ಯೋಹಾನೆ 3

ಯೇಸು ಬೊಕ್ಕ ನಿಕೋದೇಮು

1ಪರಿಸಾಯೆರೆಡ್ ಯೆಹೂದ್ಯೆರೆ ಹಿರಿಸಭೆತ ಒರಿ ಅಧಿಕಾರಿ ನಿಕೋದೇಮು ಪನ್ಪಿನಾಯೆ ಇತ್ತೆ. 2ಆಯೆ ರಾತ್ರೆಡ್ ಯೇಸುನ ಕೈತಲ್‌ ಬತ್ತ್‌ದ್ ಆಯಡ, “ಗುರುಕುಲೇ, ಈ ದೇವೆರೆ ಕಡೆಡ್ದ್ ಬೈದಿನ ಬೋಧಕೆ ಅಂದ್‌ದ್ ತೆರಿದುಲ್ಲ. ಈ ಮಲ್ತ್‌ದ್ ತೋಜಾವುನ ಕಾರ್ನಿಕೆದ ಕಾರ್ಯೊಲೆನ್ ದೇವೆರೆ ಸಹಾಯದಾಂತೆ ಏರೆಡ್ದ್‌ಲಾ ಮಲ್ಪೆರೆ ಆವಂದ್.” ಅಂದ್‌ದ್ ಪಂಡೆ.

3ಐಕ್ ಯೇಸು, “ಯಾನ್ ನಿಕ್ಕ್ ನಿಜಾದ್ ಪನ್ಪೆ, ಒರಿ ಪೊಸತ್ತಾದ್ ಪುಟ್ಟುಜೆಡ ಆಯೆ ದೇವೆರೆ ರಾಜ್ಯೊನು ತೂಪಿನೆ ಇಜ್ಜಿ.” ಅಂದ್‌ದ್ ಪಂಡೆ.

4ನಿಕೋದೇಮು ಆಯಡ, “ನರಮಾನಿ ಪರಬೆ ಆಯಿ ಬೊಕ್ಕ ಪೊಸತ್ತಾದ್ ಪುಟ್ಟುನವು ಎಂಚ? ಆಯೆ ತನ ಅಪ್ಪೆ ಬಂಜಿಡ್ ಸೇರ್ದ್ ಕುಡೊರ ಪುಟ್ಯರೆ ಸಾದ್ಯನಾ?” ಅಂದ್‌ದ್ ಕೇಂಡೆ.

5ಐಕ್ ಯೇಸು, “ಯಾನ್ ನಿಕ್ಕ್ ನಿಜಾದ್ ಪನ್ಪೆ, ಒರಿ ನೀರ್‌ಡ್ದ್‌ಲಾ ಆತ್ಮೊಡ್ದುಲಾ ಪುಟ್ಟುಜೆಡ ದೇವೆರೆ ರಾಜ್ಯೊಗು ಸೇರಯೆ. 6ಶರೀರೊಡ್ದು ಪುಟ್ಟಿನವು ಶರೀರನೇ, ಆತ್ಮೊಡ್ದು ಪುಟ್ಟಿನವು ಆತ್ಮನೇ. 7‘ನಿಕುಲು ಪೊಸತ್ತಾದ್ ಕುಡ ಪುಟ್ಟೊಡು,’ ಅಂದ್‌ದ್ ಯಾನ್ ನಿಕ್ಕ್ ಪಂಡಿನೆಡ್ದ್ ಅಚ್ಚಿರ ಪಡೆವೊಡ್ಚಿ. 8ಗಾಳಿ ಮನಸ್ ಬತ್ತಿನಡೆ ಬೀಜುಂಡು, ಈ ಐತ ಶಬ್ಧೊನು ಕೇನ್ವ. ಆಂಡ ಅವು ಒಲ್ತು ಬರ್ಪುಂಡು ಒಡೆಗ್ ಪೋಪುಂಡು ನಿಕ್ಕ್ ತೆರಿಯಂದ್; ಅಂಚೆನೇ ಆತ್ಮಡ್ದ್ ಪುಟ್ಟಿನಾಯೆ ಐತ ಲೆಕ್ಕನೇ,” ಅಂದ್‌ದ್ ಪಂಡೆ.

9ಐಕ್ ನಿಕೋದೇಮು, “ಉಂದು ಆಪಿನಿ ಎಂಚ?” ಅಂದ್‌ದ್ ಕೇನ್ನಗ, 10ಯೇಸು ಆಯಗ್ ಪಂಡಿನಿ ದಾನೆಂದ್ಂಡ, “ಈ ಇಸ್ರಾಯೇಲ್ಯೆರೆ ಬೋಧಕೆ ಆದ್‌ಲಾ ನಿಕ್ಕ್ ಉಂದು ತೆರಿದಿಜಾ? 11ಯಾನ್ ನಿಕ್ಕ್ ಸತ್ಯಾದ್ ಪನ್ಪೆ, ಎಂಕುಲು ತೆರಿದಿನೆನ್ ಪಾತೆರ್‌ವ. ತೂಯಿನೆಕ್ಕ್ ಸಾಕ್ಷಿ ಕೊರ್ಪ, ನಿಕುಲು ಎಂಕ್ಲೆನ ಸಾಕ್ಷಿನ್ ನಂಬುಜರ್. 12ಯಾನ್ ಭೂಲೋಕೊಡು ನಡಪು ಕಾರ್ಯೊಲೆ ಬಗೆಟ್ ನಿಕ್ಲೆಗ್ ಪನ್ನಗ ನಿಕುಲು ನಂಬಂದೆ ಪೋಂಡ ಪರಲೋಕದ ಕಾರ್ಯೊಲೆ ಬಗೆಟ್ ನಿಕ್ಲೆಗ್ ಪಂಡ್ಂಡ ಎಂಚ ನಂಬರ್? 13ಪರಲೋಕೊಡ್ದು ಜತ್ತ್‌ದ್ ಬತ್ತಿನಾಯೆನೇ ಅಂದ್ಂಡ ನರಮಾನಿ ಮಗೆನೇ ಅತ್ತಂದೆ ಬೇತೆ ಏರ್ಲಾ ಪರಲೋಕೊಗು ಪೋತಿನಾಯೆ ಇಜ್ಜೆ.”

14“ಉಂದತ್ತಂದೆ ಜನೊಕುಲು ತೂದು ಬದ್‌ಕ್‌ದ್ ಒರಿಯೊಡು ಅಂದ್‌ದ್ ಕಾಡ್‌ಡ್ ಪ್ರವಾದಿ ಆಯಿ ಮೋಶೆ ಸರ್ಪೊನು ಎತ್ತರೊಡು ದೀತಿ ಲೆಕ್ಕನೇ. 15ನರಮಾನಿ ಮಗನ್ಲಾ ನಂಬುನಾಕುಲೆಗ್ ಮಾತೆರೆಗ್ಲಾ ನಿತ್ಯಜೀವ ಪಡೆವೊಡು ಅಂದ್‌ದ್ ಎತ್ತರೊಡು ದೀಪಾವೊಡು. 16ದೇವೆರ್ ಲೋಕದ ಮಿತ್ತ್ ಏತೋ ಪ್ರೀತಿ ದೀದ್ ತನ ಒರಿಯೇ ಮಗನ್ ಕೊರಿಯೆ, ಆಯನ್ ನಂಬುನ ಒರಿಲಾ ನಾಶ ಆವಂದೆ ಮಾತೆರ್ಲಾ ನಿತ್ಯಜೀವೊನು ಪಡೆಯೊಡು ಅಂದ್‌ದ್ ಆಯನ್ ಕೊರಿಯೆ. 17ದೇವೆರ್ ತನ ಮಗನ್ ಲೋಕೊಗು ಕಡಪುಡ್ದಿನವು ಲೋಕೊನು ತೀರ್ಪು ಮಲ್ಪೆರೆ ಅತ್ತ್, ಆಂಡ ಮಗಡ್ದ್ ಲೋಕೊನು ರಕ್ಷಣೆ ಮಲ್ಪೆರೆ ಕಡಪುಡಿಯೆ.

18“ಆಯನ್ ನಂಬುನಾಯಗ್ ನ್ಯಾಯತೀರ್ಪು ಆಪುಜಿ. ಆಂಡ ನಂಬಂದಿನಾಯಗ್ ದೇವೆರೆ ಒರಿಯೇ ಮಗನ ಪುದರ್‌ನ್ ನಂಬಂದಿನೆಡ್ದ್ ಅಪಗನೇ ನ್ಯಾಯತೀರ್ಪು ಆದ್ ಪೋಂಡು. 19ಆ ನ್ಯಾಯತೀರ್ಪು ದಾನೆಂದ್ಂಡ, ಬೊಲ್ಪು ಲೋಕೊಗು ಬತ್ತಿತ್ತ್‌ಂಡಲಾ ನರಮಾನಿಲೆ ಬೇಲೆಲು ಹಾಳ್ ಆದುಪ್ಪುನೆಡ್ದ್ ಅಕುಲು ಬೊಲ್ಪುಡ್ದು ಹೆಚ್ಚಿಗೆ ಕತ್ತಲೆನೇ ಪ್ರೀತಿ ಮಲ್ತೆರ್. 20ಹಾಳ್ ಬೇಲೆ ಮಲ್ಪುನಾಕುಲು ಬೊಲ್ಪುನು ಪಗೆ ಮಲ್ಪುವೆರ್, ಅಕುಲು ಬೊಲ್ಪುಗು ಬರ್ಪುಜೆರ್ ದಾಯೆಗಂದ್ಂಡ ಅಕ್ಲೆನ ಹಾಳ್ ಕೆಲಸೊಲೆನ್ ಬೊಲ್ಪು ತೋಜಾದ್ ಕೊರ್ಪುಂಡು. 21ಆಂಡ ಸತ್ಯದ ಬೆರಿಯೆ ಪೋಪಿನಾಯೆ ತಾನ್ ದೇವೆರೆಡ್ದ್ ನಡಪಾವೊಂದು ತನ ಕಾರ್ಯೊಲೆನ್ ಮಲ್ತೆ ಪಂಡ್ದ್ ತೋಜಿದ್ ಬರ್ಪಿಲೆಕ್ಕ ಬೊಲ್ಪುಗು ಬರ್ಪೆ.”

ಯೇಸು ಬೊಕ್ಕ ಯೋಹಾನೆ

22ಐಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆ ಒಟ್ಟುಗು ಯೂದಾಯ ಸೀಮೆಗ್ ಪೋದು ಅಲ್ಪ ಅಕ್ಲೆಡೊಪ್ಪ ಇತ್ತ್‌ದ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆ. 23ಯೋಹಾನೆಲಾ ಸಲಿಮೂರುದ ಕೈತಲುಪ್ಪು ಐನೊನು ಪನ್ಪಿ ಜಾಗ್‌ಡಿತ್ತ್‌ದ್ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆ. ಅಲ್ಪ ದಿಂಜ ನೀರಿತ್ತ್‌ಂಡ್, ಜನೊಕುಲು ಬತ್ತ್‌ದ್ ದೀಕ್ಷಾಸ್ನಾನ ದೆತ್ತೊನೊಂದಿತ್ತೆರ್. 24ಉಂದು ಆಯಿನಿ ಯೋಹಾನನ್ ಸೆರೆಮನೆಕ್ ಪಾಡುನೆಡ್ದ್ ದುಂಬು.

25ಇಂಚ ಉಪ್ಪುನಗ ಯೋಹಾನನ ಶಿಷ್ಯೆರೆಡ್ ಕೆಲೆವೆರೆಗ್ ಯೆಹೂದ್ಯೆರೆಡೊಪ್ಪ ಶುದ್ಧಾಚಾರದ ಸಂಗತಿಡ್ ಚರ್ಚೆ ನಡತ್ಂಡ್. 26ಅಪಗ ಅಕುಲು ಯೋಹಾನನ ಕೈತಲ್‌ ಬತ್ತ್‌ದ್ ಆಯಡ, “ಗುರುಕುಲೇ, ಯೊರ್ದಾನ್ ತುದೆತ ಆಯೆರೆಡ್ ನಿನಡೊಪ್ಪ ಇತ್ತಿನಾಯನ ಸಂಗತಿಡ್ ಈ ಸಾಕ್ಷಿ ಕೊರಿಯತ್ತಾ, ಆಯೆಲಾ ನೀರ್‌ದ ದೀಕ್ಷಾಸ್ನಾನ ಕೊರ್ಪೆ ಆಯನ ಕೈತಲ್‌ ಮಾತೆರ್ಲಾ ಪೋವೊಂದುಲ್ಲೆರ್!” ಅಂದ್‌ದ್ ಪನ್ನಗ 27ಯೋಹಾನೆ, “ದೇವೆರ್ ಪರಲೋಕೊಡ್ದು ದಯ ಮಲ್ತ್ ಕೊರ್ಪಿನವು ಅತ್ತಂದೆ ನರಮಾನಿಗ್ ಹೆಚ್ಚಿಗೆದವು ದಾಲಾ ತಿಕ್ಕಂದ್. 28‘ಯಾನ್ ಕ್ರಿಸ್ತೆ ಅತ್ತ್. ಆಯನ ದುಂಬುಡ್ದು ಕಡಪುಡ್ದಿನಾಯೆ ಆದುಲ್ಲೆ,’ ಅಂದ್‌ದ್ ಯಾನ್ ಪಂಡಿನೆಕ್ಕ್ ನಿಕುಲೇ ಸಾಕ್ಷಿ. 29ಮದ್ಮಲ್ ಉಪ್ಪುನಾಯೆನೇ ಮದ್ಮಯೆ. ಆಂಡಲಾ ಮದ್ಮಯನ ಸ್ನೇಹಿತೆ ಆಯ ಕೈತಲ್‌ ಉಂತೊಂದು ಆಯನ ಪಾತೆರೊಲೆನ್ ಕೇಂಡ್ದ್ ಮದ್ಮಯನ ಸ್ವರೊಕ್ಕು ಸಂತೋಷ ಪಡೆಪೆ ಅತ್ತಾ. ನೆತ್ತ ಲೆಕ್ಕನೆ ಎಂಕುಪ್ಪು ಸಂತೋಷ ಪೂರ್ತಿ ಆಂಡ್. 30ಆಯೆ ಹೆಚ್ಚಾವೊಡು, ಯಾನ್ ತಗ್ಗೊಡು,” ಅಂದ್‌ದ್ ಪಂಡೆ.

ಪರಲೋಕೊಡ್ದು ಬೈದಿನಾಯೆ

31“ಮಿತ್ತ್‌ಡ್ದ್ ಬರ್ಪಿನಾಯೆ ಮಾತೆರೆ ಮಿತ್ತ್ ಉಲ್ಲೆ, ಭೂಲೋಕೊಡು ಪುಟ್ಟಿನಾಯೆ ಭೂಲೋಕದಾಯೆ ಆದಿತ್ತ್‌ದ್ ಭೂಲೋಕದ ಪಾತೆರೊಲೆನ್ ಪಾತೆರ್‌ವೆ, ಪರಲೋಕೊಡ್ದು ಬರ್ಪಿನಾಯೆ ಮಾತೆರೆಡ್ದ್ ಮಿತ್ತ್‌ದಾಯೆ. 32ತಾನ್ ತೂದು ಕೇಂಡಿನೆಕ್ಕ್ ಸಾಕ್ಷಿ ಕೊರ್ಪೆ. ಆಂಡ ಆಯನ ಸಾಕ್ಷಿನ್ ಏರ್ಲಾ ನಂಬಿಜೆರ್. 33ಆಯ ಸಾಕ್ಷಿನ್ ನಂಬಿನಾಯೆ ದೇವೆರ್ ಸತ್ಯವಂತೆ ಪನ್ಪಿ ಪಾತೆರೊನು ಮುದ್ರೆ ಒತ್ತುದಿನಾಯೆ ಆದುಲ್ಲೆ. 34ಎಂಚಂದ್ಂಡ ದೇವೆರ್ ಏರೆನ್ ಕಡಪುಡುದೆನಾ ಆಯಗ್ ಧಾರಾಳಾದ್ ಆತ್ಮೊನು ಕೊರ್ತಿನೆಡ್ದ್ ಆಯೆ ದೇವೆರೆ ಪಾತೆರೊಲೆನೇ ಪಾತೆರ್‌ವೆ. 35ಅಮ್ಮೆ ಆದುಪ್ಪು ದೇವೆರ್ ತನ ಮಗನ್ ಪ್ರೀತಿ ಮಲ್ತ್‌ದ್ ಮಾತೆನ್ ಆಯ ಕೈಟ್ ಕೊರ್ತೆ. 36ಆಯನ ಮಗನ್ ನಂಬುನಾಯಗ್ ನಿತ್ಯಜೀವ ಉಂಡು ಆಯನ್ ನಂಬಂದಿನಾಯೆ ನಿತ್ಯಜೀವೊನು ತೂಪಿನೆ ಇಜ್ಜಿ. ದೇವೆರೆ ಕೋಪ ಆಯನ ಮಿತ್ತ್ ನಿಲೆ ಆದುಂಡು.”

Currently Selected:

ಯೋಹಾನೆ 3: ತುಳು

Highlight

Copy