ಯೋಹಾನೆ 21
21
ಯೇಸು ಶಿಷ್ಯೆರೆಗ್ ಕುಡೊರ ತೋಜಿದ್ ಬರ್ಪಿನವು
1ಐಡ್ದ್ ಬೊಕ್ಕ ಯೇಸು ತಿಬೇರಿಯ ಕಡಲ್ದ ಬರಿಟ್ಟ್ ಆಯನ ಶಿಷ್ಯೆರೆಗ್ ಕುಡ ತೋಜಾವೊಂಡಿನ ರೀತಿ ಎಂಚಂದ್ಂಡ. 2ಸೀಮೋನು ಪೇತ್ರೆ ದಿದುಮೆ ಪನ್ಪಿ ತೋಮೆ ಗಲಿಲಾಯ ಕಾನಾ ಊರುದ ನತಾನಿಯೇಲೆ ಜೆಬೆದಾಯನ ಜೋಕುಲು ಆಯ ಶಿಷ್ಯೆರೆಡ್ ಕುಡ ಇರ್ವೆರ್ ಸೇರ್ದಿತ್ತೆರ್. 3ಅಕ್ಲೆಡ ಸೀಮೋನು ಪೇತ್ರೆ, “ಯಾನ್ ಮೀನ್ ಪತ್ತೆರೆ ಪೋಪೆ.” ಪನ್ನಗ ಅಕುಲು, “ಎಂಕುಲುಲಾ ನಿನಡೊಪ್ಪ ಬರ್ಪ.” ಪಂಡೆರ್. ಅಕುಲು ಪಿದಾಡ್ದ್ ಓಡ ಮಿತ್ತಾರಿಯೆರ್. ಆಂಡ ಆ ರಾತ್ರೆಡ್ ಒಂಜಿ ಮೀನ್‌ಲಾ ತಿಕ್ಕಿಜಿ 4ಪುಲ್ಯ ಆನಗ ಯೇಸು ಕಡಲ್ದ ಕರೆಟ್ ಉಂತೊಂದಿತ್ತೆ. ಆಂಡ ಶಿಷ್ಯೆರೆಗ್ ಆಯೆ ಯೇಸು ಅಂದ್‌ದ್ ಗೊತ್ತಾಯಿಜಿ. 5ಅಪಗ ಯೇಸು ಅಕ್ಲೆಡ, “ಜೋಕುಲೇ, ನಿಕ್ಲೆಗ್ ವಣಸ್‌ಗ್ ದಾಲಾ ಇಜ್ಜಾ?” ಅಂದ್‌ದ್ ಕೇನ್ನಗ, ಅಕುಲು “ಇಜ್ಜಿ” ಅಂದ್‌ದ್ ಉತ್ತರ ಕೊರಿಯೆರ್.
6ಆಯೆ ಅಕ್ಲೆಡ, “ನಿಕುಲು ಓಡದ ಬಲತ್ತ ಮರ್ಗಿಲ್‌ಡ್ ಬಲೆ ಬೀತರ್ಡ ನಿಕ್ಲೆಗ್ ಮೀನ್ ತಿಕ್ಕುಂಡು,” ಪಂಡೆ. ಅಕುಲು ಅಂಚೆನೇ ಬಲೆ ಪಾಡ್ನಗ ಮೀನ್ ಹೆಚ್ಚ್ ತಿಕ್ಕಿನೆಡ್ದ್, ಬಲೆನ್ ಮಿತ್ತ್ ಒಯ್ಪರೆ ಅಕ್ಲೆಗ್ ಆಯಿಜಿ.
7ಅಪಗ ಯೇಸುನ ಪ್ರೀತಿದ ಶಿಷ್ಯೆ ಪೇತ್ರಡ, “ಆಯೆ ಕರ್ತವೆ!” ಪಂಡೆ. ಆಯೆ ಕರ್ತವೆ ಪಂಡ್ದ್ ಕೇಂಡ್ದ್ ಸೀಮೋನು ಪೇತ್ರೆ ಮೆಯಿತ ಮಿತ್ತ್ ಕುಂಟು ಇಜ್ಜಂದಿನೆಡ್ದ್ ಅಂಗಿನ್ ಸುತ್ತೊಂದು ಯೇಸು ಕೈತಲ್‌ ಪೋಯೆರೆ ಕಡಲ್‌ಗ್ ಲಾಗಿಯೆ. 8ಕಡಲ್ದ ಕರೆ ದೂರ ಉಪ್ಪಂದೆ ಹೆಚ್ಚಿಕಡಿಮೆ #21:8 ಸುಮಾರ್ 100 ಮೀಟರ್ದಾತ್ಇರ್ನೂದು ಮೊರಂಗೆದಾತ್‌ ದೂರ ಇತ್ತಿನೆಡ್ದ್ ಬಾಕಿದ ಶಿಷ್ಯೆರ್‌ಲು ಮೀನ್ ದಿಂಜಿದಿ ಆ ಬಲೆನ್ ಒಯ್ತೊಂದು ಓಡೊಡೇ ಬತ್ತೆರ್. 9ಅಕುಲು ಓಡೊಡ್ದು ಕರೆಕ್ ಜಪ್ಪುನಗ ಅರ್ಲೊಂದಿತ್ತಿ ಗೆಂಡೊನ್ಲಾ ಐತ ಮಿತ್ತ್ ದೀದಿತ್ತಿ ಮೀನ್ ಬೊಕ್ಕ ರೊಟ್ಟಿನ್ಲಾ ತೂಯೆರ್. 10ಅಪಗ ಯೇಸು ಅಕ್ಲೆಡ, “ಇತ್ತೆ ನಿಕುಲು ಪತ್ತಿನ ಮೀನ್‌ಲೆಡ್ ಕೆಲೆವೆನ್ ಕನಲೆ,” ಪಂಡೆ 11ಸೀಮೋನು ಪೇತ್ರೆ ಓಡ ಮಿತ್ತಾರ್ದ್ ಬಲೆನ್ ಕರೆಕ್ ಒಯ್ತೊಂದು ಬತ್ತೆ. ಐಟ್ಟ್ ನೂತ್ತ ಐವತ್ತ ಮೂಜಿ ಮಲ್ಲ ಮಲ್ಲ ಮೀನ್‌ಲು ದಿಂಜಿದಿತ್ತ್ಂಡ್. ಆತ್ ಮೀನ್‌ಲು ಇತ್ತ್ಂಡಲಾ ಬಲೆ ಪರಿದಿಜಿ. 12ಯೇಸು ಅಕ್ಲೆಡ, “ಬತ್ತ್‌ದ್ ಉನ್ಲೆ,” ಪಂಡೆ. ಶಿಷ್ಯೆರ್ ಆಯೆ ಕರ್ತವೆ, ಪಂಡ್ದ್ ತೆರಿದಿತ್ತಿನೆಡ್ದ್, “ಈ ಏರ್?” ಅಂದ್‌ದ್ ಕೇನಿಯೆರೆ ಅಕ್ಲೆಡ್ ಏರ್ಲಾ ಧೈರ್ಯ ಮಲ್ತ್‌ಜೆರ್. 13ಯೇಸು ಬತ್ತ್‌ದ್ ರೊಟ್ಟಿನ್ ದೆತ್ತೊಂದು ಅಕ್ಲೆಗ್ ಕೊರಿಯೆ, ಅಂಚೆನೇ ಮೀನ್‌ನ್ಲಾ ಕೊರಿಯೆ.
14ಯೇಸು ಸೈತ್‌ದ್ ಜೀವೊಡು ಲಕ್ಕಿ ಬೊಕ್ಕ ಶಿಷ್ಯೆರೆಗ್ ತೋಜಿದ್ ಬತ್ತಿನವು ಉಂದು ಮೂಜನೇ ಸರ್ತಿ.
ಯೇಸು ಬೊಕ್ಕ ಸೀಮೋನು ಪೇತ್ರೆ
15ಅಕುಲು ಉಂಡಿಬೊಕ್ಕ ಯೇಸು ಸೀಮೋನು ಪೇತ್ರಡ, “ಯೋಹಾನ ಮಗೆ ಆಯಿ ಸೀಮೋನು, ಎನನ್ ಮೊಕ್ಲೆಡ್ದ್ ಹೆಚ್ಚ್ ಪ್ರೀತಿ ಮಲ್ಪುವನಾ?” ಕೇನ್ನಗ, ಆಯೆ, “ಅಂದ್ ಕರ್ತವಾ, ನಿನನ್ ಪ್ರೀತಿ ಮಲ್ಪುವೆ ಅಂದ್‌ದ್ ಈಯೇ ತೆರಿದ,” ಪಂಡಿನಪಗ ಯೇಸು ಆಯಡ, “ಎನ ಕುರಿತ ಕಿನ್ನಿಲೆನ್ ಮೇಪಾಲ,” ಪಂಡೆ 16ಯೇಸು ಕುಡ ರಡ್ಡನೆ ಸರಿ ಆಯಡ, “ಯೋಹಾನ ಮಗೆ ಆಯಿ ಸೀಮೋನು, ಎನನ್ ಪ್ರೀತಿ ಮಲ್ಪುವನಾ?” ಕೇನ್ನಗ, ಆಯೆ, “ಅಂದ್ ಕರ್ತವಾ, ನಿನನ್ ಪ್ರೀತಿ ಮಲ್ಪುವೆ ಪನ್ಪಿನೆನ್ ಈಯೇ ತೆರಿದ,” ಪಂಡೆ. ಯೇಸು ಆಯಡ, “ಎನ ಕುರಿಕುಲೆನ್ ಕಾಪು,” ಪಂಡೆ. 17ಯೇಸು ಮೂಜಿನೇ ಸರ್ತಿ, ಯೋಹಾನನ ಮಗೆ ಆಯಿ ಸೀಮೋನೋ, ಎನನ್ ಪ್ರೀತಿ ಮಲ್ಪುವನಾ ಅನ್ನಗ, ಆಯೆ ಮೂಜನೆ ಸರ್ತಿ ಎನನ್ ಪ್ರೀತಿ ಮಲ್ಪುವನಾ ಅಂದ್‌ದ್ ಕೇಂಡಿನೆಡ್ದ್ ಪೇತ್ರೆ ದುಃಖ ಮಲ್ತ್‌ದ್ ಆಯಡ, “ಕರ್ತವಾ, ಈ ಮಾತೆನ್ಲಾ ತೆರಿದಿನಾಯೆ ಆದುಲ್ಲ. ನಿನನ್ ಪ್ರೀತಿ ಮಲ್ಪುವೆ ಅಂದ್‌ದ್ ನಿಕ್ಕ್ ತೆರಿದ್‌ಂಡ್,” ಪಂಡೆ. ಯೇಸು ಆಯಡ ಪಂಡಿನಿ, “ಎನ ಕುರಿಕುಲೆನ್ ಮೇಪಾಲ.” 18ನಿಕ್ಕ್ ಸತ್ಯಾದ್ ಪನ್ಪೆ, ಈ ಜವ್ವನೆ ಆದುಪ್ಪುನಗ ಈಯೇ ಕುಂಟು ತುತ್ತೊಂದು ಸೊಂಟ ಕಟ್ಟೊಂದು ಇಷ್ಟ ಇತ್ತಿನಡೆ ಕುಸಿಟ್ ಪೋವೊಂದಿತ್ತ. ಆಂಡ ಈ ಪರಬೆ ಆನಗ ಕೈ ನೀಡ್ವ, ಬೊಕ್ಕೊರಿ ನಿನ ನಡು ಕಟ್ಟ್‌ದ್ ನಿಕ್ಕ್ ಕುಸಿ ಇಜ್ಜಂದಿನಡೆಗ್ ನಿನನ್ ಲೆತ್ತೊಂದು ಪೋಪೆ. 19ಆಯೆ ಎಂಚಿತ್ತಿ ಮರಣೊಡ್ದು ದೇವೆರೆನ್ ಮೈಮೆ ಮಲ್ಪಾವೆ ಪನ್ಪಿನೆನ್ ಯೇಸು ಈ ಪಾತೆರೊಡು ತೋಜಾಯೆ. ಉಂದೆನ್ ಪಂಡಿ ಬೊಕ್ಕ ಆಯಡ, “ಎನ ಬೆರಿಯೆ ಬಲ,” ಪಂಡೆ.
ಯೇಸು ಬೊಕ್ಕ ಆಯನ ಪ್ರೀತಿದ ಶಿಷ್ಯೆ
20ಪೇತ್ರೆ ತಿರ್ಗ್‌ದ್ ಯೇಸುನ ಪ್ರೀತಿದ ಶಿಷ್ಯೆ ಬೆರಿಯೆ ಬರ್ಪಿನೆನ್ ತೂಯೆ. ಆ ಶಿಷ್ಯೆ ವಣಸ್ ಮಲ್ಪುನಗ ಯೇಸುನ ತಿಗಲೆಗ್ ಒರಗ್‌ದ್ ಕರ್ತವಾ, ನಿನನ್ ಪತ್ತ್‌ದ್ ಕೊರ್ಪಿನಾಯೆ ಏರ್ ಅಂದ್‌ದ್ ಕೇಂಡಿನಾಯೆನೇ, 21ಉಂಬ್ಯನ್ ಪೇತ್ರೆ ತೂದು, ಯೇಸುಡ, “ಕರ್ತವಾ, ಉಂಬ್ಯನ ಸಂಗತಿ ದಾನೆ?” ಅಂದ್‌ದ್ ಕೇಂಡೆ. 22ಯೇಸು ಆಯಡ, “ಯಾನ್ ಬರ್ಪಿನೆಟ್ಟ ಆಯೆ ಉಪ್ಪೊಡಂದ್‌ದ್ ಎಂಕ್ ಮನಸಿತ್ತ್‌ಂಡ ನಿಕ್ಕ್ ದಾನೆ? ಈ ಎನ ಬೆರಿಯೆ ಬಲ” ಅಂದ್‌ದ್ ಪಂಡೆ.
23ಉಂದೆತ್ತ ದಿಸೆಟ್ಟ್ ಆ ಶಿಷ್ಯೆ ಸೈಪುಜೆ ಪನ್ಪಿ ಪಾತೆರ ಸಹೋದರೆರೆ ನಡುಟು ಪಸರ್ಂಡ್. ಆಂಡ ಆಯೆ ಸೈಪುಜೆ ಅಂದ್‌ದ್ ಯೇಸು ಆಯಗ್ ಪನ್ತ್‌ಜೆ. “ಯಾನ್ ಬರ್ಪಿನೆಟ್ಟ ಆಯೆ ಉಪ್ಪೊಡಂದ್‌ದ್ ಎನ ಮನಸಿತ್ತ್‌ಂಡ ನಿಕ್ಕ್ ದಾನೆ?” ಅಂದ್‌ದ್ ಮಾತ್ರ ಪಂಡ್ದಿತ್ತೆ.
24ಈ ಸಂಗತಿಲೆನ್ ಬರೆದ್ ನೆತ್ತ ಸಂಗತಿಡ್ ಸಾಕ್ಷಿ ಕೊರ್ತಿನ ಶಿಷ್ಯೆ ಆಯೆನೇ. ಆಯ ಸಾಕ್ಷಿ ಸತ್ಯದವು ಅಂದ್‌ದ್ ಎಂಕುಲು ತೆರಿದ.
25ಉಂದತ್ತಂದೆ ಯೇಸು ಮಲ್ತಿನವು ನನಲಾ ಮಸ್ತ್ ಉಂಡು, ಅವೆನ್ ಮಾತೆನ್ ಒಂಜೊಂಜಾದ್ ಬರೆಂಡ ಬರೆಯಿನ ಪುಸ್ತಕೊಲೆನ್ ದೀವೆರೆ, ಲೋಕನೇ ಯಾವಂದ್ ಅಂದ್‌ದ್ ಎನ್ನುವೆ. ಆಮೆನ್.
Currently Selected:
ಯೋಹಾನೆ 21: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
