِيض اَتَاف اَذَايِي ثنْكَرذ ثْڒَاثَا ن ثْوَاڒَاثِين."
35ينَّا-ٱس بُطْرُس: "نش وَار ش نكَّرغ شَا وَاخَّا اَكِذش إِي غَا مّْثغ." أَمنِّي إِي نَّان مَارَّا يمحْضَارن.
سِيذِيثْنغ عِيْسَى يتْࢲَادْجَا ذݣ وذْرَار ن زِّيتُوْن
36يُوْسَا-د عِيْسَى اَك يمحْضَارن نّس غَار يِجّن ن ومْشَان قَّارن-اَس <ݣَتْسِمَانِي.> ينَّا-ٱسن: "قِّيمم ذَا، نش اَذ رَاحغ ذِيهَا اَذ ࢲَّادْجغ." 37يُوْوِي اَكِس بُطْرُس ذ ثْنَاين ن ثَارْوَا ن زَبَادِي، ئِبْذَا يتْنخْڒَاع يتْخيَّاق. 38ينَّا-ٱسن: "ڒَعْمَر ينُو عْڒَاين اَذ يدُّوْقّز س لْحُزن. قِّيمم ذَا ثْفَاقم اَكِذِي." 39ئِبعّذ خَاسن شْوَايْت، ئِسجّذ غَار ثْمُوْرْث يبْذَا يتتَّار إِ أَربِّـي ينَّا: "آ بَابَا، مڒَا مُمْكِن سْبعّذ-يث خَافِي ڒْكَاس-أَ ن ڒَعْذَاب. مَاشِي مَامش خْسغ نش؛ لَّا، مَامش يخس ڒْخَاضَر نّش شك."
40ئِذْوڒ غَار يمحْضَارن-أَ يُوْفِي-ثن طّْصن، ينَّا-ٱس إِ بُطْرُس: "مَا وَار ثْزمَّرم شَا اَكِذِي ثْفَاقم وَاخَّا ذ يجّن ن ثْسَعَّات وَاهَا؟ 41إِڒِيم عْلَابَال ࢲَّادْجم حمَا وَار تِيذْفم شَا ذِي ڒمْحَاين. ؤُڒ ن بْنَاذم يوْجذ وَلَكِن دَّات نّس ثضْعف." 42ئِبعّذ خَاسن ثْوَاڒَا وِيس ثْنَاين، ئِتَّار إِ أَربِّـي ينَّا: "آ بَابَا، مڒَا ڒْكَاس-أَ ن ڒَعْذَاب وَار خَافِي ثسْبعّْذذ شَا سْوِيغ-ث، أَتَاف اَذ يِيڒِي مِين يخس ڒْخَاضَر نّش."
43ئِذْوڒ-د عَاوذ غَارْسن يُوْفِي-ثن طّْصن ڒَاحقَّاش يغلّب خَاسن يِيضص. 44ئِبعّذ خَاسن عَاوذ، يࢲُّودْج ثْوَاڒَا وِيس ثْڒَاثَا ينَّا مَامش ينَّا قْبڒ.
45ئِذْوڒ-د غَار يمحْضَارن-أَ ينَّا-ٱسن: "عَاذ ثطّْصم، عَاذ ثْريّْحم؟ صَافِي، بَرَكَا! أَقَا ثُوْوض-د ڒْوقْث نِّي إِي ذِي غَا يتْوَاسلّم مِّيس ن بْنَاذم غَار يفَاسّن ن يِنِّي يعصَّان. 46كَّرم أَ نُوْيُوْرم، قَا ونِّي إِي ذَايِي غَا يزّنْزن اَقَاث يُوْسَا-د."
أَيث-إِسْرَائِيل ذ يرُوْمَانِيْين تطّْفن سِيذِيثْنغ عِيْسَى
47يَالَّاه عِيْسَى يسَّاوَاڒ يُوْوض-د يَهُوْذَا، ئِجّن زِي ثنْعَاش نِّي ن اَرُّسُل نّس. يُوْوِي-د اَكِذس ڒْغَاشِي اَطَّاس يْسِين ڒسْيُوْف ذ يدبُّوْزن. سّكّن-ثن-د اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل. 48ونِّي إِي ث غَا يزّنْزن يعْنِي يَهُوْذَا قْبڒ تُوْغَا يتَافق اَكِذْسن خ يِجّن ن لْعَلَامَا ينَّا-ٱسن: ونِّي خف غَا سدْجْمغ ذ ونِّي إِي خف ثْرزُّوْم، طّْفم-ث." 49ڒخْدّنِّي يقَارّب يَهُوْذَا غَار عِيْسَى ينَّا-ٱس: "سَّلَام آ سِيذِي." أُوْشَا يسدْجم خَاس.
50ينَّا-ٱس عِيْسَى: "آي اَمدُّوْكڒ، مِينْغَار د ثُوْسِيذ اݣّ-يث." أُوْشَا قَارّْبن-د غَار عِيْسَى حرْثن خَاس، طّْفن-ث.
51ئِكَّر-د يِجّن زݣ يِنِّي ذِنِّي يدْجَان اَك عِيْسَى يسْوِيزّذ يجْبذ-د سِّيف، يُوْوْثَا زَّايس يسْمغ ن اَرَّايس ن ڒْفُقَهَا يقسّ-اَس اَمزُّوْغ. 52ينَّا-ٱس عِيْسَى: "أَرّ سِّيف نّش غَار ومْشَان نّس، ڒَاحقَّاش مَارَّا يِنِّي يكسِّين سِّيف تْمتَّان س سِّيف. 53مَا تْغِير-اَش وَار زمَّرغ اَذ تَّارغ إِ بَابَا اَذَايِي د يسّكّ ڒخُّو كْتَار زِي ثنْعَاش ن لْجُيُوْش ن لْمَلَائِكَاث؟ 54وَلَكِن مَامّش إِي غَا يكمّڒ وَاوَاڒ إِي ينَّا سِيذِي أَربِّـي بلِّي مَانَايَا يتْخصَّا اَذ يوْقع اَمُّو؟"
55ڒخْدّنِّي ينَّا-ٱسن عِيْسَى إِ يِوْذَان نِّي: "مَا تْغِير-اَوم قَا نش ذ لْمُجْرِم وَامِي د ثيْسِيم ڒسْيُوْف ذ يدبُّوْزن حمَا اَذَايِي ثطّْفم نِغ؟ تُوْغَا تْغِيمِيغ مْكُڒ نْهَار ذِي ثمْزِيذَا ثَمقّْرَانْت، سڒْمَاذغ ذِنِّي وَار ذَايِي ثطِّيفم شَا. 56وَلَكِن مَارَّا مَانَايَا يوْقع حمَا اَذ يكمّڒ مِين يُوْرِين ذِي لْكُتُب ن لْأَنْبِيَا." أُوْشَا سمْحن ذَايس مَارَّا يمحْضَارن نّس اَروْڒن.
سِيذِيثْنغ عِيْسَى زَّاث إِ لْحُكَّام ن أَيث-إِسْرَائِيل
57يِنِّي يطّْفن عِيْسَى ؤُوِين-ث غَار اَرَّايس ن ڒْفُقَهَا قَّارن-اَس قِيَافَا. مُوْنن اَكِذس يمقّْرَانن ن أَيث-إِسْرَائِيل ذ يمْسڒْمَاذن ن شَّرِيعَا. 58ئِذْفَار-يث بُطْرُس زِي ڒݣّْوَاج، يُوْذف غَار ڒمْرَاح ن ثدَّارْث ن اَرَّايس ن ڒْفُقَهَا. يُوْذف يقِّيم ذِي ڒمْرَاح اَك يعسَّاسن حمَا اَذ يࢲر مِين غَا يوقْعن.
59أَرُّوْيَاس ن ڒْفُقَهَا ذ مَارَّا جْمَاعث ن لْحُكَّام ن أَيث-إِسْرَائِيل رزُّوْن ؤُو غَا يشهْذن ࢲُّوْر خ عِيْسَى حمَا اَث نْغن. 60وَار ؤُفِين شَا مِينْخف رزُّوْن وَاخَّا اَطَّاس إِي خَاس يشهّْذن ࢲُّوْر. منْبَعْد حْضَارن-د ثْنَاين 61نَّان: "أَرْيَاز-أَ ينَّا: زمَّرغ اَذ هذْمغ ثَمْزِيذَا ثَمقّْرَانْت ن أَربِّـي، أَت بْنِيغ ذِي ثڒْتِيَّام."
62أُوْشَا يبدّ اَرَّايس ن ڒْفُقَهَا ينَّا-ٱس إِ عِيْسَى: مَا وَار ثقَّارذ وَالُو شك؟ مِين خَاش شهّْذن يِوْذَان-أَ؟"
63ئِقِّيم عِيْسَى يسْقَر وَار ذَاس يِينِّي وَالُو. أُوْشَا ينَّا-ٱس اَرَّايس نِّي: "تتَّارغ زَّايش اَذَانغ ثجَّادْجذ س أَربِّـي يدَّرن حمَا اَذَانغ ثِينِيذ: مَا شك ذ لْمَسِيح، ذ مِّيس ن أَربِّـي؟"
64ينَّا-ٱس عِيْسَى: "أَقَا ثنِّيذ-ث شك. إِنَّمَا، أَقَا قَّارغ-اَوم: زِي سَّا اَڒ ثْسَاونْت اَذ تࢲرم مِّيس ن بْنَاذم يقِّيم خ وفُوْسِي ن لْقَوِي. أَث ثࢲرم عَاوذ يهوَّا-د اَك وسيْنُو ن وجنَّا."
65ڒخْدّنِّي اَرَّايس نِّي ن ڒْفُقَهَا يغَرص اَرُّوْض خ يِيخف نّس ينَّا-ٱسن: "مَا ثسْڒِيم-اَس يقَّار لْمُنْكَر خ سِيذِي أَربِّـي؟ وَار نحْذِيج بُو ڒشْهُوْذ! 66مِين ذَاوم يمظْهَارن؟"
ندْقن-د نَّان: "وَانِيتَا يسْذَاهدْج ڒْموْث!"
67ڒخْدّنِّي سُّوْسُوْفن خَاس خ وغمْبُوْب شَّاثن-ث س ڒْپُـوْنْيَاث. ڒبْعَاض زَّايسن تْسقَّاڒن-ث، 68قَّارن-اَس: "إِيوَا آ نَّبِي لْمَسِيح، سّن ؤُو ش يُوْوْثِين زَّايْنغ!"
بُطْرُس ينكَّر سِيذِيثْنغ عِيْسَى
69بُطْرُس يقِّيم غَار بَرَّا ذِي ڒمْرَاح. ثْقَارّب غَارس يجّن ن ثْخدَّانْت ثنَّا-ٱس: "ؤُڒَا ذ شك ثدْجِيذ اَك عِيْسَى زِي لْجَلِيل."
70ئِنْكَر بُطْرُس زَّاث إِ يِوْذَان نِّي مَارَّا ينَّا-ٱس: "وَار سِّينغ شَا مِينْخف ثسَّاوَاڒذ!"
71ئِفّغ بُطْرُس يرُوْح طَّارْف ن ثوَّارْث ن ڒمْرَاح. ثࢲْرِي-ث يجّن ن ثْخدَّانْت نّغْنِي ثنَّا-ٱسن إِ يِنِّي يحْضَارن ذِنِّي: "أَرْيَاز-أَ يتِيڒِي اَك عِيْسَى زِي نَاصِرَا!"
72ئِنْكَر بُطْرُس عَاوذ ينَّا-ٱسن: "أَذَاوم جَّادْجغ، أَرْيَاز-أَ وَار ث سِّينغ شَا."
73منْبَعْد شْوَايْت قَارّْبن-د غَار بُطْرُس يِنِّي يحْضَارن ذِنِّي نَّان-اَس: "شك ذ يجّن زَّايسن، وَار ذَايس بُو شّكّ. تْوَاعقْڒذ غِير ذݣ وَاوَاڒ نّش."
74ئِكَّر بُطْرُس يبْذَا يتْحَرَّام يخف نّس يتْجَادْجَا يقَّار-اَسن: "نش اَرْيَاز-أَ وَار ث سِّينغ شَا!" ڒخْدّنِّي يدّن ويَازِيض. 75ذِنِّي يفكَّر-د بُطْرُس اَوَاڒ نِّي ن عِيْسَى وَامِي ذَاس ينَّا: قْبڒ مَا ٱذ يدّن ويَازِيض اَتَاف اَذَايِي ثنْكَرذ ثْڒَاثَا ن ثْوَاڒَاثِين. ئِفّغ غَار بَارَّا يرُو يمطَّاون ذ يمدْجَاحن اَطَّاس.
Currently Selected:
متى 26: ريف
Highlight
Share
Copy
Want to have your highlights saved across all your devices? Sign up or sign in
Free Reading Plans and Devotionals related to متى 26
The Gospel of Matthew
Holy Week Reading and Listening Plan
Matthew | Reading Plan + Study Questions
