ಯೋಹಾನೆ 18
18
ಯೇಸುನು ಪತ್ತ್‌ದ್ ಕೊರ್ಪಿನವು
(ಮತ್ತಾಯೆ 26:47-56; ಮಾರ್ಕೆ 14:43-50; ಲೂಕೆ 22:47-53)
1ಯೇಸು ಪ್ರಾರ್ಥನೆ ಮಲ್ತಿ ಬೊಕ್ಕ ತನ ಶಿಷ್ಯೆರೆಡೊಪ್ಪ ಕೆದ್ರೋನ್ ಕೆದುತ ಆಪೆ ಬರಿಕ್ಕ್ ಪೋಯೆ. ಅಲ್ಪ ಒಂಜಿ ತೋಟ ಇತ್ತ್ಂಡ್, ಐತ ಉಲಯಿ ಆಯೆಲಾ ಆಯ ಶಿಷ್ಯೆರ್‌ಲುಲಾ ಪೋಯೆರ್. 2ಯೇಸುಲಾ ಆಯ ಶಿಷ್ಯೆರ್‌ಲಾ ಅಪಗಾಪಗ ಈ ಜಾಗ್‌ಗ್ ಬರೊಂದಿತ್ತಿನೆಡ್ದ್ ಯೇಸುನು ಪತ್ತ್‌ದ್ ಕೊರ್ಪಿ ಯೂದಗ್ಲಾ ಆ ಜಾಗ್ ಗೊತ್ತಿತ್ತ್ಂಡ್. 3ಇಂಚ ಉಪ್ಪುನಗ ಯೂದೆ ಸಿಪಾಯಿಲೆ ಪಟ್ಲಾಮುಲೆನ್ಲಾ ಪ್ರಧಾನಯಾಜಕೆರೆ ಬೊಕ್ಕ ಪರಿಸಾಯೆರ್ ಕಡಪುಡಿ ಅಧಿಕಾರಿಲೆನ್ಲಾ ಲೆತ್ತೊಂದು ತೂಟೆ, ಕತ್ತಿ ಇಂಚಿನ ಆಯುಧೊಲೆನ್ ಪತ್ತೊಂದು ಅಡೆಗ್ ಬತ್ತೆ. 4ಅಪಗ ಯೇಸುಗು ತನ ಮಿತ್ತ್ ಬರ್ಪಿನವು ಮಾತಲಾ ಗೊತ್ತಾದ್, ಪಿದಯಿ ಬತ್ತ್‌ದ್ ನಿಕುಲು, “ಏರೆನ್ ನಾಡೊಂದುಲ್ಲರ್?” ಅಕ್ಲೆಡ ಕೇಂಡೆ.
5ಐಕ್ ಅಕುಲು, “ನಜರೇತ್‌ದ ಯೇಸುನು” ಪಂಡೆರ್. ಯೇಸು ಅಕ್ಲೆಡ, “ಯಾನೇ ಆಯೆ” ಪಂಡೆ. ಆಯನ್ ಪತ್ತ್‌ದ್ ಕೊರ್ಪಿ ಯೂದೆಲಾ ಅಕ್ಲೆನೊಟ್ಟುಗು ಉಂತುದಿತ್ತೆ. 6ಯೇಸು ಅಕ್ಲೆಡ, “ಯಾನೇ,” ಅಂದ್‌ದ್ ಪನ್ನಗ ಅಕುಲು ಪಿರಜಾರ್ದ್ ನೆಲತ್ತ ಮಿತ್ತ್ ಬೂರ್ಯೆರ್. 7ಯೇಸು ಕುಡ ಅಕ್ಲೆಡ, “ಏರೆನ್ ನಾಡೊಂದುಲ್ಲರ್?” ಅಂದ್‌ದ್ ಕೇನ್ನಗ, ಅಕುಲು, “ನಜರೇತ್‌ದ ಯೇಸುನು ನಾಡುವ,” ಪಂಡೆರ್.
8ಐಕ್ ಯೇಸು, “ಯಾನ್ ಆಯೆನೇ ಅಂದ್‌ದ್ ನಿಕ್ಲೆಗ್ ಪನ್ಪೆ ಅತ್ತಾ, ನಿಕುಲು ಎನನೇ ನಾಡುನಾಕುಲಾಂಡ ಮೊಕ್ಲೆನ್ ಪೋವೆರೆ ಬುಡ್ಲೆ,” ಪಂಡೆ. 9“ಈ ಎಂಕ್ ಕೊರಿನೆಟ್ಟ್ ಒರಿಯನ್ಲಾ ಯಾನ್ ಕಳೆವೊಂಡಿಜಿ,” ಅಂದ್‌ದ್ ಆಯೆ ಪಂಡಿನ ಪಾತೆರ ಪೂರ್ತಿ ಆವೊಡು ಅಂದ್‌ದ್ ಇಂಚ ಕೂಡುದು ಬತ್ತ್ಂಡ್.
10ಸೀಮೋನು ಪೇತ್ರಡ ಒಂಜಿ ಕತ್ತಿ ಇತ್ತ್ಂಡ್ ಅವೆನ್ ದೆತ್ತೊಂದು ಆಯೆ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತೆ. ಆ ಬೇಲೆದಾಯನ ಪುದರ್ ಮಲ್ಕೆ. 11ಅಪಗ ಯೇಸು ಪೇತ್ರಗ್, “ಕತ್ತಿನ್ ಬರಿಕ್ಕ್ ಪಾಡ್ಲ. ಅಮ್ಮೆ ಎಂಕ್ ಕೊರ್ತಿನ ಪಾತ್ರೆಡ್‌ ಯಾನ್ ಪರಿಯೆರೆ ಬಲ್ಲಿಯಾ?” ಅಂದ್‌ದ್ ಕೇಂಡೆ.
ಪ್ರಧಾನಯಾಜಕೆ ಅನ್ನನ ಎದುರು ಯೇಸು
12ಐಡ್ದ್ ಬೊಕ್ಕ ಸಿಪಾಯಿಲೆ ಪಟ್ಲಾಮುಲಾ ಸಹಸ್ರಾಧಿಪತಿಲಾ ಯೆಹೂದ್ಯೆರೆ ಚಾಕ್ರಿದಾಕುಲುಲಾ ಯೇಸುನು ಪತ್ತ್‌ದ್ ಕಟ್ಟಿಯೆರ್. 13ಸುರುಟ್ಟು ಅನ್ನ ಕೈತಲ್ ಪೋಯೆರ್. ಅನ್ನೆ ಆ ವರ್ಸೊಡು ಪ್ರಧಾನಯಾಜಕೆ ಆಯಿ ಕಾಯಫನ ತಮ್ಮಲೆ ಆದಿತ್ತೆ. 14ಒರಿ ನರಮಾನಿ ಜನೊಕುಲೆಗಾದ್ ಸೈಪಿನವು ಎಡ್ಡೆಂದ್‌ದ್ ಯೆಹೂದ್ಯೆರೆಗ್ ಆಲೋಚನೆ ಕೊರ್ತಿನಾಯೆ ಆ ಕಾಯಫೆನೇ.
ಪೇತ್ರೆ ಯೇಸುನು ಅರೆಂಜುನವು
(ಮತ್ತಾಯೆ 26:69,70; ಮಾರ್ಕೆ 14:66-68; ಲೂಕೆ 22:55-57)
15ಸೀಮೋನು ಪೇತ್ರೆಲಾ ಬೊಕ್ಕೊರಿ ಶಿಷ್ಯೆಲಾ ಯೇಸುನ ಬೆರಿಯೆ ಪೋಯೆರ್. ಆ ಶಿಷ್ಯಗ್ ಪ್ರಧಾನಯಾಜಕನ ಗುರ್ತ ಇತ್ತಿನೆಡ್ದ್ ಯೇಸುಡೊಪ್ಪ ಪ್ರಧಾನಯಾಜಕನ ಜಾಲ್‌ಗ್ ಪೋಯೆ. 16ಪೇತ್ರೆ ಪಿದಯಿ ಬಾಕಿಲ್‌ದ ಕೈತಲ್ ಉಂತುದಿತ್ತಿನೆಡ್ದ್ ಪ್ರಧಾನಯಾಜಕನ ಗುರ್ತ ಇತ್ತಿ ಶಿಷ್ಯೆ ಪಿದಯಿ ಬತ್ತ್‌ದ್ ಬಾಕಿಲ್ ಕಾಪುನ ಚಾಕ್ರಿದಲೆಡ ಪಾತೆರ್‌ದ್ ಪೇತ್ರನ್ ಉಲಯಿ ಲೆತ್ತೊಂದು ಪೋಯೆ. 17ಅಪಗ ಬಾಕಿಲ್ ಕಾಪುನ ಚಾಕ್ರಿದಾಲ್, “ಈಲಾ ಯೇಸುನ ಶಿಷ್ಯೆರೆಡ್ ಒರಿ ಅತ್ತಾ?” ಅಂದ್‌ದ್ ಪೇತ್ರಡ ಕೇಂಡಿನೆಕ್ಕ್ ಆಯೆ, “ಯಾನ್ ಅತ್ತ್,” ಪಂಡೆ.
18ಅಪಗ ಚಳಿ ಇತ್ತಿನೆಡ್ದ್ ಚಾಕ್ರಿದಾಕುಲುಲಾ ಸಿಪಾಯಿಲುಲಾ ಕನಕ್‌ಡ್ ತೂ ಮಲ್ತ್‌ದ್ ಚಳಿ ಕಾಯ್ತೊಂದು ಉಪ್ಪುನಗ, ಪೇತ್ರೆಲಾ ಅಕ್ಲೆಡೊಪ್ಪ ಇತ್ತ್‌ದ್ ಚಳಿ ಕೈತೊಂದಿತ್ತೆ.
ಪ್ರಧಾನಯಾಜಕೆ ಯೇಸುಡ ಪ್ರಶ್ನೆ ಕೇನುನವು
(ಮತ್ತಾಯೆ 26:59-66; ಮಾರ್ಕೆ 14:55-64; ಲೂಕೆ 22:66-71)
19ಅಪಗ ಪ್ರಧಾನಯಾಜಕೆ ಯೇಸುಡ ಆಯನ ಶಿಷ್ಯೆರೆ ಸಂಗತಿಡ್ಲಾ ಆಯ ಬೋಧನೆದ ಸಂಗತಿಡ್ಲಾ ಪ್ರಶ್ನೆ ಮಲ್ತೆ. 20ಐಕ್ ಯೇಸು, “ಯಾನ್ ಲೋಕದ ಜನೊಕುಲೆ ಎದುರುಡು ಪಾತೆರ್‌ದೆ. ಮಾತ ಯೆಹೂದ್ಯೆರ್ ಸೇರು ಜಾಗ್ ಆಯಿ ಸಭಾಮಂದಿರೊಲೆಡ್ಲಾ ದೇವಾಲಯೊಲೆಡ್ಲಾ ಏಪಲಾ ಬೋಧನೆ ಮಲ್ತೊಂದೇ ಬೈದೆ. ಮದೆಟ್ ಒವೆನ್ಲಾ ಪಾತೆರ್‌ದಿಜಿ. 21ಎನನ್ ದಾಯೆ ಪ್ರಶ್ನೆ ಮಲ್ಪುವ? ಯಾನ್ ಪಾತೆರಿದಿನೆನ್ ಕೇಂಡಿನಾಕುಲೆಡ ವಿಚಾರ ಮಲ್ಪುಲ, ಯಾನ್ ಪಂತಿನವು ಮಾತ ಅಕ್ಲೆಗ್ ಗೊತ್ತುಂಡತ್ತಾ?” ಪಂಡೆ.
22ಯೇಸು ಈ ಪಾತೆರೊನು ಪನ್ನಗ ಕೈತಲ್ ಉಂತುದಿತ್ತಿ ಅಧಿಕಾರಿಲೆಡ್ ಒರಿ ಆಯ ಕೆಪ್ಪೆಗ್ ಹಾಕ್‌ದ್, “ಪ್ರಧಾನಯಾಜಕಗ್ ಈ ಇಂಚ ಉತ್ತರ ಕೊರ್ಪನಾ?” ಪಂಡೆ.
23ಯೇಸು ಆಯಗ್, “ಯಾನ್ ಪಾತೆರ್‌ನೆಟ್ಟ್ ದಾದಾಂಡಲಾ ದೋಷ ಇತ್ತ್ಂಡ ಆ ದೋಷ ಇಂಚಿತ್ತಿನವು ಅಂದ್‌ದ್ ಸಾಕ್ಷಿ ಪನ್ಲ. ಯಾನ್ ಪಾತೆರುನವು ಸರಿಯಾದ್ ಇತ್ತ್ಂಡ ಎಂಕ್ ದಾಯೆ ಹಾಕುವಾ?” ಅಂದ್‌ದ್ ಕೇಂಡೆ.
24ಅಪಗ ಅನ್ನೆ ಆಯನ್ ಕಟ್ಟ್‌ದ್ ಪ್ರಧಾನಯಾಜಕೆ ಆಯಿ ಕಾಯಫ ಕೈತಲ್ ಕಡಪುಡ್ದು ಕೊರಿಯೆ.
ಪೇತ್ರೆ ಯೇಸುನು ಕುಡ ಅರೆಂಜುನವು
(ಮತ್ತಾಯೆ 26:71-75; ಮಾರ್ಕೆ 14:69-72; ಲೂಕೆ 22:58-62)
25ಇಂಚಿಡ್ದ್ ಸೀಮೋನೆ ಪೇತ್ರೆ ಉಂತೊಂದು ಚಳಿ ಕೈತೊಂದಿತ್ತೆ. ಅಪಗ ಅಲ್ಪ ಇತ್ತಿನಾಕುಲು ಆಯಡ, “ಈ ಯೇಸುನ ಶಿಷ್ಯೆರೆಡ್ ಒರಿ ಅತ್ತಾ?” ಅಂದ್‌ದ್ ಕೇನ್ನಗ, ಆಯೆ “ಯಾನ್ ಅತ್ತ್.” ಅಂದ್‌ದ್ ಆರೆಂಜಿಯೆ.
26ಪ್ರಧಾನಯಾಜಕನ ಬೇಲೆದಾಕುಲೆಡ್, ಪೇತ್ರೆ ಕೆಬಿ ಕತೆರ್ದ್ ಪಾಡ್ದಿನಾಯನ ಸಮ್ಮಂಧದಾಯೆ ಆದಿತ್ತಿ ಒರಿ, “ಯಾನ್ ನಿನನ್ ತೋಟೊಡು ಆಯಡೊಪ್ಪ ಇತ್ತಿನೆನ್ ತೂತೆ ಅತ್ತಾ?” ಪಂಡೆ.
27ಐಕ್ ಪೇತ್ರೆ ಕುಡ, “ಯಾನ್ ಅತ್ತ್,” ಪಂಡೆ. ಅಪಗನೆ ಕೋರಿ ಕಿಲೆತ್ತ್ಂಡ್.
ಪಿಲಾತನ ಎದುರುಡು ಯೇಸು
(ಮತ್ತಾಯೆ 27:1,2; 27:11-14; ಮಾರ್ಕೆ 15:1-5; ಲೂಕೆ 23:1-5)
28ಐಡ್ದ್ ಬೊಕ್ಕ ಅಕುಲು ಯೇಸುನು ಕಾಯಫ ಕೈತಲ್‌ಡ್ದ್ ಅರಮನೆಕ್ ಲೆತ್ತೊಂದು ಪೋಯೆರ್. ಅಪಗ ಪುಲ್ಯ ಆದಿತ್ತ್ಂಡ್. ಅಕುಲು ತನ್ಕುಲೆಗ್ ಮೈಲೆ ಆದ್ ಪಸ್ಕದ ವಣಸ್ ಮಲ್ಪರೆ ಅಡ್ಡಿ ಆವು ಅಂದ್‌ದ್ ಅರಮನೆತ್ತ ಉಲಯಿ ಪೋಯಿಜೆರ್. 29ಇಂಚ ಉಪ್ಪುನಗ ಪಿಲಾತೆ ಪಿದಾಯಿ ಅಕ್ಲೆನ ಕೈತಲ್ ಬತ್ತ್‌ದ್, “ಈ ನರಮಾನಿನ ಮಿತ್ತ್ ವಾ ದೂರುನು ಕನೈದರ್?” ಅಂದ್‌ದ್ ಕೇಂಡೆ.
30ಅಕುಲು ಪಿಲಾತಗ್, “ಉಂಬೆ ಪಡಿಕೆಂತಿನಾಯೆ ಅತ್ತ್‌ಡ ಎಂಕುಲು ಉಂಬ್ಯನ್ ನಿಕ್ಕ್ ಒಪ್ಪಿಸದ್ವಯ,” ಅಂದ್‌ದ್ ಉತ್ತರ ಕೊರಿಯೆರ್. 31ಅಪಗ ಪಿಲಾತೆ ಅಕ್ಲೆಗ್, “ನಿಕುಲೇ ಆಯನ್ ಲೆತ್ತೊಂದು ಪೋದು ನಿಕ್ಲೆನ ನ್ಯಾಯಕಟ್ಟ್‌ದ ಪ್ರಕಾರ ಆಯಗ್ ತೀರ್ಪು ಮಲ್ಪುಲೆ,” ಪಂಡೆ. ಐಕ್ ಯೆಹೂದ್ಯೆರ್, “ಮರಣದ ಶಿಕ್ಷೆನ್ ಕೊರ್ಪಿ ಅಧಿಕಾರ ಎಂಕ್ಲೆಗ್ ಇಜ್ಜಿ” ಪಂಡೆರ್. 32ನೆಡ್ದ್ ಯೇಸು ತಾನ್ ಎಂಚಿತ್ತಿ ಮರಣೊನು ಸೈಯೆರೆ ಉಲ್ಲೆ ಪನ್ಪಿ ಪಾತೆರೊಲು ನಡತ್ಂಡ್.
33ಅಪಗ ಪಿಲಾತೆ ಕುಡ ಅರಮನೆತ್ತ ಉಲಯಿ ಪೋದು ಯೇಸುನು ಲೆತ್ತ್‌ದ್ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಅಂದ್‌ದ್ ಕೇಂಡೆ.
34ಐಕ್ ಯೇಸು, “ನಿನ್ನಾತೆಗೇ, ಈ ಉಂದೆನ್ ಪನೊಂದುಲ್ಲತ್ತಾ? ಬೊಕ್ಕೊರಿ ಎನ ಸಂಗತಿಡ್ ನಿಕ್ಕ್ ದಾಲಾ ಪನ್ತೆರಾ,” ಅಂದ್‌ದ್ ಕೇಂಡೆ.
35ಐಕ್ ಪಿಲಾತೆ, “ಯಾನ್ ದಾನೆ ಯೆಹೂದ್ಯೆನಾ? ನಿನ ಸ್ವಂತ ಜನೊಕುಲುಲಾ ಪ್ರಧಾನಯಾಜಕೆರ್‌ಲುಲಾ ನಿನನ್ ಎಂಕ್ ಒಪ್ಪಿಸಾದೆರ್. ಈ ದಾದ ಮಲ್ತ್‌ದ?” ಅಂದ್‌ದ್ ಕೇಂಡಿನೆಕ್ಕ್ 36ಯೇಸು, “ಎನ ರಾಜ್ಯ ಈ ಲೋಕದವು ಅತ್ತ್, ಎನ ರಾಜ್ಯ ಈ ಲೋಕದವು ಆದಿತ್ತ್ಂಡ ಯಾನ್ ಯೆಹೂದ್ಯೆರೆ ಕೈಕ್ ತಿಕ್ಕ್‌ದ್ ಬೂರಂದಿಲೆಕ್ಕ ಎನ ಸೇವಕೆರ್ ಲಡಯಿ ಮಲ್ತ್‌ದ್ವೆರ್. ಆಂಡ ಎನ ರಾಜ್ಯ ಮುಲ್ತವು ಅತ್ತ್,” ಅಂದ್‌ದ್ ಉತ್ತರ ಕೊರಿಯೆ.
37ಐಕ್ ಪಿಲಾತೆ, “ಅಂಚಾಂಡ ಈ ಅರಸು ಅಂದತ್ತಾ?” ಅಂದ್‌ದ್ ಪಂಡೆ. ಅಪಗ ಯೇಸು ಆಯಡ, “ಎನನ್ ಅರಸು ಅಂದ್‌ದ್ ಈಯೆ ಪಂಡ. ಯಾನ್ ಸತ್ಯದ ಸಂಗತಿಡ್ ಸಾಕ್ಷಿ ಕೊರಿಯೆರೆ ಪುಟ್ಟುದಿನಾಯೆ, ಐಕಾದೇ ಈ ಲೋಕೊಗು ಬೈದೆ. ಸತ್ಯೊಗು ಸೇರ್ದಿನಾಕುಲು ಮಾತೆರ್ ಎನ ಪಾತೆರೊಗು ಕೆಬಿ ಕೊರ್ಪೆರ್,” ಅಂದ್‌ದ್ ಉತ್ತರ ಕೊರಿಯೆ.
38ಐಕ್ ಪಿಲಾತೆ, “ಸತ್ಯ ಪಂಡ ದಾದ?” ಅಂದ್‌ದ್ ಕೇಂಡೆ.
ಯೇಸುಗು ಮರಣ ದಂಡನೆ ಕೊರ್ಪಿನವು
(ಮತ್ತಾಯೆ 27:15-31; ಮಾರ್ಕೆ 15:6-20; ಲೂಕೆ 23:13-25)
ಉಂದೆನ್ ಪಂಡ್ದ್ ಪಿಲಾತೆ ಕುಡ ಯೆಹೂದ್ಯೆರೆ ಕೈತಲ್ ಬತ್ತ್‌ದ್, “ಎಂಕ್ ಆಯಡ ವಾ ಅಪರಾಧಲಾ ತೋಜಿದ್ ಬರ್ಪುಜಿ. 39ಆಂಡ ಪಸ್ಕ ಪರ್ಬೊಡು ಯಾನ್ ಒರಿಯನ್ ನಿಕ್ಲೆಗ್ ಬುಡ್ದು ಕೊರ್ಪಿ ಕ್ರಮ ಉಂಡತ್ತಾ, ಯಾನ್ ಯೆಹೂದ್ಯೆರೆ ಅರಸುನು ಬುಡ್ದು ಕೊರ್ಪಿನವು ನಿಕ್ಲೆಗ್ ಇಷ್ಟನಾ?” ಅಂದ್‌ದ್ ಅಕ್ಲೆಡ ಕೇಂಡೆ.
40ಐಕ್ ಅಕುಲು, “ಯೇಸುನು ಬೊಡ್ಚಿ, ಬರಬ್ಬನ್ ಬುಡ್ದು ಕೊರೊಡು!” ಅಂದ್‌ದ್ ಕುಡೊರ ಅರಬಾಯಿ ದೀದ್ ಪಂಡೆರ್. ಆ ಬರಬ್ಬೆ ಒರಿ ಕಲ್ವೆ ಆದಿತ್ತೆ.
Currently Selected:
ಯೋಹಾನೆ 18: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
