ಲೂಕೆ 5

ಯೇಸು ಸುರುತ್ತ ನಾಲ್ ಶಿಷ್ಯೆರೆನ್ ಲೆಪ್ಪುನವು

(ಮತ್ತಾಯೆ 4:18-22; ಮಾರ್ಕೆ 1:16-20)

1ಒಂಜಿ ದಿನ ಜನೊಕುಲು ಗೆನೇಜರೇತು ಕೆರೆತಲ್ಪ ಗುಂಪು ಸೇರ್ದ್ ದೇವೆರೆ ಪಾತೆರೊನು ಕೇನೊಂದಿತ್ತೆರ್. 2ಕೆರೆತ ಬರಿಟ್ಟ್ ಉಂತುದಿತ್ತಿ ಯೇಸು ರಡ್ಡ್ ಓಡೊಲೆನ್ ತೂಯೆ. ಮೀನ್ ಪತ್ತುನಾಕುಲು ತನ್ಕುಲೆ ಬಲೆನ್ ದೆಕ್ಕೊಂದಿತ್ತೆರ್. 3ಐಟ್ಟ್ ಸೀಮೋನನ ಓಡೊಡು ಯೇಸು ಕುಲ್ಲುದು ಕಡಲ ಕರೆಡ್ದ್ ಒಂತೆ ದೂರ ಒಚ್ಚಿಲ ಅಂದ್‌ದ್ ಆಯಡ ಪಂಡೆ, ಬೊಕ್ಕ ಆಯೆ ಓಡದುಲಯಿ ಕುಲ್ಲೊಂದೆ ಆ ಜನೊಕುಲೆ ಗುಂಪುಗು ಬೋಧನೆ ಮಲ್ತೆ. 4ಪಾತೆರ ಮುಗಿ ಬೊಕ್ಕ ಯೇಸು ಸೀಮೋನುಗು ಪಂಡೆ, “ನಿಕುಲು ಗುಂಡಿ ಇತ್ತಿ ಜಾಗ್‌ಗ್ ಓಡೊನು ಒಚ್ಚಿದ್ ಮೀನ್‌ದ ಬೋಂಟೆಗ್ ಬಲೆ ಪಾಡ್ಲೆ,” ಪಂಡೆ. 5ಐಕ್ ಸೀಮೋನು ಗುರೂ, “ಎಂಕುಲು ರಾತ್ರೆ ಇಡೀ ಕಷ್ಟ ಬತ್ತಡಲಾ ದಾಲಾ ತಿಕ್ಕಿಜಿ, ಆಂಡ ನಿನ ಪಾತೆರದ ಮಿತ್ತ್ ಬಲೆ ಪಾಡ್ವ,” ಅಂದ್‌ದ್ ಪಂಡೆ. 6ಪಾಡಿ ಬೊಕ್ಕ ಮೀನ್‌ದ ರಾಶಿಯೇ ತಿಕ್ಕ್‌ದ್ ಅಕ್ಲೆನ ಬಲೆ ಪರಿಯೆರೆ ಮುಟ್ಟ ಆಂಡ್. 7ಅಪಗ ಅಕುಲು ಬೊಕ್ಕೊಂಜಿ ಓಡೊಡಿತ್ತಿ ಪಾಲ್‌ದಾರೆರೆನ್ ಲೆತ್ತ್‌ದ್, ಎಂಕ್ಲೆಗ್ ಸಹಾಯ ಮಲ್ಪುಲೆ ಅಂದ್‌ದ್ ಪಂಡೆರ್. ಅಕುಲು ಬತ್ತ್‌ದ್ ಅಕ್ಲೆನ ರಡ್ಡ್ ಓಡೊಲೆಡ್ ಮೀನ್‌ಲೆನ್ ದಿಂಜಾವನಗ ಅವು ಮುರ್ಕುನಡೆ ಮುಟ್ಟ ಆಂಡ್. 8ಸೀಮೋನು ಪೇತ್ರೆ ಉಂದೆನ್ ತೂದು ಯೇಸುನ ಕಾರ್‌ಗ್ ಮೊರಂಪೂರೂದು, “ಕರ್ತವಾ, ಯಾನ್ ಪಾಪಿಷ್ಟೆ; ಎನನ್ ಬುಡ್ದು ಪೋಲ,” ಪಂಡೆ. 9ದಾಯೆಗಂದ್ಂಡ ಆಯಗ್ಲಾ ಆಯಡೊಪ್ಪ ಇತ್ತಿನಾಕುಲೆಗ್ಲಾ ತನ್ಕುಲು ಪತ್ತಿನ ಮೀನ್‌ದ ರಾಶಿ ತೂದು ಅಚ್ಚಿರ ಆದಿತ್ತ್ಂಡ್. 10ಸೀಮೋನುನ ಪಾಲ್‌ದಾರೆರಾದುಪ್ಪು ಜೆಬೆದಾಯನ ಜೋಕುಲಾಯಿ ಯಾಕೋಬು ಬೊಕ್ಕ ಯೋಹಾನೆಲಾ ಅಂಚೆನೇ ಅಚ್ಚಿರ ಆಯೆರ್. ಬೊಕ್ಕ ಯೇಸು ಸಿಮೋನುಗು, “ಪೋಡ್ಯಡ, ಆಂಡ ಇನಿಡ್ದ್ ಈ ನರಮಾನಿಲೆನ್ ಪತ್ತುನಾಯೆ ಆದುಪ್ಪುವ,” ಅಂದ್‌ದ್ ಪಂಡೆ. 11ಅಕುಲು ತನ್ಕುಲೆ ಓಡೊಲೆನ್ ಕಡಲ್ದ ಕರೆಕ್ ಕನತ್‌ದ್ ಮಾತೆನ್ಲಾ ಬುಡ್ದು ಆಯ ಬೆರಿಯೆ ಪೋಯೆರ್.

ಯೇಸು ಕೊಷ್ಟದಾಯನ್ ಗುಣ ಮಲ್ಪುನವು

(ಮತ್ತಾಯೆ 8:1-4; ಮಾರ್ಕೆ 1:40-45)

12ಯೇಸು ಒಂಜಾನೊಂಜಿ ಊರುಡುಪ್ಪುನಗ ಮೆಯಿ ನಿಲ್ಕೆ ಕೊಷ್ಟ ಪತ್ತ್‌ದಿನಾಯೆ ಯೇಸುನು ತೂದು ಅಡ್ಡಬೂರ್ದು, “ಕರ್ತವಾ, ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಪಂಡ್ದ್ ನಟ್ಟಿಯೆ. 13ಯೇಸು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು ಶುದ್ಧ ಆಲ,” ಅಂದ್‌ದ್ ಪಂಡೆ. ಅಪಗನೆ ಆಯನ ಕೊಷ್ಟ ಬುಡ್ದು ಪೋಂಡು. 14ಅಪಗ ಯೇಸು ಆಯಡ ಈ ಉಂದೆನ್ ಏರೆಗ್ಲಾ ಪನೊಡ್ಚಿ; ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಲೆಕ್ಕನೇ ನಿನ ಶುದ್ಧಾಚಾರೊಗು ಬೋಡಾದ್ ಕಾಣಿಕೆ ಅರ್ಪಣೆ ಮಲ್ಪುಲ ಇನ್ಪಿ ಅಪ್ಪಣೆ ಆಯಗ್ ಕೊರಿಯೆ. ಅವು ಜನೊಕುಲೆಗ್ ಸಾಕ್ಷಿ ಆವಡ್ ಪಂಡೆ. 15ಆಂಡಲಾ ಆಯನ ಸುದ್ಧಿ ಹೆಚ್ಚಾದ್ ಪರಡ್ಂಡ್. ಜನೊಕುಲು ಆಯನ ಬೋಧನೆನ್ ಕೇನಿಯೆರೆ ತನ್ಕುಲೆ ಸೀಕ್ ಸಂಕಟೊಲೆಡ್ದ್ ಗುಣ ಆಯೆರೆ ಗುಂಪುಗುಂಪಾದ್ ಸೇರಿಯೆರ್. 16ಆಂಡ ಆಯೆ ಒರಿಯೇ ಏಪಲಾ ಜನಮಾನಿದಾಂತಿ ಜಾಗ್‌ಗ್ ಪೋದು ಪ್ರಾರ್ಥನೆ ಮಲ್ತೊಂದಿತ್ತೆ.

ಯೇಸು ಪಕ್ಷವಾತದಾಯನ್ ಗುಣ ಮಲ್ಪುನವು

17ಒಂಜಾನೊಂಜಿ ದಿನೊಟು ಯೇಸು ಬೋಧನೆ ಮಲ್ತೊಂದುಪ್ಪುನಗ ಗಲಿಲಾಯದ ಮಾತ ಊರುಲೆಡ್ದ್‌ಲಾ ಯೂದಾಯದ ಮಾತ ಗ್ರಾಮೊಲೆಡ್ದ್‌ಲಾ ಯೆರೂಸಲೇಮುಡ್ದುಲಾ ಬತ್ತಿತ್ತಿ ಪರಿಸಾಯೆರ್‌ಲಾ ನ್ಯಾಯಕಟ್ಟ್‌ದ ಬೋಧಕೆರ್‌ಲಾ ಆಯನ ಕೈತಲ್‌ ಕುಲ್ಲುದಿತ್ತೆರ್. ಸೀಕ್‌ದಾಕುಲೆನ್ ಗುಣ ಮಲ್ಪೆರೆ ಕರ್ತವ ಬಲ ಯೇಸುಡ ಇತ್ತ್ಂಡ್. 18ಇಂಚ ಉಪ್ಪುನಗ ಕೆಲವು ಅಂಜೊವುಲು ಒರಿ ಪಕ್ಷವಾತದಾಯನ್ ಮಂಚವುದ ಮಿತ್ತ್ ತುಂಬೊಂದು ಬತ್ತೆರ್. ಆಯನ್ ಉಲಯಿ ಕೊನೊದು ಯೇಸುನ ಎದುರುಡು ದೀವೊಡು ಪಂಡ್ದ್ ಪ್ರಯತ್ನ ಮಲ್ತೆರ್. 19ಆಂಡ ಜನೊಕುಲೆ ಮಲ್ಲ ಗುಂಪು ಇತ್ತಿನೆಡ್ದಾವರ ಆಯನ್ ಉಲಯಿ ಲೆತ್ತೊಂದು ಪೋವೆರೆ ಆವಂದೆ, ಅಕುಲು ಮಾಡ್‌ಗ್ ಮಿತ್ತಾದ್ ಓಡು ದೆತ್ತ್‌ದ್ ಆಯನ್ ಪಜೆದೊಟ್ಟುಗು ಯೇಸುನ ಎದುರುಡು ಜಪುಡಾಯೆರ್. 20ಆಯೆ ಅಕ್ಲೆನ ನಂಬಿಕೆನ್ ತೂದು, “ಸಹೋದ್ರ, ನಿನ ಪಾಪೊಲು ಮಾಪು ಆತ್ಂಡ್,” ಪಂಡೆ. 21ಐಕ್ ಆ ಶಾಸ್ತ್ರಿಲುಲಾ ಪರಿಸಾಯೆರ್‌ಲುಲಾ, ದೇವದೂಷಣೆ ಪಾತೆರುನಾಯೆ ಇಂಬೆ ಏತೆತ್ತಾಯೆ? ಪಾಪೊಲೆನ್ ಮಾಪು ಮಲ್ಪುನವು ದೇವೆರ್ ಒರಿಯಡ್ದೇ ಅತ್ತಂದೆ ಬೊಕ್ಕ ಏರೆಡ್ದ್ ಆವು ಅಂದ್‌ದ್ ಪನೊಂದಿತ್ತೆರ್. 22ಅಕುಲು ಅಂಚ ಪನೊಂದುಪ್ಪುನೆನ್ ಯೇಸು ತೆರಿಯೊಂದು ಅಕ್ಲೆಡ, “ನಿಕುಲು ನಿಕ್ಲೆನ ಉಡಲ್‌ಡ್ ದಾಯೆಗ್ ಅಂಚ ಎನ್ನುವರ್? 23ಒವು ಸುಲಭ, ‘ನಿನ ಪಾಪೊಲು ಮಾಪು ಆತ್ಂಡ್,’ ಪನ್ಪಿನವಾ? ‘ಲಕ್ಕ್‌ದ್ ನಡಪುಲ ಪನ್ಪಿನವಾ?’ 24ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಆ ಪಕ್ಷವಾತದಾಯನ್ ತೂದು, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋಲ, ಅಂದ್‌ದ್ ನಿಕ್ಕ್ ಪನ್ಪೆ,” ಪಂಡೆ. 25ಅಪಗನೆ ಆಯೆ ಅಕ್ಲೆನ ಎದುರು ಲಕ್ಕ್‌ದ್ ತಾನ್ ಜೆತ್ತ್‌ದಿತ್ತಿ ಪಜೆನ್ ಪತ್ತೊಂದು ದೇವೆರೆನ್ ಪುಗರೊಂದು ಇಲ್ಲಗ್ ಪೋಯೆ. 26ತೂಯಿನಾಕುಲು ಮಾತೆರ್ಲಾ ಅಚ್ಚಿರ ಆದ್ ದೇವೆರೆನ್ ಪುಗರಿಯೆರ್. ಬೊಕ್ಕ ಅಕುಲು ಪೋಡಿದ್, “ನಮ ಇನಿ ತೂವಂದಿನೆನ್ ತೂಯ!” ಪಂಡೆರ್.

ಯೇಸು ಲೇವಿನ್ ಲೆಪ್ಪುನವು

(ಮತ್ತಾಯೆ 9:9-13; ಮಾರ್ಕೆ 2:13-17)

27ಉಂದು ಆಯಿ ಬೊಕ್ಕ ಪಿದಾಡ್ದ್ ಪೋವೊಂದುಪ್ಪುನಗ ಸುಂಕ ದೆತ್ತೊನಿಯೆರೆ ಕುಲ್ಲೊಂದಿತ್ತಿ ಲೇವಿ ಪನ್ಪಿ ಒರಿ ಸುಂಕದಾಯನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಆಯನ್ ಲೆಪ್ಪುನಗ 28ಆಯೆ ಲಕ್ಕ್‌ದ್ ಮಾತೆನ್ಲಾ ಬುಡ್ದು ಆಯನ ಬೆರಿಯೆ ಪೋಯೆ. 29ಐಡ್ದ್ ಬೊಕ್ಕ ಲೇವಿ ತನ ಇಲ್ಲಡ್ ಯೇಸುಗು ಒಂಜಿ ಮಲ್ಲ ಲೇಸ್‌ದ ವಣಸ್ ಏರ್ಪಾಡ್ ಮಲ್ತೆ. ಅಲ್ಪ ಸುಂಕದಾಕುಲುಲಾ ಬಾಕಿದಾಕುಲುಲಾ ಯೇಸು ಕುಲ್ಲುದಿತ್ತಿ ಪಂತೆಡೇ ವಣಸ್‌ಗ್ ಕುಲ್ಲುದಿತ್ತೆರ್. 30ಅವೆನ್ ತೂದು ಪರಿಸಾಯೆರೆಡೊಪ್ಪ ಇತ್ತಿ ಶಾಸ್ತ್ರಿಲು ಆಯನ ಶಿಷ್ಯೆರೆಡ ಗುಟ್ಟುಡು, “ನಿಕುಲು ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ಉನ್ಪಿನಿ ದಾಯೆಗ್?” ಅಂದ್‌ದ್ ಕೇಂಡೆರ್. 31ಐಕ್ ಯೇಸು, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ; ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು. 32ಪಶ್ಚಾತಾಪ ಪಡೆಲೆ ಪಂಡ್ದ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್. ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಅಂದ್‌ದ್ ಅಕ್ಲೆಗ್ ಉತ್ತರ ಕೊರಿಯೆ.

ಉಪವಾಸದ ಸಂಗತಿಡ್ ಪ್ರಶ್ನೆ

(ಮತ್ತಾಯೆ 9:14-17; ಮಾರ್ಕೆ 2:18-22)

33ಅಕುಲು ಆಯಗ್, “ಯೋಹಾನನ ಶಿಷ್ಯೆರ್ ಅಪಗಪಗ ಉಪವಾಸ ಪ್ರಾರ್ಥನೆ ಮಲ್ಪುವೆರ್; ಅಂಚೆನೇ ಪರಿಸಾಯೆರೆ ಶಿಷ್ಯೆರ್‌ಲಾ ಉಪವಾಸ ಪ್ರಾರ್ಥನೆ ಮಲ್ಪುವೆರ್; ಆಂಡ ನಿನ ಶಿಷ್ಯೆರ್ ಉನ್ಪಿನಿ ಪರ್ಪಿನಿ ದಾಯೆಗ್?” ಅಂದ್‌ದ್ ಪನ್ನಗ, 34ಯೇಸು ಅಕ್ಲೆಗ್, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪುನಗ ಅಕ್ಲೆನ್ ಉಪವಾಸ ಕುಲ್ಲಾವೆರೆ ನಿಕ್ಲೆಡ್ದ್ ಆವಾ? 35ಆಂಡ ಮದ್ಮಯನ್ ಅಕ್ಲೆನ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು; ಅಪಗ ಆ ಕಾಲೊಡು ಉಪವಾಸ ಮಲ್ಪುವೆರ್,” ಅಂದ್‌ದ್ ಉತ್ತರ ಕೊರಿಯೆ. 36ಅಕ್ಲೆಗ್ ಒಂಜಿ ಉಪಕತೆನ್ಲಾ ಪಂಡೆ ಅವು ದಾದ ಪಂಡ, “ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಕುಂಟು ಪರಿದ್ ಪೋವು ಅತ್ತಂದೆ ಪೊಸ ಕುಂಟುದ ಪತ್ತೆ ಪರತೆಕ್ಕ್ ಎಡ್ಡೆ ತೋಜುಜಿ. 37ಬೊಕ್ಕ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್; ದಿಂಜಾಂಡ ಆ ಪೊಸ ದ್ರಾಕ್ಷಾರಸತ್ತ ಚೀರವು ಪುಡಾದ್ ಪೊಸ ದ್ರಾಕ್ಷಾರಸಲಾ ಚೀರವುಲಾ ಹಾಳಾದ್ ಪೋಪುಂಡು. 38ಅಂಚ ಪೊಸ ದ್ರಾಕ್ಷಾರಸೊನು ಪೊಸ ಚೀರವುಡು ಪಾಡ್ದ್ ದೀವೊಡು. 39ಉಂದತ್ತಂದೆ ಪರ ಅಮಲ್‌ದ ದ್ರಾಕ್ಷಾರಸೊನು ಪರಿನಾಯೆ ಪೊಸತ್ತ್ ಬೋಡು ಪನ್ಪುಜೆ; ‘ಪರತ್ತೇ ಎಡ್ಡೆಂತಿನವು,’ ಪನ್ಪೆ.”

Currently Selected:

ಲೂಕೆ 5: ತುಳು

Highlight

Copy