ڒخذايم 7
7
سْتِيفَان يتْوَاجَه جْمَاعث ن لْحُكَّام ن أَيث-إِسْرَائِيل
1ئِكَّر اَرَّايس ن ڒْفُقَهَا ينَّا-ٱس إِ سْتِيفَان: "مَا ذ صَّح مَانَايَا؟"
2ينَّا-ٱسن سْتِيفَان: "آي أَيثْمَا! آ يِنِّي يمْغَارن! صنّْطث غَاڒِي. وَامِي تُوْغَا يدْجَا جدِّيثْنغ بْرَاهِيم ذِي ثْمُوْرْث نِّي ن مِيسُوْبُوْطَامْيَا قْبڒ مَا ٱذ يزْذغ ذِي ثنْدِينْت ن حَارَان، ئِمظْهَار-اَس-د أَربِّـي لْعَظِيم 3ينَّا-ٱس: كَّر، فّغ شك سَّا زِي ثْمُوْرْث-أَ نّش، اجّ ڒحْبَاب نّش رُوْح غَار ثْمُوْرْث نِّي إِي ذَاش د غَا سظْهَارغ.
4ئِكَّر بْرَاهِيم يُوْيُوْر زِي ثْمُوْرْث نِّي ن يكَلْدَانِيْين، يعْنِي مِيسُوْبُوْطَامْيَا، ئِرُوْح يزْذغ ذِي ثنْدِينْت ن حَارَان. وَامِي يمُّوْث بَابَاس، يُوْوِي-ث أَربِّـي غَار ثْمُوْرْث-أَ مَانِي ثزدّْغم رخُّو. 5وَلَكِن وَار ذَاس يُوْشِي ؤُڒَا ذ شّْبَار زِي ثْمُوْرْث-أَ اَث يمْلك. ذِي ڒْوقْث نِّي بْرَاهِيم وَار غَارس بُو ثَارْوَا. وَاخَّا اَمنِّي يوْعذ-يث أَربِّـي ينَّا-ٱس: أَذَاش ؤُشغ ثَمُوْرْث-أَ اَذ تِيڒِي نّش شك ذ دُّوْرِّيث نّش منْبَعْد إِ شك.
6أَمُّو إِي ذَاس ينَّا أَربِّـي: دُّوْرِّيث نّش اَذ عِيشن ذِي ثْمُوْرْث ن مِيدّن، أَذ يڒِين ذ يسمْغَان#7.6 ئِسمْغَان نِثْنِي ذ لْعَبِيد. ن أَيثْبَاب ن ثْمُوْرْث نِّي، أَخَاسن سّكّن تَمَارَا اَرْبعمِيَّا يسݣّْوُوْسَا. 7وَلَكِن أَربِّـي يقَّار: اَذ عَقْبغ يوْذَان ن ثْمُوْرْث نِّي إِي ثن يݣِّين ذ يسمْغَان، منْبَعْد اَذ فّْغن سّنِّي دُّوْرِّيث نّش اَذ تِيڒِي عبّْذن-اَيِي ذݣ ومْشَان-أَ.#7.7 أَمْشَان-أَ يخس اَذ يِينِي ثَمُورْث ن أَيث-إِسْرَائِيل.
8فَا أَربِّـي يُوْشَا-ٱس ڒْعَهذ نِّي ن طَّهَارث إِ بْرَاهِيم. بْرَاهِيم يجَّا-د إِسْحَاق، ئِطهَّار-يث نْهَار وِيس ثْمنْيَام. إِسْحَاق يجَّا-د يعْقُوْب. يعْقُوْب يجَّا-د ثنْعَاش ن ڒجْذُوْذ نّغ. 9ڒجْذُوْذ نّغ حسّْذن ؤُمَاثْسن يُوْسف، زّنْزن-ث اَذ يذْوڒ ذ يسْمغ ذِي مِصْرَا. وَلَكِن أَربِّـي اَقَاث اَكِذس، 10ئِفكّ-يث زِي مَارَّا تَمَارَا نّس. يُوْشَا-اَس لْحِكْمَا، ئِسْعِيزّ-يث غَار فِيرْعُوْن يعْنِي اَزدْجِيذ ن مِصْرَا. ئِݣِّي-ث فِيرْعُوْن اَذ يحْكم خ مِصْرَا ذ ڒقْصَار نّس يكْمَاڒ.
11ثُمَّا يوْقع بُوْهيُّوْف ذِي مَارَّا ثِمُوْرَا ن مِصْرَا ذ كَنْعَان. ثكَّا خَاسن تَمَارَا ذ ثَمقّْرَانْت، ڒجْذُوْذ نّغ وَار ؤُفِين مِين غَا شّن. 12وَامِي يسْڒَا يعْقُوْب مِصْرَا ذَايس ذِنِّي يرْذَان، ئِسّكّ ڒجْذُوْذ نّغ ذِنِّي ثْوَاڒَا ثَمزْوَارُوْت. 13وَامِي رُوْحن ذِنِّي ثْوَاڒَا وِيس ثْنَاين، ينَّا-ٱسن يُوْسف إِ اَيثْمَاس اَقَا نش ذ ؤُمَاثْوم يُوْسف، ڒخْدّنِّي عقْڒن-ث. سّنِّي إِݣ يسّن فِيرْعُوْن ڒحْبَاب ن يُوْسف. 14يُوْسف يسّكّ اَذ د اَوِين بَابَاس يعْقُوْب ذ ڒحْبَاب نّس، ذَايْسن خمْسَا أُو سبْعِين إِذْسن. 15ئِهْوَا-د يعْقُوْب غَار مِصْرَا مَانِي يمُّوْث نتَّا ذ ڒجْذُوْذ نّغ. 16مّيْسِين-د سّنِّي ؤُوِين-ثن غَار ثْمُوْرْث ن شَكِيم، نضْڒن-ثن ذِنِّي ذݣ ونْضڒ نِّي إِي تُوْغَا يسْغَا بْرَاهِيم س شَان ن نُّقَارْث خ اَيث-حَمُّوْر ذِي شَكِيم.
17ثُمَّا وَامِي د ثْقَارّب ڒْوقْث نِّي إِي ذِي غَا يكمّڒ أَربِّـي اَوَاڒ نّس مِينْزِي تُوْغَا يوْعذ بْرَاهِيم، ئِكْثَر شَّعْب نّغ ذِي مِصْرَا يمَارْنِي-د اَطَّاس. 18ئِمظْهَار-د يجّن ن وزدْجِيذ نّغْنِي ذِي مِصْرَا نتَّا وَار يسِّين شَا يُوْسف. 19ئِخدّع شَّعْب نّغ يسّكّ-يت خ ڒجْذُوْذ نّغ، ئِتݣّ خَاسن بسِّيف بَاش اَذ نْضَرن يسيْمَان نْسن غَار بَارَّا حمَا اَذ مّْثن. 20ذِي ڒْوقْث نِّي يخْڒق-د مُوْسَى، نتَّا ذ اَصبْحَان اَطَّاس. ئِتْوَاربَّا ثڒْت شْهُوْر ذِي ثدَّارْث ن بَابَاس. 21وَامِي ث نْضَرن غَار بَارَّا، ثيْسِي-ث يدْجِيس ن فِيرْعُوْن ثْربَّا-ث ثَارِّي-ث ذ مِّيس. 22أُوْشَا سْڒمْذن-اَس إِ مُوْسَى مَارَّا مِين سّْنن يمِصْرِين، ئِذْوڒ غَارس جّْهذ ذِي مِين يقَّار ذ مِين يتݣّ.
23ثُمَّا وَامِي يكمّڒ اَرْبعِين يسݣّْوُوْسَا، يرزُّو اَذ يفْقذ اَيثْمَاس يعِنِي أَيث-إِسْرَائِيل. 24ئِࢲْرَا يِجّن ن ومِصْرِي يعدّ خ يِجّن ن وئِسْرَائِيلِي، ئِرُوْح نتَّا يذَافع خ ونِّي يتْوَاضڒْمن، ئِنْتَاقم-اَس ينْغَا اَمِصْرِي نّي. 25نتَّا ينْوَا اَيثْمَاس أَيث-إِسرائيل اَذ فهْمن بلِّي اَثن يسنْجم أَربِّـي خ وفُوْس نّس، وَلَكِن نِثْنِي وَار فْهِيمن شَا. 26ثِيوشَّا نّس يُوْفَا ثْنَاين يسْرَائِيلِيْين تْمنْغَان جَارَاسن يخس اَثن يسْمصْڒَاح ينَّا-ٱسن: كنِّيو ذ اَوْمَاثن، مَايمِّي تْعدَّام خ وَايَاوْيَا؟ 27يكَّر-د ونِّي يتْعدَّان، يعَانّ-يث ينَّا-ٱس: ؤُو ش يݣِّين شك ذ اَرَّايس نِغ ذ ڒْقَاضِي خَانغ؟ 28مَا ثْرزُّوْذ اَذَايِي ثنْغذ اَم ثنْغِيذ أَمِصْرِي نِّي ن إِضنَّاظ؟ 29وَامِي يسْڒَا مُوْسَى مَانَايَا، ئِكَّر يَرْوڒ يرُوْح غَار ثْمُوْرْث ن مِدْيَان يعِيش ذِنِّي ذ اَبَرَّانِي. خڒْقن-د غَارس ذِنِّي ثْنَاين ن يحنْجِيرن.
30ثُمَّا وَامِي عْذُوْن اَرْبعِين يسݣُّوُوْسَا، ثْبدّ-د غَارس يجّن ن لْمَلَائِكَا زݣ وحَذُوْق ن ثْمسِّي ثْرقّ ذݣ ؤُخْشَاب#7.30 مَاشِي مَعْرُوْف مِين يعْنَا وخْشَاب-أَ، وَلَكِن يمْكن ذ شَان اَرْبِيع اَم ثَابْغَا نِغ اَم شَان ثْشجَّارْث ثَمزْيَانْت ذَايس يسنَّانن. ذِي صَّحْرَا زَّاث إِ وذْرَار ن سِينَا. 31وَامِي يࢲْرَا مُوْسَى مَانَاينِّي يتْعجّب، ئِقَارّب غَارس اَذ يخْزَر. ئِسْڒَا إِ صُّوْت ن سِيذِي أَربِّـي يقَّار-اَس: 32نش ذ أَربِّـي ن ڒجْذُوْذ نّش، ذ أَربِّـي ن بْرَاهِيم ذ إسْحاق ذ يعْقُوْب. ئِبْذَا مُوْسَى يترْجِيجِي س ثِيݣّْوْذِي وَار يزْعِيم شَا اَذ يخْزَر.
33ينَّا-ٱس سِيذِي أَربِّـي: كّس ثِيسِيڒَا زݣ يضَارن نّش قَا اَمْشَان-أَ مَانِي ثْبدّذ نتَّا مُقدّس. 34أَقَا ࢲْرِيغ ڒَعْذَاب ن شَّعْب ينُو يدْجَان ذِي مِصْرَا، سْڒِيغ إِ يغُوْيَان نْسن اَقَا هْوِيغ-د اَثن سْنجْمغ. ڒخُّو اَرَاح-د شك اَش سّكّغ غَار مِصْرَا.
35مُوْسَى-يَا نْكَرن-ث نَّان-اَس: ؤُو ش يݣِّين شك ذ اَرَّايس نِغ ذ ڒْقَاضِي خَانغ؟ وَلَكِن نتَّا يسّكّ-يث أَربِّـي اَذ يِيڒِي ذ اَرَّايس ذ ونِّي إِي ثن غَا يسْنجْمن. ئِسّكّ-يث أَربِّـي خ وفُوْس ن لْمَلَائِكَا نِّي إِي ذَاس د يمظْهَارن ذݣ ؤُخْشَاب نِّي. 36مُوْسَى-يَا ذ نتَّا إِي ثن يسُوْفْغن س ڒَعْجَايب ذ لْمُعْجِيزَاث إِي يݣَّا ذِي مِصْرَا، ذِي ڒبْحَر اَزݣّْوَاغ، ؤُڒَا ذِي صَّحْرا اَرْبعِين يسݣّْوُوْسَا.
37ذ مُوْسَى-يَا إِي ذَاسن ينَّان إِ أَيث-إِسرائيل: أَذَاوم د يُوْش أَربِّـي يجّن ن نَّبِي زݣ اَيثْمَاثْوم اَم نش. 38ذ نتَّا مُوْسَى إِي يݣُّوْرن اَك جْمَاعث ن أَيث-إِسْرَائِيل إِݣ يمُوْنن ذِي صَّحْرَا. ذ نتَّا مِيكذ ثسِّيوڒ لْمَلَائِكَا خ وذْرَار ن سِينَا ذ ڒجْذُوْذ نّغ. ذ نتَّا إي خف د هْوَان وَاوَاڒن يدَّرن حمَا اَذَانغ ثن يُوْش.
39وَلَكِن ڒجْذُوْذ نّغ ؤُݣِين اَذَاس طَاعن ؤُݣِين اَث قبْڒن، نْوَان ذݣ وُوْڒَاون نْسن اَذ ذوْڒن غَار مِصْرَا. 40نَّان-اَس إِ هَارُون:#7.40 هَارُون نتَّا ذ ومَاس ن سِيذْنَا مُوْسَى. صْنع-اَنغ لْأَصْنَامَاث حمَا اَذ يڒِين ذ أَربِّـيثن نّغ اَثن نيْسِي غَار زَّاث نّغ. وَار نسِّين شَا مَانِيس يكَّا مُوْسَى-يَا إي ذَانغ د يسُوْفْغن زِي مِصْرَا! 41ذِي ڒِيَّام نِّي صنْعن يجّن ن لْأَصْنَام خ تصْوِيرْث ن وينْدُوْز. قدّْمن-اَس دْبِيحث، فَرْحن اَطَّاس خ مِين ݣِّين س يفَاسّن نْسن.
42ئِبعّذ خَاسن أَربِّـي، يجِّي-ثن اَذ عبّْذن يثْرَان ن وجنَّا اَم مَامّش يقَّار لْكِتَاب ن لْأَنْبِيَا:
"آي أَيث-إِسْرَائِيل، وَامِي تْقدَّامم دْبِيحث ذ تضْحِيّث
ذِي اَرْبعِين يسݣّْوُوْسَا نِّي ذِي صَّحْرَا،
مَا ثݣِّيم-اَيِي-ت إِ نش نِغ؟
43لَّا، ثيْسِيم اَقِيضُوْن ن لْأَصْنَام ؤُمِي قَّارن مُوْلُوْخ،
ذ يِيثْرِي ن أَربِّـي نْوم ؤُمِي قَّارن رَفَان.
ذ يِيْنَا ذ لْأَصْنَامَاث إِي ثݣِّيم بَاش اَثن ثْعبْذم!
خ مَانَايَا نش اَخَاوم اَزّْڒغ اَغِيرِين إِ ثْمُوْرْث ن بَابِل."
44غَارْسن غَار ڒجْذُوْذ نّغ ثَمْزِيذَا وقِيضُوْن ن أَربِّـي ذِي صَّحْرا. ئِݣِّي-ت مُوْسَى اَمش إِي ث يُوْمَر أَربِّـي عْلَاحْسَاب شّْكل إِي تُوْغَا يࢲْرَا. 45ثَمْزِيذَا نِّي وقِيضُوْن ثمُّوْش-اَسن إِ ڒجْذُوْذ نّغ. نِثْنِي يْسِين-ت اَكِذْسن اَك يَشُوْع#7.45 سِيذْنَا يَشُوْع تُوْغَا نتَّا ذ اَخدَّام ن سِيذْنَا مُوْسَى، يحْكم خ أَيث-إِسْرَائِيل وَامِي يمُّوْث سِيذْنَا مُوْسَى. غَار ثْمُوْرْث-أَ ن ڒݣْنُوْس إِي خف يُوْزّڒ أَربِّـي زَّاث إِ ڒجْذُوْذ نّغ. ثقِّيم اَمنِّي اَڒ وُوْسَّان ن دَاود. 46دَاود يرْضَا خَاس أَربِّـي ينَّا-ٱس: آ سِيذِي أَربِّـي ن جدِّيثْنغ يَعْقُوْب، اَجّ-اَيِي اَذ ذبَّرغ يجّن ن ومْشَان اَذَايس ثِيڒِي ثْزدِّيغْث نّش. 47وَلَكِن يرُوْح سُلِيمَان يبْنَا نتَّا يجّن ن ثدَّارْث إِ أَربِّـي. 48وَاخَّا اَمنِّي قَا أَربِّـي يُوْعْڒَان وَار يزدّغ شَا ذِي ثُوْذْرِين إِي بنَّان س يفَاسّن. أَمش ينَّا نَّبِي إِشَعْيَا:
49ئِقَّار سِيذِي أَربِّـي اَجنَّا ذ لْعَرْش ينُو،
ذ ثَمُوْرْث مِيخ سْرُوْسِيغ يضَارن ينُو.
مَامّش ثݣَّا ثدَّارْث إِي ذَايِي غَا ثبْنَام؟
مَانِي غَا يِيڒِي ومْشَان ن اَرَّاحث ينُو؟
50مَا وَار يدْجي شَا ذ فُوْس ينُو إِي د يخڒْقن مَانَايَا كُڒْشِي؟
51 ينَّا-ٱسن سْتِيفَان: آ يِنِّي إِي ذِي ثدْجَا ثْغنَّانْت، قَا ؤُڒَاون نْوم ذ يمجَّان نْوم قّْنن!#7.51 س ڒْمَعْنَا ن ثْيُوْنَانِيث يقَّار ؤُڒَاون نْوم ذ يمجَّان نْوم وَار طهَّارن شَا. كنِّيو تݣّم مَامّش إِي ݣِّين ڒجْذُوْذ نْوم، كِيف-كِيف. ڒبْدَا تْعَارَّاضم-اَس إِ أَرُّوْح يقدّْسن. 52مَا ينْجم شَان ن نَّبِي وَار ث عدّْبن شَا ڒجْذُوْذ نْوم؟ نِثْنِي نْغِين ؤُڒَا ذ لْأَنْبِيَا نِّي ن زْمَان إِي ينَّان قَا ٱذ د يَاس ونِّي يدْجَان صَّالِح، يعْنِي ونِّي ڒخُّو ثْخذْعم كنِّيو ثنْغِيم-ث.#7.52 ونِّي خذْعن نْغِين-ث نتَّا ذ سِيذِيثْنغ عِيْسَى. 53ثطّْفم شَّرِيعَا خ وفُوْس ن لْمَلَائِكَاث، كنِّيو وَار زَّايس ثݣَّيم شَا."
ڒْموْث ن سْتِيفَان
54وَامِي سْڒِين جْمَاعث نِّي ن لْحُكَّام ن أَيث-إِسْرَائِيل اَوَاڒ ن سْتِيفَان، خيّْقن غضْبن، تْغࢲَّاࢲن غَارس ثِيغْمَاس. 55سْتِيفَان يشُّوْر س أَرُّوْح يقدّْسن، يخْزَر غَار وجنَّا يࢲْرَا لْعَظَمَا ن أَربِّـي يُوْفَا عِيْسَى يبدّ خ وفُوْسِي ن أَربِّـي. 56ينَّا: "أَقَا تْوَاڒِيغ اَجنَّا ينُوْرْزم ذ مِّيس ن بْنَاذم يبدّ خ وفُوْسِي ن أَربِّـي."
57سْنكَّرن ثْغُوْيّث س جّْهذ بلّْعن خ يمجَّان نْسن، هجْمن خَاس مَارَّا إِذْسن. 58سُوْفْغن-ث بَارَّا إِ ثنْدِينْت بْذَان رجّْمن-ث س وزْرُو. سرْسن يزدْجُوْبَا نْسن غَار يضَارن ن يِجّن ن شَّاب قَّارن-اَس شَاوُل. 59قِّيمن رجّْمن سْتِيفَان س وزْرُو نتَّا ينَّا: "آ سِيذِيثْنغ عِيْسَى، قْبڒ بُوْحْبڒ ينُو!" 60يوْضَا خ يفَادّن ينَّا-ٱس س جّْهذ: "آ سِيذِي، وَار خَاسن حسّب شَا ڒْمُعْصِيّث-أَ!" وَامِي ينَّا مَانَايَا صَافِي يفّغ-يث بُوْحْبڒ نّس.
Currently Selected:
ڒخذايم 7: ريف
Highlight
Share
Copy
Want to have your highlights saved across all your devices? Sign up or sign in
