ಯೋಹಾನೆ 2

ಯೇಸು ಮಲ್ತಿನ ಸುರುತ್ತ ಕಾರ್ನಿಕದ ಕಾರ್ಯ

1ಮೂಜನೇ ದಿನೊಟು ಗಲಿಲಾಯದ ಕಾನಾ ಪನ್ಪಿ ಊರುಡು ಒಂಜಿ ಮದ್ಮೆ ನಡತ್ಂಡ್, ಯೇಸುನ ಅಪ್ಪೆಲಾ ಅಲ್ಪ ಇತ್ತಲ್; 2ಯೇಸುನ್ಲಾ ಆಯನ ಶಿಷ್ಯೆರೆನ್ಲಾ ಮದ್ಮೆಗ್ ಲೆತ್ತ್‌ದಿತ್ತೆರ್. 3ದ್ರಾಕ್ಷೆದರಸ ಕಡಿಮೆ ಆಯಿನೆಡ್ದ್ ಯೇಸುನ ಅಪ್ಪೆ ಆಯಡ, “ಅಕ್ಲೆಡ ದ್ರಾಕ್ಷೆದರಸ ಇಜ್ಜಿ.” ಪಂಡಲ್‌. 4ಅಪಗ ಯೇಸು ಆಲೆಗ್, “ಅಮ್ಮಾ ಉಂದೆನ್ ಎನಡ ದಾಯೆಗ್ ಪನ್ಪ? ಎನ ಗಳಿಗೆ ನನಲಾ ಬೈದ್‌ಜಿ.” ಅಂದ್‌ದ್ ಪನ್ನಗ, 5ಆಯನ ಅಪ್ಪೆ ಬೇಲೆದಾಕುಲೆಡ, “ಆಯೆ ದಾದ ಪನ್ಪೆನಾ ಅಂಚ ಮಲ್ಪುಲೆ.” ಪಂಡಲ್.

6ಯೆಹೂದ್ಯೆರ್‌ನಾಕುಲೆನ ಶುದ್ಧಾಚಾರದ ಕ್ರಮತ್ತ ಪ್ರಕಾರ ಅಲ್ಪ ರಡ್ದ್, ಮೂಜಿ ಮರಾಯಿ ನೀರ್ ಪತ್ತುನಾತ್ ಆಜಿ ಕಲ್ಲ್‌ದ ಬೀಯಮ್‌ಲೆನ್ ದೀದಿತ್ತ್‌ಂಡ್. 7ಯೇಸು ಬೇಲೆದಾಕುಲೆಡ, “ಆ ಬೀಯಮ್‌ಗ್ ನೀರ್ ದಿಂಜಾಲೆ.” ಅಂದ್‌ದ್ ಪನ್ನಗ ಅಕುಲು ಐಕ್ ನಿಲಿಕೆ ನೀರ್ ದಿಂಜಾಯೆರ್. 8ಅಪಗ ಯೇಸು ಬೇಲೆದಾಕುಲೆಡ, “ಇತ್ತೆ ಅವೆನ್ ತೋಡ್ದು ಗುರ್ಕಾರಗ್ ಕೊರ್ಲೆ.” ಅಂದ್‌ದ್ ಪನ್ನಗ ದೆತ್ತೊಂದು ಪೋದು ಕೊರಿಯೆರ್. 9ಅವು ಒಲ್ತುಡ್ದು ಬತ್ತ್ಂಡ್ ಇನ್ಪಿನವು ನೀರ್‌ನ್ ತೋಡ್ದಿನ ಬೇಲೆದಾಕುಲೆಗ್ ತೆರಿದಿತ್ತ್‌ಂಡ್ ಅತ್ತಂದೆ ಗುರ್ಕಾರಗ್ ತೆರಿಯಂದಿನೆಡ್ದ್ ಆಯೆ ಆ ದ್ರಾಕ್ಷಾರಸತ್ತ ರುಚಿ ತೂದು, 10ಮದ್ಮಯನ್ ಲೆತ್ತ್‌ದ್, “ಮಾತೆರ್ಲಾ ದುಂಬತ್ತ ಎಡ್ಡೆ ದ್ರಾಕ್ಷಾರಸೊನು ಕೊರ್ದು ಅಮಲ್ ಆಯಿ ಬೊಕ್ಕ ಸುಮಾರ್ದೆನ್ ಕೊರ್ಪೆರ್; ಆಂಡ ಈ ಎಡ್ಡೆ ದ್ರಾಕ್ಷಾರಸೊನು ಈತ್‌ನೆಂಗೆ ದೀವೊಂದ.” ಪಂಡೆ

11ಯೇಸು ಸುರುಟ್ಟು ಮಲ್ತಿ ಈ ಕಾರ್ನಿಕೊಲೆಡ್ದ್ ಗಲಿಲಾಯದ ಕಾನಾ ಪನ್ಪಿ ಊರುಡು ತನ ಮೈಮೆನ್ ತೋಜಾಯೆ. ಬೊಕ್ಕ ಶಿಷ್ಯೆರ್‌ನಾಕುಲು ಆಯನ ಮಿತ್ತ್ ನಂಬಿಕೆ ದೀಯೆರ್.

12ಉಂದು ನಡತಿ ಬೊಕ್ಕ ಆಯೆಲಾ ಆಯ ಅಪ್ಪೆಲಾ ಮೆಗ್ಯಾಡ್ಲುಲಾ ಶಿಷ್ಯೆರ್‌ಲಾ ಕಪೆರ್ನೌಮುಗು ಪೋದು ಅಲ್ಪ ಒಂತೆ ದಿನ ಇತ್ತೆರ್.

ದೇವಾಲಯೊಡು ನಡತೊಂದಿತ್ತಿ ವ್ಯಾಪಾರೊನು ಉಂತಾಯಿನವು

(ಮತ್ತಾಯೆ 21:12-13; ಮಾರ್ಕೆ 11:15-17; ಲೂಕೆ 19:45-46)

13ಯೆಹೂದ್ಯೆರೆನ ಪಸ್ಕ ಪರ್ಬ ಕೈತಲ್‌ ಬತ್ತ್‌ತ್ತಿನೆಡ್ದ್ ಯೇಸು ಯೆರೂಸಲೇಮುಗು ಪೋಯೆ. 14ಅಲ್ಪ ದೇವಾಲಯೊಡು ಕೈಕಂಜಿಲು, ಕುರಿ, ಪಾರಿವಾಳ ಮಾರುನಾಕುಲೆನ್ಲಾ ಕಾಸ್ ಬದಲಿ ಮಲ್ಪುನಾಕುಲೆನ್ಲಾ ತೂದು 15ಆಯೆ ಒಂಜಿ ಬಲ್ಲ್‌ಡ್ದ್ ಚಾಟಿ ಮಲ್ತ್‌ದ್ ಐಡ್ದ್ ಕುರಿ, ಕೈಕಂಜಿಲೆನ್, ಮಾತೆನ್ ದೇವಾಲಯೊಡ್ದು ಪಿದಯಿ ಗಿಡ್ತ್‌ದ್, ಕಾಸ್‌ದ ಬ್ಯಾರ ಮಲ್ಪುನಾಕುಲೆನ ಕಾಸ್ ಚಲ್ಲಾಪಿಲ್ಲಿ ಮಲ್ತ್‌ದ್ ಮೇಜಿಲೆನ್ ಮರತ್ ಪಾಡಿಯೆ. 16ಪಾರಿವಾಳ ಮಾರುನಾಕುಲೆಗ್, “ಉಂದೆಕ್ಲೆನ್ ಮುಲ್ತುಡ್ದು ದೆತ್ತೊಂದು ಪೋಲೆ ಎನ ಅಮ್ಮೆರೆನ ಇಲ್ಲನ್ ಸಂತೆ ಮಲ್ಪೊಡ್ಚಿ,” ಅಂದ್‌ದ್ ಪಂಡೆ. 17ಅಪಗ “ಎನ ಇಲ್ಲದ ಮಿತ್ತುಪ್ಪು ಅಭಿಮಾನ ಎನ ಉಲಯಿ ತೂತ ಲೆಕ್ಕ ಪೊತ್ತೊಂದುಂಡು.” ಅಂದ್‌ದ್ ಬರೆತಿ ಪಾತೆರ ಶಿಷ್ಯೆರೆನ ನೆನೆಪುಗು ಬತ್ತ್ಂಡ್.

18ಯೆಹೂದ್ಯೆರ್ ಆಯಡ, “ಉಂದೆನ್ ಮಾತ ಮಲ್ಪೆರೆ ನಿಕ್ಕ್ ಅಧಿಕಾರ ಉಂಡು ಪನ್ಪಿನೆನ್ ತೋಜಾದ್ ಕೊರ್ಪಿನಂಚಿನ ವಾ ಕಾರ್ನಿಕೊಲೆನ್ ಮಲ್ತ್‌ದ್ ತೋಜಾವ,” ಅಂದ್‌ದ್ ಕೇನ್ನಗ 19ಯೇಸು, “ಈ ದೇವಾಲಯನ್ ಗಿರ್ಪುಲೆ, ಯಾನ್ ಮೂಜಿ ದಿನೊಟು ಅವೆನ್ ಲಕ್ಕಾವೆ,” ಅಂದ್‌ದ್ ಪಂಡೆ.

20ಐಕ್ ಯೆಹೂದ್ಯೆರ್, “ಈ ದೇವಾಲಯನ್ ಕಟ್ಟಿಯೆರೆ ನಲ್ಪತ್ತಾಜಿ ವರ್ಸ ತಾಗ್‌ದ್‌ಂಡ್, ಈ ಅವೆನ್ ಗಿರ್ತ್‌ದ್ ಮೂಜಿ ದಿನೊಟು ಲಕ್ಕಾವನಾ?” ಅಂದ್‌ದ್ ಕೇಂಡೆರ್.

21ಆಂಡ ಆಯೆ ತನ ಶರೀರ ಇನ್ಪಿ ದೇವಾಲಯದ ವಿಷಯೊಡು ಈ ಪಾತೆರೊನು ಪಂಡ್ದಿತ್ತೆ. 22ಐಡ್ದಾವರ ಆಯೆ ಸೈತಿನಾಕುಲೆಡ್ದ್ ಲಕ್ಕಿ ಬೊಕ್ಕ ಈ ಪಾತೆರ ಆಯ ಶಿಷ್ಯೆರೆ ಗೇನೊಗು ಬತ್ತ್‌ದ್ ಶಾಸ್ತ್ರೊಡು ಬರೆತಿನೆನ್ಲಾ ಯೇಸುನ ಪಾತೆರೊಲೆನ್ಲಾ ಅಕುಲು ನಂಬಿಯೆರ್.

ಅಂತರಂಗದ ಅರಿಕೆ

23ಆಯೆ ಪಸ್ಕ ಪರ್ಬೊಡು ಯೆರೂಸಲೇಮುಡು ಉಪ್ಪುನಗ ಮಸ್ತ್ ಜನೊಕುಲು ಆಯೆ ಮಲ್ತ್‌ದಿನ ಕಾರ್ನಿಕೊಲೆನ್ ತೂದು ಆಯನ ಪುದರ್‌ದ ಮಿತ್ತ್ ನಂಬಿಕೆ ದೀಯೆರ್. 24ಆಂಡ ಯೇಸು ಮಾತೆರೆನ್ಲಾ ತೆರಿದಿತ್ತಿನಾಯೆ ಆಯಿನೆಡ್ದಾವರ ಅಕ್ಲೆಗ್ ವಶ ಆಯಿಜೆ. 25ಆಯೆ ಮಾತ ನರಮಾನಿಲೆ ಉಡಲ್‌ನ್ ತೆರಿದುಪ್ಪುನೆಡ್ದ್ ಏರ್ಲಾ ವಾ ನರಮಾನಿಲೆ ವಿಷಯೊಡ್ಲಾ ಆಯಗ್ ಸಾಕ್ಷಿ ಪನ್ಪಿ ಅಗತ್ಯ ಇತ್ತ್‌ಜಿ.

Currently Selected:

ಯೋಹಾನೆ 2: ತುಳು

Highlight

Copy