ಲೂಕೆ 16

ಗಂಟ್ ಮಲ್ತೊಂಡಿ ಗುಮಾಸ್ತನ ಉಪಕತೆ

1ಯೇಸು ತನ ಶಿಷ್ಯೆರೆಗ್ ಇಂಚ ಪಂಡೆ, “ಒರಿ ಐಶ್ವರ್ಯವಂತಗ್ ಒರಿ ಗುಮಾಸ್ತೆ ಇತ್ತೆ. ಆಯನ ಬಗೆಟ್, ಯಜಮಾನನ ಕೈತಲ್‌ ಬತ್ತ್‌ದ್‌, ‘ಇಂಬೆ ನಿನ ಆಸ್ತಿನ್ ಹಾಳ್ ಮಲ್ತೊಂದುಲ್ಲೆ,’ ಅಂದ್‌ದ್ ಏರಾ ದೂರು ಪಂಡೆರ್. 2ಯಜಮಾನೆ ಆಯನ್ ಲೆತ್ತ್‌ದ್ ಆಯಡ, ‘ಈ ಎನ ಆಸ್ತಿನ್ ಲೂಟಿ ಮಲ್ತೊಂದುಲ್ಲಂದ್‌ದ್ ನಿನ ಬಗೆಟ್ ಯಾನ್ ಕೇನೊಂದುಲ್ಲೆ. ಈ ಮಲ್ತೊಂದಿತ್ತಿ ಗುಮಾಸ್ತಿಕೆದ ಲೆಖ್ಖೊನು ಕೊರ್ಲ. ನನ ಈ ಎನ ಗುಮಾಸ್ತೆ ಆದುಪ್ಪೆರೆ ಸಾದ್ಯ ಇಜ್ಜಿ.’ ಪಂಡೆ. 3ಉಂದೆನ್ ಕೇಂಡ್ದ್, ‘ನನ ಯಾನ್ ದಾದ ಮಲ್ಪುನು? ಎನ ಯಜಮಾನೆ ಎನನ್ ಈ ಗುಮಾಸ್ತಿಕೆಡ್ ದೆತ್ತ್‌ದ್ ಬುಡ್ಪೆ ಅತ್ತಾ? ಗರ್ಪೆರೆ ಎಂಕ್ ತೀರಂದ್, ನಟ್ಟರೆ ಎಂಕ್ ನಾಚಿಗೆ ಆಪುಂಡು. 4ಈ ಗುಮಾಸ್ತಿಕೆಡ್ದ್ ಎನನ್ ದೆತ್ತಿ ಬೊಕ್ಕ ಜನೊಕುಲು ಎನನ್ ತನ್ಕುಲೆ ಇಲ್ಲದುಲಯಿ ಸೇರಾಯಿಜೆರ್ಡ ಎನ ಪರಿಸ್ಥಿತಿ ಭಯಂಕರ ಅವು,’ ಅಂದ್‌ದ್ ತನ ಉಲಯಿ ಎನ್ನೊಂದು, 5ತನ ಕರ್ತವಗ್ ಕೊರೊಡಾಯಿ ಸಾಲದಾಕುಲೆಡ್ ಒರಿ ಒರಿಯನ್ ಕೈತಲ್‌ ಲೆತ್ತ್‌ದ್ ಸುರುತ್ತಾಯಡ, ‘ಈ ಎನ ಧನಿಕ್ ಏತ್ ಸಾಲ ಕೊರೊಡು?’ ಅಂದ್‌ದ್ ಕೇಂಡೆ. 6ಐಕ್ ಆಯೆ, ‘ನೂದು ಡಬ್ಬಿ ಎಣ್ಣೆ,’ ಅಂದ್‌ದ್ ಪನ್ನಗ ಆಯಡ, ನಿನ ಬಿಲೆಪತ್ರಿಕೆನ್ ದೆತ್ತೊಂದು, ‘ಬೇಗ ಕುಲ್ಲೊಂದು ಐವ ಡಬ್ಬಿ ಅಂದ್‌ದ್ ಬರೆಲ,’ ಪಂಡೆ 7ಬೊಕ್ಕೊರಿಯನ್, ‘ಈ ಏತ್ ಸಾಲ ಕೊರೊಡು?’ ಅಂದ್‌ದ್ ಕೇನ್ನಗ ‘ನೂದು ಖಂಡಿಗೆ ಗೋದಿ,’ ಪಂಡೆ. ಆಯಡ, ‘ಈ ನಿನ ಬಿಲೆಪತ್ರಿಕೆನ್ ದೆತ್ತೊಂದು, ಎಣ್ಪ ಖಂಡಿಗೆ ಅಂದ್‌ದ್ ಬರೆಲ,’ ಪಂಡೆ 8ಯಜಮಾನೆ ಉಂದೆನ್ ಕೇಂಡ್ದ್ ಅನ್ಯಾಯ ಮಲ್ತಿ ಗುಮಾಸ್ತನ್ ಉಂಬೆ ಎಡ್ಡೆ ಮಲ್ತೆ ಅಂದ್‌ದ್ ಪುಗರಿಯೆ. ದಾಯೆ ಪಂಡ ಲೋಕದಾಕುಲು ಬೊಲ್ಪುದ ಜನೊಕುಲೆಡ್ದ್‌ಲಾ ಬುದ್ಧಿವಂತೆರಾದುಲ್ಲೆರ್. 9ಈ ಲೋಕೊಡುಪ್ಪುನಗ ಅನ್ಯಾಯದ ಕಾಸ್‌ಡ್ದ್ ಬಡವೆರೆಗ್ ಸಹಾಯ ಕೊರ್ದು ಸ್ನೇಹಿತೆರೆನ್‌ ಮಲ್ತೊನ್ಲೆ. ಇಂಚ ಮಲ್ತ್ಂಡ ನಿಕ್ಲೆನ ಕೈ ಬುಡ್ದು ಪೋನಗ ನಿಕ್ಲೆಗ್ ನಿತ್ಯ ಗುಡಾರೊಡು ಸೇರಾವೊನ್ವೆರ್ ಅಂದ್‌ದ್ ಯಾನ್ ಪನ್ಪೆ. 10ಒಂತೆಡ್ ನಂಬಿಕೆ ಇತ್ತಿನಾಯೆ ಮಸ್ತ್‌ಡ್ಲಾ ನಂಬಿಗೆದಾಯೆ ಆಪೆ. ಒಂತೆದೆಟ್ ಅನ್ಯಾಯಗಾರೆ ಆಂಡ ಮಸ್ತ್‌ದೆಟ್ಲಾ ಅನ್ಯಾಯಗಾರೆ ಆಪೆ. 11ಇಂಚ ಉಪ್ಪುನಗ ಅನ್ಯಾಯದ ಆಸ್ತಿದ ಬಗೆಟ್ ನಿಕುಲು ನಂಬಿಕೆದಾಕುಲು ಆಯಿಜರ್ಡ ನಿಜವಾಯಿನ ಆಸ್ತಿನ್ ನಿಕ್ಲೆ ವಶೊಕ್ಕು ಏರ್ ಕೊರುವೆರ್? 12ಬೊಕ್ಕೊರಿಯನ ಸೊತ್ತುದ ಸಂಗತಿಡ್ ನಿಕುಲು ನಂಬಿಗಸ್ತೆರಾಯಿಜರ್ಡ ನಿಕ್ಲೆ ಸ್ವಂತದೆನ್ ನಿಕ್ಲೆಗ್ ಏರ್ ಕೊರುವೆರ್? 13ವಾ ಬೇಲೆದಾಯೆಲಾ, ರಡ್ಡ್ ಯಜಮಾನನ ಚಾಕ್ರಿ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಒರಿಯನ್ ಪಗೆ ಮಲ್ತ್‌ದ್ ಬೊಕ್ಕೊರಿಯನ್ ಪ್ರೀತಿ ಮಲ್ಪುವೆ. ಇಜ್ಜಾಂಡ ಒರಿಯನ್ ಎಡ್ಡೆ ಮಲ್ತೊಂದು ಬೊಕ್ಕೊರಿಯನ್ ತಾತ್ಸಾರ ಮಲ್ಪುವೆ. ನಿಕುಲು ದೇವೆರೆನ್ಲಾ ಕಾಸ್‌ನ್ಲಾ ಒಟ್ಟುಗು ಸೇವೆ ಮಲ್ಪೆರೆ ಆವಂದ್.”

ಯೇಸು ಪಂಡಿನ ಪಾತೆರೊಲು

(ಮತ್ತಾಯೆ 11:12,13; 5:31,32; ಮಾರ್ಕೆ 10:11,12)

14ಪರಿಸಾಯೆರ್ ಈ ಮಾತ ಪಾತೆರೊಲೆನ್ ಕೇಂಡ್ದ್ ತನ್ಕುಲು ಕಾಸ್‌ದಾಸೆ ಇತ್ತಿನಾಕುಲು ಆದಿತ್ತಿನೆಡ್ದ್ ಯೇಸುನು ಮಸ್ಕಿರಿ ಮಲ್ತೆರ್.

15ಅಪಗ ಆಯೆ ಅಕ್ಲೆಡ ಪಂಡಿನಿ ದಾನೆಂದ್ಂಡ, “ನರಮಾನಿಲೆ ಎದುರುಡು ನೀತಿವಂತೆರ್ ಅಂದ್‌ದ್ ನಿಕುಲು ತೋಜಾವೊನುನಾಕುಲು ನಿಕುಲು; ಆಂಡಲಾ ದೇವೆರ್ ನಿಕ್ಲೆ ಉಡಲ್‌ನ್ ತೆರಿದುಲ್ಲೆ. ನರಮಾನಿಲೆಡ್ ಮಿತ್ತ ಸ್ಥಾನದಾಯೆ ಅಂದ್‌ದ್ ಪನ್ಪಾವೊನುನವು ದೇವೆರೆ ದೃಷ್ಟಿಡ್ ಪೇಸಿಗೆ ಆದುಂಡು.

16“ನ್ಯಾಯಕಟ್ಟ್‌ಲಾ ಪ್ರವಾದಿಲುಲಾ ಯೋಹಾನನ ಮುಟ್ಟ ಮಾತ್ರ. ಐಡ್ದ್ ಬೊಕ್ಕ ದೇವೆರೆ ರಾಜ್ಯದ ಸುವಾರ್ತೆ ಸಾರಿಯೊಂದು ಉಂಡು. ಐಟ್ಟ್ ಮಾತೆರ್ಲಾ ಬಲತ್ಕಾರೊಡು ನೂರುವೆರ್. 17ಬಾನಲಾ ಭೂಮಿಲಾ ಆಳಿದ್ ಪೋಪಿನವು ಸುಲಭ. ಆಂಡ ನ್ಯಾಯಕಟ್ಟ್‌ದ ಒಂಜಿ ಸೊನ್ನೆಲಾ ಬೂರ್ದು ಪೋವಂದ್.

18“ತನ ಬೊಡೆದಿನ್ ಬುಡ್ದು ಬೊಕ್ಕೊರ್ತಿನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ. ಬೊಕ್ಕ ಕಂಡನಿ ಬುಡ್ತಿನಲೆನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.

ಐಶ್ಚರ್ಯವಂತೆ ಬೊಕ್ಕ ಲಾಜರೆ

19“ಒರಿ ಐಶ್ಚರ್ಯವಂತೆ ಇತ್ತೆ. ಆಯೆ ಪೊರ್ಲುದ ನೇರಲೆ ಅಂಗಿನ್ಲಾ ನಾರ್‌ಮಡಿತ ಕುಂಟುನು ತುತ್ತೊಂದು ಪ್ರತಿದಿನಲಾ ಗನಸ್ಥಿಕೆಡ್ ಸುಖ ಸಂತೋಷ ಪಡೆಯೊಂದಿತ್ತೆ. 20ಆಯನ ಇಲ್ಲದ ಬಾಕಿಲ್‌ದಲ್ಪ ಲಾಜರೆ ಪನ್ಪಿ ಒರಿ ನಟ್ಟುನಾಯೆ ಇತ್ತೆ. ಉಂಬೆ ಮೆಯಿ ನಿಲಿಕೆ ಗಜ್ಜಿ ಇತ್ತಿನಾಯೆ. 21ಐಶ್ಚರ್ಯವಂತನ ಮೇಜಿಡ್ದ್ ಬೂರಿನ ಮಡೆನ್ ತಿನೊಂದಿತ್ತೆ; ನಾಯಿಲು ಬತ್ತ್‌ದ್ ಆಯನ ಗಾಯೊಲೆನ್ ನಕ್ಕೊಂದಿತ್ತ. 22ಇಂಚ ಉಪ್ಪುನಗ ಒಂತೆ ಸಮಯೊಡ್ದು ಬೊಕ್ಕ ಆ ನಟ್ಟುನಾಯೆ ಸೈತೆ; ದೂತೆರ್ ಆಯನ್ ದೆತ್ತೊಂದು ಪೋದು ಅಬ್ರಹಾಮುನ ತಿಗಲೆಗ್ ಒರಗಾಯೆರ್. ಆ ಐಶ್ವರ್ಯವಂತೆಲಾ ಸೈತೆ; ಆಯನ ಸೈತಿ ಕರ್ಮಕ್ರಿಯ ಆಂಡ್. 23ಆಯೆ ಪಾತಾಳದುಲಯಿ ನರಕೊಂದು ಉಪ್ಪುನಗ ಕಣ್ಣ್ ದೆರ್ತ್ತ್‌ದ್ ದೂರೊಡ್ದು ಅಬ್ರಹಾಮುನ ತಿಗಲೆಗ್ ಒರಗೊಂದಿತ್ತಿ ಲಾಜರನ್ ತೂದು, 24‘ಅಮ್ಮೆರೇ, ಅಬ್ರಹಾಮೋ, ಎನ ಮಿತ್ತ್ ಕನಿಕರ ಮಲ್ತ್‌ದ್ ಲಾಜರನ್ ಕಡಪುಡು. ಆಯೆ ತನ ಕೊಡಿ ಬಿರೆಲ್‌ನ್ ನೀರ್‌ಡ್ ಮುರ್ಕಾದ್ ಎನ ನಾಲಯಿನ್ ಪಸೆ ಮಲ್ಪಡ್; ಈ ಉರಿಟ್ಟ್ ಸಂಕಟ ಪಡೆಯೊಂದುಲ್ಲೆ,’ ಅಂದ್‌ದ್ ಬುಲ್ತೆ. 25ಆಂಡ ಅಬ್ರಹಾಮು, ‘ಮಗಾ, ನಿನ ಬದ್‌ಕ್‌ಡ್ ಈ ಆಸೆ ಮಲ್ತಿನ ಮಾತ ಎಡ್ಡೆನ್ ಪಡೆತ; ಅಂಚೆನೇ ಲಾಜರೆಲಾ ಕಷ್ಟೊನು ಪಡೆತೆ ಪನ್ಪಿನೆನ್ ನೆನೆಪು ಮಲ್ಪುಲ. ಆಂಡ ಇತ್ತೆ ಆಯೆ ಮುಲ್ಪ ಸುಖ ಪಡೆಪೆ; ನಿಕ್ಕ್ ಅವುಲು ಸಂಕಟ. 26ಉಂದು ಮಾತ್ರತ್ತಂದೆ ಎಂಕುಲೆಗ್ಲಾ ನಿಕ್ಲೆಗ್ಲಾ ನಡುಟು ಒಂಜಿ ಕಣಿ ಉಂಡು; ಅವೆಡ್ದಾವರ ಈ ಕಡೆಡ್ದ್ ನಿಕ್ಲೆನ ಕಡೆಕ್ಕ್ ಪೋಯೆರ್ ಸಾದ್ಯ ಇಜ್ಜಿ; ಬೊಕ್ಕ ಆ ಕಡೆಡ್ದ್ ಎಂಕ್ಲೆನ ಕಡೆಕ್ಕ್ ಏರ್ಲಾ ದಾಂಟ್ಯೆರೆ ಸಾದ್ಯ ಇಜ್ಜಿ,’ ಪಂಡೆ. 27ಅಪಗ ಆಯೆ, ‘ಅಮ್ಮೆರೇ, ಅಂಚಾಂಡ ಲಾಜರನ್ ಎನ ಅಮ್ಮೆರೆನ ಇಲ್ಲಗ್ ಕಡಪುಡೊಡು ಅಂದ್‌ದ್ ನಿನಡ ನಟ್ಟೊನ್ವೆ. 28ಎಂಕ್ ಐನ್ ಜನ ಪಲಯೆ ಮೆಗ್ಯಾಡ್ಲು ಉಲ್ಲೆರ್; ಅಕುಲುಲಾ ಈ ಬೇನೆದ ಜಾಗ್‌ಗ್ ಬರಂದಿಲೆಕ್ಕ ಲಾಜರೆ ತಾನ್ ತೂಯಿನೆನ್ ಅಕ್ಲೆಗ್ ಮಾತ ತೆರಿಪಾವಡ್,’ ಅಂದ್‌ದ್ ನಟ್ಟೊನ್ವೆ. 29ಆಂಡ ಅಬ್ರಹಾಮು ಆಯಡ, ‘ಮೋಶೆನ ಬೊಕ್ಕ ಪ್ರವಾದಿಲೆ ಗ್ರಂಥೊಲು ಅಕ್ಲೆಡ ಉಂಡು; ಅವೆನ್ ಓದಡ್,’ ಪಂಡೆ. 30ಐಕ್ ಆಯೆ, ‘ಅಮ್ಮೆರೇ, ಅಬ್ರಹಾಮೋ, ಅಂಚತ್ತ್; ಸೈತಿನಕಲೆನ ಕಡೆಡ್ದ್ ಒರಿ ಅಕ್ಲೆನ ಕೈತಲ್‌ ಪೋಂಡ ಒಂಜಿ ವೇಳೆ ಅಕುಲು ದೇವೆರೆ ಕಡೆಕ್ಕ್ ತಿರ್ಗ್‌ದ್ವೆರ್,’ ಪಂಡೆ. 31ಅಬ್ರಹಾಮು ಆಯಡ, ‘ಅಕುಲು ಮೋಶೆನಲಾ ಪ್ರವಾದಿಲೆ ಪಾತೆರೊನ್ಲಾ ಕೇನುಜೆರ್ಡ ಸೈತ್‌ದ್ ಪೋದಿತ್ತಿನಾಯೆ ಒರಿ ಜೀವ ಆದ್ ಲಕ್ಕ್ಂಡಲಾ ಅಕುಲು ನಂಬಯೆರ್,’” ಅಂದ್‌ದ್ ಪಂಡೆ.

Currently Selected:

ಲೂಕೆ 16: ತುಳು

Highlight

Copy