ڒخذايم 8
8
شَاوُل يتْعدَّاب جْمَاعث ن ڒْمُوْمِنِين
1وَامِي نْغِين سْتِيفَان، ئِجّن قَّارن-اَس شَاوُل اَقَاث ذِنِّي يحْضَار يتَافق اَكِذْسن. نْهَار نِّي بْذَان تْعدَّابن جْمَاعث ن ڒْمُوْمِنِين ذِي ثنْدِينْت ن لْقُدْس. مسْفْرَاقن مَارَّا ڒْمُوْمِنِين رُوْحن غَار جْوَايه ن يَهُوْذِيَا ذ سَامَرْيَا كُڒ يجّن مَانِي يرُوْح، وَار يقِّيم حَدّ ذِي لْقُدْس إِلَّا اَرُّسُل. 2شَان ن يرْيَازن إِي تݣّْوْذن أَربِّـي نضْڒن سْتِيفَان حزْنن خَاس اَطَّاس. 3شَاوُل نتَّا يرزُّو اَذ يقْضَا خ جْمَاعث ن ڒْمُوْمِنِين، يتَاذف زِي ثدَّارث غَار ثدَّارْث يسُوْفُوْغ-د يرْيَازن ذ ثمْغَارِين يتݣّ-يثن ذِي ڒحْبس.
تْبشَّارن س لْإِنْجِيل ذِي ثنْدِينْت ن سَمَارْيَا
4ڒْمُوْمِنِين نِّي يمسْفْرَاقن تْرَاحن زݣ ومْشَان غَار ومْشَان تْبشَّارن س وَاوَاڒ ن أَربِّـي. 5فِيلِيپَّـاس يرُوْح غَار ثنْدِينْت ن سَمَارْيَا، ئِتْحدَّاث إِ يمزْذَاغ نّس س لْمَسِيح. 6سّنِّي مَارَّا ڒْغَاشِي نِّي وَامِي سْڒِين إِ وَاوَاڒ نّس وَامِي ࢲْرِين لْمُعْجِيزَاث نِّي يݣَّا، قِّيمن تْصنَّاطن-اَس مْلِيح غَار مِين يقَّار. 7جْنُوْن يعفَّانن فّْغن زݣ وَاطَّاس ن يِوْذَان سْنكَّرن ثْغُوْيّث س جّْهذ. أَطَّاس ن يزحَّافن ذ يِنِّي ؤُمِي مُّوْثن يضَارن ݣنْفَان. 8فَرّْحن اَطَّاس ذِي ثنْدِينْت نِّي.
9ذِنِّي ذِي ثنْدِينْت نِّي يجّن ن وسحَّار قّارن-اَس سِمْعَان مشْحَاڒ زݣ وَامِي يسْخدَّام سّْحُوْر. ئِسذْهَاش مَارَّا يوْذَان ن أَيث-سَمَارْيَا، يَارَّا يخف نّس ذ اَمقّْرَان. 10تسْڒَان-اَس مَارَّا يوْذَان س ومزْيَان ذ ومقّْرَان نَّان خَاس: "أَرْيَاز-أَ نتَّا ذ جّْهذ نِّي اَمقّْرَان ن أَربِّـي إِي يدْجَان عَظِيم!" 11تسْڒَان-اَس مِنْزِي يسذْهَاش-يثن اَطَّاس ن ڒْوقْث س سّْحُوْر نّس. 12وَلَكِن وَامِي ثن يبشَّر فِيلِيپَّـاس س ڒْمُلْك ن أَربِّـي ذ يِيسم ن عِيْسَى لْمَسِيح ڒخْدّنِّي ؤُمْنن تتْوَاطهَّارن س وَامَان س يرْيَازن ذ ثمْغَارِين. 13سِمْعَان نتَّا س يِيخْف نّس يُوْمن يتْوَاطهَّار س وَامَان. ئِمُوْن اَك فِيلِيپَّـاس يتْعجّب سِمْعَان وَامِي يࢲْرَا لْمُعْجِزَاث ذ لْبُرْهَانَاث ذ ثِمقّْرَانِين إِݣ يتوْقِيعن.
14وَامِي د اَرِّين ڒخْبَر اَرُّسُل ذِي لْقُدْس قَا اَيث-سَامَرْيَا قبْڒن اَوَاڒ ن أَربِّـي، كَّرن سّكّن غَارْسن بُطْرُس ذ يُوْحَنَّا. 15وَامِي ؤُوْضن، تَّارن-اَس إِ أَربِّـي اَذَاسن يُوْش أَرُّوْح يقدّْسن. 16عَاذ وَار د يهْوِي أَرُّوْح ؤُڒَا خ يِجّن زَّايْسن مِينْزِي تُوْغَا تْوَاطهَّارن س وَامَان عْلَاحْسَاب يسم ن سِيذِيثْنغ عِيْسَى أُو صَافِي. 17ثُمَّا بُطْرُس ذ يُوْحَنَّا سرْسن خَافْسن يفَاسّن نْسن أُوْشَا يمُّوْش-اَسن أَرُّوْح يقدّْسن.
18وَامِي سرْسن اَرُّسُل يفَاسّن نْسن خ يِوْذَان يتْوَاڒَا سِمْعَان بلِّي يمُّوْش-اَسن اَرُّوْح يقدّْسن، ئِكَّر سِيمْعَن يرزُّو اَذَاسن يُوْش تْمنْيَاث إِ اَرُّسُل. 19ينَّا-ٱسن: "ؤُشم-اَيي ؤُڒَا ذ نش جّْهذ-أَ حمَا ونِّي إِي خف غَا سرْسغ يفَاسّن ينُو اَذَاس يمُّوْش أَرُّوْح يقدّْسن."
20ئِكَّر بُطْرُس ينَّا-ٱس: "لَّا، جْمع نُّقَارْث نّش قَا اَذ تِيڒِي ذ ثِمسِّي اَكِذش ذِي ڒفْنَا مِنْزِي ثنْوِيذ اَذ تسْغذ لْهَدِيَا ن أَربِّـي س تْمنْيَاث! 21وَار غَارك يتِيڒِي بُو ومْشَان ؤُڒَا ذ ڒْحَقّ ذِي ڒْخذْمث-أَ ڒَاحقَّاش ؤُڒ نّش وَار يدْجِي شَا نِيشَان اَك أَربِّـي. 22تُوْب زِي شَّرّْ نّش، تَّار إِ سِيذِي أَربِّـي يمْكن اَذَاش يغْفَر مِين ثنْوِيذ ذݣ وُوْڒ نّش. 23تْوَارِيغ شك ثشُّوْرذ س ثَارْزُوْݣِي ن ڒحْسذ، شك ذ اَمحْبُوْس ن شَّرّْ."
24ينَّا-ٱس سِمْعَان: "تَّارث اَكِذِي غَار سِيذِي أَربِّـي حمَا وَار ذَايِي توْقِيع ؤُڒَا ذ يجّن ن ڒْحَاجث زِي مِين ثنِّيم."
25وَامِي بُطْرُس ذ يُوْحَنَّا شهْذن خ عِيْسَى بشَّرن نِثْنِي س وَاوَاڒ ن سِيذِي أَربِّـي، كَّرن ذوْڒن غَار لْقُدْس بشَّرن س لْإِنْجِيل ذݣ وَاطَّاس ن ڒدْشُوْرَاث ذِي سَمَارْيَا.
فِيلِيپَّـاس اَك يِجّن ن لْوَزِير ن ثْمُوْرْث ن لْحَبَشَا
26ئِجّن لْمَلَائِكَا ن سِيذِي أَربِّـي ثسِّيوڒ-د غَار فِيلِيپَّـاس ثنَّا-ٱس: "كَّر، رُوْح غَار لْجَنُوْب اكّ خ وبْرِيذ نِّي ن ڒخْڒَا يتَاوِين زِي لْقُدْس غَار غَزَّا." 27ئِكَّر يرُوْح، ئِمْسڒْقَا ذِنِّي اَك يِجّن ن ورْيَاز نتَّا ذ اَحْبَاشِي ذ اَخَاصْيُوْنِي.#8.27 أَخَاصِيُوْنِي يعْنِي س ثعْرَابْث <خَصِيٌّ> أُو <eunuque> س ثْفْرَانْسِيسْت. نتَّا زݣ يمقّْرَانن ن لْمَلِكَا ن لْحَبَشَا قَّارن-اَس نتَّاث كَنْدَاكَا، نتَّا إِݣ يتْكلَّافن خ صّنْدُوْق ن تْمنْيَاث ن لْمَلِكَا نِّي. تُوْغَا يرُوْح غَار لْقُدْس اَذ يعْبذ أَربِّـي، 28ئِذْوڒ-د غَار لْحَبَشَا ينْيَا خ وكَارُّو نّس يقَّار ذِي لْكِتَاب ن نَّبي إِشَعْيَا.
29ينَّا-ٱس أَرُّوْح ن أَربِّـي إِ فِيلِيپَّـاس: "يَالَّاه، مُوْن اَك وكَارُّو-يِين."
30يُوْزّڒ فِيلِيپَّـاس غَار وحَبَاشِي نِّي يتسْڒَا-يَاس يقَّار ذِي لْكِتَاب ن نَّبِي إِشَعْيَا. ينَّا-ٱس: "مَا ثْفهْمذ مِين ثقَّارذ؟"
31ينَّا-ٱس وحَبَاشِي نِّي: "نش، مَامّش غَا ݣّغ اَذ فهْمغ مڒَا وَار ذَايي يسفْهم شَان يِجّن؟ يَالَّاه نيْ-د اَكِذِي ذݣ وكَارُّو-يَا." 32أَقَا لْأَيَاث نِّي إِي يقَّار وحَبَاشِي ذِي لْكِتَاب:
<نتَّا اَمشْنَاو اَحُوْڒِي إِي تَاوِين اَذَاس غَرْصن،
أَمشْنَاو يزْمَار إِي يذْوڒ ذ اَزيْزُوْن
زَّاث إِ ينِّي يتْڒَاسّن ثَاضُوْفْث نّس،
أَمّن وَار يرزّم شَا نتَّا اَقمُّوْم نّس.
33ضڒْمن-ث، كْسِين-اَس ڒحَقّ نّس.
وَار غَارس ثدْجِي دُّوْرِّيث اَخَاس يِيڒِي وَاوَاڒ.
ثُوْذَارْث نّس تْوَاكّس خ ثْمُوْرْث-أَ.>
34ئِسّقْسَا وحَبَاشِي نِّي فِيلِيپَّـاس ينَّا-ٱس: "تتَّارغ زَّايك اَذَايِي ثِينِيذ، مِيخف يسَّاوَاڒ نَّبِي-يَا؟ مَا خ يِيخف نّس نِغ خ شَان حَدّ نّغْنِي؟"
35ئِتْشَرَّاح-اَس فِيلِيپَّـاس، ئِبْذَا-يَاس زِي لْأَيَاث-أَ ذِي لْكِتَاب يتْبشَّار-يث س عِيْسَى. 36ݣُّوْرن ذݣ وبْرِيذ ؤُوْضن غَار شَان وَامَان. ينَّا-ٱس وحَبَاشِي نِّي: "أَقَاش اَمَان مُوْجُوْد، مِين ذَايِي يُوْغن نش وَار تْوَاطهَّارغ شَا س وَامَان-أَ؟"
37{ينَّا-ٱس فِيلِيپَّـاس: "شك مڒَا ثُوْمْنذ س مَارَّا ؤُڒ نّش قَا ثْزمَّرذ اَذ تْوَاطهَّارذ س وَامَان-أَ." يَارَّا خَاس ينَّا-ٱس: "وَاه، نش تَامْنغ بلِّي عِيْسَى لْمَسِيح نتَّا ذ مِّيس ن أَربِّـي."}
38يُوْمَر وحَبَاشِي اَذ سْبدّن اَكَارُّو نِّي. هْوَان س ثْنَاين إِذْسن غَار وَامَان، فِيلِيپَّـاس يطهَّار-اَس إِ وحَبَاشِي نِّي س وَامَان. 39وَامِي د ݣَعّْذن زݣ وَامَان نِّي، أَرُّوْح ن سِيذِيثْنغ يرْفع فِيلِيپَّـاس سّنِّي. وَار يقِّيم شَا وحَبَاشِي نِّي يتْوَاڒَا فِيلِيپَّـاس كْتَار عَاذ، يُوْيُوْر خ وبْرِيذ نّس س ڒفْرَاحث. 40فِيلِيپَّـاس يُوْفَا يخف نّس ذِي ثنْدِينْت ن وَاشْدُوْد، ئِتْرَاح زݣ ومْشَان غَار ومْشَان يتْبشَّار س لْإِنْجِيل ذِي مَارَّا يبِيلَاجن حتَّا ٱڒ وَامِي يُوْوض غَار ثتْدِينْت ن قَيْصَارِيَا.
Currently Selected:
ڒخذايم 8: ريف
Highlight
Share
Copy
Want to have your highlights saved across all your devices? Sign up or sign in
