ڒخذايم 5
5
أَنَاس ذ ثمْغَارْث نّس سَافُوْرَا
1ئِكَّر يِجّن ن ورْيَاز قَّارن-اَس أَنَاس ثَمْغَارث نّس قَّارن-اَس سَافُوْرَا، ئِرُوْح يزّنْز يجّن ن ثْمُوْرْث نّس. 2يُوْوِي-د تْمنْيَاث، شَا يسْنُوْفَّر-يثنْت غَارس، شَا يُوْوِي-ثنْت يسرْس-يثنت غَار يضَارن ن اَرُّسُل. ثَمْغَارث نّس ثَرْݣب قَاع خ مَانَاينِّي.
3ينَّا-ٱس بُطْرُس: "آي أَنَاس، مَايمِّي ثجِّيذ شِّيطَان اَش يغَرّ يُوْذف ذݣ وُوْڒ نّش ثسْخرّْقذ خ أَرُّوْح يقدّْسن ثسْنُوْفَّرذ شَان ن تْمنْيَاث إِ يِيخف نّش زِي تْمنْيَاث ن ثْمُوْرْث نِّي؟ 4ثَمُوْرث نِّي تُوْغَا ثدْجَا نّش مَارَّا قْبڒ إِي ت غَا ثزّنْزذ؟ وَامِي ثْزّنْزذ ثَمُوْرْث نِّي، تْمنْيَاث نِّي مَارَّا دْجَانْت نّش كُلْشِي." ينَّا-ٱس: "مَايمِّي ثنْوِيذ ذݣ وُوْڒ نّش مَانَايَا؟ قَا وَار يدْجِي ثسْخرّْقذ خ يِوْذَان، قَا ثسخرّْقذ خ أَربِّـي."
5وَامِي يسْڒَا أَنَاس إِ وَاوَاڒ نِّي، ئِوْضَا غَار ثْمُوْرْث يمُّوْث ذِنِّي. ئِوْذَان مَارَّا إِي د يارِّين ڒخْبَار-أَ ݣّْوْذن اَطَّاس. 6ؤُسِين-د شَّبَاب كفّْنن أَنَاس س ڒشْفن ؤُوِين-ث نضْڒن-ث.
7عْذُوْنْت شَان ثْڒَاثَا ن ثْسَعَّاثِين ثُوْسَا-د ثمْغَارْث ن أَنَاس وَار د ثَارِّي بُو ڒخْبَار خ مِين يوقْعن. 8ئِنْدق-د بُطْرُس ينَّا-ٱس: "إِن-اَيي، مَا ٱنِشْتُوْيَا وَاهَا إِي زِي ثزّنْزم ثَمُوْرْث نِّي؟"
ثنَّا-ٱس نتَّاث: "وَاه، أَنِشْتُوْيَا وَاه."
9ينَّا-ٱس بُطْرُس: "مَايمِّي ثْتَافْقم اَذ تْزَعْمم اَذ تࢲرم اَرُّوْح ن سِيذِي أَربِّـي مِين غَا يݣّ؟" ينَّا-ٱس: "يِنِّي ينضْڒن اَرْيَاز نّمْ ذوْڒن-د اَقَاثن غَار ثوَّارْث، أَشم يْسِين ؤُڒَا ذ شم." 10صَافِي ثوْضَا ڒخْدّنِّي، ثمُّوْث ذِنِّي غَار يضَارن ن بُطْرُس. ؤُذْفن شَّبَاب نِّي ؤُفِين-ت ثمُّوْث، يْسِين-ت نضْڒن-ت اَݣ وغزْذِيس ن ورْيَاز نّس. 11مَارَّا جْمَاعث ن ڒْمُوْمِينِين ذ مَارَّا يِنِّي يسْڒِين خ مَانَايَا ݣّْوْذن اَطَّاس.
أَرُّسُل سْݣنْفَان اَطَّاس ن يِوْذَان
12أَرُّسُل تݣّن اَطَّاس ن لْمُعْجِيزَاث ذ لْبُرْهَانَاث جَار يِوذَان، تْمُوْنن مَارَّا ذݣ وسقِّيف ن سُلِيمَان ذِي ثمْزِيذَا ثَمقّْرَانْت. 13زݣ يِوْذَان نِّي إِي وَار يُوْمِينن شَا وَار يزْعِيم حَدّ اَكِذْسن يِيڒِي اَك ڒْمُوْمِنِين وَلَكِن وَاخَّا ٱمنِّي تحْتَارَامن-ثن اَطَّاس. 14مَارْنِين-د اَطَّاس ن يِوْذَان إِي يُوْمْنن زِي سِيذِيثْنغ، زَّايْسن يجّن ن لْعَدَد ن يرْيَازن ؤُڒَا ذ ثمْغَارِين.
15ئِوْذَان سُوْفُوْغن-د يمهْڒَاش نْسن غار زْنَاقِي، سْرُوْسَان-ثن خ ثَاسُّوْث ذ يجَرْثِيڒن حمَا اَخْمِي سّنِّي د غَا يعْذُو بُطْرُس، يمْكن اَذ يڒْقف ڒبْعَاض زَّايْسن س ثِيڒِي نّس. 16تَاسن-د اَطَّاس ن يِوْذَان زِي ڒدْشُوْرَاث إِي يُوْذْسن غَار لْقُدْس، تَاوِين-د يمهْرَاش نْسن ذ يِنِّي يتْعدَّابن جْنُوْن يعفَّانن نِثْنِي تْݣنْفَان مَارَّا.
أَيث-إِسْرَائِيل تْعدَّابن اَرُّسُل
17ئِكَّر اَرَّايس ن ڒْفُقَهَا ذ مَارَّا يِنِّي كِس يدْجَان نِثْنِي زِي ڒْحِزب ن يصَدُّوْقِيْين، حسْذن اَرُّسُل اَطَّاس. 18طّْفن-ثن ݣِّين-ثن ذِي ڒحْبس. 19وَلَكِن س دْجِيرث يجّن ن لْمَلَائِكَا ن سِيذِي أَربِّـي ثرْزم-اَسن ثِوُّوْرَا ن ڒحْبس، ثْسُوْفغ-يثن ثنَّا-ٱسن: 20"رُوْحم بدّث ذِي ثمْزِيذَا ثَمقّْرَانْت، حدّْثم إِ يِوْذَان س مَارَّا اَوَاڒن ن ثُوْذَارْث-أَ ن جْذِيذ." 21ذ مَانَاينِّي إِي ݣِّين، ؤُذْفن غَار ڒفْجَر غَار ثمْزِيذَا ثَمقّْرَانْت بْذَان سڒْمَاذن.
منْبَعْد يرُوْح اَرَّايس ن ڒْفُقَهَا ذ مَارَّا يِنِّي كِس يدْجَان سْمُوْنن-د جْمَاعث ن لْحُكَّام ن أَيث-إِسْرَائِيل يعْنِي مَارَّا يمقّْرَانن نْسن، سّنِّي سّكّن يعسَّاسن ن ثمْزِيذَا اَذ د اَوِين اَرُّسُل زي ڒحْبس. 22وَامِي ؤُوْضن يعسَّاسن نِّي غَار ڒحْبس وَار ثن ؤُفِين شَا ذِنِّي. ذوْڒن-د سِّيوْضن ڒخْبَار، 23نَّان-اَسن: "نُوْفَا ثِوُّوْرَا ن ڒحْبس بلّْعنْت مْلِيح، ذ يعسَّاسن ن ڒحْبس بدّن زَّاث إِ ثوُّوْرَا نِّي. نشِّين وَامِي نُوْذف غَار ذَاخڒ وَار ذِنِّي نُوْفِي حَدّ." 24وَامِي سْڒِين إِ وَاوَاڒ-أَ اَرُّوْيَاس ن ڒْفُقَهَا ذ ومقّْرَان ن يعسَّاسن ن ثمْزِيذَا ثَمقّْرَانْت يسْمض-اَسن ڒَعْجب ذݣ وُوْڒ فكَّرن مَانِي غَا يَاوض مَانَايَا؟
25يُوْسَا-د غَارْسن يجّن ينَّا-ٱسن: "يرْيَازن نِّي إِي ثݣِّيم ذِي ڒحْبس اَقَاثن ذِي ثمْزِيذَا ثَمقّْرَانْت سڒْمَاذن يوْذَان!" 26ڒخْدّنِّي يرُوْح ومقّْرَان نِّي ن يعسَّاسن اَك يمْخَازْنِيْين نّس ؤُوِين-د اَرُّسُل بڒَا لْعُنْف مِينْزِي ݣّْوْذن زِي شَّعب اَثن رجْمن س وزْرُو.
27وَامِي د سِيذْفن اَرُّسُل، سْبدّن-ثن زَّاث إِ جْمَاعث ن لْحُكَّام ن أَيث-إِسْرَائِيل. ينَّا-ٱسن اَرَّايس ن ڒْفُقَهَا: 28"نشِّين نُوْمَر-يكنِّيو وَار ثسڒْمَاذم شَا عْلَاحْسَاب يسم نِّي ن عِيْسَى. وَلَكِن كنِّيو ثْعمَّارم لْقُدْس س تَّعْلِيم نْوم. ثخْسم اَذ تݣّم ڒْموْث ن ورْيَاز-أَ خ يِيڒي نّغ."
29ئِنْدق-د اَرَّسُوْل بُطْرُس ذ اَرُّسُل نّغْنِي نَّان-اَسن: "ئِتْخصَّا-يَانغ أَ نْطَاع إِ أَربِّـي مَاشِي إِ يِوْذَان! 30أَربِّـي ن ڒجْذُوْذ نّغ يسكَّر-د عِيْسَى ونِّي إِي ثنْغِيم كنِّيو ثْرفْعم-ث خ ثحْنَاشْت. 31يرْفع-يث أَربِّـي اَغَارس يݣِّي-ث خ وفُوْسِي نّس بَاش اَذ يحْكم اَذ يسنْجم، أَذ يُوْش تُوْبَا إِ أَيث-إِسْرَائِيل اَذ يغْفَر ڒْمُعْصِيَاث نْسن. 32خ ثْمسْڒَايِين-أَ نْشهّذ خَاسنْت نشِّين ذ أَرُّوْح يقدّْسن، أَرُّوْح-أَ يُوْشِي-ث أَربِّـي إِ يِنِّي ذَاس يتْطَاعَان."
33وَامِي سْڒِين إِ وَاوَاڒَ-أَ خيّْقن غضْبن رزُّوْن اَثن نْغن. 34ئِكَّر-د يجّن ن وفَرِّسِي، نتَّا ذ اَمسڒْمَاذ ن شَّرِيعَا قَّارن-اَس ݣَامْلِيل يتحْتَارَام-يث شَّعْب مَارَّا. ئِبدّ ذِي ڒْوسْط ن جْمَاعث ن لْحُكَّام ن أَيث-إِسْرَائِيل، ئِتَّار-اَسن اَذ سُوْفْغن اَرُّسُل شْوَايْت ن ڒْوقْث غَار بَارَّا. 35ينَّا-ٱسن: "آي يرْيَازن ن أَيث-إِسْرَائِيل، حْضَام يخف نْوم زِي مِين ثخْسم اَذ تݣّم إِ يِوْذَان-أَ! 36قْبڒ إِ وُوْسَّان-أَ، ئِكَّر-د يجّن ن ورْيَاز قَّارن-اَس أَثُوْدَّاس. يَارَّا يخف نّس ذ اَمقّْرَان، ذْفَارن-ث شَان اَرْبعَا مِيَّا ن يرْيَازن. وَلَكِن نْغِين-ث، مَارَّا يِنِّي إي ث يذْفَارن مْسفْرَاقن ذوْڒن ذ وَالُو. 37منْبَعْد إِ ورْيَاز-أَ أَثُوْدَّاس، ئِكَّر-د يجّن نّغْنِي قَّارن-اَس يَهُوْذَا زِي ثْمُوْرْث ن لْجَلِيل ذِي ڒِيَّام ن لْإِحْصَاءْ ن يمزْذَاغ ن أَيث-إِسْرَائِيل. ئِجْمع اَكِذس يجّن ن لْعَدَد ن يِوْذَان، وَلَكِن نْغِين-ث ؤُڒَا ذ نتَّا، يِنِّي إِي ث يذْفَارن كُڒ يجّن مَانِس يكَّا. 38ڒخُّو اَكنِّيو نصْحغ اَذ تْبعّْذم إِ يِوْذَان-أَ، أَثن ثجّم. مِين نوَّان نِغ ذ مِين خدّْمن، مڒَا زَّايْسن وَاهَا اَذ يقْضَا. 39مڒَا مَانَايَا زِي أَربِّـي وَار ثْزمَّرم شَا اَخَاسن ثقْضَام. غَارْوم اَذ تَافم يخف نْوم تْمنْغَام اَك أَربِّـي!"
40سْڒِين يِوْذَان نِّي غَار ݣَامْلِيل. ؤُوِين-د اَرُّسُل عَانّن-اَسن اَعْمُوْذ نَّان-اَسن: "قَا عمَّارْص اَذ تْعَاوْذم اَذ تسِّيوْڒم عْلَاحْسَاب يسم ن عِيْسَى." ڒخْدّنِّي ضڒْقن-اَسن.
41فَرْحن اَرُّسُل وَامِي فّْغن زِي جْمَاعث نِّي ن لْحُكَّام ن أَيث-إِسْرَائِيل، حسّْبن بلِّي غَارْسن لْهِمَّا خ لْإِهَانَا نِّي إِي ذَاسن يوقْعن خ يِيسم ن عِيْسَى. 42قِّيمن مكُڒ نْهَار تْرَاحن غَار ثمْزِيذَا ثَمقّْرَانْت، تْرَاحن زِي ثدَّارْث اَڒ ثدَّارْث سڒْمَاذن تْبشَّارن س عِيْسَى بلِّي نتَّا ذ لْمَسِيح.
Currently Selected:
ڒخذايم 5: ريف
Highlight
Share
Copy
Want to have your highlights saved across all your devices? Sign up or sign in
