ಲೂಕೆ 11

ಯೇಸು ಪ್ರಾರ್ಥನೆ ಮಲ್ಪೆರೆ ಕಲ್ಪಾವುನವು

(ಮತ್ತಾಯೆ 6:9-13; 7:7-11)

1ಯೇಸು ಒಂಜಿ ಜಾಗ್‌ಡ್ ಪ್ರಾರ್ಥನೆ ಮಲ್ತ್‌ದ್ ಮುಗಿಪುನಗ ಆಯನ ಶಿಷ್ಯೆರೆಡ್ ಒರಿ ಕೇನ್ವೆ, “ಕರ್ತವ, ಯೋಹಾನೆ ತನ ಶಿಷ್ಯೆರೆಗ್ ಕಲ್ಪಾಯಿ ಲೆಕ್ಕ ಎಂಕುಲೆಗ್ಲಾ ಪ್ರಾರ್ಥನೆ ಮಲ್ಪುನೆನ್ ಕಲ್ಪಾಲ,” ಅಂದ್‌ದ್ ಪಂಡೆ. 2ಯೇಸು ಅಕ್ಲೆಗ್, “ನಿಕುಲು ಪ್ರಾರ್ಥನೆ ಮಲ್ಪುನಗ, ‘ಪರಲೋಕೊಡುಪ್ಪು ಎಂಕುಲೆ ಅಮ್ಮೆರೇ, ನಿನ ಪುದರ್ ಪರಿಶುದ್ಧ ಆವಡ್. ನಿನ ರಾಜ್ಯ ಬರಡ್. 3ಎಂಕುಲೆ ದಿನದಿನತ ಪಡಿನ್ ಪ್ರತಿ ದಿನಲ ಕೊರ್ಲ. 4ಎಂಕ್ಲೆಗ್ ತಪ್ಪು ಮಲ್ತಿನಾಕುಲೆಗ್ ಪ್ರತಿ ಒರಿಯನ್ ಎಂಕುಲು ಮಾಪು ಮಲ್ಪುಲೆಕ್ಕ, ಎಂಕ್ಲೆನ ಪಾಪೊಲೆನ್ಲಾ ಮಾಪು ಮಲ್ಪುಲ. ಎಂಕ್ಲೆನ್ ಶೋಧನೆದುಲಯಿ ಸೇರಾವಂದೆ ತಪ್ಪಾಲ,’” ಅಂದ್‌ದ್ ಪಂಡೆ.

5ಬೊಕ್ಕ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ನಿಕ್ಲೆಡ್ ಒರಿಯಗ್ ಸ್ನೇಹಿತೆ ಉಪ್ಪುನಗ, ಆಯೆ ಮದ್ಯ ರಾತ್ರೆಡ್ ಆಯ ಕೈತಲ್‌ ಪೋದು, ‘ಅಣ್ಣಾ, ಎಂಕ್ ಮೂಜಿ ರೊಟ್ಟಿಲೆನ್ ಸಾಲ ಕೊರ್ಲ. 6ಎನ ಸ್ನೇಹಿತೆ ಒರಿ ಪ್ರಯಾಣ ಮಲ್ತ್‌ದ್ ಎನ ಕೈತಲ್‌ ಬೈದೆ; ಆಯಗ್ ವಣಸ್ ಮಲ್ಪಾವೆರೆ ಎನಡ ದಾಲಾ ಇಜ್ಜಿ!’ ಅಂದ್‌ದ್ ಪನ್ನಗ 7ಆ ಸ್ನೇಹಿತೆ, ‘ಎಂಕ್ ತೊಂದರೆ ಕೊರೊಡ್ಚಿ; ಇತ್ತೆ ಬಾಕಿಲ್ ಪಾಡ್ದೆ; ಎನ ಎಲ್ಯ ಜೋಕುಲು ಎನಡೊಪ್ಪ ಜೆಯಿದೆರ್; ಯಾನ್ ಲಕ್ಕ್‌ದ್ ನಿಕ್ಕ್ ಕೊರಿಯೆರೆ ಆವಂದ್,’ ಅಂದ್‌ದ್ ಉಲಯಿಡ್ದೇ ಉತ್ತರ ಕೊರಿಯೆಡಲಾ ಕೊರೊಲಿ. 8ಆಂಡ ಸ್ನೇಹಿತಗಾದ್ ಲಕ್ಕ್‌ದ್ ಕೊರಂದೆ ಇತ್ತ್ಂಡಲಾ ಆಯನ ಕಿರಿಕಿರಿತ ದಿಸೆಟ್ಟ್ ಲಕ್ಕ್‌ದ್ ಕೇಂಡಿನಾತ್ ಆಯಗ್ ಕೊರ್ಪೆ. 9ಅಂಚೆನೇ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ: ಕೇನೊನ್ಲೆ, ಅಪಗ ನಿಕ್ಲೆಗ್ ಒದಗುಂಡು; ನಾಡ್‌ಲೆ, ಅಪಗ ನಿಕ್ಲೆಗ್ ತಿಕ್ಕುಂಡು; ಬೊಟ್ಟುಲೆ, ಅಪಗ ನಿಕ್ಲೆಗ್ ಜಪ್ಪುಂಡು. 10ದಾಯೆಗಂದ್ಂಡ ಕೇನುನ ಪ್ರತಿಯೊರಿಯಗ್ಲಾ ಕೊರ್ಪುಂಡು, ನಾಡುನಾಯಗ್ ತಿಕ್ಕುಂಡು, ಬೊಟ್ಟುನಾಯಗ್ ಜಪ್ಪುಂಡು. 11ನಿಕ್ಲೆಡ್ ಅಮ್ಮೆ ಆದಿತ್ತಿನಾಯೆ ಮೀನ್ ಕೇನುನ ಮಗಕ್ಕ್ ಮೀನ್ ಕೊರಂದೆ ಉಚ್ಚುನು ಕೊರುವೆನಾ? 12ಅತ್ತ್‌ಡ ತೆತ್ತಿನ್ ಕೇಂಡ್‌ಂಡ ಚೇಲ್‌ನ್ ಕೊರ್ಪೆನಾ? 13ಅಂಚಾಂಡ ಪಡಿಕೆಂತಿನಕುಲಾಯಿ ನಿಕುಲು ನಿಕ್ಲೆನ ಜೋಕುಲೆಗ್ ಎಡ್ಡೆ ವಸ್ತುಲೆನ್ ಕೊರ್ಪಿನಕುಲಾಂಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ತನಡ ಕೇನುನಾಕುಲೆಗ್ ಏತೋ ಹೆಚ್ಚಾದ್ ಪರಿಶುದ್ಧಾತ್ಮನ ವರೊಕ್ಲೆನ್ಲಾ ಕೊರುವೆತ್ತಾ?” ಅಂದ್‌ದ್ ಪಂಡೆ.

ಯೇಸು ಬೊಕ್ಕ ಬೆಲ್ಜೆಬೂಲೆ

(ಮತ್ತಾಯೆ 12:22-30; ಮಾರ್ಕೆ 3:20-27)

14ಒಂಜಿ ದಿನ ಆಯೆ ಬಾಯಿಬರಂದಿ ದೆವ್ವೊನು ಬುಡ್ಪಾವೊಂದಿತ್ತೆ. ಆ ದೆವ್ವ ಬುಡ್ದು ಪೋಯಿ ಬೊಕ್ಕ ಪೊಟ್ಟೆ ಪಾತೆರಿಯೆ; ಐಕ್ ಜನೊಕುಲು ಅಚ್ಚಿರ ಆಯೆರ್. 15ಆಂಡ ಅಕ್ಲೆಡ್ ಕೆಲೆವೆರ್, “ಇಂಬೆ ದೆವ್ವೊಲೆ ಮುಖ್ಯಸ್ಥೆ ಆಯಿ ಬೆಲ್ಜೆಬೂಲಡ್ದ್ ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪಂಡೆರ್. 16ಬೇತೆ ಕೆಲೆವೆರ್ ಆಯನ್ ಪರೀಕ್ಷೆ ಮಲ್ಪೆರೆಗಾದ್ ಈ ಬಾನೊಡು ಒಂಜಿ ಗುರ್ತೊನು ತೋಜಾದ್ ಕೊರೊಡು ಅಂದ್‌ದ್ ಯೇಸುಡ ಕೇಂಡೆರ್. 17ಆಯೆ ಅಕ್ಲೆನ ಆಲೋಚನೆಲೆನ್ ತೆರಿದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ತನ್ಕುಲೆ ಉಲಯಿ ಭೇದ ಇತ್ತಿ ರಾಜ್ಯೊಲು ಹಾಳಾಪುಂಡು. 18ಅಂಚೆನೇ ಸೈತಾನೆ ತನಡನೇ ಭೇದ ಪುಟ್ಟಾವೊಂಡೆಡ ಆಯನ ರಾಜ್ಯ ಎಂಚ ಒರಿವು? ನಿಕುಲು ಬೆಲ್ಜೆಬೂಲನ ಬಲೊಡ್ದು ಯಾನ್ ದೆವ್ವೊಲೆನ್ ಬುಡ್ಪಾವೆ ಪನ್ಪರ್. 19ಯಾನ್ ಬೆಲ್ಜೆಬೂಲನ ಬಲೊಡ್ದು ದೆವ್ವೊಲೆನ್ ಬುಡ್ಪಾವುನಾಂಡ ನಿಕ್ಲೆನಾಕುಲು ಏರೆನ ಬಲೊಟು ಬುಡ್ಪಾವೆರ್? ಅಂಚಾಯಿನೆಡ್ದ್ ಅಕುಲೇ ನಿಕ್ಲೆಗ್ ನ್ಯಾಯತೀರ್ಪು ಮಲ್ಪುನಾಕುಲು ಆಪೆರ್. 20ಯಾನ್ ದೇವೆರೆ ಬಲೊಡ್ದೇ ದೆವ್ವೊಲೆನ್ ಬುಡ್ಪಾವುನಾಂಡ ದೇವೆರೆ ರಾಜ್ಯ ನಿಕ್ಲೆ ಕೈತಲೇ ಬತ್ತ್‌ಂಡತ್ತಾ. 21ಒರಿ ಬಲವಂತೆ ಮಾತ ಆಯುಧೊಲೆನ್ ಪತ್ತೊಂದು ತನ ಇಲ್ಲನ್ ಕಾತೊಂದಿತ್ತೆಡ ಆಯನ ಇಲ್ಲದ ವಸ್ತುಲು ಜೋಕೆಡೇ ಉಪ್ಪುಂಡು. 22ಆಂಡ ಆಯಡ್ದ್ ಬಲವಂತೆ ಆಯನ್ ಸೋಪಾಯಿ ಬೊಕ್ಕ ಸುರುತ್ತಾಯೆ ನಂಬೊಂದು ಇತ್ತಿ ಆಯುಧೊಲೆನ್ ತಾನ್ ದೆತ್ತೊಂದು ತಾನ್ ಲೂಟಿ ಮಲ್ತಿನೆನ್ ಪಟ್ಟ್‌ದ್ ಕೊರ್ಪೆ.

23“ಎನ ಪಕ್ಷ ಪತ್ತಂದಿನಾಯೆ ಎಂಕ್ ವಿರೋಧಿ. ಎನ ಜತೆಟ್ ಸೇರಂದಿನಾಯೆ ಚಲ್ಲಾಪಿಲ್ಲಿ ಮಲ್ಪುನಾಯೆ ಆದುಲ್ಲೆ.”

24“ದೆವ್ವ ನರಮಾನಿನ್ ಬುಡ್ದು ಪೋಯಿ ಬೊಕ್ಕ ನಿಲೆ ನಾಡೊಂದು ನೀರ್ ಇಜ್ಜಾಂದಿ ಜಾಗ್‌ಡ್ ತಿರ್ಗುವ, ನಿಲೆ ತಿಕ್ಕಂದಿನೆಡ್ದ್ ಅವು ‘ಯಾನ್ ಬುಡ್ದು ಬೈದಿನ ಎನ ಇಲ್ಲಗ್ ಪಿರ ಪೋಪೆ ಅಂದ್‌ದ್ ಪನೊಂದು ಬರ್ಪ,’ 25ಆ ಇಲ್ಲ್ ಅಡ್ತ್‌ದ್ ಸಿಂಗಾರ ಮಲ್ತಿನೆನ್ ತೂದು ಕುಡ ಪೋದು 26ತನಡ್ದ್ ಪಡಿಕೆಂತಿನ ಬೇತೆ ಏಳ್ ದೆವ್ವೊಲೆನ್ ಲೆತ್ತೊಂದು ಬರ್ಪುಂಡು. ಐಕುಲು ಉಲಯಿ ಪೊಗ್ಗುದು ಅಲ್ಪ ವಾಸ ಮಲ್ಪುವ. ಅಪಗ ಆ ನರಮಾನಿನ ಕಡೆತ ಸ್ಥಿತಿ ದುಂಬುಡ್ದು ಪಡಿಕೆಂತಿನವು ಆದುಪ್ಪುಂಡು,” ಪಂಡೆ.

ನಿಜ ಸಂತೋಷ

27ಯೇಸು ಈ ಪಾತೆರೊಲೆನ್ ಪನೊಂದುಪ್ಪುನಗ ಜನೊಕುಲೆ ನಡುಡ್ದು ಒಂಜಿ ಪೊಂಜೊವು, “ನಿನನ್ ತುಂಬೊಂಡಿ ಬಂಜಿಲಾ ಈ ಪರಿ ಮಿರೆಲಾ ಭಾಗ್ಯದವು!” ಅಂದ್‌ದ್ ಪಂಡಲ್.

28ಯೇಸು ಆಲೆಗ್ ಅಂಚ ಪನಡ, “ದೇವೆರೆ ಪಾತೆರೊನು ಕೇಂಡ್ದ್ ಐಕ್ ಸರಿಯಾದ್ ನಡಪುನಾಕುಲೆ ಭಾಗ್ಯವಂತೆರ್,” ಪಂಡೆ.

ಯೆಹೂದ್ಯೆರೆನ ಬೇಡಿಕೆಗ್ ಪ್ರತ್ಯುತ್ತರ

(ಮತ್ತಾಯೆ 12:38-42)

29ಜನೊಕುಲು ಗುಂಪುಗುಂಪಾದ್ ಬರೊಂದುಪ್ಪುನಗ ಯೇಸು ಪನಿಯೆರೆ ಸುರು ಮಲ್ತಿನವು ದಾನೆಂದ್ಂಡ, “ಈ ಸಂತಾನ ಹಾಳ್ ಸಂತಾನನೇ; ಉಂದು ಗುರ್ತೊನು ತೂವೊಡು ಅಂದ್‌ದ್ ಬಯಕುಂಡು; ಆಂಡ ಯೋನಗ್ ಆಯಿನ ಗುರ್ತನೇ ಅತ್ತಂದೆ ಬೇತೆ ಒವುಲಾ ಗುರ್ತ ನೆಕ್ಕ್ ತಿಕ್ಕಂದ್,” 30ಎಂಚಂದ್ಂಡ ಯೋನೆ ನಿನವೆದಾಕುಲೆಗ್ ಒಂಜಿ ಗುರ್ತ ಆದಿತ್ತೆನಾ, ಅಂಚೆನೇ ನರಮಾನಿ ಮಗೆಲಾ ಈ ಸಂತಾನೊಗು ಒಂಜಿ ಗುರ್ತ ಆದುಪ್ಪುವೆ. 31ತೆನ್‌ಕಯಿ ದೇಶದ ರಾಣಿ ನ್ಯಾಯತೀರ್ಪುನಪಗ ಈ ಸಂತಾನದೊಟ್ಟುಗು ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನ್ಪಲ್; ಆಲ್ ಸೊಲೊಮೋನನ ಗೇನೊನು ತೆರಿಯೊನಿಯೆರೆ ಭೂಮಿದ ಕಟ್ಟಕಡೆಡ್ದ್ ಬತ್ತಲ್; ಆಂಡ ಮುಲ್ಪ ಸೊಲೊಮೋನಡ್ದ್‌ಲಾ ಮಲ್ಲಾಯೆ ಉಲ್ಲೆ. 32ನ್ಯಾಯತೀರ್ಪುಡು ನಿನವೆ ಪಟ್ಟಣದಾಕುಲು ಈ ಸಂತಾನದೊಪ್ಪ ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನುವೆರ್. ಅಕುಲು ಯೋನೆ ಸಾರಿನ ಪಾತೆರೊಲೆನ್ ಕೇಂಡ್ದ್ ಪಶ್ಚಾತಾಪ ಪಡೆಯೆರ್. ಆಂಡ ಮುಲ್ಪ ಯೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.

ಶರೀರದ ಬೊಲ್ಪು

(ಮತ್ತಾಯೆ 5:15; 6:22,23)

33“ಏರ್ಲಾ ತುಡರ್‌ನ್ ಪೊತ್ತಾದ್ ಮದೆಟಾವಡ್ ಕಲಸೆದುಲಯಿ ಆವಡ್ ದೀಪುಜೆರ್. ಇಲ್ಲದುಲಯಿ ಬರ್ಪಿನಾಕುಲೆಗ್ ಬೊಲ್ಪು ತೋಜುಲೆಕ್ಕ ದೀಪಕಂಬದ ಮಿತ್ತ್ ದೀಪೆರತ್ತಾ? 34ಕಣ್ಣ್ ಶರೀರೊಗು ತುಡರ್ ಆದುಂಡು. ನಿನ ಕಣ್ಣ್ ಸರ್ತ ಇತ್ತ್ಂಡ ನಿನ ಇಡೀ ಶರೀರಲಾ ಬೊಲ್ಪಾದುಪ್ಪುಂಡು. ಅವು ಹಾಳ್ ಆದಿತ್ತ್ಂಡ ನಿನ ಶರೀರಲಾ ಕತ್ತಲೆ ಆದುಪ್ಪುಂಡು. 35ಅಂಚಾದುಪ್ಪುನಗ ನಿನ ಉಲಯಿಡುಪ್ಪುನ ಬೊಲ್ಪು ಕತ್ತಲೆ ಆವಂದಿಲೆಕ್ಕ ಜಾಗ್ರತೆಡ್ ತೂವೊನ್ಲ. 36ನಿನ ಶರೀರ ಇಡೀ ಬೊಲ್ಪು ಆದಿತ್ತ್‌ದ್ ಒಂಜಿ ಭಾಗೊಡ್ಲಾ ಕತ್ತಲೆ ಆದುಪ್ಪಂದೆ ತುಡರ್‌ದ ಲೆಕ್ಕ ಎಡ್ಡೆ ಅರ್ಲ್‌ದ್ ಬೊಲ್ಪು ಕೊರ್ಪಿಲೆಕ್ಕನೇ ಬೊಲ್ಪಾದುಪ್ಪುಲ.”

ಪರಿಸಾಯೆರೆಗ್ ಎಚ್ಚರಿಕೆ ಕೊರ್ಪಿನವು

(ಮತ್ತಾಯೆ 23:1-36; ಮಾರ್ಕೆ 12:38-40)

37ಯೇಸು ಪಾತೆರೊಂದುಪ್ಪುನಗ ಒರಿ ಪರಿಸಾಯೆ ಆಯನ್ ವಣಸ್‌ಗ್ ಬರೊಡಂದ್‌ದ್ ಕೇಂಡೊನ್ನಗ ಆಯೆ ಉಲಯಿ ಪೋದು ವಣಸ್‌ಗ್ ಕುಲ್ಲಿಯೆ. 38ಆಂಡ ಪರಿಸಾಯೆರೆ ಪದ್ಧತಿ ಪ್ರಕಾರ ಯೇಸು ವಣಸ್‌ಡ್ದ್ ದುಂಬು ಕೈ ದೆಕ್ಕಂದೆ ವಣಸ್‌ಗ್ ಕುಲ್ಲಿನೆನ್ ತೂದು ಅಚ್ಚಿರ ಆಯೆರ್. 39ಕರ್ತವೆ ಆಯಗ್, “ಪರಿಸಾಯೆರಾಯಿ ನಿಕುಲು ಕಂಚಿದ ಬಟ್ಟಲ್ದ ಪಿದಾಯಿದ ಭಾಗೊನು ಮಾತ್ರ ದೆಕ್ಕುವರ್; ಆಂಡ ನಿಕ್ಲೆನ ಉಲಯಿದ ಭಾಗ ದುರಾಸೆಡ್ದ್‌ಲಾ ಹಾಳ್ ಬುದ್ಧಿಡ್ದ್‌ಲಾ ದಿಂಜಿದುಂಡು. 40ಬುದ್ಧಿದಾಂತಿನಾಕುಲೇ, ದೇವೆರ್ ಪಿದಯಿದ ಭಾಗೊನು ಮಲ್ತಿ ಲೆಕ್ಕನೆ ಉಲಯಿದ ಭಾಗೊನ್ಲಾ ಮಲ್ತ್‌ದೆ ಅತ್ತಾ? ಅಂದ್‌ದ್ ಪಂಡೆ. 41ಆಂಡಲಾ ಉಲಯಿ ಇತ್ತಿನೆನ್ ಬಡವೆರೆಗ್ ದಾನ ಮಲ್ಪುಲೆ; ಅಪಗ ಮಾತಲಾ ನಿಕ್ಲೆಗ್ ಶುದ್ಧಾದುಪ್ಪುಂಡು.

42“ಅಯ್ಯೋ ಪರಿಸಾಯೆರೇ, ನಿಕ್ಲೆನ ಗತಿ ದಾನೆಂದ್ ಪನೊಡು? ನಿಕುಲು ಪುದಿನ, ಮೆತ್ತೆ, ಸದಪು ಇಂಚಿತ್ತಿ ಮಾತ ಕಾಯಿಕಜಿಪುಲೆಡ್ದ್ ಪತ್ತೆಟ್ಟ್ ಒಂಜಿ ಪಾಲ್ ಕೊರ್ಪರ್ ಸರಿ; ಆಂಡ ನ್ಯಾಯೊನ್ಲಾ ದೇವೆರೆ ಪ್ರೀತಿನ್ಲಾ ಮದತ್‌ದ್ ಬುಡ್ತರ್ ಉಂದೆನ್ಲಾ ನಿಕುಲು ಮಲ್ಪೊಡಿತ್ತ್‌ಂಡ್ ಅವೆನ್ ಬುಡಿಯೆರೆ ಬಲ್ಲಿ.

43“ಅಯ್ಯೋ ಪರಿಸಾಯೆರೇ, ಸಭಾಮಂದಿರೊಡು ಮಲ್ಲಸ್ಥಾನೊಲು, ಅಂಗಡಿ ಸಾದಿಲೆಡ್ ವಂದನೆಲು ನಿಕ್ಲೆಗ್ ಇಷ್ಟ ಆದುಂಡು. 44ನಿಕ್ಲೆನ ಗತಿ ದಾನೆಂದ್ ಪನೊಡು? ನಿಕುಲು ನೆಲ ಸಮ ಆತಿ ಸಮಾಧಿದ ಲೆಕ್ಕ ಉಲ್ಲರ್; ಐತ ಮಿತ್ತ್ ನಡಪುನ ಜನೊಕುಲೆಗ್ ಅವು ಸಮಾಧಿ ಅಂದ್‌ದ್ ತೆರಿಯಂದ್.”

45ಉಂದೆನ್ ಕೇಂಡ್ದ್ ಒರಿ ನ್ಯಾಯಶಾಸ್ತ್ರಿ ಆಯಗ್, “ಬೋಧಕಾ, ಈ ಪಾತೆರೊಲೆನ್ ಪನ್ಪಿನೆಡ್ದ್ ಎಂಕ್ಲೆನ್ ಹಲ್ಕಿ ಮಲ್ತಿಲೆಕ್ಕ ಆಂಡ್,” ಅಂದ್‌ದ್ ಪನ್ನಗ 46ಯೇಸು ಅಕ್ಲೆಗ್, “ನ್ಯಾಯಶಾಸ್ತ್ರಿಲೇ, ನಿಕ್ಲೆನ ಗತಿನ್ ದಾನೆಂದ್ ಪನೊಡು? ನಿಕುಲು ಜನೊಕುಲೆ ಮಿತ್ತ್ ತುಂಬೆರೆ ತೀರಂದಿ ಪುದೆಕ್ಲೆನ್ ತುಂಬಾವರ್; ನಿಕುಲಾಂಡಲಾ ಆ ಪುದೆಕ್ಲೆನ್ ನಿಕ್ಲೆನ ಒಂಜಿ ಬಿರೆಲ್‌ಡ್ದ್‌ಲಾ ಮುಟ್ಟುಜರ್. 47ನಿಕ್ಲೆನ ಗತಿನ್ ದಾನೆಂದ್ ಪನೊಡು? ನಿಕುಲು ಪ್ರವಾದಿಲೆ ಸಮಾಧಿಲೆನ್ ಕಟ್ಟುವರ್; ಅಕ್ಲೆನ್ ಕೆರಿನಾಕುಲು ನಿಕ್ಲೆನ ಹಿರಿಯೆರ್; 48ಇಂಚ ಉಪ್ಪುನಗ ನಿಕ್ಲೆನ ಹಿರಿಯೆರ್ ಮಲ್ತಿನೆಕ್ಕ್ ನಿಕುಲೇ ಸಾಕ್ಷಿ ಆದುಲ್ಲರ್; ಅತ್ತಂದೆ ಅಕ್ಲೆನ ಬೇಲೆಲೆನ್ ನಿಕುಲು ಮಲ್ತಿಲೆಕ್ಕ ಆಂಡ್. ಅಕುಲು ಪ್ರವಾದಿಲೆನ್ ಕೆರಿಯೆರ್; ನಿಕುಲು ಗೋರಿಲೆನ್ ಕಟ್ಟುವರ್. 49ಅಂಚಾಯಿನೆಡ್ದಾವರ ದೇವೆರೆ ಬುದ್ಧಿ ಪನ್ಪಿನಿ ದಾನೆಂದ್ಂಡ, ‘ಯಾನ್ ಅಕ್ಲೆನ ಕೈತಲ್‌ ಪ್ರವಾದಿಲೆನ್ಲಾ ಅಪೊಸ್ತಲೆರೆನ್ಲಾ ಕಡಪುಡ್ವೆ. ಅಕ್ಲೆಡ್ ಕೆಲೆವೆರೆನ್ ಕೆರುವೆರ್, ಭಂಗಲಾ ಕೊರುವೆರ್.’ 50-51ಇಂಚ ಲೋಕದ ಆದಿಡ್ದ್ ಹೇಬೇಲ್‌ನ ನೆತ್ತೆರೆಡ್ದ್ ಸುರುವಾದ್ ಬಲಿಪೀಠದ ಬೊಕ್ಕ ದೇವಾಲಯದ ಮದ್ಯೊಡು ಕೆರ್ದ್ ಪಾಡಿ ಜಕರೀಯನ ನೆತ್ತೆರ್ ಮುಟ್ಟ ಮಾತ ಪ್ರವಾದಿಲೆನ ನೆತ್ತೆರ್‌‌ಲೆಗ್ಲಾ ಈ ಸಂತಾನದಾಕುಲೇ ಉತ್ತರ ಕೊರೊಡು. ಅಂದ್, ಈ ಸಂತಾನದಾಕುಲೇ ಉತ್ತರ ಕೊರೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ.

52“ಅಯ್ಯೋ ನ್ಯಾಯಶಾಸ್ತ್ರಿಲೇ, ಗೇನೊಗು ಸಾದನ ಆದುಪ್ಪು ಬೀಗದ ಕೈನ್ ದೆತ್ತ್ ದೀತರ್; ನಿಕುಲಾಂಡಲಾ ಉಲಯಿ ಪೋಯಿಜರ್; ಪೋಪಿನಾಕುಲೆಗ್ಲಾ ಅಡ್ಡಿ ಮಲ್ಪುವರ್,” ಅಂದ್‌ದ್ ಪಂಡೆ.

53ಬೊಕ್ಕ ಆಯೆ ಅಲ್ತ್‌ಡ್ದ್ ಬುಡ್ದು ಬನ್ನಗ ಶಾಸ್ತ್ರಿಲು ಬೊಕ್ಕ ಪರಿಸಾಯೆರ್ ಆಯನ್ ಮಸ್ತ್ ವಿರೋಧ ಮಲ್ತ್‌ದ್ ಆಯಡ ತರತರತ ಪ್ರಶ್ನೆ ಕೇನೊಂದಿತ್ತೆರ್. 54ಆಯನ ಬಾಯಿ ಪಾತೆರೊಡು ತಪ್ಪು ತಿಕ್ಕೊಡು ಅಂದ್‌ದ್ ಕಾತೊಂದಿತ್ತೆರ್.

Currently Selected:

ಲೂಕೆ 11: ತುಳು

Highlight

Copy