ಲೂಕೆ 15
15
ತತ್ತ್ ಪೋಯಿನ ಕುರಿತ ಕತೆ
(ಮತ್ತಾಯೆ 18:12-14)
1ಯೇಸುನ ಬೋಧನೆನ್ ಕೇನಿಯೆರೆ ಮಸ್ತ್ ಸುಂಕದಾಕುಲುಲಾ ಪಾಪಿಲುಲಾ ಆಯನ ಕೈತಲ್ ಬರೊಂದಿತ್ತೆರ್. 2ಉಂದೆನ್ ತೂದು ಪರಿಸಾಯೆರ್ಲಾ ಶಾಸ್ತ್ರಿಲುಲಾ, “ಉಂಬೆ ಪಾಪಿಲೆನ್ ಸೇರಾವೊಂದು ಅಕ್ಲೆಡೊಪ್ಪ ವಣಸ್ ಮಲ್ಪುವೆ,” ಅಂದ್ದ್ ಗುಣುಗುಟೊಂದಿತ್ತೆರ್. 3ಅಪಗ ಯೇಸು ಅಕ್ಲೆಗ್ ಒಂಜಿ ಉಪಕತೆನ್ ಪಂಡೆ. 4ಅವು ದಾನೆಂದ್ಂಡ, “ನಿಕ್ಲೆಡ್ ಒರಿ ನರಮಾನಿಗ್ ನೂದು ಕುರಿಕುಲು ಉಪ್ಪುನಗ ಐಟ್ಟ್ ಒಂಜಿ ಕುರಿ ತತ್ತ್ದ್ ಪೋಂಡ ಆಯೆ ಸೊನ್ಪತೊಂರ್ಬೊನು ಕಾಡ್ಡ್ ಬುಡ್ದು ತತ್ತ್ ಪೋಯಿ ಕುರಿ ತಿಕ್ಕುನೆಟ್ಟ ನಾಡೊಂದು ಪೋಪುಜೆನಾ? 5ತಿಕ್ಕಿಬೊಕ್ಕ ಆಯೆ ಸಂತೋಷೊಡು ಅವೆನ್ ತನ ಪುಗೆಲ್ಡ್ ದೀವೊಂದು 6ಇಲ್ಲಗ್ ಬತ್ತ್ದ್ ಸ್ನೇಹಿತೆರೆನ್ ನಿರೆಕರೆತಾಕುಲೆನ್ ಸೇರಾವೊಂದು, ‘ತತ್ತ್ದ್ ಪೋಯಿ ಕುರಿ ತಿಕ್ಕ್ಂಡ್ ಎನಡೊಪ್ಪ ಸಂತೋಷ ಮಲ್ಪುಲೆ,’ ಪನ್ಪೆ. 7ಐತ ಲೆಕ್ಕನೆ ದೇವೆರೆ ಕಡೆಕ್ಕ್ ಬರಿಯೆರೆ ಅಗತ್ಯದಾಂತಿ ಸೊನ್ಪತೊಂರ್ಬ ಮಂದಿ ನೀತಿವಂತೆರೆಡ್ದ್ ಒರಿ ಪಾಪಿ ಪಶ್ಚಾತಾಪ ಪಡೆಂಡ ಪರಲೋಕೊಡು ಸಂತೋಷ ಉಂಡಾಪುಂಡು.
ದಕ್ಕ್ದ್ ಪೋಯಿನ ಪಾವೊಲಿ
8“ಅಂಚೆನೇ ಒಂಜಿ ಪೊಂಜೊವುಡ ಪತ್ತ್ ಪಾವೊಲಿಡ್ ಒಂಜಿ ಪಾವೊಲಿ ದಕ್ಕ್ದ್ ಪೋಂಡ, ತುಡರ್ ಪೊತ್ತಾದ್ ಇಲ್ಲನ್ ಅಡ್ತ್ದ್ ಅವು ತಿಕ್ಕುನೆಟ್ಟ ಜಾಗ್ರತೆಡ್ ನಾಡುವೊಲತ್ತಾ? 9ತಿಕ್ಕಿಬೊಕ್ಕ ಆಲ್ ತನ ಸ್ನೇಹಿತೆರೆನ್ ನಿರೆಕರೆತಾಕುಲೆನ್ ಸೇರಾವೊಂದು, ‘ದಕ್ಕ್ದ್ ಪೋಯಿ ಪಾವೊಲಿ ತಿಕ್ಕ್ಂಡ್ ನಿಕುಲು ಎನಡೊಪ್ಪ ಸಂತೋಷ ಮಲ್ಪುಲೆ,’ ಪನ್ಪಲತ್ತಾ? 10ಐತ ಲೆಕ್ಕ ಒರಿ ಪಾಪಿ ಪಶ್ಚಾತಾಪ ಪಡೆಂಡ ಪರಲೋಕೊಡು ದೇವೆರೆ ದೂತೆರೆ ಎದುರುಡು ಸಂತೋಷ ಆಪುಂಡು.” ಪಂಡ್ದ್ ನಿಕ್ಲೆಗ್ ಪನ್ಪೆ.
ತತ್ತ್ ಪೋಯಿನ ಮಗೆ
11ನನಲಾ ಆಯೆ ಪಂಡಿನಿ ದಾನೆಂದ್ಂಡ, “ಒರಿಯಗ್ ರಡ್ಡ್ ಜೋಕುಲಿತ್ತೆರ್. 12ಐಟ್ಟ್ ಎಲ್ಯಾಯೆ ಅಮ್ಮೆರೆಡ, ‘ಅಮ್ಮೆರೇ, ಆಸ್ತಿಡ್ ಎಂಕ್ ಬರೊಡಾಯಿ ಪಾಲ್ನ್ ಕೊರ್ಲ,’ ಅಂದ್ದ್ ಕೇನ್ನಗ ಅಮ್ಮೆ ಬದ್ಕ್ನ್ ಅಕ್ಲೆಗ್ ಪಾಲ್ ಮಲ್ತ್ದ್ ಕೊರಿಯೆ. 13ಒಂತೆ ದಿನೊಡ್ದು ಬೊಕ್ಕ ಆ ಎಲ್ಯ ಮಗೆ ಆ ಪಾಲ್ನ್ ದೆತ್ತೊಂದು ದೂರ ದೇಶೊಗು ಪೋಯೆ. ಅಲ್ಪ ಪಟಿಂಗತನೊಟು ಬದ್ಕ್ದ್ ತನಡ ಇತ್ತಿನೆನ್ ಮಾತ ಕಾಲಿ ಮಲ್ತೊಂಡೆ. 14ಇಂಚ ಆಯೆ ಗತಿದಾಂತಿನಾಯೆ ಆದುಪ್ಪುನಗ ಆ ದೇಶೊಡು ಮಲ್ಲ ಬರಗಾಲ ಬತ್ತ್ಂಡ್. 15ಅಪಗ ಆಯೆ ಆ ದೇಶದ ಒರಿಯ ಇಲ್ಲಡ್ ಬೇಲೆಗ್ ಸೇರೊಂಡೆ. ಆ ನರಮಾನಿ ಪಂಜಿಲೆನ್ ಮೇಪಾಯೆರೆ ಆಯನ್ ಕಂಡೊಗು ಕಡಪುಡಿಯೆ. 16ಆಯಗ್ ಮಸ್ತ್ ಬಡವು ಆನಗ ಪಂಜಿಲು ತಿನೊಂದಿತ್ತಿನ ತೌಡುನು ತಿಂದ್ದ್ ಬಡವುನು ತಗ್ಗಾವೆ ಅಂದ್ದ್ ಎನ್ನಿಯೆ; ಆಂಡ ತಿನಿಯೆರೆ ಏರ್ಲಾ ಆಯಗ್ ದಾಲಾ ಕೊರ್ಜೆರ್. 17ಅಪಗ ಆಯಗ್ ಬುದ್ಧಿ ಬತ್ತ್ದ್ ಆಯೆ, ‘ಎನ ಅಮ್ಮೆರೆ ಇಲ್ಲಡ್ ಏತೋ ಜನ ಬೇಲೆದಾಕುಲೆಗ್ ಬೋಡಾಯಿನಾತ್ ವಣಸ್ ಉಂಡು, ಯಾನ್ ಮುಲ್ಪ ಬಡವುಡು ಸೈಯೊಂದುಲ್ಲೆ. 18ಯಾನ್ ಲಕ್ಕ್ದ್ ಎನ ಅಮ್ಮೆರೆನ ಕೈತಲ್ ಪೋದು, “ಅಮ್ಮೆರೇ, ಪರಲೋಕದ ದೇವೆರೆಗ್ಲಾ ನಿಕ್ಕ್ಲಾ ವಿರೋಧಾದ್ ಪಾಪ ಮಲ್ತ್ದೆ; ನನ ಯಾನ್ ನಿನ ಮಗೆ ಅಂದ್ದ್ ಲೆಪ್ಪಾವೊನಿಯೆರೆ ಯೋಗ್ಯತೆ ಎಂಕಿಜ್ಜಿ, 19ಎನನ್ ನಿನ ಬೇಲೆದಾಕುಲೆಡ್ ಒರಿಯಲೆಕ್ಕ ದೀವೊನ್ಲ,” ಅಂದ್ದ್ ಪನ್ಪೆ.’ 20ಅಂಚ ಎನ್ನೊಂದು ಲಕ್ಕ್ದ್ ತನ ಅಮ್ಮೆರೆನ ಕೈತಲ್ಗ್ ಬತ್ತೆ. ಆಂಡ ಆಯೆ ನನಲಾ ದೂರೊಡು ಉಪ್ಪುನಗ ಅಮ್ಮೆ ಆಯನ್ ತೂದು ಉಡಲ್ ಕರಗ್ದ್ ಪಾರ್ಪೋದು ಆಯನ್ ಅರಾದ್ ಪತ್ತ್ದ್ ಆಯಗ್ ಮುತ್ತ ಕೊರಿಯೆ. 21ಆಂಡ ಮಗೆ ಆಯಗ್, ‘ಅಮ್ಮೆರೇ,’ ‘ಪರಲೋಕದ ದೇವೆರೆ ವಿರೋಧಲಾ ನಿನ ವಿರೋಧಲಾ ಪಾಪ ಮಲ್ತ್ದೆ; ಯಾನ್ ನಿನ ಮಗೆ ಅಂದ್ದ್ ಪನಿಯೆರೆ ಯೋಗ್ಯತೆ ಎಂಕಿಜ್ಜಿ,’ ಅಂದ್ದ್ ಪಂಡೆ. 22ಆಂಡ ಅಮ್ಮೆ ತನ ಬೇಲೆದಾಕುಲೆನ್ ಲೆತ್ತ್ದ್, ‘ಮಗಕ್ಕ್ ಎಡ್ಡೆಂತಿನ ಅಂಗಿನ್ ತುತ್ತಾಲೆ. ಉಂಬ್ಯನ ಕೈಕ್ ಉಂಗಿಲ ಪಾಡ್ಲೆ. ಕಾರ್ಗ್ ಜೋಡು ಪಾಡ್ಲೆ. 23ಚರ್ಬಿದ ಕುರಿ ಕಡ್ಪುಲೆ, ಪರ್ಬ ಮಲ್ಪುಗ, ಸಂತೋಷ ಮಲ್ಪುಗ. 24ಈ ಮಗೆ ಸೈತ್ ಪೋದಿತ್ತೆ, ಇತ್ತೆ ಆಯೆ ಕುಡ ಬದ್ಕ್ದ್ ಬೈದೆ; ಪೋಲಿ ಪೋದಿತ್ತೆ, ತಿಕ್ಕಿಯೆ,’ ಅಂದ್ದ್ ಪಂಡೆ. ಬೊಕ್ಕ ಅಕುಲು ಸಂತೋಷ ಮಲ್ಪೆರೆ ಸುರು ಮಲ್ತೆರ್. 25ಆ ಪೊರ್ತುಡು ಆಯನ ಮಲ್ಲ ಮಗೆ ಕಂಡೊಡು ಕೆಲಸೊಡು ಇತ್ತೆ. ಆಯೆ ಇಲ್ಲ್ ಮುಟ್ಟುನಗ ವಾದ್ಯೊನ್ಲಾ ನಲಿಪುನೆನ್ಲಾ ಕೇಂಡೆ. 26ಬೇಲೆದಾಕುಲೆಡ, ‘ಉಂದು ದಾದ ಆವೊಂದುಂಡು?’ ಅಂದ್ದ್ ಕೇಂಡೆ. 27ಐಕ್ ಬೇಲೆದಾಯೆ ಆಯಗ್, ‘ನಿನ ಮೆಗ್ಯೆ ಬೈದೆ; ಆಯೆ ಎಡ್ಡೆಡ್ ಬತ್ತಿನೆಕ್ಕ್ ನಿನ ಅಮ್ಮೆ ಚರ್ಬಿದ ಕುರಿ ಕಡ್ಪಾದೆ,’ ಪಂಡೆ. 28ಉಂದೆನ್ ಕೇಂಡ್ದ್ ಆಯಗ್ ಕೋಪ ಬತ್ತ್ದ್ ಇಲ್ಲದುಲಯಿ ಪೋವಂದೆ ಉಂತಿಯೆ. ಅಪಗ ಆಯನ ಅಮ್ಮೆ ಪಿದಾಯಿ ಬತ್ತ್ದ್ ಆಯಡ ಉಲಯಿ ಬರಿಯೆರೆ ನಟ್ಟೊಂಡೆ. 29ಆಂಡ ಆಯೆ ತನ ಅಮ್ಮೆರೆಗ್, ‘ತೂಲ, ಈತ್ ವರ್ಸ ಚಾಕ್ರಿದಾಯಲೆಕ್ಕ ನಿಕ್ಕ್ ಸೊಂದಿಯೆ, ಬೊಕ್ಕ ಯಾನ್ ನಿನ ಅಪ್ಪಣೆನ್ ಏಪಲಾ ಮೀರ್ದಿಜಿ. ಆಂಡ ಎಂಕ್ ಎನ ಸ್ನೇಹಿತೆರೆಡೊಪ್ಪ ಸಂತೋಷ ಮಲ್ಪೆರೆ ಒಂಜಿ ಏಡ್ನಾಂಡಲಾ ಕೊರ್ತುಜ. 30ಆಂಡ ಈ ನಿನ ಮಗೆ ಸೂಳೆಲೆನ್ ಕಟ್ಟೊಂದು ನಿನ ಬದ್ಕ್ನ್ ಹಾಳ್ ಮಲ್ತ್ ಬುಡ್ತಿನಾಯಗ್ ಚರ್ಬಿದ ಕುರಿ ಕಡ್ಪಾಯ,’ ಪಂಡೆ. 31ಐಕ್ ಅಮ್ಮೆ, ‘ಮಗಾ,’ ‘ಈ ಏಪಲಾ ಎನಡೊಪ್ಪ ಉಲ್ಲ, ಎನ್ನವು ಮಾತಲಾ ನಿನ್ನವೇ. 32ಆಂಡ ಉಲ್ಲಾಸ ಮಲ್ಪುನವು ಸಂತೋಷ ಪಡೆಪಿನವು ನ್ಯಾಯದವೇ. ದಾಯೆ ಪಂಡ ಈ ನಿನ ಮೆಗ್ಯೆ ಸೈತ್ ಪೋದಿತ್ತೆ, ಇತ್ತೆ ಬದ್ಕ್ದ್ ಬೈದೆ; ಪೋಲಿ ಪೋದಿತ್ತೆ, ತಿಕ್ಕಿಯೆ ಅಂದ್ದ್ ಪಂಡೆ.’”
Currently Selected:
ಲೂಕೆ 15: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
