ಲೂಕೆ 4
4
ಯೇಸುಗು ಆಯಿನ ಶೋಧನೆಲು
(ಮತ್ತಾಯೆ 4:1-11; ಮಾರ್ಕೆ 1:12,13)
1ಯೇಸು ಪರಿಶುದ್ಧಾತ್ಮಡ್ ದಿಂಜಿದಿನಾಯೆ ಆದ್ ಯೊರ್ದಾನ್ ತುದೆಡ್ದ್ ಪಿರ ಬನ್ನಗ ಆತ್ಮ ಆಯನ್ ಕಾಡ್ಗ್ ಲೆತ್ತೊಂದು ಪೋಂಡು. 2ಅಲ್ಪ ಆಯಗ್ ನಲ್ಪ ದಿನ ಸೈತಾನಡ್ದ್ ಶೋಧನೆ ಆವೊಂದಿತ್ತ್ಂಡ್. ಆ ದಿನೊಕುಲೆಡ್ ಆಯೆ ದಾಲಾ ತಿನಂದೆ ಇತ್ತಿನೆಡ್ದ್ ಆಯಗ್ ಬಾರಿ ಬಡವಾಂಡ್. 3ಅಪಗ ಸೈತಾನೆ ಯೇಸುಗು, “ಈ ದೇವೆರೆ ಮಗೆ ಆದಿತ್ತಡ ಈ ಕಲ್ಲ್ನ್ ರೊಟ್ಟಿ ಆಪಿಲೆಕ್ಕ ಅಪ್ಪಣೆ ಕೊರ್ಲ,” ಪಂಡೆ 4ಐಕ್ ಯೇಸು ಆಯಗ್, “ನರಮಾನಿ ರೊಟ್ಟಿ ತಿಂದ್ಂಡ ಮಾತ್ರ ಬದುಕುಜೆ, ಅಂದ್ದ್ ಬರೆತ್ಂಡ್,” ಅಂದ್ದ್ ಉತ್ತರ ಕೊರಿಯೆ.
5ಐಡ್ದ್ ಬೊಕ್ಕ ಸೈತಾನೆ ಆಯನ್ ಮಲ್ಲ ಗುಡ್ಡೆಗ್ ಲೆತ್ತೊಂದು ಪೋದು ಒಂಜಿ ಕ್ಷಣತ ಉಲಯಿ ಲೋಕದ ಮಾತ ರಾಜ್ಯೊಲೆನ್ ಆಯಗ್ ತೋಜಾಯೆ. 6ಬೊಕ್ಕ ಸೈತಾನೆ ಆಯಗ್ ಪಂಡಿನಿ, “ನೆತ್ತ ಮಾತ ಅಧಿಕಾರೊನ್ಲಾ ಮೈಮೆನ್ಲಾ ನಿಕ್ಕ್ ಕೊರ್ಪೆ; ಅವು ಎಂಕ್ ಒಚ್ಚಿದ್ ಕೊರ್ತುಂಡು. ಉಂದೆನ್ ಎಂಕ್ ಮನಸ್ ಇತ್ತಿನಾಯಗ್ ಕೊರ್ಪೆ. 7ಈ ಎನ ಎದುರು ಅಡ್ಡಬೂರ್ದು ಆರಾಧನೆ ಮಲ್ತ್ಂಡ, ಉಂದು ಮಾತ ನಿನ್ನವು ಆಪುಂಡು,” ಪಂಡೆ. 8ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವಗ್ ಅಡ್ಡಬೂರ್ದು ಆಯನ್ ಒರಿಯನೇ ಆರಾಧನೆ ಮಲ್ಪೊಡಂದ್ದ್ ಬರೆತ್ಂಡ್,” ಅಂದ್ದ್ ಉತ್ತರ ಕೊರಿಯೆ.
9ಬೊಕ್ಕ ಸೈತಾನೆ ಯೇಸುನು ಯೆರೂಸಲೇಮುಗು ಲೆತ್ತೊಂದು ಪೋದು ದೇವಾಲಯದ ಗೋಪುರದ ಮಿತ್ತ್ ಉಂತಾದ್ ಆಯಗ್, “ಈ ದೇವೆರೆ ಮಗೆ ಆದಿತ್ತಡ ಮುಲ್ತುಡ್ದು ತಿರ್ತ್ ಲೈಪುಲ. 10-11ನಿನನ್ ಕಾಪೆರೆಗ್, ‘ದೇವೆರ್ ತನ ದೂತೆರೆಗ್ ಅಪ್ಪಣೆ ಕೊರುವೆ, ಬೊಕ್ಕ ನಿನ ಕಾರ್ ಕಲ್ಲ್ಗ್ ತಾಂಟಂದಿಲೆಕ್ಕ ಅಕುಲು ನಿನನ್ ಕೈಟ್ ದೆರ್ತ್ತ್ ಪತ್ತ್ವೆರ್ ಅಂದ್ದ್ ಬರೆತ್ಂಡ್,’” ಅಂದ್ದ್ ಪಂಡೆ. 12ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವನ್ ಪರೀಕ್ಷೆ ಮಲ್ಪೆರೆ ಬಲ್ಲಿ ಪಂಡ್ದ್ ಬರೆತ್ಂಡ್,” ಅಂದ್ದ್ ಉತ್ತರ ಕೊರಿಯೆ.
13ಇಂಚ ತರತರೊಟು ಶೋಧನೆ ಮಲ್ತಿ ಬೊಕ್ಕ ಒಂತೆ ಸಮಯೊಗು ಸೈತಾನೆ ಆಯನ್ ಬುಡ್ದು ಪೋಯೆ.
ಯೇಸು ಗಲಿಲಾಯೊಡು ಸೇವೆ ಮಲ್ಪುನವು
(ಮತ್ತಾಯೆ 4:12-17; ಮಾರ್ಕೆ 1:14,15)
14ಯೇಸು ಪರಿಶುದ್ಧಾತ್ಮದ ಬಲೊಡ್ದು ದಿಂಜಿದಿನಾಯೆ ಆದ್ ಗಲಿಲಾಯ ಸೀಮೆಗ್ ಪಿರ ಪೋಯೆ; ಆಯನ ಸುದ್ಧಿ ಕೈತಲಿತ್ತಿ ಮಾತ ಪ್ರಾಂತೊಲೆಡ್ ಪರಡ್ಂಡ್. 15ಆಯೆ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಬತ್ತೆ. ಮಾತೆರ್ಲಾ ಆಯನ್ ಪುಗರಿಯೆರ್.
ನಜರೇತ್ಡ್ ಯೇಸುನು ತಿರಸ್ಕಾರ ಮಲ್ಪುನವು
(ಮತ್ತಾಯೆ 13:53-58; ಮಾರ್ಕೆ 6:1-6)
16ಬೊಕ್ಕ ಆಯೆ ತಾನ್ ಪುಟ್ಟುದು ಬಲತಿ ನಜರೇತ್ಗ್ ಬತ್ತ್ದ್ ತನ ಕಟ್ಟ್ದ ಪ್ರಕಾರ ಸಬ್ಬತ್ದಿನೊಟು ಸಭಾಮಂದಿರೊಗು ಪೋದು ಓದೆರೆಗಾದ್ ಲಕ್ಕ್ದ್ ಉಂತಿಯೆ. 17ಅಪಗ ಪ್ರವಾದಿ ಯೆಶಾಯೆ ಗ್ರಂಥದ ಸುರುಳಿನ್ ಆಯನ ಕೈಕ್ ಕೊರ್ನಗ ಅವೆನ್ ಬುಡ್ಪಾದ್ ಬರೆದುಪ್ಪುನೆನ್ ತೂದು ಓದಿಯೆ; ಆ ಪಾತೆರ ದಾನೆಂದ್ಂಡ: 18“ಕರ್ತವ ಆತ್ಮ ಎನ ಮಿತ್ತ್ ಉಂಡು, ಆಯೆ ಎನನ್ ಬಡವೆರೆಗ್ ಸುವಾರ್ತೆನ್ ಸಾರಿಯೆರೆಗ್ ಅಭಿಷೇಕ ಮಲ್ತೆ, ಸೆರೆಮನೆಟ್ಟುಪ್ಪುನಾಕುಲೆಗ್ ಬುಡುಗಡೆ ಆಪಿನೆನ್ಲಾ ಕುರುಡೆರೆಗ್ ಕಣ್ಣ್ ತೋಜುನೆನ್ಲಾ ಮನಸ್ ಪೊಲಿದಿನಾಕುಲೆನ್ ಬುಡ್ಪಾದ್ ಕಡಪುಡಿಯೆರೆಗ್ಲಾ 19ಕರ್ತವೆ ನೇಮಕ ಮಲ್ತಿ ಶುಭವರ್ಸೊನು ಸಾರಿಯೆರೆಗ್ಲಾ ಆಯೆ ಎನನ್ ಕಡಪುಡುದೆ ಪನ್ಪಿನವೇ.”
20ಓದಿ ಬೊಕ್ಕ ಆಯೆ ಆ ಸುರುಳಿನ್ ಸುತ್ತುದು ಸಭಾಮಂದಿರದ ಚಾಕ್ರಿದಾಯನ ಕೈಟ್ ಕೊರ್ದು ಕುಲ್ಲೊಂಡೆ. ಅಲ್ಪ ಇತ್ತಿ ಮಾತ ಜನೊಕುಲೆ ಕಣ್ಣ್ದ ದೃಷ್ಟಿ ಆಯನ ಮಿತ್ತೇ ಬೂರ್ದಿತ್ತ್ಂಡ್. 21ಅಪಗ ಯೇಸು, “ನಿಕುಲು ಎನ ಪಾತೆರೊನು ಕೇನೊಂದುಪ್ಪುನಗನೇ ಈ ಶಾಸ್ತ್ರದ ಪಾತೆರ ನಡತ್ಂಡ್,” ಅಂದ್ದ್ ಪನೊಂದುಪ್ಪುನಗ 22ಮಾತೆರ್ಲಾ ಆಯನ್ ಪುಗರೊಂದು, ಆಯ ಬಾಯಿಡ್ದ್ ಪಿದಾಡು ದಯತ ಪಾತೆರೊಲೆಗ್ ಅಚ್ಚಿರ ಆದ್, “ಇಂಬೆ ಯೋಸೇಫು ಮಗೆ ಅತ್ತಾ?” ಅಂದ್ದ್ ಪಾತೆರೊಂಡೆರ್. 23ಯೇಸು ಅಕ್ಲೆಗ್, “ನಿಕುಲಾಂಡಲಾ, ‘ವೈದ್ಯಾ ನಿನನ್ ಈಯೇ ಗುಣ ಮಲ್ತೊನು,’ ಪನ್ಪಿ ಗಾದೆನ್ಲಾ, ‘ಕಪೆರ್ನೌಮುಡು ಮಲ್ತಿ ಕಾರ್ಯೊಲೆನ್ ಎಂಕುಲು ಕೇಂಡ್ದ, ಅಂಚಿತ್ತಿನೆನ್ ಈ ನಿನ ಸ್ವಂತ ಜಾಗ್ಡ್ ಮಲ್ಪು,’ ಅಂದ್ದ್ ಪನುವರ್. 24ನಿಕ್ಲೆಗ್ ನಿಜಾದ್ ಪನ್ಪೆ, ವಾ ಪ್ರವಾದಿಗ್ಲಾ ಆಯನ ಸ್ವಂತ ಊರುಡು ಮರ್ಯಾದಿ ತಿಕ್ಕುಜಿ. 25ನಿಜಾದ್, ಎಲೀಯನ ಕಾಲೊಡು ಮೂಜಿ ವರ್ಸ ಆಜಿ ತಿಂಗೊಲು ಬಾನ ಮುಚ್ಚಿದ್ ಬರ್ಸ ಬರಂದೆ ಇಡೀ ದೇಶೊಡು ಮಲ್ಲ ಬರಗಾಲ ಉಂಡಾನಗ, ಇಸ್ರಾಯೇಲ್ ಜನೊಕುಲೆಡ್ ಏತೋ ಜನ ಕಂಡನಿ ಸೈತಿನಾಕುಲು ಇತ್ತಿನಿ ನಿಜ; 26ಆಂಡ ಅಕ್ಲೆಡ್ ಏರೆ ಕೈತಲ್ಲಾ ದೇವೆರ್ ಎಲೀಯನ್ ಕಡಪುಡಂದೆ ಸೀದೋನು ದೇಶೊಗು ಸೇರ್ದಿನ ಸರೆಪ್ತ ಊರುಡಿತ್ತಿ ಒಂಜಿ ಕಂಡನಿ ಸೈತಿನಲೆನ ಕೈತಲ್ ಕಡಪುಡಿಯೆ. 27ಬೊಕ್ಕ ಎಲೀಷ ಪನ್ಪಿ ಪ್ರವಾದಿ ಕಾಲೊಡು ಇಸ್ರಾಯೇಲ್ ಜನೊಕುಲೆಡ್ ಏತೋ ಜನ ಕೊಷ್ಟದಾಕುಲು ಇತ್ತೆರ್ಡಲಾ ಅಕ್ಲೆಡ್ ಒರಿಯಾಂಡಲಾ ಶುದ್ಧ ಆವಂದೆ ಸುರಿಯ ದೇಶದ ನಾಮಾನೆ ಮಾತ್ರ ಗುಣ ಆಯೆ,” ಅಂದ್ದ್ ಪಂಡೆ. 28ಸಭಾಮಂದಿರೊಡು ಇತ್ತಿನಾಕುಲು ಮಾತೆರ್ ಈ ಪಾತೆರೊಲೆನ್ ಕೇಂಡ್ದ್ ಮಸ್ತ್ ಕೋಪೊಡು 29ಲಕ್ಕ್ದ್ ಆಯನ್ ಊರುದ ಪಿದಯಿ ಗಿಡ್ತ್ದ್ ತನ್ಕುಲೆ ಊರುಡಿತ್ತಿ ಗುಡ್ಡೆದ ಕೊಡಿಕ್ಕ್ ನಡಪಾವೊಂದು ಪೋದು ಅಲ್ತ್ಡ್ದ್ ತಿರ್ತ್ ನೂಕುದು ಪಾಡೊಡು ಅಂದ್ದ್ ಇತ್ತೆರ್. 30ಆಂಡ ಆಯೆ ಅಕ್ಲೆನ ಮದ್ಯೊಡ್ದು ತಪ್ಪಾವೊಂದು ಪೋಯೆ.
ದೆವ್ವ ಪತ್ತ್ದಿ ನರಮಾನಿಗ್ ಬುಡುಗಡೆ
31ಐಡ್ದ್ ಬೊಕ್ಕ ಆಯೆ ಘಟ್ಟ ಜತ್ತ್ದ್ ಗಲಿಲಾಯೊಗು ಸೇರ್ದಿನ ಕಪೆರ್ನೌಮು ಪನ್ಪಿ ಊರುಗು ಬತ್ತೆ. 32ಅಲ್ಪ ಸಬ್ಬತ್ದಿನೊಟು ಅಕ್ಲೆಗ್ ಬೋಧನೆ ಮಲ್ತೊಂದುಪ್ಪುನಗ, ಆಯನ ಪಾತೆರೊಲು ಅಧಿಕಾರದವು ಆದಿತ್ತಿನೆಡ್ದ್ ಅಕುಲು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್. 33ಆ ಸಭಾಮಂದಿರೊಡು ದೆವ್ವ ಪತ್ತ್ದಿನ ಒರಿ ನರಮಾನಿ ಇತ್ತೆ. 34ಆ ದೆವ್ವ ಓ ನಜರೇತ್ದ ಯೇಸೋ, “ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆ? ಎಂಕ್ಲೆನ್ ನಾಶ ಮಲ್ಪೆರೆ ಬೈದನಾ? ಈ ಏರ್ ಅಂದ್ದ್ ಎಂಕ್ ಗೊತ್ತುಂಡು, ಈ ದೇವೆರೆ ಪರಿಶುದ್ಧದಾಯೆನೇ.” ಅಂದ್ದ್ ಅರಬಾಯಿ ದೀದ್ ಪಂಡ್ಂಡ್. 35ಯೇಸು ಅವೆನ್ ದಟ್ಟಿದ್, “ಮನಿಪಂದೆ ಕುಲ್ಲು, ಉಂಬ್ಯನ್ ಬುಡ್ದು ಪೋಲ!” ಅಂದ್ದ್ ಪನ್ನಗ ಆ ದೆವ್ವ ಆಯನ್ ಮಗ್ರ್ಪಾದ್ ಆಯಗ್ ದಾಲಾ ಉಪದ್ರ ಮಲ್ಪಂದೆ ಬುಡ್ದು ಪೋಂಡು. 36ಐಕ್ ಮಾತೆರ್ಲಾ ಅಚ್ಚಿರ ಆದ್, “ಉಂದು ಎಂಚಿತ್ತಿ ಪಾತೆರ ಆದುಪ್ಪು? ಉಂಬೆ ಅಧಿಕಾರೊಡುಲಾ ಬಲೊಡ್ದುಲಾ ದೆವ್ವೊಲೆಗ್ ಅಪ್ಪಣೆ ಕೊರ್ಪೆತ್ತಾ? ಐಕುಲು ಬುಡ್ದು ಪೋಪ,” ಅಂದ್ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. 37ಬೊಕ್ಕ ಆಯನ ಸುದ್ಧಿ ಸುತ್ತೊಡಿತ್ತಿ ಸೀಮೆದ ಮಾತ ಊರುಲೆಡ್ ಪರಡ್ಂಡ್.
ಮಸ್ತ್ ಸೀಕ್ದಾಕುಲೆನ್ ಗುಣ ಮಲ್ಪುನವು
(ಮತ್ತಾಯೆ 8:14-17; ಮಾರ್ಕೆ 1:29-34)
38ಬೊಕ್ಕ ಯೇಸು ಸಭಾಮಂದಿರೊಡ್ದು ಲಕ್ಕ್ದ್ ಸೀಮೋನನ ಇಲ್ಲಗ್ ಬತ್ತೆ. ಅಲ್ಪ ಸೀಮೋನನ ಮಾಮಿ ಜ್ವರೊಟು ಕಷ್ಟ ಬರ್ಪಿನೆಡ್ದ್ ಆಲೆನ್ ಗುಣ ಮಲ್ಪೊಡಂದ್ದ್ ಯೇಸುಡ ನಟ್ಟೊಂಡೆರ್. 39ಆಯೆ ಆಲೆ ಕೈತಲ್ ಉಂತುದು ಆ ಜ್ವರೊನು ದಟ್ಟಿನಗ ಅವು ಆಲೆನ್ ಬುಡ್ದು ಪೋಂಡು. ಅಪಗನೆ ಆಲ್ ಲಕ್ಕ್ದ್ ಅಕ್ಲೆಗ್ ಉಪಚಾರ ಮಲ್ತಲ್.
40ಪೊರ್ತು ಕಂತ್ನಗ ಆಯಿನಿ ದಾನೆಂದ್ಂಡ ತರತರತ ಸೀಕ್ದಾಕುಲೆನ್ ಆಯ ಕೈತಲ್ಗ್ ಲೆತ್ತೊಂದು ಬತ್ತೆರ್. ಆಯೆ ಪ್ರತಿ ಒರಿಯನ ಮಿತ್ತ್ ಕೈ ದೀದ್ ಅಕ್ಲೆನ್ ಮಾತೆರೆನ್ಲಾ ಗುಣ ಮಲ್ತೆ. 41ದೆವ್ವೊಲು, “ಈ ದೇವೆರೆ ಮಗೆ!” ಅಂದ್ದ್ ಅಬ್ಬರಿತ್ದ್ ಮಸ್ತ್ ಜನೊಕುಲೆನ್ ಬುಡ್ದು ಪೋಂಡು. ತಾನ್ ರಕ್ಷಕೆ ಆದುಪ್ಪು ಕ್ರಿಸ್ತೆ ಅಂದ್ದ್ ಐಕ್ಲೆಗ್ ತೆರಿದಿತ್ತಿನೆಡ್ದ್ ಆಯೆ ಐಕ್ಲೆನ್ ದಟ್ಟಿದ್ ಪಾತೆರಿಯೆರೆ ಬುಡ್ಜೆ.
ಯೇಸುನ ಸಭಾಮಂದಿರೊಲೆಡ್ ಬೋಧನೆ
(ಮಾರ್ಕೆ 1:35-39)
42ಬೊಲ್ಪು ಆನಗ ಆಯೆ ಪಿದಾಡ್ದ್ ಜನಮಾನಿದಾಂತಿನ ಜಾಗ್ಗ್ ಪೋಯೆ; ಜನೊಕುಲು ಗುಂಪುಗುಂಪಾದ್ ಆಯನ್ ನಾಡೊಂದು ಆಯೆ ಇತ್ತಿನಡೆಗ್ ಬತ್ತೆರ್. ಈ ಎಂಕ್ಲೆನ್ ಬುಡ್ದು ಪೋವಡ ಅಂದ್ದ್ ಆಯನ್ ತಡೆತೆರ್. 43ಆಂಡ ಆಯೆ ಅಕ್ಲೆಗ್, “ಯಾನ್ ದೇವೆರೆ ರಾಜ್ಯದ ಸುವಾರ್ತೆ ಬೇತೆ ಬೇತೆ ಊರುಲೆಗ್ ಸಾರಿಯೊಡು. ಉಂದೆಕಾದೇ ಕಡಪುಡ್ದಿನಾಯೆ ಆದುಲ್ಲೆ,” ಅಂದ್ದ್ ಪಂಡೆ.
44ಬೊಕ್ಕ ಆಯೆ ಯೂದಾಯ ದೇಶದ ಸಭಾಮಂದಿರೊಲೆಡ್ ಸುವಾರ್ತೆನ್ ಸಾರಿಯೊಂದಿತ್ತೆ.
Currently Selected:
ಲೂಕೆ 4: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
