ڒخذايم 23
23
1ئِخْزَر مْلِيح بُوْلُس غَار جْمَاعث ن لْحُكَّام ن أَيث-إِسْرَائِيل ينَّا-ٱسن: "آي اَيثْمَا، قَا نش ݣِّيغ لْوَاجِب نِيْشَان اَك أَربِّـي، زِي قْبڒ حتَّا نْهَارَا نش ضَّمِير ينُو مرْتَاح." 2ئِكَّر أَنَاس أَرَّايس ن ڒْفُقَهَا يُوْمَر يِنِّي يبدّن اَك بُوْلُس اَث ؤُوْثن غَار وقمُّوْم. 3ڒخْدّنِّي ينَّا-ٱس بُوْلُس: "شك ثݣِّيذ اَم ڒْحِيض يرْشَان يجِّيَارن س جِّير، أَش يُوْوث أَربِّـي! ثقِّيمذ شك ذِنِّي اَخَافِي ثْحكْمذ عْلَاحْسَاب شَّرِيعَا، وَلَكِن ڒخُّو تْخَالَافذ شَّرِيعَا وَامِي ثن ثُوْمَرذ اَذَايِي ؤُوْثن."
4نَّان-اَس إِ بُوْلُس يِنِّي ذِنِّي يحْضَارن: "مَا تُوْكَّارذ شك اَرَّايس ن ڒْفُقَهَا ن أَربِّـي؟!"
5ينَّا-ٱسن بُوْلُس: "آي اَيثْمَا، قَا نش وَار ث سِّينغ شَا تُوْغَاث ذ اَرَّايس ن ڒْفُقَهَا مِنْزِي لْكِتَاب يقَّار: <أَرَّايس ن شَّعْب، وَار ذَايس قَّار بُو ڒْعِيب.>"
6وَامِي يسّن بُوْلُس قَا شَا زَّايْسن زِي ڒْحِزْب ن يصَدُّوْقِيْين شَا نّغْنِي زِي ڒْحِزب ن يفَرِّسِيْين، ئِكَّر يڒَاغَا-د س جّْهذ ذِي جْمَاعث نِّي ن لْحُكَّام جَارَاسن ينَّا-ٱسن: "آي اَيثْمَا، قَا نش ذ اَفَرِّيسِي مِّيس ن يفَرِّيسِيْين! أَقَا تْحَاكَامم خَافِي وَامِي نش غَارِي لْأَمَال اَذ د كَّرن يِوْذَان زِي ڒْموْث ذِي لْقِيَامَا." 7وَامِي ينَّا مَانَايَا يوْقع يجّن ن لْخِلَاف جَار يفَرِّسِيْين ذ يصَدُّوْقِيْين، جْمَاعث نِّي ن لْحُكَّام مسْفْرَاقن جَارَاسن. 8(مِنْزِي يصَدُّوْقِيْين قَّارن قَا وَار ذِنِّي لَّا لْقِيَامَا، لَّا لْمَلَايْكَاث، لَّا جْنُوْن، وَلَكِن يفَرِّسِيْين قَّارن مَارَّا مَانَايَا يدْجَا.)
9ئِوْقع يجّن ن سّْدَع يمْغَار، كَّرن ڒبْعَاض زݣ يمْسڒْمَاذن ن شَّرِيعَا نِثْنِي ذ يفَرِّيسِيْين تمْنَاقَارن س جّْهذ قَّارن: "نشِّين وَار ذَاس نْتِيف بُو شَان لْغَالط ذِي بْنَاذم-أَ، يمْكن يسِّيوڒ اَكِذس شَان ن جّنّ نِغ ذ شَان ن لْمَلَائِكَا."
10وَامِي بْذَان تْمنْغَان س جّْهذ عْلَاحْسَاب لْخِلَاف نِّي، ئِݣّْوذ اَرَّايس ن ڒْعَسْكَار اَذ مزْقن بُوْلُس. يُوْمَر ڒْعَسْكَار نّس اَذ هْوَان اَذ د خضْفن بُوْلُس زِي ڒْوسْط نْسن، أَث سِيڒِين غَار لْقشْلَا. 11دْجِيرث نِّي يبدّ-د سِيذِيثْنغ غَار بُوْلُس ينَّا-ٱس: "اݣّ زْعَامث! مَامّش إِي زَّايِي ثْشهْذذ ذِي ثنْدِينْت ن لْقُدْس، أُو لَابُد عَاوذ اَزَّايِي ثْشهْذذ ذِي ثنْدِينْت ن رُوْمَا."
أَيث-إِسْرَائِيل تْشِيطِّينن بَاش اَذ نْغن اَرَّسُوْل بُوْلُس
12وَامِي د يصْبح ڒْحَاڒ شِيطّْنن أَيث-إِسْرَائِيل، وعْذن أَربِّـي حَرّْمن يخف نْسن وَار تتّن وَار سسّن اَڒ غَا نْغن بُوْلُس. 13كْتَار زِي اَرْبعِين إِذْسن إِݣ يشِيطّْنن ذِي مَانَايَا. 14رُوْحن غَار اَرُّوْيَاس ن ڒْفُقَهَا ذ يمقّْرَانن ن أَيث-إِسْرَائِيل نَّان-اَسن: "نشِّين نوْعذ أَربِّـي نْحَرّم يخف نّغ وَار نْتتّ وَالُو اَڒ غَا نْنغ بُوْلُس نشِّين. 15ڒخُّو جْمَاعث ن لْحُكَّام ذ كنِّيو تَّارم زِي اَرَّايس ن ڒْعَسْكَار ن اَرُّوْمَانُوْس بَاش اَغَارْوم د يسّكّ بُوْلُس. ݣّث يخف نْوم ثخْسم اَكِذس ثݣّم لْإِسْتِجْوَاب مْلِيح. نشِّين اَقَانغ مُوْجُوْد بَاش اَث نْنغ قْبڒ إِي د غَا يَاوض."
16مِّيس ن وتْشْمَاس ن بُوْلُس يَارَّا-د ڒخْبَار خ مِين شِيطِّينن يِوْذَان نِّي، ئِرُوْح غَار لْقشْلَا يُوْذف ذِنِّي يعَاوذ-اَس مَانَاينِّي إِ بُوْلُس. 17ئِڒَاغَا-د بُوْلُس خ يِجّن ن وعَسْكَارِي ذ اَمقّْرَان ن اَرُّوْمَانُوْس ينَّا-ٱس: "أَوِي اَحنْجِير-أَ غَار اَرَّايس نْوم اَقَا غَارس شَان وَاوَاڒ اَذَاس ث يِينِي."
18يُوْوِي-ث غَار اَرَّايس ن ڒْعَسْكَار ينَّا-ٱس قَا يڒَاغَا-د خَافِي بُوْلُس اَمحْبُوْس نِّي يتَّار زَّايِي ينَّا-ٱيِي اَذَاش د اَوِيغ اَحنْجِير-أَ اَقَا غَارس شَان وَاوَاڒ اَذَاش ث يِينِي.
19أَرَّايس نِّي ن ڒْعَسْكَار يطّف اَحنْجِير نِّي ذݣ وفُوْس، يُوْوِي-ث غَار شَان ثْغمَّارْث وَاحْذس ينَّا-ٱس: "مِين تخْسذ اَذَايِي ثِينِيذ؟"
20ينَّا-ٱس وحنْجِير نِّي: "ئِسْرَائِيلِيْين تَّافَاقن جَارَاسن بَاش اَزَّايك تَّارن اَذ د تسّكّذ ثِيوشَّا بُوْلُس غَار جْمَاعث ن لْحُكَّام نْسن. ݣِّين يخف نْسن اَخْمِي خْسن اَذَاس ݣّن لْإِسْتِجْوَاب مْلِيح. 21وَار ثن تجَّا شَا اَش سْقنْعن قَا ذِنِّي كْتَار زِي اَرْبعِين ن يرْيَازن وجّْذن إِ بُوْلُس، وعْذن أَربِّـي حَرّْمن يخف نْسن وَار تتّن وَار سسّن اَڒ ث غَا نْغن. أَقَا نِثْنِي وجّْذن، غِير تْرَاجَان اَذ تْوَافْقذ خ طَّلب نْسن!"
22ئِسّكّ اَرَّايس-أَ ن ڒْعَسْكَار اَحنْجِير نِّي ينَّا-ٱس: "وَار تْعَاوَاذ إِ حَدّ بلِّي شك ثنِّيذ-اَيِي إِ نش ڒخْبَار-أَ."
تَاوِين اَرَّسُوْل بُوْلُس غَار لْوَالِي فِيلِيكْس
23ڒخْدّنِّي يڒَاغَا-د اَرَّايس نِّي ن ڒْعَسْكَار إِ ثْنَاين ن يمقّْرَانن نّس ينَّا-ٱسن: "سْوجْذث مِيّتَاين ن ڒْعَسْكَار ذ سبْعِين ن يِنِّي إِي ينْيِين خ يِيْسَان ذ مِيّتَاين زݣ يِنِّي يكسِّين يكشُّوْضن غَارْسن ثِيشّط ن وُوْزّڒ، أَذ تْرَاحم غَار تسْعَا ن دْجِيڒث غَار ثنْدِينْت ن قَيْصَارِيَا. 24سْوجْذث إِ بُوْلُس مِينْخف غَا يني بَاش اَث تْسِيوْضم ذِي لْأَمَان أُو ضّْمَان غَار لْوَالِي فِيلِيكس."
25أُوْشَا يُوْرَا يجّن ن ثبْرَات إِ لْوَالِي فِيلِيكس ينَّا-ٱس ذَايس: 26"آ سِي لْوَالِي فِيلِيكس، نش كْلُوْدْيُوْس لِيسْيَاس تْسدْجَامغ خَاك. 27أَرْيَاز-أَ طّْفن-ث أَيث-إِسْرَائِيل تُوْغَا عْڒَاين اَث نْغن. وَامِي د اَرِّيغ ڒخْبَار قَا نتَّا غَارس لْجِينْسِيَا ن اَرُّوْمَانُوْس، رُوْحغ نش ذ ڒْعَسْكَار ينُو نْسنْجم-يث-يذ. 28رزُّوْغ اَذ سّْنغ نش تُّهْمَاث إِي خَاس ݣِّين، ؤُوِيغ-ث غَار جْمَاعث ن لْحُكَّام نْسن. 29ؤُفِيغ تُّهْمَاث نِّي نِثنْتِي ذ شَان ثْمسْڒَايِين خ شَّرِيعَا نْسن وَاهَا. وَار خَاس ؤُفِيغ بُو شَان تُّهْمَا يسْذَاهدْج خَاس ڒْموْث نِغ ذ ڒحْبس. 30وَامِي د اَرِّيغ ڒخْبَار شِيطّْنن خَاس، سّكّغ-ث-يذ غَارك ذغْيَا. ؤُمَرغ يِنِّي خَاس إِي ݣِّين تُّهْمَاث اَذَاش عَاوْذن مِين غَارْسن ضد نّس."
31-33سّنِّي نفْذن ڒْعَسْكَار عْلَاحْسَاب مِين زِي ثن يُوْمَر. ؤُوِين بُوْلُس س دْجِيڒث غَار ثنْدِينْت ن أَنتِيپَـاتْرِيس. ثِيوشَّا نّس ذوْڒن-د ڒبْعَاض ن ڒْعَسْكَار غَار لْقشْلَا نْسن، يِنِّي إِي ينْيِين خ يِيْسَان كمّْڒن خ وبْرِيذ نْسن اَك بُوْلُس ؤُوْضن غَار قَيْصَارِيَا. كلّْفن ذِنِّي لْوَالِي خ بُوْلُس سلّْمن-اَس ثَبْرَات نِّي. 34-35وَامِي ت يغْرَا لْوَالِي ينَّا-ٱس إِ بُوْلُس مَان لْإِقْلِيم إِي غَار تْوَاحْسَابذ شك؟ وَامِي ذَاس ينَّا بُوْلُس نش زِي لْإِقْلِيم ن كِيلِيكْيَا ينَّا-ٱس لْوَالِي: "نش اَذ يڒِيغ خ لْجلْسَا نّش خْمِي د غَا اَوْضن يِنِّي إِي خَاك غَا ينِين تُّهْمَا." سّنِّي يُوْمَر اَخَاس عسّْسن ذِي ڒقْصَاڒ ن هِيرُوْدُوْس.
Currently Selected:
ڒخذايم 23: ريف
Highlight
Share
Copy
Want to have your highlights saved across all your devices? Sign up or sign in
