ڒخذايم 22
22
1"آي اَيثْمَا آي يمْغَارن، صنّْطث-اَيِي مْلِيح ڒخُّو بَاش اَذ ذَافْعغ خ يِيخف ينُو!" 2وَامِي سْڒِين إِ بُوْلُس يسَّاوَاڒ س لُّغَا لْعِبْرِيَا أُوْشَا قضْعن ڒْحسّ. ينَّا-ٱسن: 3"نش ذ اَئِسْرَائِيلِي خڒْقغ ذِي ثنْدِينْت ن طَرْسُوْس ذِي لْإِقْلِيم ن كِيلِيكْيَا، وَلَكِن نش يْمِيغ ذِي ثنْدِينْت-أَ ذَانِيتَا. غْرِيغ غَار يضَارن ن لْأُسْتَاد ݣَامْليِيل تْوَاربِّيغ س شَّرِيعَا ن ڒجْذُوْذ نّغ مَامّش ذَانغ ثْوصَّا ثَا س ثَا كُڒْشِي. رزُّوْغ اَذ ݣّغ لْوَاجِب اَك أَربِّـي س وُوْڒ ينُو مَامش ثْرزُّوْم اَذ تݣّم كنِّيو مَارَّا نْهَارَا.
4نش تُوْغَا تْعدَّابغ يِنِّي يذْفَارن اَبْرِيذ-أَ حتَّا وَامِي مُّوْثن. طّْفغ يرْيَازن ذ ثمْغَارِين ݣِّيغ-ثن ذِي ڒحْبس. 5أَرَّايس ن ڒْفُقَهَا ذ مَارَّا جْمَاعث ن يمقّْرَانن ن أَيث-إِسْرَائِيل نِثْنِي ذ ڒشْهُوْذ خ مَانَاينِّي. ؤُشِين-اَيِي اَرُّخْصَاث اَثنْت سِّيوْضغ غَار اَيثْمَاثْسن ذِي ثنْدِينْت ن دِمَشق. رُوْحغ ذِنِّي اَذ طّْفغ يوْذَان ن وبْرِيذ-أَ اَثن د اَوِيغ غَار لْقُدْس بَاش اَذ تْوَاعَاقْبن.
6نش تُوْغَا ݣُّوْرغ ذݣ وبْرِيذ قَارّْبغ غَار دِمَشق، تُوْغَا عْڒَاين ذ اَزْين ن نْهَار. عْلَاغَفْلَا ينّض-اَيِي-د يجّن ن نُّوْر يتْشعْشِيع زݣ وجنَّا. 7ؤُضِيغ غَار ثْمُوْرْث سْڒِيغ إِ يِجّن ن ثْمِيجَّا ثقَّار-اَيي-د: آ شَاوُل آ شَاوُل، مَايمِّي ذَايِي تْعدَّابذ؟ 8نِّيغ-اَس نش: مِين ثعْنِيذ شك آ سِيذِي؟ ينَّا-ٱيِي نش ذ عِيْسَى زي نَاصِرَا ذ ونِّي إِي تْعدَّابذ.
9يِنِّي كِذِي يدْجَان ࢲْرِين نُّوْر نِّي وَلَكِن وَار فْهِيمن شَا إِ ثْمِيجَّا ن ونِّي إِي كِذِي د يسَّاوَاڒن.
10نِّيغ-اَس نش: مِين غَا ݣّغ آ سِيذِي؟ ينَّا-ٱيِي سِيذِيثْنغ: كَّر اَذف غَار دِمَشق، أَذَاش يتْوَانَّا ذِنِّي مَارَّا مِين يُوْرِين اَذ تݣّذ.
11نُّوْر نِّي تُوْغَا يتْسقْسِيق يجْهذ خَافِي، ذوْڒغ وَار تْوِيڒِيغ وَالُو. طّْفن-اَيِي زݣ وفُوْس ينُو يِنِّي كِذِي يدْجَان، سِّيوْضن-اَيِي غَار دِمَشق. 12-13يُوْسَا-د غَارِي ذِنِّي يجّن قَّارن-اَس أَنَاس. نتَّا ذَايس دِّين، يتْطَاعَا إِ شَرِيعَا. سَّاوَاڒن خَاس مْلِيح مَارَّا يسْرَائِيلِيْين إِي زدّْغن ذِي دِمَشق. ئِبدّ-د زَّاثِي ينَّا-ٱيِي: آي ؤُمَا شَاوُل، ڒخُّو اَذ تْذوْڒذ اَذ تْوَاڒِيذ! ڒخْدّنِّي ݣنْفِيغ تْوَاڒِيغ نتَّا. 14ينَّا-ٱيِي: أَربِّـي ن ڒجْذُوْذ نّغ يخْضَر-يشك نتَّا بَاش اَذ تسّْنذ مِين يخس، أَذ تْوَاڒِيذ س ثِيطَّاوِين نّش اَخدَّام نّس صَّالِح اَذ تْصنّْطذ إِ يِجّن ن وَاوَاڒ زݣ وقمُّوْم نّس. 15شك اَخَاس ثِيڒِيذ ذ شَّاهذ غَار مَارَّا يوْذَان عْلَاحْسَاب مِين ثࢲْرِيذ ذ مِين ثسْڒِيذ. 16ئِي ڒخُّو مِين تْرَاجِيذ؟ كَّر اَذ تْوَاطهَّارذ س وَامَان، سِيرذ زِي ڒْمُعْصِيَاث نّش خْمِي غَا ثْڒَاغِيذ خ يِيسم نّس.
17وَامِي ذوْڒغ غَار ثنْدِينْت ن لْقُدْس تْࢲَادْجِيغ ذِي ثمْزِيذَا ثَمقّْرَانْت، ئِهْوَا-د خَافِي يجّن ن لْوَحِي. 18ࢲْرِيغ سِيذِيثْنغ ينَّا-ٱيِي: كَّر فّغ ذغْيَا زِي لْقُدْس مِينْزِي شْهَاذث نّش خَافِي وَار ت قبّْڒن شَا. 19نِّيغ-اَس: آ سِيذِي، نِثْنِي سّْنن بلِّي تُوْغَا تْرَاحغ زِي ثمْزِيذَا غَار ثمْزِيذَا تْحبَّاسغ شَّاثغ يِنِّي زَّايك يُوْمْنن. 20حْضَارغ نش وَامِي سِيزّْڒن يذَامّن ن سْتِيفَان#22.20 سْتِيفَان نتَّا زِي سبْعَا نِّي ن صَّحَابَا ن اَرُّسُل ذِي ثنْدِينْت ن لْقُدْس. نْغِين-ث يسْرَائِيلِيْين. ونِّي خَاك يشهّْذن. وَافْقغ خ ڒْموْث نّس، حْضِيغ-اَسن ؤُڒَا ذ اَرُّوْض ن يِنِّي إِي ث ينْغِين. 21ينَّا-ٱيي سِيذِي: رُوْح، شك اَش سّكّغ غَار يمُوْشَان ݣّْوْجن اَطَّاس، غَار يِنِّي وَار يدْجِين شَا زِي أَيث-إِسْرَائِيل."
22سْڒِين مْلِيح إِ بُوْلُس حتَّا اَڒ وَامِي ينَّا اَوَاڒ-أَ اَنݣَّارُو. ڒخْدّنِّي سْنكَّرن خَاس ثْغُوْيّث نَّان: مْحَاث اَرْيَاز-أَ زِي دُّنشْت-أَ، وَار يسْذِيهدْج شَا اَذ يقِّيم عَاذ يدَّر! 23سْنكَّرن ثْغُوْيّث، نظَّارن يزدْجُوْبَا نْسن، زُّوْزَّارن ثَعجَّاشْت غَار وجنَّا. 24ئِكَّر اَرَّايس ن ڒْعَسْكَار يُوْمَر اَذ سِيذْفن بُوْلُس غَار لْقشْلَا، أَث ؤُوْثن س وسْغُوْن اَذَاس ݣّن لْإِسْتِجْوَاب مَايمِّي خَاس سْنكَّرن ثْغُوْيّث قَاع اَمُّو. 25وَامِي ث شدّن بَاش اَث ؤُوْثن، ينَّا-ٱس بُوْلُس إِ ومقّْرَان ن ڒْعَسْكَار يبدّن ذِنِّي: "مَا قَانُوْنِي اَذ تُوْوْثم يجّن ن بْنَاذم س وسْغُوْن غَارس لْجِينْسِيَا ن اَرُّوْمَانُوْس مڒَا وَار خَاس ثْحكِّيمم شَا؟"
26وَامِي يسْڒَا ومقّْرَان نِّي ن ڒْعَسْكَار مَانَاينِّي، ئِرُوْح غَار اَرَّايس ن ڒْعَسْكَار ينَّا-ٱس: "مِين تݣّذ شك اَمُّو؟ قَا ٱرْيَاز نِّي غَارس لْجِينْسِيَا ن أَرُوْمَانُوْس!"
27يُوْسَاَ-د اَرَّايس نِّي ينَّا-ٱس: "إِن-اَيِي شك، مَا غَارك لْجِينْسِيَا ن أَرُوْمَانُوْس؟"
يَارَّا خَاس بُوْلُس: "وَاه، نش اَقَات غَارِي."
28ينَّا-ٱس اَرَّايس نِّي: "قَا نش سْغِيغ لْجِينْسِيَا ينُو س وَاطَّاس ن تْمنْيَاث."
ينَّا-ٱس بُوْلُس: "نش خڒْقغ-د زَّايس." 29ڒخْدّنِّي بعّْذن خَاس ذغْيَا يِنِّي يخْسن اَس ݣّن لْإِسْتِجْوَاب. ئِݣّْوذ وَاخَّا ذ اَرَّايس نِّي وَامِي يسّن بلِّي يشدّ يجّن غَارس لْجِينْسِيَا ن أَرُوْمَانُوْس.
أَرَّسُوْل بُوْلُس زَّاث إِ جْمَاعث ن لْحُكَّام ن أَيث-إِسْرَائِيل
30ثِيوشَّا نّس، يرزُّو اَرَّايس نِّي ن ڒْعَسْكَار اَذ يسّن مَايمِّي أَيث-إِسْرَائِيل تَاهَامن بُوْلُس، ئِرُوْح يُوْمَر اَرُّوْيَاس ن ڒْفُقَهَا ذ مَارَّا جْمَاعث ن لْحُكَّام ن أَيث-إِسْرَائِيل اَذ مُوْنن. ڒخْدّنِّي يسُوْفغ-د بُوْلُس يُوْوِي-ث-يذ غَارْسن يسْبدّ-يث زَّاثْسن.
Currently Selected:
ڒخذايم 22: ريف
Highlight
Share
Copy
Want to have your highlights saved across all your devices? Sign up or sign in
