ڒخذايم 6
6
أَرُّسُل تِيخْضَارن سبْعَا ن صَّحَابَا ذِي ثنْدِينْت ن لْقُدْس
1ذݣ وُوْسَّان نِّي لْعَدَد ن يمحْضَارن يمَارْنِي. ڒْمُوْمِنِين إِي سَّاوَاڒن س لُّغَا ثَيُوْنَانِيث تْشثْشَان زݣ يِنِّي يسَّاوَاڒن لْعِبْرِيَا، قَّارن قَا نشِّين ثَاجَّاڒِين نّغ وَار ذَاسنْت تِيشّن بُو ڒْحَقّ نْسنْت خْمِي فرّْقن لْمُعْوَانَا مْكُڒ نْهَار. 2كَّرن ثنْعَاش نِّي ن اَرُّسُل سْمُوْنن مَارَّا يمحْضَارن نَّان-اَسن: "نشِّين اَرُّسُل مَاشِي مَعْقُوْل أَ نسْمح ذݣ وَاوَاڒ ن أَربِّـي بَاش أَ نفرق لْمُعْوَانَا. 3آي اَيثْمَا، كَّرم اَوِيم-د سبْعَا ن يرْيَازن زَّايْوم اَذ تِيڒِي ثسّْنم-ثن اَقَاثن مْلِيح، أَذ يڒِين شُّوْرن س أَرُّوْح يقدّْسن ذ ڒفْهَامث. نشِّين اَثن نْكلّف س لْمُهِمَّا-يَا 4بَاش نشِّين اَرُّسُل أَ نُوْش ڒْوقْث نّغ إِ ثْࢲَادْجِيث ذ وحدّث."
5ئِعْجب-اَسن ڒْحَاڒ إِ مَارَّا جْمَاعث. كَّرن يخْضَرن يجّن ن ورْيَاز قَّارن-اَس سْتِيفَان، نتَّا يشُّوْر س لْإِيمَان ذ أَرُّوْح يقدّْسن. ئِخْضَرن فِيلِيپَّـاس ذ بْرُوْكُوْرُس ذ نِيكَانُوْر ذ تِيمُوْن ذ پَـرْمِينَاس ذ نِيكُوْلَاس زݣ وَانْطَاكْيَا، تُوْغَا يسْڒم نتَّا ذِي دِّين ن أَيث-إِسْرَائِيل. 6سبْعَا-يَا ن صَّحَابَا قدّْمن-ثن غَار اَرُّسُل، ࢲُّوْدْجن خَاسن سرْسن خَاسن يفَاسّن نْسن بَرَكن-ثن.#6.6 خْمِي ڒْمُوْمِنِين تْࢲَادْجَان خ شَان يِجّن خ شَان سَّبَاب سْرُوْسَان خَاس يفَاسّن، يعْنِي ثَا ذ يجّن ن لْعَلَامَا بلِّي اَذَاس ؤُشن جّْهذ ذ لْبَرَكَا. 7ئِنْتَاشَار وَاوَاڒ ن أَربِّـي، مَارْنِين-د اَطَّاس ن يمحْضَارن ذِي لْقُدْس، ؤُمْنن اَطَّاس ن ڒْفُقَهَا ن أَيث-إِسْرَائِيل زِي لْإِنْجِيل.
طّْفن سْتِيفَان زِي سبْعَا نِّي ن صَّحَابَا يخْضَرن اَرُّسُل
8سْتِيفَان نِّي نتَّا يشُّوْر س لْبَرَكَا ن أَربِّـي ذ جّْهذ، ئِخدّم جَار يِوْذَان لْبُرْهَانَاث ذ لْمُعْجِيزَات ذ ثِمقّْرَانِين. 9كَّرن ڒبْعَاض زِي ثمْزِيذَا ؤُمي قَّارن <لْبَرْتِينُوْن.>#6.9 ئِوْذَان قَّارن بلِّي لْبَرْتِينُون نِثْنِي ذ شَان ن يسْرَائِيلِيْين إِي تُوْغَا حبْسن-ثن اَرُّوْمَانُوس ؤُوِين-ثن غَار ثنْدِينْت ن رُوْمَا. منْبَعْد ضڒْقن-اَسن-د سُوفْغن-ثن زِي رُوْمَا. عقْبن-د غَار إِسْرَائِيل ذ يمُوشَان نّغْنِي. نِثْنِي ذ يسْرَائِيلِيْين ن ثنْدِينْت ن لْقُرِينَا ذ ثنْدِينْت ن إِسْكَنْدَرِيَا ذ ينّغْنِي زِي لْإِقْلِيم ن كِيلِيكْيَا ذ لْإِقْلِيم ن آسْيَا. بْذَان تمْنَاقَارن اَك سْتِيفَان، 10وَلَكِن وَار زمَّرن اَذ قَاوّْمن ڒفْهَامث ذ أَرُّوْح إِي زِي يسَّاوَاڒ.
11كَّرن ؤُشِين اَرّشْوث إِ شَان يرْيَازن بَاش اَذ ينِين قَا نشِّين نسْڒَا إِ سْتِيفَان نتَّا يقَّار اَوَاڒ وَار يحْڒِين خ مُوْسَى ذ أَربِّـي! 12وَامِي سْعصّْبن يوْذَان ؤُڒَا ذ يمقّْرَانن ن أَيث-إِسْرَائِيل ذ يمْسڒْمَاذن ن شَّرِيعا، طّْفن سْتِيفَان ؤُوِين-ث غَار جْمَاعث ن لْحُكَّام ن أَيث-إِسْرَائِيل. 13ؤُوِين-د يوْذَان اَخَاس شهْذن ࢲُّوْر قَّارن "قَا بْنَاذم-أَ يقَّار اَوَاڒ وَار يحْڒِين خ ومْشَان-أَ اَمْقدّس ذ شَّرِيعَا ن مُوْسَى! 14نسْڒَا-يَاس يقَّار بلِّي عِيْسَى زِي نَاصِرَا اَذ يهْذم اَمْشَان-أَ اَذ يبدّڒ لْعَادَاث نِّي إِي ذَانغ د يجَّا مُوْسَى." 15خزَّرن ذَايس ذِي سْتِيفَان مَارَّا يِنِّي إِي ذِنِّي يدْجَان ذِي جْمَاعث ن لْحُكَّام ن أَيث-إِسْرَائِيل، ؤُفِين اَغمْبُوْب نّس اَم وغمْبُوْب ن لْمَلَائِكَا.
Currently Selected:
ڒخذايم 6: ريف
Highlight
Share
Copy
Want to have your highlights saved across all your devices? Sign up or sign in
